SAIDA mak akontese daudauk iha neʼe? Ema halo festa boot. Liurai Babilónia konvida ema-boot rihun ida. Sira uza kopu osan-mean no osan-mutin no mós manko neʼebé hadau tiha husi Jeová nia templu iha Jeruzalein. Maibé, derrepente, ema nia liman mosu iha anin no hahú hakerek iha didin. Ema hotu taʼuk tebes.

Agora, Belsazar, Nabucodonosor nia bei-oan mak liurai. Nia hakilar hodi bolu ema matenek sira mai. Liurai hatete: ‘Se iha ema ruma neʼebé hatene lee letra sira-neʼe no esplika mai haʼu neʼe katak sá, nia mak sei simu prezente barak no mós sei tuur iha fatin terseiru nuʼudar ukun-naʼin iha reinu.’ Maibé, la iha ema matenek ida neʼebé bele lee no esplika letra iha didin neʼe.

Liurai nia inan rona barullu no tama ba sala boot neʼe. Nia hatete ba liurai: ‘Lalika taʼuk hanesan neʼe. Iha Ita-Boot nia reinu, iha mane ida neʼebé koñese maromak santu sira. Uluk Ita-Boot nia avó Nabucodonosor mak liurai, nia foti ema neʼe nuʼudar ema matenek sira hotu nia xefe. Nia naran Daniel. Haruka nia mai, no nia sei fó-hatene letra neʼe hotu katak sá.’

Lakleur deʼit, ema lori Daniel mai. Daniel hatete katak nia lakohi simu prezente ida, no depois neʼe, hahú koʼalia tansá Jeová uluk hasai tiha Belsazar nia avó Nabucodonosor nuʼudar liurai. Daniel hatete: ‘Nia foti-an tebes, no Jeová fó kastigu ba nia.’

Daniel hatutan ba Belsazar: ‘Ita-Boot hatene buat hotu neʼebé akontese ba nia, maibé nafatin foti-an hanesan deʼit ho Nabucodonosor. Ita-Boot lori kopu no manko neʼebé hadau husi Jeová nia templu no uza sira-neʼe atu hemu. Ita-Boot hahiʼi maromak husi fatuk no ai, no lakohi hanaʼi ita-nia Kriadór Boot. Tan neʼe mak Maromak haruka liman neʼe atu hakerek letra sira-neʼe.’

Daniel hatete: ‘Letra sira-neʼe mak MENE, MENE, TEKEL no PARSIN.’

‘MENE katak Maromak sura tiha ó-nia reinu nia loron, no halo ó-nia reinu ramata tiha ona. TEKEL katak tetu tiha ó iha dasin no hetan katak ladiʼak. PARSIN katak ó-nia reinu entrega tiha ona ba ema Média no Pérsia.’

Kuandu Daniel koʼalia daudauk, ema Média no Pérsia ataka Babilónia. Sira hadau sidade neʼe no oho Belsazar. Letra sira iha didin neʼe sai loos duni iha kalan neʼe kedas! Maibé saida mak akontese ba ema Izraél? Lakleur ita sei aprende kona-ba neʼe, maibé ulukliu mai ita haree saida mak akontese ba Daniel.