Roma 5:1-21
5 Tan neʼe, agora Maromak haree ona ita nuʼudar ema laran-loos tanba fiar,+ entaun mai ita hela nafatin iha dame* ho Maromak liuhusi ita-nia Naʼi Jesus Kristu.+
2 Liuhusi fiar ba Jesus mak ita hetan ona dalan atu simu Maromak nia laran-diʼak neʼebé boot, no ita simu daudaun ida-neʼe.+ Mai ita haksolok* tanba ita-nia esperansa katak ita sei simu glória husi Maromak.
3 Laʼós neʼe deʼit, mai ita haksolok* kuandu iha terus laran,+ tanba ita hatene katak liuhusi terus ita aprende atu tahan.+
4 Kuandu ita tahan, Maromak sei simu ita,+ no kuandu Maromak simu ita, ita iha esperansa,+
5 no esperansa neʼe sei la halo ita laran-triste,+ tanba liuhusi espíritu santu neʼebé Maromak tau ona iha ita-nia laran, nia hatudu katak nia hadomi ita.+
6 Tanba tuir loloos, bainhira ita sei fraku hela,*+ Kristu mate ba ema sala-naʼin sira iha tempu neʼebé Maromak deside tiha ona.
7 Baibain la iha ema ida mak prontu atu mate ba ema laran-loos; maibé kona-ba ema diʼak, karik sei iha ema ida neʼebé brani atu mate ba nia.
8 Maibé Maromak hatudu ninia domin ba ita iha dalan tuirmai neʼe: Kristu mate ba ita bainhira ita sei sala-naʼin hela.+
9 Entaun, tanba Maromak haree ita nuʼudar ema laran-loos liuhusi Kristu nia raan,+ ita bele fiar duni katak liuhusi nia mak ita sei hetan salvasaun husi Maromak nia hirus.+
10 Uluk bainhira ita mak Maromak nia inimigu hela, Maromak hadame malu fali ho ita liuhusi ninia Oan-Mane nia mate.+ Entaun, sá tan ho agora ita hadame malu ona ho Maromak, ita bele fiar duni katak ita sei hetan salvasaun liuhusi ninia Oan-Mane nia moris.
11 Laʼós neʼe deʼit, ita mós haksolok kona-ba Maromak liuhusi ita-nia Naʼi Jesus Kristu, tanba liuhusi nia mak ita hadame malu fali ho Maromak.+
12 Entaun, sala tama iha mundu liuhusi ema ida, no mate tanba sala.+ Nuneʼe ema hotu mate tanba ema hotu halo ona sala.+
13 Sala iha mundu ona antes Ukun-Fuan iha, maibé se ukun-fuan la iha, ita labele duun ema ida katak nia halo sala.+
14 Maski nuneʼe, mate ukun nuʼudar liurai husi Adão nia tempu toʼo Moisés nia tempu. Mate ukun mós sira neʼebé la halo sala hanesan sala neʼebé Adão halo. Adão mak ilas ba ida neʼebé atu mai.+
15 Maibé Maromak nia prezente la hanesan ho sala. Tanba liuhusi ema ida nia sala mak ema barak mate, maibé Maromak nia laran-diʼak neʼebé boot no ninia prezente neʼebé la presiza selu mai liuhusi ema ida,+ Jesus Kristu, no ida-neʼe lori buat diʼak* ba ema barak.+
16 No mós, prezente neʼebé la presiza selu no sala neʼebé ema ida halo, lori rezultadu neʼebé la hanesan.+ Tanba ema ida nia sala, Maromak haree katak ema hotu merese simu kastigu,+ maibé bainhira ema barak halo ona sala, Maromak fó prezente neʼebé la presiza selu. Tanba prezente neʼe mak Maromak haree ema nuʼudar ema laran-loos.+
17 Liuhusi ema ida nia sala mak mate ukun nuʼudar liurai.+ Tan neʼe, ita bele fiar katak Maromak nia laran-diʼak neʼebé boot no ninia prezente neʼebé la presiza selu+ atu sai ema laran-loos mak boot liu no lori rezultadu diʼak liu. Ema neʼebé simu buat sira-neʼe sei hetan moris no sei ukun nuʼudar liurai+ liuhusi ema ida, Jesus Kristu.+
18 Entaun, liuhusi sala ida deʼit mak ema oioin hetan kastigu,+ nuneʼe mós liuhusi hahalok loos ida deʼit mak Maromak haree ema oioin+ nuʼudar ema laran-loos hodi hetan moris.+
19 Tanba liuhusi ema ida deʼit neʼebé lakohi halo tuir, ema hotu sai sala-naʼin,+ nuneʼe mós liuhusi ema ida deʼit neʼebé halo tuir, Maromak sei haree ema barak nuʼudar ema laran-loos.+
20 Maromak fó Ukun-Fuan atu ema bele hatene katak sira halo sala barak.+ Maibé kuandu ema nia sala sai barak, Maromak nia laran-diʼak neʼebé boot sai barak liután.
21 Tanbasá mak Maromak halo nuneʼe? Hanesan sala no mate ukun nuʼudar liurai,+ nuneʼe mós Maromak nia laran-diʼak neʼebé boot sei ukun nuʼudar liurai ho hahalok loos, atu nuneʼe lori ema ba moris rohan-laek liuhusi ita-nia Naʼi Jesus Kristu.+
Nota-rodapé
^ Ka karik “ita iha dame duni”.
^ Ka karik “Ita haksolok duni”.
^ Ka karik “ita haksolok duni”.
^ Ka “sala-naʼin”.
^ Ka “lori buat diʼak nakonu toʼo resin”.
