1, 2. Saida mak Jesus halo iha kalan ikus kuandu hamutuk ho ninia apóstolu sira? Tanbasá mak ninia kalan ikus neʼe mak tempu neʼebé espesiál ba nia?

 JESUS halibur ninia apóstolu sira iha fatin ida iha andár leten iha Jerusalém, no nia hatene katak neʼe mak ninia kalan ikus atu hamutuk ho sira. Tempu besik ona ba nia atu fila fali ba Aman. Iha oras balu tan ema sei mai atu kaer nia, no nia mós sei hetan koko neʼebé boot liu iha ninia moris. Maibé, susar sira-neʼe la hanetik nia atu hanoin kona-ba ninia apóstolu sira-nia diʼak.

² Jesus fó-hatene nanis ona ba ninia apóstolu sira katak nia sei husik hela sira. Maski nuneʼe, nia sei iha buat barak tan atu esplika hodi hametin sira atu sai prontu ba buat neʼebé sei akontese iha futuru. Tan neʼe nia uza tempu espesiál neʼe atu hanorin sira lisaun importante neʼebé sei ajuda sira atu nafatin laran-metin. Jesus nia liafuan neʼebé nia hatoʼo iha kalan neʼe nakonu ho sentimentu. Entaun, tanbasá mak Jesus hanoin ulukliu kona-ba apóstolu sira duké kona-ba nia an? Tanbasá mak kalan ikus neʼebé nia uza hamutuk ho sira mak tempu neʼebé espesiál tebes ba nia? Resposta mak nia hadomi sira. Sin, nia hadomi tebetebes ninia apóstolu sira.

3. Oinsá mak ita hatene katak Jesus laʼós deʼit hatudu domin ba ninia dixípulu sira iha ninia kalan ikus?

³ Tinan balu liutiha, Maromak haleno apóstolu João atu hakerek fali kona-ba buat neʼebé akontese iha kalan neʼe. João dehan: “Jesus hatene ona katak nia oras toʼo ona atu husik mundu neʼe hodi liu ba Aman; no hadomi tiha nia doben sira neʼebé hela iha mundu, nia hadomi sira toʼo rohan.” (João 13:1) Klaru katak, laʼós deʼit iha kalan neʼe mak Jesus hatudu ninia domin ba ninia “doben sira”. Durante tempu hotu neʼebé nia halaʼo ninia serbisu iha rai, nia hatudu iha dalan oioin katak nia hadomi ninia dixípulu sira. Nuʼudar  ema kristaun, ita mós presiza banati-tuir Jesus hodi hatudu domin tanba ida-neʼe sei hatudu katak ita mak ninia dixípulu neʼebé loos. Entaun, mai ita koʼalia kona-ba dalan balu neʼebé Jesus hatudu ninia domin.

4, 5. (a) Tanbasá mak Jesus presiza pasiénsia kuandu hamutuk ho ninia dixípulu sira? (b) Saida mak Jesus halo kuandu nia hetan ninia apóstolu naʼin-tolu la matan-moris kuandu sira iha jardín Getsémani?

⁴ Pasiénsia mak hahalok ida neʼebé mosu tanba domin. 1 Korinto 13:4 hatete: “Domin pasiénsia.” Ita presiza hatudu pasiénsia kuandu ema halo sala hasoru ita. Maibé oinsá ho Jesus? Nia mós presiza hatudu pasiénsia kuandu nia hamutuk ho ninia dixípulu sira ka lae? Sin, nia presiza duni! Hanesan ita aprende ona iha Kapítulu 3, apóstolu sira neineik liu atu haburas hahalok haraik-an. Sira haksesuk malu kona-ba sé mak boot liu iha sira-nia leet, no ida-neʼe laʼós akontese ba dala ida deʼit. Saida mak Jesus halo? Nia sai hirus no hatán ho liafuan makaʼas ba sira ka lae? Lae. Maski ninia apóstolu sira haksesuk malu kona-ba neʼe iha ninia kalan ikus, maibé nia nafatin hatudu pasiénsia hodi hanorin sira.—Lucas 22:24-30; Mateus 20:20-28; Marcos 9:33-37.

