1-3. Saida mak akontese kuandu inan-aman sira lori sira-nia oan ba Jesus? Informasaun neʼe hatudu saida kona-ba Jesus?

 JESUS hatene katak iha semana balu tan nia sei ramata ninia moris iha rai, maibé sei iha serbisu barak ba nia atu halo! Jesus no ninia apóstolu sira haklaken iha Peréia, iha Mota Jordaun nia parte leste. Sira haklaken tuituir dalan nuʼudar sira laʼo ba Jerusalém, fatin neʼebé Jesus sei selebra Páskua ba dala ikus.

² Lakleur depois Jesus diskute malu makaʼas ho ulun-naʼin relijiaun balu, iha buat ida neʼebé akontese. Ema lori sira-nia oan atu bá hasoru Jesus. Labarik sira-neʼe iha tinan neʼebé la hanesan. Ita hatene ida-neʼe tanba Marcos koʼalia kona-ba labarik sira-neʼe hodi uza liafuan neʼebé uluk nia uza atu koʼalia kona-ba labarik neʼebé tinan 12. Iha parte seluk Lucas uza liafuan neʼebé la hanesan, no liafuan neʼe bele tradús nuʼudar “kiʼikoan sira”. (Lucas 18:15; Marcos 5:41, 42; 10:13) Baibain kuandu iha labarik barak, sira bele halo barullu no bele halai bá-mai. Jesus nia dixípulu sira siʼak labarik sira-neʼe nia inan-aman. Karik sira halo ida-neʼe tanba sira hanoin katak Jesus la iha tempu atu koʼalia ho labarik sira. Saida mak Jesus halo?

³ Kuandu Jesus haree buat neʼebé akontese nia sai hirus. Nia sai hirus ba sé? Nia sai hirus ba labarik sira ka ba sira-nia inan-aman ka lae? Lae! Nia sai hirus ba ninia dixípulu sira! Nia hatete: “Husik labarik sira mai hakbesik haʼu; keta taka dalan ba sira. Loloos, reinu lalehan ba sira neʼebé hanesan neʼe. Tebes haʼu dehan ba imi: Ema neʼebé la simu Maromak nia reinu hanesan labarik oan ida, nia sei la tama iha neʼebá.” Tuirmai Jesus “hakoʼak labarik sira, [no] tau liman ba sira” hodi fó bensaun ba sira. (Marcos 10:13-16)  Klaru katak Jesus gosta labarik sira. No informasaun neʼe mós hatudu buat seluk tan kona-ba Jesus, neʼe mak ema gosta atu hakbesik ba nia.

4, 5. (a) Oinsá mak ita bele hatene katak ema kontente atu hakbesik ba Jesus? (b) Ita sei koʼalia kona-ba pergunta saida deʼit iha kapítulu neʼe?

⁴ Se Jesus mak ema neʼebé sériu demais, ka ladún gosta ransu ho ema seluk, ka foti-an, karik labarik sira-neʼe lakohi atu hakbesik ba nia, no karik sira-nia inan-aman mós la sente seguru atu hakbesik ba nia. Maibé, hanoin toʼok kona-ba buat neʼebé akontese iha tempu neʼebá! Klaru katak inan-aman sira oin-midar loos atu haree Jesus hatudu domin ba sira-nia oan hodi fó bensaun ba sira no fó-hatene oan sira katak Maromak hafolin sira. Sin, maski Jesus lori responsabilidade neʼebé todan, maibé nia sempre halo ema sente kontente atu hakbesik ba nia.

⁵ Sé tan mak gosta atu hakbesik ba Jesus? Tanbasá mak fasil ba ema atu hakbesik ba nia? Oinsá mak ita bele aprende atu sai hanesan Jesus? Mai ita haree kona-ba neʼe.

6-8. Dala barak Jesus ransu ho ema oinsá? Oinsá mak ninia hahalok la hanesan ho ulun-naʼin relijiaun sira?

