1, 2. Tanbasá mak ita presiza ajuda atu hakbesik ba Maromak Jeová? Saida mak Jesus Kristu halo atu ajuda ita?

 SITUASAUN tuirmai neʼe akontese ona ba Ita ka lae? Karik Ita bá atu vizita Ita-nia kolega ka família no iha dalan klaran Ita la hatene ona atu liu dalan ida neʼebé. Nuʼudar Ita kontinua laʼo iha dalan neʼe, karik Ita para no husu ema seluk kona-ba dalan neʼebé loos. Agora, hanoin toʼok se ema laran-diʼak ida ajuda Ita laʼós deʼit hodi esplika dalan ba Ita, maibé nia mós dehan ba Ita: “Mai laʼo tuir haʼu. Haʼu sei lori Ita toʼo iha neʼebá.” Ida-neʼe halo Ita sente laran-kmaan duni, loos ka lae?

² Ita bele dehan katak Jesus Kristu mós halo buat neʼebé hanesan ba ita. Se Kristu la ajuda ita, ita la bele iha relasaun diʼak ho Maromak. Sin, tanba sala hadaʼet ba ema hotu, ita ema lakon ona dalan atu habelun ho Maromak. Eskritura dehan: “[Ema] dook husi moris iha Maromak.” (Éfeso 4:17, 18) Tan neʼe, ita presiza duni ajuda atu hatene dalan neʼebé loos atu laʼo. Jesus la hatudu deʼit dalan mai ita, maibé nia ho laran-diʼak tebes halo buat ida tan neʼebé furak liu. Hanesan ita aprende ona iha Kapítulu 1, Jesus konvida ita hodi dehan: “Mai tuir haʼu.” (Marcos 10:21) Jesus mós esplika kona-ba tansá mak diʼak atu simu konvite neʼe. Jesus hatete: “Haʼu neʼe dalan, lia-loos no moris. Ema ida la liu karik husi haʼu, nia la bele hakbesik haʼu Aman.” (João 14:6) Mai ita koʼalia kona-ba razaun balu tansá Jesus deʼit mak dalan atu ita hakbesik ba Maromak. No depois neʼe, ita sei koʼalia tan kona-ba oinsá mak Jesus sai nuʼudar “dalan, lia-loos no moris”.

3. Tanbasá Jesus deʼit mak dalan atu hakbesik ba Maromak?

³ Jesus deʼit mak dalan atu hakbesik ba Maromak Jeová. Tanbasá? Tanba Jeová rasik mak hili Jesus atu sai nuʼudar dalan ba ema atu bele hakbesik Maromak. a Liután neʼe, Aman hili Jesus atu kumpre Aman nia hakarak hotu. (2 Korinto 1:20; Koloso 1:18-20) Atu komprende kona-ba Oan nia knaar espesiál sira, ita presiza hatene uluk kona-ba buat neʼebé akontese iha jardín Eden, iha neʼebé kaben-naʼin primeiru apoia Satanás atu kontra hasoru Maromak Jeová.—Génesis 2:16, 17; 3:1-6.

4. Buat neʼebé akontese iha jardín Eden hamosu lia saida? Saida mak Maromak Jeová deside atu halo hodi bele rezolve lia neʼe?

⁴ Buat neʼebé akontese iha jardín Eden hamosu lia ida neʼebé kona Maromak nia kriatura hotu. Lia neʼe mak: Jeová mak Maromak neʼebé santu, diʼak, laran-loos, no hatudu domin ba buat hotu neʼebé nia halo ka lae? Atu rezolve lia neʼe, Jeová deside atu haruka ninia oan espíritu ida husi lalehan tun mai rai. Knaar neʼebé oan neʼe sei halo mak todan tebes tanba nia presiza saran ninia moris atu halo ninia Aman nia naran santu, no oan neʼe nia sakrifísiu mós sei salva ema. Hodi laran-metin nafatin toʼo mate, oan neʼe sei loke dalan atu hadiʼa buat aat hotu neʼebé mosu tanba Satanás kontra hasoru Maromak. (Ebreu 2:14, 15; 1 João 3:8) Maibé, Maromak Jeová iha oan rihun ba rihun iha lalehan. (Daniel 7:9, 10) Entaun, oan ida neʼebé mak nia sei hili atu bele halaʼo knaar importante neʼe? Jeová hili ninia “Oan-Mane mesak”, neʼebé ikusmai ita hatene nuʼudar Jesus Kristu.—João 3:16.

