Ezequiel 7:1-27
7 Jeová koʼalia tan mai haʼu, hodi dehan:
2 “Oh oan-mane husi ema, Jeová, Naʼi Ukun-Naʼin Boot Liu, dehan nuneʼe ba rai-Izraél: ‘Ó-nia rohan toʼo ona! Rai tomak* neʼe nia rohan toʼo mai ona.
3 Agora ó-nia rohan toʼo ona ba ó, no haʼu sei hasai haʼu-nia hirus hasoru ó, no haʼu sei tesi-lia ba ó tuir buat neʼebé ó halo no kastigu ó tanba ó-nia hahalok aat hotu.
4 Haʼu* sei la hanoin ó, no haʼu mós sei la sente laran-sadiʼa.+ Haʼu sei selu fali ó tuir buat neʼebé ó halo, no ó sei lori todan ba ó-nia hahalok aat sira.+ Nuneʼe ó sei hatene duni katak haʼu mak Jeová.’+
5 “Jeová, Naʼi Ukun-Naʼin Boot Liu, dehan nuneʼe: ‘Susar boot ida mai daudaun, susar neʼebé la hanesan baibain.+
6 Ó-nia rohan mai daudaun. Rohan neʼe sei mai duni. Ó-nia rohan sei toʼo mai derrepente* hodi kontra ó. Ó-nia rohan mai daudaun.
7 Ó neʼebé hela iha rai neʼe, ó-nia rohan* mai ona. Tempu mai daudaun, loron neʼe besik ona.+ Foho sira runguranga no la iha haklalak haksolok nian iha neʼebá.
8 “‘Lakleur tan haʼu sei fakar sai haʼu-nia laran-nakali hasoru ó,+ no haʼu sei hasai hotu haʼu-nia hirus hasoru ó.+ Haʼu sei tesi-lia ba ó tuir buat neʼebé ó halo no kastigu ó tanba ó-nia hahalok aat hotu.
9 Haʼu* sei la hanoin ó, no haʼu mós sei la sente laran-sadiʼa.+ Haʼu sei selu fali ó tuir buat neʼebé ó halo, no ó sei lori todan ba ó-nia hahalok aat sira. Nuneʼe ó sei hatene duni katak haʼu, Jeová, mak kastigu ó.+
10 “‘Loron neʼe mai daudaun! Neʼe besik ona!+ Ó-nia rohan* mai ona. Rota neʼebé haʼu uza atu kastigu ó iha neʼe ona no inimigu nia hahalok foti an* aumenta liután.
11 Violénsia sai ona ai-tonka ba hahalok aat.+ Sira no sira-nia rikusoin, sira-nia ema-lubun no sira-nia naran-boot sei lakon mohu.
12 Tempu neʼe sei mai, no loron neʼe sei toʼo mai. Husik ema neʼebé sosa labele haksolok, no ema neʼebé faʼan labele sai triste, tanba Maromak nia hirus lakan hasoru sira-nia ema-lubun hotu.*+
13 Maski karik ema neʼebé faʼan rai la mate, maibé nia labele fila fali ba rai neʼebé nia faʼan ona, tanba vizaun neʼe kontra ema hotu. La iha ema ida mak sei fila fali, no la iha ema ida mak sei moris, tanba ninia sala.*
14 “‘Sira huu ona trombeta,+ no ema hotu prontu, maibé la iha ema ida mak sai atu halo funu, tanba haʼu-nia hirus kontra ema-lubun hotu.+
15 Surik iha sidade nia liʼur,+ moras-peste* no hamlaha boot mak iha sidade nia laran. Ema neʼebé iha toʼos sei mate ho surik, no ema neʼebé iha sidade laran sei mate ho hamlaha no moras.+
16 Ema neʼebé konsege halai no la mate, sei halai ba foho sira, no sira ida-idak sei tanis tanba sira-nia sala, hanesan manu-pombu iha foho-leet.+
17 Sira hotu nia liman sei sai fraku, no sira hotu nia ain-tuur sei turuk ho bee.*+
18 Sira hatais hena karón,*+ no sira sai nakdedar.* Sira hotu sei hetan moe, no sira hotu nia ulun sei koi molik.*+
19 “‘Sira sei soe sira-nia osan-mutin iha dalan, no hakribi sira-nia osan-mean. Sira-nia osan-mutin no osan-mean sei la salva sira iha Jeová nia loron hirus nian.+ Sira sei la sai bosu, sira sei la halo nakonu sira-nia kabun, tanba buat sira-neʼe* sai ona fatuk sidi nian neʼebé lori sira ba sala.
