Maromak organiza Abraão nia bei-oan sira atu sai nasaun ida, neʼe mak nasaun “Izraél”. Nia fó ukun-fuan ba nasaun neʼe no fó knaar espesiál ba sira atu proteje ninia Liafuan no halaʼo adorasaun neʼebé loos. (Salmo 147:19, 20) Hodi nuneʼe, ema husi nasaun seluk hotu bele hetan bensaun liuhusi nasaun Izraél.​—Lee Génesis 22:18.

Maromak hili ema Izraél atu sai ninia testemuña. Ema Izraél nia istória hatudu katak ema bele hetan duni benefísiu kuandu halo tuir Maromak nia ukun-fuan. (Deuteronómio 4:6) Liuhusi ema Izraél, ema seluk bele hakbesik ba Maromak neʼebé loos.​—Lee Isaias 43:10, 12.

Ikusmai, nasaun Izraél la halo tuir tan Maromak Jeová, no nia troka nasaun neʼe ho kongregasaun Kristaun. (Mateus 21:43; 23:37, 38) Ohin loron, ema Kristaun neʼebé loos mak serbí nuʼudar Jeová nia testemuña.​—Lee Apóstolu 15:14, 17.

Jesus organiza ninia dixípulu sira atu haklaken no hanorin ema husi nasaun hotu. (Mateus 10:7, 11; 24:14; 28:19, 20) Tanba mundu aat neʼe besik ona atu remata, serbisu haklaken neʼe mós besik atu remata. Agora daudauk, Jeová halibur ema rihun ba rihun husi nasaun hotu atu adora nia iha dalan neʼebé loos. (Apokalipse 7:9, 10) Maromak organiza ema Kristaun loos nuʼudar grupu ida atu ajuda malu no fó laran-manas ba malu. Iha mundu tomak, sira simu informasaun neʼebé hanesan husi Bíblia iha sira-nia reuniaun sira.​—Lee Ebreu 10:24, 25.

Maizumenus iha tinan 1870, grupu kiʼik ida husi estudante Bíblia komesa atu buka-hetan lia-loos neʼebé subar hela iha Bíblia laran. Sira hatene katak Jesus organiza kongregasaun Kristaun iha tempu uluk atu haklaken, tan neʼe sira komesa haklaken Maromak nia Ukun iha mundu tomak. Iha tinan 1931, sira hanaran sira-nia an nuʼudar Testemuña ba Jeová.​—Lee Apóstolu 1:8; 2:1, 4, 11; 5:42.

Iha apóstolu sira-nia tempu, kongregasaun Kristaun sira hetan matadalan husi grupu administradór neʼebé halo tuir Jesus nuʼudar kongregasaun nia Ulun. (Apóstolu 16:4, 5) Nuneʼe mós ho ohin loron, Testemuña ba Jeová iha mundu tomak hetan matadalan husi Grupu Administradór. Membru ba grupu neʼe mak katuas sira neʼebé iha esperiénsia barak. Grupu neʼe tau matan ba Testemuña ba Jeová nia sukursál sira neʼebé tradús no fahe informasaun kona-ba Bíblia iha língua 850 liu. Hodi halo nuneʼe, Grupu Administradór bele dirije kongregasaun hamutuk 120.000 liu iha mundu tomak no fó laran-manas ba sira. Iha kongregasaun ida-idak, mane balu neʼebé kumpre kritériu bele serbí nuʼudar katuas ba kongregasaun, no sira tau matan ba Maromak nia bibi sira ho domin.​—Lee 1 Pedro 5:2, 3.

Testemuña ba Jeová organiza an atu haklaken liafuan diʼak no ajuda ema atu sai Jesus nia dixípulu. Sira haklaken husi uma ba uma hodi halo tuir apóstolu sira-nia ezemplu. (Apóstolu 20:20) Sira mós gosta estuda Bíblia ho ema neʼebé hakarak aprende lia-loos. Maibé Testemuña ba Jeová la hanesan organizasaun baibain, sira mak hanesan família ida neʼebé iha Aman neʼebé diʼak, no sira hanoin malu hanesan maun-alin. (2 Tesalónika 1:3) Sira sai nuʼudar família neʼebé kontente liu, tanba sira organiza an atu ajuda ema seluk no atu halo Maromak Jeová kontente.​—Lee Salmo 33:12; Apóstolu 20:35.