5, 6. Oinsá mak Maromak Jeová hatudu katak nia tau fiar tomak ba ninia Oan? Tanbasá?

⁵ Ita hakfodak kona-ba Maromak Jeová nia desizaun neʼe  ka lae? Lae duni! Ita hatene katak Aman tau fiar tomak ba ninia Oan-Mane mesak. Tinan rihun ba rihun antes ninia Oan mai toʼo rai, Jeová fó-hatene nanis katak Oan neʼe sei laran-metin nafatin maski hasoru terus oioin. (Isaias 53:3-7, 10-12; Apóstolu 8:32-35) Mai ita hanoin toʼok kona-ba neʼe. Hanesan ema no anju sira seluk, Oan neʼe iha liberdade atu hili buat neʼebé nia hakarak atu halo. Maski nuneʼe, Maromak Jeová tau fiar tomak ba nia toʼo Maromak fó-hatene nanis katak ninia Oan sei laran-metin nafatin. Tanbasá mak Maromak Jeová bele iha fiar hanesan neʼe ba nia Oan? Tanba nia hatene didiʼak ninia Oan no hatene mós katak ninia Oan hakarak duni atu halo nia kontente. (João 8:29; 14:31) Oan hadomi ninia Aman, no Aman Jeová mós hadomi ninia Oan. (João 3:35) Sira-nia domin ba malu halo sira tau fiar ba malu no mós halo sira-nia relasaun sai metin liu no la bele haketak.—Koloso 3:14.

⁶ Ita haree ona katak Jesus simu knaar neʼebé importante tebes, ninia Aman tau fiar tomak ba nia, no mós Aman no Oan iha domin ba malu. Ida-neʼe fó razaun mai ita atu fiar katak Jesus deʼit mak dalan atu ita bele hakbesik ba Maromak. Maski nuneʼe, iha razaun ida tan kona-ba tansá Oan deʼit mak bele lori ita ba Aman.

7, 8. Tanbasá mak Jesus bele dehan katak “Oan deʼit mak hatene” kona-ba Aman?

⁷ Ita presiza kumpre kritériu balu atu bele hakbesik ba Maromak Jeová. (Salmo 15:1-5) Oan mak hatene diʼak liu kona-ba oinsá atu tuir Maromak nia lei no kona-ba oinsá Maromak bele simu ita. Jesus hatete: “Haʼu Aman tau tiha buat hotu-hotu iha haʼu liman; ema ida la hatene Oan, Aman deʼit mak hatene; nuneʼe mós ema ida la hatene Aman, Oan deʼit mak hatene, no mós ema neʼebé Oan hakarak hatudu ba nia.” (Mateus 11:27) Agora mai ita koʼalia  kona-ba tansá Jesus bele dehan katak la iha ema ida neʼebé hatene Aman ho didiʼak, só “Oan deʼit mak hatene”.

⁸ Nuʼudar ida neʼebé Maromak kria ulukliu, Oan iha relasaun espesiál ho Maromak Jeová. (Koloso 1:15) Hanoin toʼok kona-ba oinsá mak Aman no Oan nia relasaun sai metin liu durante tinan rihun ba rihun neʼebé sira naʼin-rua mesak deʼit, antes iha kriatura sira seluk. (João 1:3; Koloso 1:16, 17) Iha tempu neʼebá, Jesus iha oportunidade kapás atu hamutuk ho nia Aman, no komprende ninia Aman nia hanoin, nia hakarak, nia lei no nia dalan sira. Klaru katak la iha kriatura seluk neʼebé hatene liu kona-ba Aman, só Jesus deʼit. Tanba sira-nia relasaun neʼebé besik liu, neʼe halo Jesus hatene diʼak liu kona-ba oinsá atu fó sai ninia Aman nia hahalok sira.

9, 10. (a) Iha dalan saida deʼit mak Jesus hatudu sai lia-loos kona-ba Aman? (b) Atu Maromak Jeová simu ita, saida mak ita tenke halo?

