Maromak Jeová duni sai ona Diabu Satanás ho ninia anju aat sira husi lalehan. (Apokalipse 12:9) Lakleur tan, sira la bele lohi tan ema iha rai. Iha apóstolu João nia vizaun, nia dehan: “Haʼu haree anju ida tun husi lalehan hodi kaer hela xave ba rai-kuak neʼebé kleʼan no iha ninia liman nia kaer hela korrente boot ida. No nia kaer samea boot neʼe, samea uluk nian, neʼebé nuʼudar Diabu no Satanás, no nia kesi samea neʼe ba tinan 1.000. No nia soe samea neʼe ba rai-kuak neʼebé kleʼan no taka tiha no tau selos iha leten, atu nuneʼe samea neʼe labele lohi tan nasaun sira toʼo tinan 1.000 ramata.” (Apokalipse 20:1-3) Liutiha neʼe, Maromak sei halakon Satanás ho ninia anju aat sira ba nafatin.—Apokalipse 20:10.

Ema aat sira mós sei la iha tan.—Salmo (Mazmur) 37:9, 10; Lucas 13:5.

Bainhira Maromak Jeová xave tiha Satanás ho ninia anju aat  sira ba “rai-kuak”, hafoin Nia sei haraik bensaun barak ba ema. Ita aprende ona katak ema mate la hatene tan buat ida. Jesus dehan ema mate hanesan toba deʼit—toba-dukur loos toʼo la mehi buat ida. (João 11:11-14) Jesus koʼalia nuneʼe tanba nia hatene katak tempu sei toʼo mai ba ema neʼebé mate ona sei moris fali hanesan ema neʼebé toba sei hadeer fali. Nia hatete: “Oras sei toʼo mai kuandu ema hotu neʼebé iha rate laran sei . . . sai husi rate.”—João 5:28, 29; kompara ho Apóstolu 24:15.

Neʼe sei akontese duni iha rai. Maski ohin loron ita rona beibeik lia rekadu kona-ba ema mate neʼebé halo ita triste, maibé iha futuru ita sei rona deʼit liafuan haksolok kona-ba ema mate neʼebé moris fali! Ita sei sente kontente tebes atu hakoʼak fali ema neʼebé ita hadomi bainhira sira moris fali!