Salmo 41:1-13
Ba dirijente. David nia knananuk.
41 Ksolok ba ema neʼebé hanoin ema kiʼik sira;+Jeová sei salva nia iha tempu susar.
2 Jeová sei proteje nia hodi nia bele kontinua moris.
Ema sei fó sai katak nia mak ema neʼebé kontente iha rai;+Ita-Boot sei nunka entrega nia ba ninia inimigu sira-nia liman.*+
3 Jeová sei tau matan ba nia durante nia moras;+Ita-Boot sei troka hotu ninia toba-fatin durante nia moras.
4 Tanba haʼu dehan: “Oh Jeová, hatudu laran-sadiʼa mai haʼu.+
Kura haʼu,+ tanba haʼu halo ona sala hasoru Ita.”+
5 Maibé haʼu-nia inimigu sira koʼalia aat kona-ba haʼu, hodi dehan:
“Bainhira mak nia sei mate no ninia naran lakon tiha?”
6 Se haʼu-nia inimigu sira-neʼe ida mai atu haree haʼu, nia hakarak bosok haʼu.
Nia halibur liafuan aat sira atu fó sai;Tuirmai nia sai no habelar ida-neʼe.
7 Ema hotu neʼebé odi haʼu bisubisu ba malu;Sira halo planu aat ba haʼu, hodi dehan:
8 “Buat neʼebé aat tebes kaer toman ona nia;Agora nia monu tun ona, no nia sei la hamriik fali.”+
9 No mós, haʼu-nia belun diʼak ida neʼebé haʼu tau fiar,+Ida neʼebé han haʼu-nia paun mak hamriik hodi kontra haʼu.*+
10 Maibé favór ida, oh Jeová, hatudu laran-sadiʼa mai haʼu no halo haʼu hamriik,Atu nuneʼe haʼu bele selu fali buat neʼebé sira halo.
11 Haʼu sei hatene katak Ita simu haʼu,
Bainhira haʼu-nia inimigu sira labele haklalak ho lian manán nian ba haʼu.+
12 Kona-ba haʼu, Ita apoia haʼu tanba haʼu-nia laran-metin;*+Ita sei husik haʼu hamriik nafatin iha Ita-nia oin.+
13 Fó hahiʼi ba Jeová, Izraél nia Maromak,Ba nafatin.+
Amen no Amen.
Nota-rodapé
^ Ka “hakarak”. Haree “Nefes” iha Glosáriu.
^ Orj., “foti nia ain-tuban hodi kontra haʼu”.
^ Ka “integridade”.
