Ezequiel 40:1-49
40 Iha tinan 25 husi tempu neʼebé ami sai dadur,*+ bainhira tinan neʼe komesa, iha loron sanulu husi fulan-primeiru, neʼe katak liutiha tinan 14 husi tempu neʼebé Jeruzalein monu,+ iha loron neʼe duni mak Jeová fó forsa mai haʼu,* no lori haʼu ba Jeruzalein.+
2 Liuhusi vizaun ida husi Maromak, nia lori haʼu ba rai-Izraél no tau haʼu iha foho leten neʼebé aas tebes.+ Iha foho neʼe nia parte súl haʼu haree buat ida neʼebé hanesan sidade ida.
3 Bainhira nia lori haʼu toʼo neʼebá, haʼu haree mane ida neʼebé isin nabilan hanesan riti.+ Nia kaer hela tali neʼebé halo husi duʼut-liñu* no mós ai-loos* sukat nian,+ no nia hamriik iha portaun.
4 Mane neʼe dehan ba haʼu: “Oan-mane husi ema, hateke no rona ho didiʼak, no tau atensaun* ba buat hotu neʼebé haʼu hatudu ba ó, tanba razaun neʼe mak Maromak lori ó mai iha neʼe. Fó sai ba umakain Izraél kona-ba buat hotu neʼebé ó haree.”+
5 Haʼu haree moru ida haleʼu templu* nia liʼur. Mane neʼe kaer hela ai-loos sukat nian neʼebé naruk kóvado neen (kóvado ida-idak aumenta tan liman-fuan haat nia luan).* No nia komesa sukat moru, no moru neʼe nia mahar mak ai-loos sukat ida no aas ai-loos sukat ida.
6 Tuirmai nia laʼo ba portaun* neʼebé hateke ba parte leste+ no nia saʼe portaun neʼe nia eskada. Bainhira nia sukat área atu tama iha portaun, neʼe luan ai-loos sukat ida, no iha mós sala ida seluk neʼebé luan ai-loos sukat ida.
7 Guarda nia kuartu ida-idak nia naruk ai-loos sukat ida no luan ai-loos sukat ida, no guarda nia kuartu sira dook malu kóvado lima.+ Área atu tama iha portaun, besik portaun nia varanda neʼebé hateke ba templu, luan ai-loos sukat ida.
8 Nia sukat portaun nia varanda neʼebé hateke ba templu, no neʼe ai-loos sukat ida.
9 Tuirmai nia sukat portaun nia varanda, no neʼe kóvado ualu. No nia sukat varanda nia riin sira iha sorin-sorin, neʼe kóvado rua. Varanda neʼe hateke ba templu.
10 Iha portaun parte leste nian, iha guarda nia kuartu tolu iha sorin ida no kuartu tolu iha sorin seluk. Kuartu tolu neʼe boot hanesan deʼit, no riin sira iha sorin-sorin mós boot hanesan deʼit.
11 Tuirmai nia sukat fatin atu tama portaun, no neʼe luan kóvado 10, no portaun neʼe nia naruk mak kóvado 13.
12 Área iha guarda nia kuartu ida-idak nia oin iha didin badak, no área neʼe luan kóvado ida. Guarda nia kuartu ida-idak neʼebé iha sorin-sorin mak kóvado neen.
13 Tuirmai nia sukat portaun husi kakuluk iha guarda nia kuartu ida* toʼo kuartu seluk nia kakuluk, no ninia luan mak kóvado 25. Odamatan ba kuartu sira-neʼe hateke malu.+
14 Tuirmai nia sukat riin sira, no riin sira-neʼe aas kóvado 60. Nia mós sukat riin sira iha portaun hotu neʼebé haleʼu pátiu.*
15 Husi fatin atu tama portaun toʼo varanda nia oin, katak varanda neʼebé hateke ba templu, neʼe kóvado 50.
16 Guarda nia kuartu sira no mós riin iha portaun laran iha sorin-sorin, iha janela sira neʼebé ninia arus boot iha laran no kiʼik iha liʼur.+ Varanda iha laran mós iha janela iha sorin-sorin, no iha dezeñu ai-palmeira+ iha riin sira neʼebé iha sorin-sorin.
