Ezequiel 44:1-31
44 Nia lori haʼu fila ba fatin sagradu nia portaun neʼebé hateke ba parte leste,+ neʼe katak portaun atu tama ba pátiu boot, no portaun neʼe taka ona.+
2 Tuirmai Jeová dehan ba haʼu: “Portaun neʼe sei taka nafatin. Labele loke portaun neʼe, no ema ida mós sei la laʼo liu portaun neʼe, tanba Jeová, Izraél nia Maromak, tama ona liuhusi ida-neʼe.+ Entaun portaun neʼe tenke taka nafatin.
3 Maibé, xefe ida sei tuur iha portaun neʼe atu han paun iha Jeová nia oin,+ tanba nia mak xefe. Nia sei bá-mai husi portaun nia varanda.”+
4 Tuirmai nia lori haʼu liuhusi portaun parte norte nian hodi bá templu nia oin. Bainhira haʼu hateke, haʼu haree katak Jeová nia templu nakonu ho Jeová nia glória.+ Entaun haʼu hakneʼak no hakruʼuk ho oin ba rai.+
5 Tuirmai Jeová dehan ba haʼu: “Oan-mane husi ema, tau atensaun didiʼak,* hateke no rona didiʼak ba buat hotu neʼebé haʼu hatete ba ó kona-ba ukun-fuan no lei sira ba Jeová nia templu. Tau atensaun didiʼak ba fatin atu tama templu neʼe no ba fatin hotu atu sai husi fatin sagradu.+
6 Ó tenke hatete ba umakain Izraél neʼebé kontradór: ‘Jeová, Naʼi Ukun-Naʼin Boot Liu, dehan nuneʼe: “Toʼo ona, oh umakain Izraél, imi halo hahalok aat sira barak liu ona.
7 Imi lori ema estranjeiru sira neʼebé la hetan sirkunsizaun* iha sira-nia laran no isin hodi tama haʼu-nia fatin sagradu, no sira hafoʼer haʼu-nia templu. Imi hasaʼe paun, naʼan bokur no raan ba haʼu, maibé iha tempu hanesan imi kontra haʼu-nia aliansa ho imi-nia hahalok aat hotu.
8 Imi la tau matan ba haʼu-nia sasán santu sira.+ Duké halo nuneʼe, imi fó knaar ba ema seluk atu halo imi-nia knaar sira iha haʼu-nia fatin sagradu.”’
9 “‘Jeová, Naʼi Ukun-Naʼin Boot Liu, dehan nuneʼe: “Ema estranjeiru neʼebé hela iha rai-Izraél, neʼebé la hetan sirkunsizaun iha sira-nia laran no isin, labele tama haʼu-nia fatin sagradu.”’
10 “‘Maibé ema Levi sira neʼebé laʼo dook ona husi haʼu+ bainhira ema Izraél laʼo sees husi haʼu hodi laʼo tuir sira-nia estátua sira neʼebé haʼu hakribi,* sira sei lori todan ba sira-nia sala rasik.
11 No sira sei halo serbisu iha haʼu-nia fatin sagradu atu tau matan templu nia portaun sira+ no atu halo serbisu iha templu. Sira sei oho animál ba sakrifísiu sunu nian neʼebé hasaʼe tomak no ba povu nia sakrifísiu, no sira sei hamriik iha povu nia oin atu serbí povu.
12 Ema Levi sira serbí povu iha sira-nia estátua sira neʼebé haʼu hakribi* nia oin, no sira sai nuʼudar fatuk sidi nian neʼebé halo umakain Izraél monu ba sala,+ tan neʼe mak haʼu foti saʼe ona liman hodi jura atu kontra sira’, Jeová, Naʼi Ukun-Naʼin Boot Liu, dehan, ‘no sira sei lori todan ba sira-nia sala rasik.
13 Sira sei la hakbesik ba haʼu atu serbí nuʼudar amlulik no la hakbesik ba haʼu-nia sasán neʼebé santu ka sasán neʼebé santu liu hotu, no sira sei lori moe tanba hahalok aat neʼebé sira halo ona.
14 Maibé haʼu sei fó sira knaar atu tau matan ba serbisu sira iha templu, atu serbí iha templu no tau matan ba buat hotu neʼebé tenke halo iha templu neʼe.’+
15 “Jeová, Naʼi Ukun-Naʼin Boot Liu, dehan: ‘Kona-ba amlulik Levi sira, Zadoc+ nia oan-mane sira, neʼebé halaʼo sira-nia serbisu iha haʼu-nia fatin sagradu bainhira ema Izraél laʼo sees husi haʼu,+ sira sei hakbesik hodi halo serbisu ba haʼu, no sira sei hamriik iha haʼu-nia oin hodi hasaʼe sakrifísiu naʼan bokur+ no raan+ ba haʼu.
