SAUL koko dala ida tan atu kaer David. Nia lori ninia soldadu diʼak liu hotu naʼin-3.000 atu buka David. Kuandu David hatene kona-ba ida-neʼe, nia haruka espiaun sira atu buka-hatene Saul no ninia ema iha neʼebé. Depois, David husu ninia ema naʼin-rua: ‘Sé mak hakarak bá hamutuk ho haʼu toʼo Saul nia fatin?’

Abisai hatán: ‘Haʼu sei bá.’ Abisai mak David nia biin Zeruia nia oan. Kuandu Saul no ninia ema toba hela, David no Abisai tama nonook toʼo Saul nia fatin. Sira foti Saul nia diman no buli husi Saul nia toba-fatin ulun. La iha ema neʼebé haree ka rona sira, tanba ema hotu toba-dukur.

Haree David no Abisai agora. Sira halai tiha ba foho leten. David hakilar hodi dehan ba Izraél nia xefe-tropa: ‘Abner, tansá ó la tau matan ba ó-nia naʼi, ó-nia liurai? Haree! Ninia diman no buli iha neʼebé?’

Saul hadeer. Nia koñese David nia lian, no husu: ‘Ó mak David ka lae?’ Bele haree Saul no Abner iha kraik neʼe?

David hatán ba Saul: ‘Sin, haʼu mak neʼe, haʼu-nia liurai.’ No David husu: ‘Tanbasá naʼi hakarak kaer haʼu? Haʼu halo aat saida? Ida-neʼe mak Ita-Boot nia diman, liurai neʼebé haʼu respeitu. Haruka Ita-Boot nia ema ida mai foti.’

Saul hatán: ‘Haʼu halo sala. Haʼu hanesan beik-teen.’ Nuneʼe, sira fahe malu, David bá fatin ida, no Saul fila ba uma. Maibé, David hanoin: ‘Loron ida Saul sei oho haʼu. Haʼu tenke halai ba ema Filístia nia rai.’ No nia halo nuneʼe. David lohi ema Filístia hodi sira hanoin katak nia hamutuk ho sira.

Ikusmai, ema Filístia bá funu hasoru ema Izraél. Iha funu neʼe, Saul no Jónatas mate. David triste tebes, nia hakerek knanuk furak ida, no kanta: ‘Haʼu sente triste tebes ba ó, haʼu-nia maun Jónatas. Ó mak belun neʼebé haʼu gosta tebetebes!’

Tuirmai, David bá fali Izraél toʼo sidade Hebron. Ema neʼebé hili Saul nia oan-mane Isboset atu sai liurai, funu hasoru ema neʼebé hili David nuʼudar liurai. Maibé ikusliu, David nia ema manán. David tinan 30 kuandu nia sai liurai. Nia ukun iha Hebron ba tinan hitu ho balun. Iha neʼebá mak ninia oan-mane balu moris hanesan Amnon, Absalão no Adonias.

Loron ida David no ninia ema manán sidade furak ida naran Jeruzalein. David nia biin Zeruia nia oan ida seluk naran Joab mak lori soldadu iha funu neʼe. Tan neʼe, David foti Joab atu sai tropa nia xefe. Tuirmai, David ukun iha sidade Jeruzalein.