⁵ Iha kalan neʼebé hanesan, kuandu Jesus bá jardín Getsémani hamutuk ho ninia apóstolu naʼin-11 neʼebé laran-metin, buat seluk tan akontese neʼebé koko ninia pasiénsia. Depois Jesus husik hela ninia apóstolu naʼin-ualu iha jardín neʼe, nia lori Pedro, Tiago, no João hodi laʼo tama liután ba jardín nia klaran. Jesus hatete ba sira: “Haʼu laran-susar toʼo mate; imi hela iha neʼe hodi hadeer ho haʼu.” Tuirmai nia laʼo dook uitoan husi sira, no nia hahú harohan ho laran tomak. Halo tiha orasaun neʼebé naruk, nia fila fali ba ninia apóstolu naʼin-tolu neʼe. Saida mak nia haree? Maski neʼe mak tempu neʼebé susar liu hotu ba nia, maibé nia hetan sira toba hela. Nia sai hirus ba sira tanba sira la matan-moris ka lae? Lae! Nia ho pasiénsia fó laran-manas ba sira. Ninia liafuan hatudu katak nia komprende laran-susar neʼebé sira sente no  fraku neʼebé sira iha. a Nia hatete: “Espíritu hakarak maibé isin kbiit-laek.” Jesus nafatin hatudu pasiénsia iha kalan neʼe, maski nia hetan sira toba hela laʼós ba dala ida deʼit, maibé ba dala rua tan.—Mateus 26:36-46.

6. Oinsá mak ita bele banati-tuir Jesus nia ezemplu kona-ba hatudu pasiénsia ba ema seluk?

⁶ Jesus la lakon ninia esperansa ba apóstolu sira, no ikusmai ninia pasiénsia neʼe lori rezultadu diʼak. Ninia apóstolu sira-neʼe aprende katak importante atu haraik an no atu matan-moris. (1 Pedro 3:8; 4:7) Jesus nia hahalok neʼe fó laran-manas ba ita, loos ka lae? Entaun, oinsá mak ita bele banati-tuir Jesus? Katuas sira presiza duni atu hatudu pasiénsia. Porezemplu, karik maluk fiar-naʼin ida hakbesik katuas kristaun atu fó sai kona-ba ninia problema, maibé katuas neʼe sente kole hela ka hanoin hela problema seluk. Liután neʼe, sira neʼebé hasoru problema dala ruma neineik liu atu halo tuir konsellu neʼebé sira simu. Maski nuneʼe, katuas sira neʼebé hatudu pasiénsia sei fó konsellu ho “laran-kmaus” no hatudu laran-sadiʼa ba bibi-lubun. (2 Timóteo 2:24, 25; Apóstolu 20:28, 29) Inan-aman sira mós presiza banati-tuir Jesus nia ezemplu kona-ba hatudu pasiénsia, tanba dala ruma labarik sira neineik liu atu halo tuir dixiplina neʼebé sira simu. Maibé, hodi haburas hahalok domin no pasiénsia, ida-neʼe sei ajuda inan-aman sira atu hakaʼas an nafatin hodi fó treinu ba sira-nia oan. Sin, hodi hatudu pasiénsia hanesan neʼe bele lori rezultadu neʼebé diʼak tebes.—Salmo 127:3.