20 Sira foti an tanba sira-nia sasán murak neʼebé furak, no ho buat sira-neʼe* mak sira halo sira-nia estátua neʼebé aat no haʼu hakribi.*+ Tan neʼe mak haʼu sei halo sasán sira-neʼe sai buat neʼebé sira hakribi.
21 Haʼu sei entrega buat sira-neʼe* ba ema estranjeiru nia liman atu foti no haʼu sei husik ema aat sira iha mundu atu hadau buat sira-neʼe, no sira sei hafoʼer buat sira-neʼe.
22 “‘Haʼu sei fila kotuk ba sira,+ no sira sei hafoʼer fatin neʼebé haʼu hafolin,* no naʼok-teen sira sei tama no hafoʼer fatin neʼe.+
23 “‘Halo korrente bá,*+ tanba rai neʼe nakonu ho ema neʼebé mate ona tanba ema tesi-lia la loos+ no sidade neʼe nakonu ho violénsia.+
24 Haʼu sei lori mai nasaun neʼebé aat loos,+ no nasaun neʼe sei hadau sira-nia uma,+ no haʼu sei hapara asuwaʼin sira-nia hahalok foti an, no sira-nia fatin sagradu sei sai foʼer.+
25 Bainhira sira-nia terus mosu mai, sira sei buka dame, maibé sei la iha dame.+
26 Susar sei mosu tuituir malu, no sira sei rona informasaun la diʼak tuituir malu, no ema sei buka vizaun husi profeta,+ maibé la iha tan ukun-fuan* husi amlulik ida no la iha tan konsellu husi katuas sira.+
27 Liurai sei sai triste,+ no xefe sei sai neon-susar tebes,* no povu iha rai neʼe nia liman sei nakdedar tanba taʼuk. Haʼu sei halo ba sira tuir sira-nia hahalok, no haʼu sei tesi-lia ba sira hanesan sira mós tesi-lia ba ema seluk. Nuneʼe sira sei hatene duni katak haʼu mak Jeová.’”+
Nota-rodapé
^ Ka “Rai nia lidun haat”.
^ Orj., “Haʼu-nia matan”.
^ Orj., “sei hadeer”.
^ Ka karik “koroa furak husi ai-funan”.
^ Orj., “Haʼu-nia matan”.
^ Ka karik “koroa furak husi ai-funan”.
^ Neʼe katak ema neʼebé sosa rai no ema neʼebé faʼan rai sei la hetan buat diʼak tanba sira hotu sei lakon mohu.
^ Ka karik “liuhusi ninia hahalok aat”.
^ Neʼe katak mii an tanba taʼuk.
^ Haree “Hena karón” iha Glosáriu.
^ Orj., “no nakdedar taka sira”.
^ Neʼe katak sira koi sira-nia fuuk atu hatudu triste.
^ Neʼe katak sira-nia osan-mutin no osan-mean.
^ Neʼe katak sira-nia sasán husi osan-mean no osan-mutin.
^ Ka “no ídolu neʼebé foʼer tebes”.
^ Neʼe katak sira-nia osan-mutin no osan-mean neʼebé uza atu halo estátua.
^ Karik neʼe refere ba Fatin Santu Liu Hotu iha Jeová nia fatin sagradu.
^ Neʼe katak halo korrente atu kesi ema dadur.
^ Ka “hanorin”.
^ Ka “laran rahun”.