⁹ Liuhusi Jesus nia hanorin nia hatudu katak nia hatene didiʼak kona-ba oinsá Maromak Jeová sente no hanoin no mós kona-ba saida mak Maromak hakarak atu ninia atan sira halo. b Jesus mós fó sai lia-loos kona-ba ninia Aman iha dalan importante seluk. Jesus hatete: “Ema neʼebé haree ona haʼu, haree ona mós haʼu Aman.” (João 14:9) Jesus banati-tuir ninia Aman nia hahalok iha buat hotu neʼebé nia halo no koʼalia. Tan neʼe, kuandu ita lee parte iha Bíblia laran neʼebé esplika kona-ba buat neʼebé Jesus halo, porezemplu, liafuan kapás neʼebé Jesus uza kuandu nia hanorin, laran-diʼak neʼebé book nia atu kura ema seluk, no hahalok laran-sadiʼa neʼebé book nia atu tanis kuandu haree ema nia susar, ida-neʼe ajuda ita hatene kona-ba saida mak Jeová sente iha situasaun sira-neʼe. (Mateus 7:28, 29; Marcos 1:40-42; João 11:32-36) Sin, Oan haleno ho didiʼak Aman nia dalan sira no Aman nia hakarak liuhusi ninia liafuan no hahalok. (João 5:19; 8:28; 12:49, 50) Tan neʼe,  atu Maromak Jeová simu ita, ita presiza halo tuir hanorin husi Jesus no banati-tuir ninia ezemplu.—João 14:23.

¹⁰ Tanba Jesus hatene didiʼak Maromak Jeová no banati-tuir nia ho didiʼak, ita bele komprende tansá Jeová deside atu hili Oan neʼe hodi sai nuʼudar dalan atu hakbesik ba Aman. Agora ita hatene ona tansá Jesus deʼit mak dalan atu hakbesik ba Jeová, entaun mai ita hanoin tan signifikadu husi Jesus nia liafuan neʼebé dehan: “Haʼu neʼe dalan, lia-loos no moris. Ema ida la liu karik husi haʼu, nia la bele hakbesik haʼu Aman.”—João 14:6.

11. Tanbasá liuhusi Jesus deʼit mak Maromak bele simu ita?

¹¹ Ita aprende ona katak Jesus deʼit mak dalan atu ita hakbesik ba Maromak. Maibé, oinsá ida-neʼe kona ita. Tuir loloos, la iha “dalan” seluk atu ita bele liu hodi bele iha relasaun diʼak ho Maromak. Tansá ida-neʼe loos? Hodi fiar metin toʼo mate, Jesus fó nia moris nuʼudar sakrifísiu atu salva ema. (Mateus 20:28) Se Jesus la fó nia moris nuʼudar sakrifísiu, ita la bele hakbesik ba Maromak. Tanba Maromak Jeová mak santu, tuir loloos nia la bele simu ema sala-naʼin, entaun sala mak hanesan buat neʼebé taka netik dalan atu ita hakbesik ba Maromak. (Isaias 6:3; 59:2) Maibé Jesus nia sakrifísiu loke fali dalan neʼe. Sakrifísiu neʼe taka ema nia sala. (Ebreu 10:12; 1 João 1:7) Se ita simu Maromak nia arranju neʼe neʼebé nia fó liuhusi Kristu no tau fiar ba ida-neʼe, Maromak Jeová sei simu ita. Klaru katak la iha dalan seluk ba ita atu bele “hadame malu” ho Maromak.—Roma 5:6-11.

12. Oinsá mak Jesus sai nuʼudar “dalan” ba ita?

¹² Jesus mak “dalan” atu hatoʼo ita-nia orasaun. Liuhusi Jesus deʼit mak ita bele hakbesik ba Jeová iha orasaun no fiar katak nia rona buat neʼebé ita husu ho laran. (1 João 5:13, 14) Jesus rasik dehan: “Imi husu buat naran deʼit ba Aman, nia sei haraik ba imi hodi haʼu-nia naran. . . . Husu bá; imi  sei simu, atu imi-nia ksolok sei sai loloos.” (João 16:23, 24) Tan neʼe, liuhusi Jesus nia naran, ita bele hakbesik ba Maromak Jeová iha orasaun no bele bolu Nia nuʼudar ita-nia “Aman”. (Mateus 6:9) Jesus mós sai nuʼudar “dalan” ba ita liuhusi ninia ezemplu. Hanesan temi tiha ona, Jesus banati-tuir ninia Aman ho loloos. Tan neʼe, Jesus nia ezemplu hatudu mai ita oinsá atu halaʼo ita-nia moris iha dalan neʼebé halo kontente Aman Jeová. Atu hakbesik ba Jeová, ita presiza laʼo tuir Jesus nia ain-fatin.—1 Pedro 2:21.