7. Iha dalan saida deʼit mak Jesus tau matan ba ninia dixípulu sira-nia presiza?

⁷ Kuandu ita halo hahalok diʼak ba ema seluk no la hanoin an deʼit, ita hatudu katak ita hadomi ema. (1 João 3:17, 18) Bíblia hatete: “Domin la buka nia rasik nia diʼak.” (1 Korinto  13:5) Domin book Jesus atu tau matan ba dixípulu sira-nia presiza. Dala barak nia halo buat diʼak ba sira maski sira seidauk fó sai kona-ba buat neʼebé sira presiza. Kuandu nia haree katak sira kole, nia konvida sira atu laʼo hamutuk nia “ba fatin fuik ida atu tuur halimar [ka, “deskansa uitoan”, MF]”. (Marcos 6:31) Kuandu nia haree katak sira hamlaha, nia buka dalan atu fó han ba sira, neʼe inklui mós fó han ba ema rihun ba rihun neʼebé rona ninia hanorin.—Mateus 14:19, 20; 15:35-37.

8, 9. (a) Saida mak hatudu katak Jesus hatene buat neʼebé dixípulu presiza atubele iha relasaun diʼak ho Maromak? (b) Kuandu Jesus prega tiha iha ai-riin, oinsá mak nia hatudu katak nia hanoin tebes ninia inan?

⁸ Jesus hatene kona-ba buat neʼebé dixípulu sira presiza atu bele iha relasaun diʼak ho Maromak no nia ajuda sira kona-ba neʼe. (Mateus 4:4; 5:3) Iha Jesus nia hanorin, dala barak nia hanoin liu kona-ba ninia dixípulu sira. Jesus hatoʼo diskursu iha foho liuliu atu ajuda ninia dixípulu sira. (Mateus 5:1, 2, 13-16) Nia hanorin ema barak hodi uza ai-knanoik,  “maibé ba eskolante sira, wainhira sira mesamesak deʼit, nia fó-hatene momoos buat hotu”. (Marcos 4:34) Jesus mós fó-hatene katak nia sei hili ‘atan laran-metin no matenek’ atu bele fó hahán espirituál ba ninia dixípulu sira durante loron ikus sira. Atan neʼe mak grupu kiʼik husi Jesus nia alin kose-mina sira iha rai. Husi tinan 1919, sira fó hahán espirituál “iha tempu loloos”.—Mateus 24:45.

⁹ Iha loron neʼebé Jesus mate, nia hatudu oinsá nia hanoin tebes kona-ba ema sira neʼebé nia hadomi, no kona-ba sira-nia relasaun ho Maromak. Dalan neʼebé nia halo ida-neʼe kona loos ita-nia laran. Hanoin toʼok kona-ba buat neʼebé akontese. Iha tempu neʼebá ema prega ona Jesus iha ai-riin ida, no nia sente moras tebetebes. Atu nia bele dada iis, nia presiza dudu saʼe nia isin-lolon ba leten ho ninia ain, no klaru katak ida-neʼe halo nia sente moras tebes tanba ninia kanek neʼebé iha ain kose ba pregu, no kanek iha ninia kotuk kose ba ai-riin. Liután neʼe, atu bele koʼalia nia presiza dada iis, no ida-neʼe mós susar tebes no halo nia sente moras duni. Maibé, lakleur antes Jesus mate, nia koʼalia liafuan sira neʼebé hatudu katak nia hadomi ninia inan, Maria. Maski susar,  Jesus ho lian makaʼas uitoan koʼalia ba Maria no apóstolu João neʼebé hamriik besik. Nia dehan ba ninia inan: “Feto, ó-nia oan mak ida-neʼe!” Tuirmai nia koʼalia ba João dehan: “Ó-nia inan mak ida-neʼe!” (João 19:26, 27) Jesus hatene katak apóstolu neʼe neʼebé laran-metin sei tau matan ba Maria nia presiza loroloron nian no mós Maria nia presiza kona-ba adora Maromak. b