⁶ Kuandu ita lee Evanjellu sira, ita bele haree katak ema barak la taʼuk atu hakbesik ba Jesus. Porezemplu, Bíblia sempre temi liafuan hanesan tuirmai neʼe: “Ema-lubun boot tuir nia husi Galileia.” “Ema barak tebetebes mai haleʼu nia.” “Ema barak mai buka nia.” “Ema-lubun boot laʼo hamutuk ho Jesus.” (Mateus 4:25; 13:2; 15:30; Lucas 14:25) Sin, dala barak ema-lubun boot sira gosta atu hakbesik ba Jesus.

⁷ Ema sira-neʼe barak liu mak ema baibain deʼit neʼebé ulun-naʼin relijiaun sira haree nuʼudar ema beik. Ema fariseu no amlulik sira hatún ema baibain sira-neʼe hodi hatete: “Ema-lubun boot neʼe neʼebé la hatene ukun-fuan hetan malisan bá.” (João 7:49) Tinan balu tuirmai sira hakerek livru balu neʼebé hatudu katak sira haree ema baibain nuʼudar folin-laek.  Ulun-naʼin relijiaun sira lakohi atu han ho sira, hola sasán husi sira, ka ransu ho sira. Ulun-naʼin relijiaun balu mós dehan katak ema baibain sira-neʼe sei la simu moris-hiʼas tanba la hatene ukun-fuan sira neʼebé ulun-naʼin sira inventa! Klaru katak ema kiʼik la gosta atu hakbesik ba ulun-naʼin sira-neʼe hodi husu ajuda ka matadalan. Maibé, Jesus la hanesan ho ulun-naʼin sira-neʼe.

⁸ Jesus kontente atu ransu ho ema baibain. Nia han hamutuk ho sira, kura sira, hanorin sira, no fó esperansa ba sira. Jesus hatene katak ema barak liu sei la simu ninia konvite atu serbí Maromak Jeová. (Mateus 7:13, 14) Maski nuneʼe, nia hanoin buat diʼak kona-ba ema ida-idak no nia hatene katak ema ida-idak iha kbiit atu halo buat neʼebé loos. Jesus nia hahalok neʼe la hanesan duni ho amlulik no ema fariseu sira neʼebé laran-aat! Tuir loloos, amlulik no ema fariseu sira mós hakbesik ba Jesus, no sira balu troka sira-nia moris hodi tuir nia. (Apóstolu 6:7; 15:5) Ema balu neʼebé riku no iha kbiit mós la taʼuk atu hakbesik ba Jesus.—Marcos 10:17, 22.

9. Tanbasá mak feto sira la taʼuk atu hakbesik ba Jesus?

⁹ Feto sira la taʼuk atu hakbesik ba Jesus. Iha tempu neʼebá dala barak feto sira sente moe tanba ulun-naʼin relijiaun haree sira nuʼudar folin-laek. Ulun-naʼin relijiaun la gosta atu ema hanorin feto sira. Liután neʼe, feto sira labele fó sasin iha tribunál tanba ema la fiar buat neʼebé sira hatete. Ulun-naʼin relijiaun mós halo orasaun hodi hatoʼo agradese ba Maromak tanba sira laʼós feto! Maibé, Jesus hafolin feto sira. Feto barak gosta atu hakbesik ba Jesus no prontu atu aprende husi nia. Porezemplu, kuandu Lázaro nia biin Marta hanoin barak kona-ba prepara hahán ba Jesus, Maria tuur iha Naʼi nia ain, hodi rona didiʼak ba liafuan hotu neʼebé Jesus fó sai. Jesus gaba Maria tanba hanoin uluk kona-ba buat neʼebé importante liu.—Lucas 10:39-42.

