Iha loron 23 Marsu, bainaka naʼin-millaun 12 ka liu mak sei asiste Memoriál kona-ba Jesus nia mate. Liuhusi diskursu neʼebé hatoʼo iha loron neʼe, sira sei aprende katak Jesus nia sakrifísiu mak prezente furak husi Jeová, neʼebé sei lori bensaun barak ba ita ema! (Isa 11:6-9; 35:5, 6; 65:21-23; Jo 3:16) Maibé, neʼe laʼós katak oradór deʼit mak sei fó sasin ba bainaka sira. Ita mós bele hola parte atu fó sasin diʼak hodi fó benvindu ba sira. (Rom 15:7) Mai ita haree sujestaun balu.

• Duké tuur deʼit hodi hein ba programa atu hahú, diʼak liu fó benvindu ba bainaka no sira neʼebé kleur ona la tuir reuniaun. Hatudu oin-midar no kumprimenta sira

• Maski Ita presiza atende ema neʼebé Ita rasik mak konvida, maibé Ita mós labele haluha ema foun sira neʼebé tuir tanba simu konvite durante kampaña. Konvida sira atu tuur hamutuk no haree hamutuk Ita-nia Bíblia no livru knananuk

• Depois reuniaun ramata, sai prontu atu hatán ba sira-nia pergunta. Se ita presiza husik kedas reuniaun-fatin tanba kongregasaun seluk mós uza fatin neʼe, diʼak atu halo planu hamutuk hodi bele hasoru malu fali iha loron balu nia laran. Se Ita seidauk hatene ninia hela-fatin ka númeru kontaktu, bele dehan: “Haʼu hakarak koʼalia tan ho Ita kona-ba reuniaun neʼe. Entaun, haʼu bele husu Ita-nia númeru kontaktu ka lae?”