13, 14. (a) Oinsá mak Jesus hatudu katak nia loos iha ninia liafuan sira? (b) Saida mak Jesus halo atu sai nuʼudar “lia-loos”? Tanbasá?

¹³ Jesus sempre koʼalia buat neʼebé loos kona-ba nia Aman nia liafuan. (João 8:40, 45, 46) La iha lia-bosok ida sai husi Jesus nia ibun. (1 Pedro 2:22) Jesus nia inimigu sira mós rekoñese katak nia “ema loos” no nia “hanorin deʼit dalan Naʼi ninian”. (Marcos 12:13, 14) Maski nuneʼe, kuandu Jesus hatete katak “haʼu neʼe . . . lia-loos”, nia laʼós deʼit fó sai kona-ba oinsá nia sempre habelar lia-loos liuhusi ninia koʼalia, haklaken, no hanorin.

¹⁴ Hanoin-hetan katak tinan atus ba atus antes Jesus mai toʼo rai, Maromak Jeová leno ema neʼebé hakerek Bíblia atu fó sai nanis kona-ba Mesias ka Kristu. Liafuan sira-neʼe esplika ho klaru kona-ba ninia moris, ninia serbisu haklaken no kona-ba ninia mate. Liután neʼe, Moisés nia Ukun-Fuan iha lei sira neʼebé sai hanesan ilas kona-ba Mesias. (Ebreu 10:1) Entaun, kuandu Jesus mai toʼo rai, nia sei hatudu katak nia laran-metin toʼo mate hodi bele kumpre liafuan hotu neʼebé fó-hatene nanis kona-ba nia ka lae? Hodi laran-metin toʼo mate, Jesus bele hatudu katak Maromak sempre loos kona-ba buat neʼebé nia fó-hatene nanis. Jesus lori responsabilidade neʼebé todan tebes iha nia kabaas. Liuhusi ninia liafuan hotu no buat hotu neʼebé nia halo, Jesus hatudu katak liafuan sira neʼebé Maromak  fó-hatene nanis mak loos. (2 Korinto 1:20) Sin, Jesus mak “lia-loos” duni, tanba liafuan neʼebé Maromak Jeová fó-hatene nanis sai loos kuandu Jesus mai toʼo rai.—João 1:17; Koloso 2:16, 17.

15. Hatudu fiar ba Maromak nia Oan katak sá? Ida-neʼe sei lori bensaun saida?

¹⁵ Jesus mak “moris” tanba liuhusi nia deʼit mak ita bele simu moris, neʼe katak hetan “moris neʼebé mesak mak loloos”. (1 Timóteo 6:19) Bíblia hatete: “Ema neʼebé fiar iha Oan-Mane hetan moris rohan-laek; maibé ema neʼebé lakohi rona Oan-Mane sei la haree moris, no Maromak nia laran-nakali horik iha nia.” (João 3:36) Entaun, tau fiar ba Maromak nia Oan-Mane katak sá? Neʼe katak ita tenke fiar ho laran tomak katak liuhusi nia deʼit mak ita bele hetan moris. Liután neʼe, ita mós presiza hatudu sai ita-nia fiar liuhusi ita-nia hahalok, kontinua aprende nafatin husi Jesus, no hakaʼas an atu halo tuir ninia hanorin no nia ezemplu. (Tiago 2:26) Kuandu ema hatudu fiar ba Maromak nia Oan, ida-neʼe sei fó moris rohan-laek iha lalehan ba “bibi luhan kiʼik” husi ema kose-mina sira, no mós moris perfeitu iha mundu furak ba “ema-lubun boot” ka “bibi seluk”.—Lucas 12:32; 23:43; Apokalipse 7:9-17; João 10:16.

16, 17. (a) Oinsá mak Jesus sei sai nuʼudar “moris” ba sira neʼebé mate ona? (b) Hodi laʼo tuir Jesus, ita bele fiar saida?