10. Oinsá mak Jesus nia dalan atu haree ema neʼebé moras la hanesan ho ulun-naʼin relijiaun sira?

¹⁰ Ema moras sira mós hakbesik ba Jesus, maski dala barak  ulun-naʼin relijiaun sira la simu sira. Ukun-Fuan Moisés nian iha lei atu haketak ema moras-lepra sira hodi la hadaʼet moras neʼe ba ema seluk, maibé ida-neʼe laʼós razaun atu la hatudu laran-diʼak ba sira. (Levítico, kapítulu 13) Maski nuneʼe, ulun-naʼin relijiaun nian halo lei neʼebé hatete katak ema neʼebé hetan moras-lepra mak hanesan buat neʼebé foʼer loos. Ulun-naʼin relijiaun balu mós tuda fatuk atu ema moras-lepra labele hakbesik sira! Klaru katak ema sira-neʼe taʼuk tebes atu hakbesik ba mestre relijiaun nian sira, maibé sira la taʼuk atu hakbesik ba Jesus. Ema moras-lepra ida koʼalia liafuan tuirmai neʼe hodi hatudu ninia fiar: “Naʼi, Ita hakarak karik, Ita bele hamoos haʼu.” (Lucas 5:12) Iha kapítulu tuirmai, ita sei koʼalia kona-ba oinsá Jesus hatán ba ema neʼe. Maibé, husi informasaun neʼe ita bele haree katak ema barak la taʼuk duni atu hakbesik ba Jesus.

11. Ezemplu saida mak hatudu katak sira neʼebé sente laran-todan tanba sala ruma la taʼuk atu hakbesik ba Jesus? Tanbasá mak ida-neʼe importante?

¹¹ Ema sira neʼebé sente laran-todan tanba sala ruma mós la taʼuk atu hakbesik ba Jesus. Porezemplu, hanoin toʼok kona-ba tempu neʼebé Jesus han iha ema fariseu ida nia uma. Feto ida neʼebé ema barak hatene nuʼudar feto-aat mai no hakneʼak iha Jesus nia ain hodi tanis kona-ba ninia sala. Feto neʼe nia matan-been habokon Jesus nia ain no nia uza ninia fuuk hodi hamaran Jesus nia ain. Maski uma-naʼin neʼe hakribi no tesi lia iha ninia laran tanba Jesus simu feto neʼe atu hakbesik nia, maibé Jesus ho laran-diʼak gaba feto neʼe tanba nia arrepende an ho laran, no Jesus mós hatete ba feto neʼe katak Maromak Jeová perdua tiha ona ninia sala. (Lucas 7:36-50) Ohin loron, ema neʼebé sente laran-todan tanba sala ruma presiza duni atu la sente taʼuk atu hakbesik ba ema sira neʼebé bele ajuda sira atu iha fali relasaun diʼak ho Maromak! Entaun, tanbasá mak fasil ba ema atu hakbesik ba Jesus?

12. Tanbasá mak ita la hakfodak katak ema la taʼuk atu hakbesik ba Jesus?

¹² Hanoin-hetan katak Jesus banati-tuir ninia Aman iha lalehan ho didiʼak. (João 14:9) Bíblia fó-hanoin ita katak Maromak Jeová “la dook husi ita ida-ida”. (Apóstolu 17:27) Jeová mak ida “neʼebé rona orasaun” husi ninia atan hotu neʼebé laran-metin ba nia, no mós husi ema seluk neʼebé hakarak duni atu buka nia no serbí nia. (Salmo 65:2) Hanoin toʼok, ita ida-idak bele hakbesik ba Ida neʼebé iha kbiit boot liu hotu iha lalehan no rai! Hanesan ninia Aman, Jesus hadomi ema. Iha kapítulu sira tuirmai, ita sei koʼalia kona-ba Jesus nia domin neʼebé kleʼan ba ema. Ema la taʼuk atu hakbesik ba Jesus tanba ema bele haree katak nia hadomi ema. Mai ita haree toʼok Jesus nia hahalok balu neʼebé hatudu sai ninia domin ba ema.