10. Oinsá mak inan-aman bele banati-tuir Jesus nuʼudar sira tau matan ba sira-nia oan nia presiza?

¹⁰ Inan-aman sira bele aprende buat barak hodi hanoin kona-ba Jesus nia ezemplu. Aman ida neʼebé hadomi ninia família sei hakaʼas an atu tau matan ba família nia presiza isin nian. (1 Timóteo 5:8) Família nia ulun sira hatudu matenek hodi fó tempu atu halimar hamutuk ho ninia família. Buat neʼebé importante liu mak, inan-aman kristaun tenke tau matan ba oan sira-nia presiza atu adora Maromak. Oinsá mak sira bele halo ida-neʼe? Sira halo arranju atu halaʼo beibeik estuda Bíblia nuʼudar família, no sira hakaʼas an atu halaʼo estudu neʼe iha dalan neʼebé fó laran-manas no fó ksolok ba labarik sira. (Deuteronómio 6:6, 7) Liuhusi inan-aman nia liafuan no ezemplu, sira hanorin oan atu haree katak serbisu haklaken mak buat neʼebé importante, no katak prepara nanis no tuir reuniaun sira mak parte importante husi família nia adorasaun ba Maromak.—Ebreu 10:24, 25.

11. Oinsá mak Jesus hanorin ninia dixípulu sira atu fó perdua?

¹¹ Prontu atu fó perdua mak parte importante husi domin. (Koloso 3:13, 14) 1 Korinto 13:5 hatete katak domin “la hanoin resin buat aat neʼebé nia simu”. Dala barak, Jesus hanorin ninia dixípulu sira katak importante atu fó perdua. Nia haruka sira atu fó perdua ba ema seluk “laʼós toʼo dala hitu, maibé toʼo hitunulu dala hitu”, neʼe katak fó perdua beibeik. (Mateus 18:21, 22) Nia hanorin katak se sira fó-hatene ba  ema neʼebé halo sala, no ema neʼe arrepende an, sira tenke fó perdua. (Lucas 17:3, 4) Jesus la hanesan ho ema fariseu sira neʼebé laran-makerek, neʼebé hanorin ema liuhusi liafuan deʼit, laʼós husi sira-nia ezemplu. (Mateus 23:2-4) Mai ita koʼalia kona-ba oinsá Jesus hatudu katak nia prontu atu fó perdua maski ninia belun halo nia laran-kanek.

12, 13. (a) Iha kalan neʼebé ema kaer Jesus, oinsá mak Pedro halo Jesus laran-kanek? (b) Oinsá mak buat neʼebé Jesus halo depois nia moris-hiʼas hatudu ho klaru katak nia laʼós deʼit haklaken kona-ba perdua malu, maibé nia rasik halo ida-neʼe?

¹² Jesus iha relasaun neʼebé besik ho apóstolu Pedro. Pedro mak mane neʼebé laran-diʼak, maski nuneʼe dala ruma nia koʼalia ka halo buat ruma hodi la hanoin uluk. Jesus hafolin Pedro nia hahalok diʼak no fó knaar espesiál balu ba nia. Pedro, Tiago no João, haree rasik milagre neʼebé apóstolu seluk la haree. (Mateus 17:1, 2; Lucas 8:49-55) Hanesan ita koʼalia tiha ona, Pedro mak apóstolu ida neʼebé laʼo hamutuk ho Jesus hodi tama liután ba jardín Getsémani iha kalan neʼebé ema atu kaer Jesus. Maibé iha kalan neʼe, kuandu ema kaer Jesus nuʼudar dadur, Pedro no apóstolu sira seluk halai husik hela Jesus. Tuirmai, Pedro hatudu aten-brani uitoan hodi hamriik iha uma liʼur kuandu ema tesi lia ba Jesus. Maibé, iha tempu neʼe mós Pedro sai taʼuk fali no halo sala neʼebé boot. Nia nega Jesus ba dala tolu hodi dehan katak nia la koñese Jesus. (Mateus 26:69-75) Saida mak Jesus halo? Oinsá ho ita? Saida mak ita sei halo se ita-nia kolega neʼebé diʼak halo ita laran-kanek hanesan buat neʼebé Pedro halo ba Jesus?

