Ebreu 8:1-13
8 Ida-neʼe mak pontu importante husi buat neʼebé ita koʼalia daudaun: Ita iha amlulik boot hanesan neʼe,+ no nia tuur ona iha liman sorin loos husi Maromak neʼebé Boot Liu nia kadunan iha lalehan,+
2 no nia serbí nuʼudar atan* iha fatin santu+ no iha tenda neʼebé loos, neʼebé Jeová* rasik mak harii, laʼós ema.
3 Tanba amlulik boot hotu simu knaar atu hasaʼe prezente no sakrifísiu, tan neʼe amlulik boot neʼe mós presiza atu hasaʼe sakrifísiu ida.+
4 Se nia iha rai, nia labele sai nuʼudar amlulik ida,+ tanba iha ona mane sira neʼebé hasaʼe prezente sira tuir Ukun-Fuan.
5 Maibé mane sira-neʼe halo serbisu sagradu nuʼudar ezemplu no lalatak+ husi buat neʼebé lalehan nian.+ Neʼe hanesan bainhira Moisés atu harii tenda santu, Maromak fó mandamentu ba nia, hodi dehan: “Ó tenke halo buat hotu tuir modelu* neʼebé haʼu hatudu ba ó iha foho neʼe.”+
6 Maibé agora Jesus simu ona knaar neʼebé kmanek liu, tanba nia mós mediadór+ ba aliansa neʼebé diʼak liu;+ aliansa neʼe halo ona tuir lei no metin ona liuhusi promesa sira neʼebé diʼak liu.+
7 Se aliansa primeiru neʼe loos no la iha sala, entaun la presiza tan aliansa segundu.+
8 Tanba nia haree ema sira-neʼe nia sala bainhira nia dehan: “‘Tempu sei toʼo mai’, Jeová* dehan, ‘bainhira haʼu sei halo aliansa foun ho umakain Izraél no umakain Judá.
9 Aliansa neʼe sei la hanesan ho aliansa neʼebé uluk haʼu halo ho sira-nia beiʼala sira iha tempu neʼebé haʼu kaer sira-nia liman no lori sira sai husi rai-Ejitu,+ tanba sira la laran-metin tan ba haʼu-nia aliansa, entaun haʼu para ona atu tau matan ba sira’, Jeová* mak dehan.”
10 “‘Neʼe mak aliansa neʼebé haʼu sei halo ho umakain Izraél liutiha tempu neʼebá’, Jeová* mak dehan. ‘Haʼu sei tau haʼu-nia ukun-fuan iha sira-nia neon, no haʼu sei hakerek ukun-fuan neʼe iha sira-nia fuan.+ Haʼu sei sai sira-nia Maromak, no sira sei sai haʼu-nia povu.+
11 “‘No sira sei la hanorin tan sira-nia maluk no sira-nia maun-alin, hodi dehan: “Imi tenke hatene Jeová!”* Tanba sira hotu sei hatene haʼu, husi povu kiʼik toʼo ema-boot.
12 Tanba haʼu sei hatudu laran-sadiʼa ba sira-nia hahalok neʼebé la loos, no haʼu sei la hanoin-hetan tan sira-nia sala.’”+
13 Nia dehan “aliansa foun”, neʼe katak nia halo aliansa uluk nian la vale ona.+ Agora buat neʼebé la vale no tuan ona besik atu lakon mohu.+
