Jeosafát mak liurai Judá neʼebé halakon altár ba Baal no estátua sira husi nasaun Judá. Nia hakarak povu atu hatene Jeová nia ukun-fuan sira. Tan neʼe nia haruka ulun-naʼin no ema Levi sira bá nasaun Judá tomak atu hanorin Jeová nia ukun-fuan ba povu.

Nasaun viziñu sira taʼuk atu ataka nasaun Judá tanba sira hatene katak Jeová hamutuk ho ninia povu. Sira mós lori prezente ba Liurai Jeosafát. Maibé ema Moab, Ammon, no ema husi área Seir hakarak ataka nasaun Judá. Jeosafát hatene katak nia presiza Jeová nia ajuda. Tan neʼe nia halibur mane, feto, no labarik hotu iha Jeruzalein. No iha sira hotu nia oin, Jeosafát halo orasaun: ‘Jeová, se la ho Ita-nia ajuda, ami sei la manán. Favór fó-hatene ami saida mak ami presiza halo.’

Jeová hatán ninia orasaun: ‘Keta taʼuk. Haʼu sei ajuda imi. Prepara imi-nia an, hamriik metin bá, no haree oinsá mak haʼu sei salva imi.’ Oinsá mak Jeová salva sira?

Dadeer-saan tuirmai, Jeosafát hili kantadór sira no haruka sira atu marxa iha tropa nia oin. Sira marxa husi Jeruzalein toʼo fatin atu halo funu iha Tekoa.

Nuʼudar kantadór sira hahiʼi Jeová ho lian boot no haksolok, Jeová halo funu hodi defende ninia povu. Nia halo ema Amon no ema Moab sai konfuzaun no ataka malu, no sira hotu mate. Maibé Jeová proteje ema Judá, tropa, no amlulik sira. Ema hotu husi nasaun viziñu rona kona-ba buat neʼebé Jeová halo ona, no sira hatene katak Jeová nafatin defende ninia povu. Oinsá mak Jeová salva ninia povu? Nia uza dalan oioin. Nia la presiza ema nia ajuda atu kumpre ninia hakarak.