17 Tuirmai nia lori haʼu ba templu nia pátiu boot, no haʼu haree iha sala han-fatin sira*+ no laʼo-fatin neʼebé nahe ona ho fatuk haleʼu pátiu neʼe. Iha sala han-fatin hamutuk 30 iha laʼo-fatin neʼe.
18 Laʼo-fatin neʼe iha portaun sira-nia sorin, no ninia naruk mak hanesan ho portaun nia naruk, neʼe mak laʼo-fatin iha kraik.
19 Tuirmai nia sukat naruk* husi pátiu boot nia portaun toʼo pátiu kiʼik nia portaun, no neʼe naruk kóvado 100. Ninia naruk iha parte leste no iha parte norte mak hanesan deʼit.
20 Pátiu boot iha portaun ida neʼebé hateke ba parte norte, no nia sukat portaun neʼe nia naruk no luan.
21 Portaun neʼe iha guarda nia kuartu tolu iha sorin-sorin. Ninia riin no varanda iha luan no naruk neʼebé hanesan ho portaun primeiru. Nia naruk mak kóvado 50 no luan kóvado 25.
22 Janela, varanda no dezeñu ai-palmeira+ iha portaun neʼe mak hanesan deʼit ho portaun parte leste nian. Ema bele toʼo portaun neʼe hodi saʼe eskada hitu, no varanda mak iha eskada nia oin.
23 Pátiu kiʼik iha portaun ida neʼebé hateke malu ho portaun parte norte nian no iha portaun ida seluk hateke malu ho portaun parte leste nian. Nia sukat husi portaun ida toʼo portaun seluk, no neʼe naruk kóvado 100.
24 Tuirmai nia lori haʼu ba parte súl, no haʼu haree portaun ida iha parte súl.+ Nia sukat portaun neʼe nia riin sira no varanda, no neʼe hanesan deʼit ho portaun sira seluk nian.
25 Iha janela iha portaun neʼe nia sorin-sorin no mós iha ninia varanda, no janela sira-neʼe hanesan deʼit ho janela sira seluk. Nia naruk mak kóvado 50 no luan kóvado 25.
26 Iha eskada hitu hodi toʼo portaun neʼe,+ no varanda mak iha eskada nia oin. No riin sira neʼebé iha sorin-sorin iha dezeñu ai-palmeira sira.
27 Pátiu kiʼik iha portaun ida neʼebé hateke ba parte súl. Nia sukat ba parte súl, husi portaun ida toʼo portaun seluk, no neʼe naruk kóvado 100.
28 Tuirmai nia lori haʼu tama ba pátiu kiʼik liuhusi portaun parte súl nian. Bainhira nia sukat portaun neʼe, ida-neʼe boot hanesan deʼit ho portaun sira seluk.
29 Guarda nia kuartu sira, riin sira no varanda iha portaun neʼe mak hanesan deʼit ho portaun sira seluk nian. Iha janela iha portaun neʼe nia sorin-sorin no mós iha ninia varanda. Nia naruk mak kóvado 50 no luan kóvado 25.+
30 Pátiu kiʼik nia portaun hotu iha varanda. Varanda ida-idak naruk kóvado 25 no luan kóvado 5.
31 Portaun nia varanda hateke ba pátiu boot, no iha dezeñu ai-palmeira iha riin sira neʼebé iha varanda nia sorin-sorin,+ no iha eskada ualu atu saʼe ba varanda neʼe.+
32 Bainhira nia lori haʼu tama ba pátiu kiʼik liuhusi portaun parte leste nian, nia sukat portaun neʼe, no neʼe boot hanesan deʼit ho portaun sira seluk.
33 Guarda nia kuartu sira, riin sira no varanda iha portaun neʼe mak hanesan deʼit ho portaun sira seluk. Iha janela iha portaun neʼe nia sorin-sorin no mós iha ninia varanda. Nia naruk mak kóvado 50 no luan kóvado 25.
34 Portaun nia varanda hateke ba pátiu boot, no iha dezeñu ai-palmeira iha riin rua neʼebé iha varanda nia sorin-sorin, no iha eskada ualu atu saʼe ba varanda neʼe.
35 Tuirmai nia lori haʼu tama ba portaun parte norte nian+ no nia sukat portaun neʼe, no neʼe boot hanesan deʼit ho portaun sira seluk.