¹⁶ Oinsá ho sira neʼebé mate ona? Jesus mós sai nuʼudar “moris” ba sira ka lae? Antes Jesus fó moris-hiʼas ba Lázaro, nia hatete ba Lázaro nia biin Marta, hodi dehan: “Haʼu neʼe moris-hiʼas no moris. Ema neʼebé fiar haʼu, maski mate ona, nia sei moris.” (João 11:25) Maromak Jeová fó ba ninia Oan “xave ba mate no ba matebian sira-nia fatin”, neʼe katak Maromak fó nia kbiit atu halo ema moris hiʼas husi mate. (Apokalipse 1:17, 18) Ho xave sira-neʼe, Jesus neʼebé agora ukun ona, sei loke odamatan hodi halo livre ema hotu neʼebé iha rate laran.—João 5:28, 29.

 ¹⁷ Kuandu Jesus dehan katak “haʼu neʼe dalan, lia-loos no moris”, nia hatudu sai razaun kona-ba tansá nia moris no tansá nia haklaken iha rai. Liafuan sira-neʼe kona ita-nia moris ohin loron. Hanoin-hetan katak depois Jesus koʼalia tiha liafuan sira-neʼe, nia mós kontinua tan hodi dehan: “Ema ida la liu karik husi haʼu, nia la bele hakbesik haʼu Aman.” (João 14:6) Jesus nia liafuan sira-neʼe sei importante nafatin ba ita ohin loron. Tan neʼe, ita bele fiar katak se ita laʼo tuir Jesus, ita sei nunka lakon dalan. Nia deʼit mak sei hatudu mai ita dalan ba “Aman”.

18. Sai Jesus nia dixípulu neʼebé loos katak sá?

¹⁸ Hodi hatene katak Jesus iha knaar neʼebé importante tebes no mós katak nia hatene didiʼak kona-ba Aman, ita iha duni razaun diʼak atu laʼo tuir Oan. Hanesan ita aprende ona iha Kapítulu 1, atu sai nuʼudar Jesus nia dixípulu neʼebé loos, neʼe kona ita-nia hahalok, laʼós deʼit ita-nia sentimentu no ita-nia koʼalia. Laʼo tuir Kristu dehan katak ita moris tuir ninia hanorin no ninia ezemplu. (João 13:15) Livru neʼebé ita lee daudaun neʼe bele ajuda ita atu halo ida-neʼe.

19, 20. Livru neʼe iha informasaun saida neʼebé bele ajuda ita atu tuir Kristu?

¹⁹ Iha kapítulu sira tuirmai, ita sei estuda didiʼak kona-ba Jesus nia moris no ninia serbisu haklaken. Informasaun iha livru neʼe fahe ba parte tolu. Iha parte primeiru, ita sei aprende kona-ba Jesus nia hahalok sira no dalan neʼebé nia halaʼo ninia moris. Iha parte segundu, ita sei aprende kona-ba ninia laran-manas atu haklaken no hanorin, no ida-neʼe sai nuʼudar ezemplu mai ita. Iha parte terseiru, ita sei aprende kona-ba oinsá nia hatudu ninia domin ba Maromak no ba ema. Hahú husi Kapítulu 3 iha livru neʼe iha kaixa ho títulu “Oinsá mak ita bele tuir Jesus?” Eskritura no pergunta sira iha kaixa laran  sei ajuda ita atu hanoin kleʼan kona-ba oinsá ita bele banati-tuir Jesus nia dalan atu koʼalia no mós ninia hahalok.

²⁰ Maski sala hadaʼet mai ita hotu, maibé ita agradese tebes ba Maromak Jeová tanba nia loke dalan ba ita atu iha relasaun diʼak ho nia. Ho domin, Aman Jeová haruka ninia Oan mai iha rai atu hatudu dalan ba ita hodi ita bele iha fali relasaun diʼak ho nia. Tuir loloos, Maromak lakon buat barak atu halo ida-neʼe. (1 João 4:9, 10) Tan neʼe, ami hein katak Maromak nia domin neʼe sei book ita hodi simu no halo tuir Jesus nia konvite neʼebé dehan: “Tuir haʼu mai!”—João 1:43.