Ba ema hotu neʼebé hadomi Maromak Jeová no ninia Liafuan Bíblia:

Jesus hatete: “Imi sei hatene lia-loos, no lia-loos sei halo imi livre.” (João 8:32) Hanoin fali buat neʼebé Ita sente bainhira Ita foin aprende lia-loos husi Bíblia. Ita kontente tebes tanba hatene katak ita bele aprende lia-loos maski ohin loron ema hanorin lia-bosok oioin.​—2 Timóteo 3:1.

Maromak Jeová hakarak ita atu hatene lia-loos. No tanba ita hadomi ema, ita mós hakarak fó-hatene sira kona-ba lia-loos. Maibé serbí Maromak envolve buat seluk tan. Ita presiza hakaʼas an atu moris nuʼudar ema Kristaun tanba ita respeitu tebes Jeová nia prinsípiu sira. Jesus esplika dalan importante ida ba ita oinsá atu hatudu ba Maromak katak ita hadomi nia. Nia hatete: “Se imi halo tuir haʼu-nia ukun-fuan, imi sei hela nafatin iha haʼu-nia domin, hanesan haʼu mós halo tuir Aman nia ukun-fuan, no hela nafatin iha ninia domin.”​—João 15:10.

Jesus hadomi tebes ninia Aman, no nia halo buat hotu neʼebé ninia Aman haruka nia atu halo. Se ita banati-tuir Jesus iha ita-nia moris loroloron, Jeová sei hadomi ita no ita sei moris kontente. Hanesan Jesus nia liafuan neʼebé hatete: “Se imi hatene buat sira-neʼe, ksolok ba imi kuandu imi halo tuir.”​—João 13:17.

Ami hein katak livru neʼe sei ajuda imi atu moris tuir lia-loos husi Bíblia no sai Maromak nia belun. Ami harohan katak imi-nia domin ba Maromak sei kontinua sai buras liután no imi sei hela “iha Maromak nia domin . . . atu hetan moris rohan-laek”.​—Judas 21.