13. Oinsá mak inan-aman bele banati-tuir Jesus?

¹³ Ema neʼebé hakbesik ba Jesus hatene ho klaru katak Jesus hanoin sira ida-idak. Jesus kontinua halo ida-neʼe maski nia hasoru susar oioin. Hanesan ita haree tiha ona, Jesus kontente atu koʼalia ho labarik sira neʼebé inan-aman lori ba nia, maski nia iha serbisu barak atu halo. Neʼe mak ezemplu diʼak tebes ba inan-aman sira, loos ka lae? Iha mundu aat neʼe la fasil atu haboot oan sira. Maibé, hanesan Jesus, inan-aman presiza halo oan sira la sente taʼuk atu hakbesik ba sira. Se Ita mak inan-aman, Ita hatene katak dala ruma Ita la bele fó tempu ba Ita-nia oan tanba Ita halo hela buat ruma. Maski nuneʼe, Ita bele dehan ba Ita-nia oan katak iha tempu seluk Ita sei koʼalia ho nia. Kuandu Ita halo tuir buat neʼebé Ita promete, Ita-nia oan sei aprende katak hatudu pasiénsia lori rezultadu diʼak. Nia mós sei aprende katak Ita sempre prontu atu ajuda nia kuandu nia hasoru problema ka kuandu nia presiza buat ruma.

14-16. (a) Situasaun saida mak book Jesus atu halo ninia milagre primeiru? Tanbasá mak ida-neʼe buat neʼebé furak loos? (b) Jesus nia milagre iha Kaná hatudu saida kona-ba nia? Ida-neʼe hanorin lisaun saida ba inan-aman sira?

 ¹⁴ Jesus hatudu katak nia hanoin kona-ba susar neʼebé ema hasoru. Porezemplu, hanoin toʼok kona-ba milagre primeiru neʼebé Jesus halo. Nia tuir festa kazamentu nian iha knua ida iha sidade Galileia. Iha tempu neʼe problema ida mosu no neʼe bele hamoe festa-naʼin. Problema neʼe mak tua hotu ona. Jesus nia inan, Maria, konta ba nia oan kona-ba buat neʼebé akontese. Saida mak Jesus halo? Nia haruka ema sira neʼebé tau matan ba meza atu enxe bee iha kusi neen neʼebé boot. Depois neʼe Jesus haruka sira atu fui balu hodi lori ba ulun-naʼin festa nian atu koko, no nia hakfodak tebes ho tua neʼebé kapás. Jesus lohi sira hodi uza májiku ka lae? Lae. Tuir loloos “bee nakfila ba tua”. (João 2:1-11) Kleur ona ema barak hakaʼas an atu troka buat ida sai fali buat seluk. Ba tinan barak ona, ema balu koko atu troka besi oin ida atu sai fali osan-mean. Maski nuneʼe sira la hetan susesu. Oinsá ho bee no tua? Bee no tua mós la hanesan duni. Tanbasá mak Jesus halo milagre furak neʼe atu hadiʼa problema kiʼik neʼebé mosu iha festa kazamentu neʼe?

¹⁵ Ba noiva no noivu, neʼe laʼós problema neʼebé kiʼik. Iha Israel antigu, hatudu laran-diʼak ba bainaka neʼebé konvida ona mak buat neʼebé importante tebes. Tan neʼe, kuandu tua la iha ona iha festa neʼe, ida-neʼe bele halo noiva no noivu sente moe tebes no karik sira sei hanoin-hetan nafatin buat neʼebé akontese iha loron neʼe. Problema neʼe importante ba sira no tan neʼe importante mós ba Jesus. Nuneʼe nia halo buat ruma iha situasaun neʼe. Istória neʼe ajuda ita atu komprende tansá ema hakarak atu hakbesik ba Jesus.