¹³ Jesus prontu atu fó perdua ba Pedro. Nia hatene katak Pedro triste tebes ho sala boot neʼebé nia halo. Liután neʼe, apóstolu neʼe arrepende an no “hahú tanis” makaʼas. (Marcos 14:72) Iha loron neʼebé Jesus moris hiʼas, nia mosu ba Pedro, no karik nia halo ida-neʼe atu fó laran-manas no halo Pedro fiar katak nia sei hadomi Pedro. (Lucas 24:34; 1 Korinto 15:5) Maizumenus fulan rua depois neʼe, Jesus hatudu katak nia hafolin Pedro hodi uza nia atu fó sasin ba ema-lubun iha Jerusalém iha loron Pentekostes. (Apóstolu 2:14-40) Jesus mós la rai odi ba apóstolu sira hotu maski sira halai husik hela nia.  Depois Jesus moris-hiʼas, nia nafatin bolu sira nuʼudar “maun-alin sira”. (Mateus 28:10) Neʼe hatudu ho klaru katak Jesus laʼós deʼit haklaken kona-ba fó perdua, maibé nia rasik halo ida-neʼe.

14. Tanbasá mak ita presiza sai toman atu fó perdua ba ema seluk? Oinsá mak ita bele hatudu katak ita prontu atu fó perdua?

¹⁴ Nuʼudar Jesus nia dixípulu, ita presiza sai toman atu fó perdua ba ema seluk. Tanbasá? La hanesan Jesus, ita mak ema sala-naʼin, nuneʼe mós ho ema sira neʼebé halo sala hasoru ita. Husi tempu ba tempu, ita hotu halo sala liuhusi ita-nia liafuan no hahalok. (Roma 3:23; Tiago 3:2) Hodi fó perdua ba ema seluk, ida-neʼe loke dalan ba Maromak atu fó perdua mós ba ita-nia sala. (Marcos 11:25) Entaun, oinsá mak ita bele hatudu katak ita prontu atu fó perdua ba ema neʼebé halo sala hasoru ita? Dala barak, domin bele ajuda ita atu haluha sala kiʼik ka fraku neʼebé ema seluk iha. (1 Pedro 4:8) Kuandu ema neʼebé halo sala hasoru ita arrepende an husi laran, hanesan Pedro, klaru katak ita hakarak duni atu banati-tuir Jesus hodi prontu atu fó perdua. Duké rai odi, ita hatudu matenek hodi husik tiha sentimentu neʼe. (Mateus 6:14, 15) Hodi halo nuneʼe, ita sei halo parte atu haburas dame iha kongregasaun laran no mós sente dame iha ita-nia neon no laran.—1 Pedro 3:11.

15. Tanbasá mak Jesus tau fiar ba ninia dixípulu sira maski sira ema sala-naʼin?

¹⁵ Domin book ema atu tau fiar ba malu. Bíblia dehan katak domin “fiar buat hotu”. c (1 Korinto 13:7) Jesus nia domin book nia atu tau fiar ba ninia dixípulu sira maski sira mak ema sala-naʼin. Jesus fiar katak iha dixípulu sira-nia laran, sira hadomi tebes Maromak Jeová no hakarak atu halo  Maromak nia hakarak. Maski sira halo sala, maibé Jesus nunka duvida kona-ba sira-nia domin ba Maromak. Porezemplu, maski apóstolu Tiago no João obriga sira-nia inan atu husu Jesus hodi fó fatin ba sira iha ninia sorin kuandu Jesus ukun, maibé nia la sai dúvida kona-ba sira-nia laran-metin no mós la hasai sira-nia pozisaun nuʼudar apóstolu.—Mateus 20:20-28.

16, 17. Jesus fó responsabilidade saida ba ninia dixípulu sira?

