Jeová halo jardín ida iha fatin naran Eden. Jardín neʼe nakonu ho ai-funan, ai-hun, no animál oioin. Tuirmai Maromak kria mane primeiru Adão husi rai-rahun no huu iis moris nian ba ninia inus. Ó hatene saida mak akontese? Mane neʼe moris! Jeová haruka Adão atu tau matan ba jardín Eden no fó naran ba animál hotu.

Jeová fó mandamentu ida neʼebé importante ba Adão: ‘Ó bele han ai-fuan husi ai-hun hotu, maibé iha ai-hun espesiál ida mak ó labele han ninia fuan. Se ó han, ó sei mate.’

Liutiha tempu balu, Jeová dehan: ‘Haʼu sei kria ajuda-naʼin ida ba Adão.’ Maromak halo Adão toba-dukur loos, depois hasai Adão nia ruin knosen ida atu kria feen ida ba Adão. Feen neʼe nia naran mak Eva. Adão no Eva sai família primeiru. Adão sente oinsá kona-ba ninia feen? Adão sente kontente tebes no  dehan: ‘Haree toʼok buat neʼebé Jeová halo husi haʼu-nia ruin! Ikusmai iha ida neʼebé hanesan haʼu.’

Jeová haruka Adão ho Eva atu iha oan barak no halo nakonu mundu. Nia hakarak sira serbisu hamutuk ho kontente atu halo mundu tomak sai paraízu, ka jardín neʼebé furak, hanesan jardín Eden. Maibé mundu la sai paraízu. Tanbasá? Ita sei aprende iha istória tuirmai.