¹⁶ Dala ida tan, inan-aman bele aprende lisaun importante ida husi Jesus nia ezemplu neʼe. Hanoin toʼok katak Ita-nia oan hakbesik ba Ita tanba nia hasoru problema neʼebé halo nia laran-tun. Iha situasaun neʼe, karik Ita bele haree ninia problema nuʼudar buat neʼebé kiʼik deʼit. Karik Ita mós hamnasa kona-ba neʼe. Se kompara ho Ita-nia problema, karik oan  nia problema mak ladún importante. Maibé, hanoin-hetan katak neʼe laʼós buat neʼebé kiʼik ba Ita-nia oan! Se ida neʼebé Ita hadomi sente katak neʼe buat neʼebé importante, Ita mós hakarak haree problema neʼe nuʼudar buat neʼebé importante, loos ka lae? Se Ita hatudu ba Ita-nia oan katak Ita hanoin nia, ida-neʼe sei ajuda oan atu la taʼuk atu hakbesik ba Ita.

17. Jesus fó ezemplu saida kona-ba hatudu hahalok laran-maus? Tanbasá mak hahalok neʼe laʼós fraku ida?

¹⁷ Hanesan ita koʼalia ona iha Kapítulu 3, Jesus mak ema neʼebé laran-maus no haraik-an. (Mateus 11:29) Laran-maus mak hahalok ida neʼebé furak tebes, ida-neʼe hatudu katak ema neʼe haraik-an iha ninia laran. Laran-maus mak parte ida husi buat neʼebé Maromak nia espíritu santu lori mai no ida-neʼe kona mós ho matenek husi Maromak. (Galásia 5:22, 23; Tiago 3:13) Maski ema sadik no haterus Jesus, maibé nia kontrola an nafatin. Jesus hatudu laran-maus, no nia  laʼós ema fraku. Matenek-naʼin ida koʼalia kona-ba hahalok neʼe hodi dehan: “Tuir loloos hahalok laran-maus mak hahalok neʼebé forsa no neʼe hanesan besi.” Sin, ita presiza duni kbiit atu tahan netik hirus no atu hatudu laran-maus ba ema seluk. Ho Maromak Jeová nia ajuda, ita bele banati-tuir Jesus hodi hatudu hahalok laran-maus, no ida-neʼe sei halo ema la taʼuk atu hakbesik ba ita.

18. Ezemplu saida mak hatudu katak Jesus prontu atu rende an? Tuir ita-nia hanoin, tanbasá mak hahalok neʼe bele halo ema gosta atu hakbesik ba ita?

¹⁸ Jesus prontu atu rende an tuir situasaun. Kuandu Jesus laʼo liu sidade Tiro, feto ida hakbesik nia tanba anju aat “fó terus boot” ba ninia oan-feto. Iha dalan tolu neʼebé Jesus hatudu katak nia lakohi atu halo buat neʼebé feto neʼe husu. Primeiru, nia la hatán liafuan ida. Segundu, nia fó razaun ba feto neʼe tansá nia la halo buat neʼebé feto neʼe husu. Terseiru, nia hatoʼo ai-knanoik ida neʼebé esplika ho klaru tansá nia la halo ida-neʼe. Maibé, iha situasaun neʼe Jesus hatudu ulun-toos no la hanoin feto neʼe ka lae? Ka, Jesus halo nia an hanesan ema-boot hodi feto neʼe sente taʼuk atu husu buat ruma ba nia ka lae? Lae. Feto neʼe sente livre atu koʼalia ho Jesus. Feto neʼe la husu ajuda ba dala ida deʼit, maibé nia husu beibeik maski nia bele haree ho klaru katak Jesus ladún hakarak atu ajuda nia. Jesus haree katak feto neʼe nia fiar mak book nia atu husu nafatin, no Jesus kura nia oan-feto. (Mateus 15:22-28) Sin, Jesus mak ema neʼebé la ulun-toos, no nia prontu atu rona no mós prontu atu rende an tuir situasaun. Ninia hahalok sira-neʼe halo ema gosta atu hakbesik ba nia.