¹⁶ Jesus hatudu katak nia tau fiar ba ninia dixípulu sira hodi fó sira knaar oioin. Porezemplu, iha situasaun rua neʼebé Jesus halo milagre atu fó han ba ema-lubun, nia fó knaar ba ninia dixípulu sira atu fahe hahán neʼe. (Mateus 14:19; 15:36) Jesus mós fó knaar ba Pedro no João atu bá Jerusalém hodi prepara ba Páskua ikus neʼebé nia selebra. Neʼe katak sira tenke buka bibi-oan, tua-uvas, paun neʼebé la iha fermentu, no buat seluk tan neʼebé presiza. Neʼe laʼós knaar neʼebé simples tanba Ukun-Fuan Moisés nian esplika katak importante atu selebra Páskua iha dalan loos, no Jesus presiza halo tuir Ukun-Fuan neʼe. Tuirmai, iha kalan neʼe Jesus uza tua-uvas no paun neʼe nuʼudar símbolu importante atu selebra ninia mate.—Mateus 26:17-19; Lucas 22:8, 13.

¹⁷ Jesus mós fó knaar neʼebé importante liu ba ninia dixípulu sira. Hanoin-hetan mós katak nia tau iha dixípulu sira-nia liman responsabilidade todan, neʼe mak atu haklaken no hanorin ema atu sai dixípulu. (Mateus 28:18-20) Hanesan ita koʼalia tiha ona, Jesus fó responsabilidade importante ba grupu kiʼik husi ninia alin kose-mina sira iha rai atu prepara no fahe hahán espirituál. (Lucas 12:42-44) Agora, maski Jesus ukun husi lalehan no ita la bele haree nia, maibé nia tau fiar ba mane balu neʼebé nuʼudar “kmanek oioin”, atu tau matan ba ninia kongregasaun iha rai.—Éfeso 4:8, 11, 12.

18-20. (a) Oinsá mak ita bele tau fiar ba ita-nia maluk fiar-naʼin? (b) Oinsá mak ita bele banati-tuir Jesus hodi prontu atu fahe knaar ba ema seluk? (c) Saida mak ita sei aprende iha kapítulu tuirmai?

¹⁸ Oinsá mak ita bele banati-tuir Jesus nia ezemplu? Kuandu ita tau fiar ba ita-nia maluk fiar-naʼin, ita hatudu katak ita hadomi sira. Hanoin-hetan katak domin buka buat diʼak no  la hanoin aat kona-ba ema seluk. Ita hotu mak ema sala-naʼin, no tan neʼe husi tempu ba tempu ema bele halo ita sai laran-kanek. Maibé, domin ajuda ita atu la tesi lia lalais kona-ba sira-nia hahalok. (Mateus 7:1, 2) Se ita nafatin iha hanoin neʼebé loos ba ita-nia maluk fiar-naʼin, ita sei hakaʼas an atu hametin malu, laʼós atu hatún malu.—1 Tesalónika 5:11.

¹⁹ Ita bele banati-tuir Jesus hodi prontu atu fahe knaar ba ema seluk ka lae? Importante tebes ba sira neʼebé iha responsabilidade iha kongregasaun atu fahe knaar ba ema seluk, no mós fiar katak sira sei halo ida-neʼe ho didiʼak. Hodi halo nuneʼe, katuas kristaun sira neʼebé iha esperiénsia bele fó treinu ba joven sira neʼebé hakaʼas an atu halo serbisu iha kongregasaun. (1 Timóteo 3:1; 2 Timóteo 2:2) Treinu hanesan neʼe mak buat neʼebé importante tebes. Nuʼudar Maromak Jeová aumenta nafatin ema ba ninia organizasaun iha rai, klaru katak presiza atu treinu mane barak tan atu bele tau matan ba kongregasaun neʼebé sai buras ba daudaun.—Isaias 60:22.

²⁰ Jesus hatudu ezemplu diʼak liu hotu kona-ba hatudu domin ba ema seluk. Ita presiza banati-tuir ninia dalan hotu, no dalan neʼebé importante liu mak banati-tuir ninia domin. Iha kapítulu tuirmai, ita sei koʼalia kona-ba dalan boot liu neʼebé nia hatudu ninia domin mai ita, dalan neʼe mak hodi fó nia moris ba ita.