Salmo 109:1-31
Ba dirijente. David nia knananuk.
109 Oh Maromak neʼebé haʼu hahiʼi,+ keta nonook deʼit ba nafatin.
2 Tanba ema aat no bosok-teen sira loke ibun hodi kontra haʼu.
Sira koʼalia bosok kona-ba haʼu;+
3 Sira haleʼu haʼu hodi koʼalia liafuan odi nian,No sira ataka haʼu la ho razaun.+
4 Sira selu fali haʼu-nia domin ho hahalok kontra;+Maibé haʼu kontinua halo orasaun.
5 Sira selu fali haʼu-nia diʼak ho buat aat+No selu fali haʼu-nia domin ho odi.+
6 Favór ida, hili ema aat atu tesi-lia ba nia;No hili ema kontradór* atu hamriik iha ninia liman-loos.
7 Bainhira nia hetan tesi-lia, nia sei hatán ba ninia sala;*Husik ninia orasaun sai hanesan sala ida.+
8 Keta husik nia moris naruk;+Husik ema seluk kaer fali ninia knaar nuʼudar ulun-naʼin.+
9 Husik ninia oan* sira lakon sira-nia aman,No ninia feen sai feto-faluk.
10 Husik ninia oan* sira sai ema neʼebé laʼo-lemo hodi husu ezmola,No buka hahán husi sira-nia uma neʼebé rahun ona.
11 Husik ema neʼebé fó debe ba nia hadau tiha* buat hotu neʼebé nia iha,No husik ema sira neʼebé nia la koñese hadau tiha ninia sasán.
12 Keta husik ema ida hatudu laran-diʼak* ba nia,Ka hatudu laran-sadiʼa ba ninia oan sira neʼebé lakon sira-nia aman.
13 Husik ninia bei-oan sira lakon mohu;+Husik jerasaun tuirmai haluha tiha sira-nia naran.
14 Haʼu harohan katak Jeová hanoin-hetan nafatin ninia beiʼala nia sala,+No labele hamoos tiha ninia inan nia sala.
15 Haʼu harohan katak Jeová sempre hanoin buat neʼebé sira halo ona;No haʼu hein katak nia sei halakon sira husi rai no ema ida mós sei la hanoin-hetan tan sira.+
16 Tanba mane neʼe la hanoin atu hatudu laran-diʼak,*+Maibé nia kontinua buka tuir sira neʼebé ema hanehan,+ buka tuir ema kiak no sira neʼebé laran-kanekAtu nia bele oho sira.+
17 Nia gosta atu fó sai malisan, entaun neʼe kona fali nia;Nia lakohi fó bensaun, entaun nia la simu bensaun ida.
18 Malisan sira taka ona nia hanesan ninia roupa.
No malisan sira tama ninia isin hanesan bee,Tama ninia ruin laran hanesan mina.
19 Husik ninia malisan sira sai hanesan hena neʼebé falun nia an+No hanesan sintu neʼebé nia sempre kesi iha ninia knotak.
20 Neʼe mak kolen neʼebé Jeová sei fó ba ema neʼebé kontra haʼu+No ba sira neʼebé koʼalia buat aat hasoru haʼu.
21 Maibé Ita, oh Jeová, Naʼi Ukun-Naʼin Boot Liu,Ajuda haʼu bá tanba Ita-nia naran.+
Salva haʼu, tanba Ita-nia domin neʼebé laran-metin mak diʼak.+
22 Tanba haʼu kbiit-laek no kiak,+No haʼu-nia laran kanek ona.+
23 Haʼu lakon daudaun hanesan lalatak;Haʼu sai hanesan gafañotu neʼebé anin lori lakon tiha.
24 Haʼu-nia ain-tuur la iha forsa tanba halo jejún;Haʼu-nia isin krekas, no haʼu sai fraku daudaun.*
25 Haʼu sai ona buat neʼebé sira goza.+
Bainhira sira haree haʼu, sira doko sira-nia ulun.+
26 Ajuda haʼu, oh Jeová, haʼu-nia Maromak;Salva haʼu ho Ita-nia domin neʼebé laran-metin.
27 Oh Jeová, halo sira hatene katak salvasaun neʼe mak husi Ita-nia liman;No Ita mak halo ona ida-neʼe.
28 Husik sira fó sai malisan, maibé Ita sei haraik bensaun ba haʼu.
Bainhira sira hamriik hodi kontra haʼu, halo sira hetan moe bá,Maibé husik Ita-nia atan neʼe haksolok.
29 Haʼu hein katak sira neʼebé kontra haʼu sei taka sira-nia an ho moe boot;Haʼu hein katak sira sei falun an ho moe hanesan ho hena ida.*+
30 Maibé haʼu-nia ibun sei hahiʼi Jeová ho laran tomak;Haʼu sei hahiʼi nia iha ema barak nia oin.+
31 Tanba Maromak sei hamriik iha ema kiak nia liman-loosAtu salva nia husi ema sira neʼebé duun nia.
Nota-rodapé
^ Ka “ema neʼebé duun”.
^ Ka “juís sei fó sai katak nia ema aat”.
^ Orj., “oan-mane”.
^ Orj., “oan-mane”.
^ Ka “tau lasu ba”.
^ Ka “domin neʼebé laran-metin”.
^ Ka “domin neʼebé laran-metin”.
^ Orj., “la iha bokur (mina)”.
^ Ka “roupa neʼebé la iha liman”.