16 Sira mak sei tama haʼu-nia fatin sagradu, no sira sei hakbesik ba haʼu-nia meza hodi halo serbisu ba haʼu,+ no sira sei halo sira-nia knaar ba haʼu.+
17 “‘Bainhira sira tama ba portaun iha pátiu* kiʼik, sira tenke hatais roupa husi hena-liñu.+ Sira labele hatais roupa husi bibi-malae fulun bainhira sira serbí haʼu iha pátiu kiʼik nia portaun no iha pátiu kiʼik laran.
18 Sira tenke tau turbante* husi hena-liñu ba sira-nia ulun, no hatais kalsa badak+ husi hena-liñu. Sira labele uza roupa neʼebé halo sira kosar.
19 Antes sira sai ba pátiu boot, katak pátiu ba povu, sira tenke hasai roupa neʼebé sira uza atu serbí+ no tau roupa sira-neʼe iha sala han-fatin sira neʼebé santu.*+ Tuirmai sira tenke hatais fali roupa seluk, atu nuneʼe sira la hadaʼet buat santu ba povu* liuhusi sira-nia roupa.
20 Sira labele koi hotu sira-nia fuuk+ ka husik sira-nia fuuk naruk liu. Sira tenke tesi kabeer sira-nia fuuk.
21 Amlulik sira labele hemu tua-uvas bainhira sira tama ba pátiu kiʼik laran.+
22 Sira labele kaben ho feto-faluk ka feto neʼebé ninia laʼen soe ona,+ maibé sira bele kaben ho feto virjen husi umakain Izraél ka amlulik nia feen neʼebé faluk ona.’+
23 “‘Sira tenke hanorin haʼu-nia povu kona-ba saida mak la hanesan entre buat santu no buat baibain, no sira mós tenke hanorin povu kona-ba saida mak la hanesan entre buat neʼebé moos no buat neʼebé la moos.+
24 Sira tenke sai nuʼudar juís atu tesi-lia bainhira iha kazu ruma.+ Sira tenke tesi-lia tuir haʼu-nia desizaun sira.+ Sira tenke kumpre haʼu-nia lei no haʼu-nia ukun-fuan sira kona-ba haʼu-nia festa hotu+ no haree haʼu-nia loron Sábadu nuʼudar buat santu.
25 Sira labele besik ema nia mate-isin ruma, se lae, sira sei sai la moos. Maibé se mate-isin neʼe mak sira-nia aman, inan, oan-mane, oan-feto, maun-alin, ka sira-nia feton neʼebé seidauk kaben, sira bele hakbesik ba mate-isin neʼe no sai la moos.+
26 Se amlulik ida kumpre ona prosesu atu hamoos an, sira tenke halo nia hein ba loron hitu antes nia bele serbí fali nuʼudar amlulik.
27 Iha loron neʼebé nia tama fali ba fatin santu, katak pátiu kiʼik, atu serbí iha fatin santu, nia tenke fó ninia sakrifísiu sala nian’,+ Jeová, Naʼi Ukun-Naʼin Boot Liu, mak dehan.
28 “‘Sira-nia liman-rohan mak tuirmai neʼe: Haʼu mak sira-nia liman-rohan.+ Imi labele fó liman-rohan ba sira iha rai-Izraél, tanba haʼu mak sira-nia liman-rohan.
29 Sira mak sei han sakrifísiu trigu* nian,+ sakrifísiu sala nian no sakrifísiu taka sala nian,+ no mós buat hotu neʼebé haketak ona nuʼudar buat santu iha rai-Izraél sei sai sira-nian.+
30 Imi-nia ai-fuan primeiru neʼebé diʼak liu no kontribuisaun hotu mak sei sai amlulik sira-nian.+ No imi-nia trigu uut* husi trigu primeiru neʼebé imi koʼa ona, imi tenke fó ba amlulik sira.+ Ho ida-neʼe mak imi-nia umakain sei hetan bensaun nafatin.+
31 Amlulik sira labele han naʼan husi manu ka animál neʼebé mate mesak deʼit ka animál seluk mak lees mate.’+
Nota-rodapé
^ Orj., “fó ó-nia laran”.
^ Ka “sira-nia ídolu sira neʼebé foʼer tebes”. Liafuan Ebraiku neʼe karik mai husi liafuan “teen”. Liafuan neʼe uza atu hatudu hakribi.
^ Ka “sira-nia ídolu sira neʼebé foʼer tebes”.
^ Ka “iha kuartu santu sira”.
^ Orj., “halo santu povu”.
^ Neʼe bele refere mós ba sevada. Haree “Sakrifísiu trigu nian” iha Glosáriu.
^ Ka “trigu neʼebé la uut demais”. Karik neʼe mós refere ba sevada.