36 Guarda nia kuartu sira, riin sira, no varanda iha portaun neʼe mak hanesan deʼit ho portaun sira seluk nian. Iha janela iha portaun neʼe nia sorin-sorin. Nia naruk mak kóvado 50 no luan kóvado 25.
37 Varanda nia riin rua hateke ba pátiu boot, no iha dezeñu ai-palmeira iha riin rua neʼe neʼebé iha sorin-sorin, no iha eskada ualu atu saʼe ba ida-neʼe.
38 Besik portaun nia riin sira iha sala han-fatin ida neʼebé iha odamatan ida. Iha sala neʼe mak ema fase sakrifísiu sunu nian neʼebé hasaʼe tomak.+
39 Iha portaun nia varanda sorin-sorin iha meza rua neʼebé uza hodi oho animál ba sakrifísiu sunu nian neʼebé hasaʼe tomak,+ sakrifísiu sala nian+ no sakrifísiu taka sala nian.+
40 Portaun parte norte nian iha meza rua iha liʼur besik fatin atu tama. No mós iha meza rua iha portaun nia varanda nia sorin seluk.
41 Iha meza haat iha portaun nia sorin-sorin, meza hotu hamutuk ualu, no meza sira-neʼe uza atu oho animál ba sakrifísiu sira.
42 Meza haat neʼebé uza atu oho animál ba sakrifísiu sunu nian neʼebé hasaʼe tomak, halo husi fatuk neʼebé fera ona. Meza sira-neʼe naruk kóvado ida ho balu, luan kóvado ida ho balu no aas kóvado ida. Meza sira-neʼe mak fatin atu rai sasán sira neʼebé uza hodi oho animál ba sakrifísiu sunu nian no sakrifísiu sira seluk.
43 Iha ai-kabelak sira iha didin iha laran halo hanesan armáriu, ninia luan liman-fuan haat nia luan,* no naʼan hotu husi sakrifísiu neʼebé ema fó nuʼudar prezente sei tau iha meza leten.
44 Iha parte liʼur husi portaun laran nian, iha sala han-fatin ba kantadór sira.+ Sala sira-neʼe iha pátiu kiʼik besik portaun parte norte nian, sala sira-neʼe hateke ba parte súl. Iha sala han-fatin ida tan besik portaun parte leste nian, sala neʼe hateke ba parte norte.
45 Nia hatete ba haʼu: “Amlulik sira neʼebé halo serbisu iha templu mak bele uza sala han-fatin neʼebé hateke ba parte súl.+
46 Amlulik sira neʼebé iha knaar atu halo serbisu iha altár mak bele uza sala han-fatin neʼebé hateke ba parte norte.+ Amlulik sira-neʼe mak Zadoc+ nia oan-mane sira. Sira mak husi umakain Levi neʼebé simu knaar atu hakbesik ba Jeová hodi serbí nia.”+
47 Tuirmai nia sukat pátiu kiʼik neʼebé kuadradu. Neʼe naruk kóvado 100 no luan kóvado 100. Altár mak iha templu nia oin.
48 Depois neʼe, nia lori haʼu ba templu nia varanda,+ no nia sukat varanda nia riin iha sorin-sorin. Riin iha sorin ida luan kóvado lima no riin ida iha sorin seluk luan kóvado lima. Portaun nia sorin ida luan kóvado tolu no ninia sorin seluk luan kóvado tolu.
49 Varanda nia naruk mak kóvado 20 no luan kóvado 11.* Ema tenke saʼe eskada hodi saʼe toʼo varanda neʼe. No varanda neʼe iha riin iha sorin-sorin.+
Nota-rodapé
^ Orj., “Jeová tau liman ba haʼu”.
^ Haree “Ezíliu” iha Glosáriu.
^ Neʼe mak ai-horis neʼebé kuda iha tempu uluk kedas. Ema uza kabas husi duʼut neʼe atu halo hena-liñu.
^ Orj., “fó ó-nia laran”.
^ Orj., “uma”. Iha kap. 40-48 liafuan neʼe tradús nuʼudar “templu” se refere ba templu ka edifísiu iha templu.
^ Portaun neʼe mak hanesan uma boot neʼebé iha kuartu balu iha laran no ninia varanda mak iha kotuk.
^ Karik neʼe refere ba guarda nia kuartu nia didin leten.
^ Ka “haʼu haree kuartu sira”.
^ Orj., “sukat luan”.
^ Ka karik “12”.