19. Oinsá mak ita bele hatene katak fasil ba ema atu hakbesik ba ita?

¹⁹ Ema barak hanoin katak ema seluk hakarak tebes atu hakbesik ba sira. Porezemplu, ema neʼebé iha pozisaun aas dala barak dehan katak sira-nia povu bele hakbesik sira iha tempu naran deʼit. Maibé, Bíblia fó avizu dehan: “Ema barak  koʼalia kona-ba sira-nia domin neʼebé laran-metin, maibé sé mak bele hetan ema ida neʼebé hatudu hahalok laran-metin?” (Provérbios 20:6) Sin, fasil atu fó sai katak ema bele hakbesik ba ita iha tempu naran deʼit. Maibé, ita ho laran-metin banati-tuir Kristu nia domin neʼebé nia hatudu hodi halo ema la taʼuk atu hakbesik ita ka lae? Atu hetan resposta ba pergunta neʼe, ita presiza hatene oinsá ema nia hanoin ba ita, laʼós ita rasik nia hanoin kona-ba ita-nia an. Paulo hatete: “Halo ema hotu koko imi-nia laran-diʼak.” (Filipe 4:5) Tan neʼe, diʼak atu ita ida-idak husu ba ita-nia an: ‘Oinsá ema nia haree kona-ba haʼu? Haʼu iha naran diʼak iha ema seluk nia oin ka lae?’

20. (a) Tanbasá mak importante ba katuas kristaun sira atu halo ema la sente taʼuk atu hakbesik ba sira? (b) Tanbasá mak ita lakohi atu husu buat barak demais husi katuas sira iha kongregasaun?

²⁰ Katuas kristaun sira presiza hakaʼas an atu halo ema seluk la sente taʼuk atu hakbesik ba sira. Sira hakarak atu halaʼo sira-nia moris hodi tuir buat neʼebé hakerek iha Isaias 32:1, 2, neʼebé dehan: “Sira ida-idak sei sai hanesan subar-fatin husi anin, no fatin mahon husi udan boot, hanesan bee neʼebé suli iha rai-maran, hanesan mahon husi fatuk boot iha rai neʼebé maran-dekor.” Se katuas kristaun sira halo ema la sente taʼuk atu hakbesik ba sira, ida-neʼe bele ajuda sira atu fó protesaun ba ema, no halo ema sente kmaan. Klaru katak halo ida-neʼe laʼós buat neʼebé fasil, tanba iha loron ikus sira-neʼe, katuas sira iha responsabilidade barak neʼebé todan. Maibé, katuas sira hakaʼas an atu  nunka halo irmaun-irmán sira hanoin katak katuas sira iha serbisu barak liu no tan neʼe sira la iha tempu atu tau matan ba Maromak Jeová nia bibi sira-nia presiza. (1 Pedro 5:2) Ema iha kongregasaun mós hakaʼas an atu la husu buat barak demais husi mane sira-neʼe, maibé sira hakarak hatudu haraik-an hodi serbisu hamutuk ho mane sira-neʼe.—Ebreu 13:17.

21. Oinsá mak inan-aman bele ajuda oan atu la sente taʼuk atu hakbesik ba sira? Saida mak ita sei estuda iha kapítulu tuirmai?

²¹ Inan-aman sira presiza hakaʼas an atu fó tempu ba sira-nia oan. Tuir loloos, neʼe mak buat neʼebé importante tebes! Sira hakarak atu sira-nia oan sente livre atu koʼalia ho aman ka inan. Tan neʼe, inan-aman kristaun sira hakaʼas an atu hatudu laran-maus no la ulun-toos. Sira hakaʼas an atu la sai hirus lalais kuandu sira-nia oan fó sai sala neʼebé sira halo ka sira iha hanoin neʼebé sala. Kuandu inan-aman kontinua treinu sira-nia oan ho pasiénsia, ida-neʼe sei ajuda oan atu koʼalia nakloke ba sira. Hanesan Jesus, klaru katak ita hotu hakarak atu ema la sente taʼuk atu hakbesik ba ita. Iha kapítulu tuirmai, ita sei koʼalia kona-ba Jesus nia laran-sadiʼa, neʼe mak hahalok ida seluk neʼebé halo ema gosta atu hakbesik ba nia.