Tuir Bíblia, bainhira no tansá mak feto kristaun presiza taka ulun kuandu halaʼo adorasaun no serbisu ba Maromak Jeová? Mai ita buka-hatene kona-ba ida-neʼe liuhusi liafuan neʼebé apóstolu Paulo mak hakerek ho espíritu santu nia tulun. Nia hatudu matadalan neʼebé ajuda ita atu halo desizaun loos, atu nuneʼe ita bele hatudu respeitu ba Maromak. Iha 1 Korinto 11:3-16, Paulo fó sai pontu tolu neʼebé importante atu hanoin: (1) feto tenke taka ulun kuandu halaʼo atividade saida? (2) iha situasaun saida deʼit mak nia sei halo nuneʼe? (3) iha razaun saida deʼit mak nia sei halo tuir matadalan neʼe?

Atividade. Paulo koʼalia kona-ba atividade rua: harohan no halo profesia. (Versíkulu 4, 5) Loos duni, harohan katak halo orasaun hodi adora Maromak Jeová. Maibé, halo profesia katak saida? Laʼós atu fó-hatene nanis deʼit kona-ba futuru, maibé mós bele aplika ba atividade hanesan hanorin Bíblia, neʼebé ema kristaun halaʼo ohin loron. Entaun, Paulo hatete katak feto sira tenke taka ulun kuandu halo orasaun no hanorin lia-loos husi Bíblia iha tempu hotu ka lae? Lae. Ida-neʼe depende ba situasaun.

Situasaun. Paulo koʼalia kona-ba situasaun rua—iha família no  iha kongregasaun. Nia hatete: “Laʼen mak nia feen nia ulun . . . Feto ida neʼebé harohan ka halo profesia hodi la taka nia ulun, hamoe nia ulun.” (Versíkulu 3, 5) Iha família laran, Maromak Jeová fó kbiit ba laʼen atu sai nuʼudar ulun ba nia feen. Kuandu feen mak halaʼo knaar neʼebé Maromak Jeová fó ona ba nia laʼen, no se nia la rekoñese nia laʼen nia kbiit neʼe, nia hamoe nia laʼen. Porezemplu, kuandu irmán ida presiza atu halaʼo estudu Bíblia iha fatin neʼebé iha mós ninia laʼen, irmán neʼe sei taka nia ulun atu hatudu katak nia rekoñese laʼen nia kbiit nuʼudar ulun. Maski nia laʼen seidauk hetan batizmu ka hetan ona batizmu, irmán neʼe sei nafatin halo nuneʼe, tanba laʼen mak família nia ulun. * Se irmán ida-neʼe halo orasaun ka halaʼo estudu iha fatin neʼebé nia oan-mane neʼebé sei kiʼik no hetan ona batizmu mós iha, irmán neʼe tenke taka nia ulun. Nia halo nuneʼe laʼós tanba nia oan mak família nia ulun, maibé tanba mane neʼebé hetan batizmu ona mak simu knaar atu hanorin no halo orasaun iha kongregasaun kristaun.

Kona-ba situasaun iha kongregasaun laran, Paulo hatete: “Se ema ruma hakarak haksesuk malu hodi apoia toman seluk ruma, ita la iha toman seluk, no Maromak nia kongregasaun mós la iha.” (Versíkulu 16, MF) Iha kongregasaun kristaun, Maromak fó kbiit ba mane neʼebé hetan batizmu ona atu sai ulun. (1 Timoteo 2:11-14; Ebreu 13:17) Mane deʼit mak simu knaar nuʼudar katuas ka atan ministeriál atu tau matan ba Maromak nia bibi. (Apostolu 20:28) Maski nuneʼe, iha situasaun balun neʼebé feto kristaun ida presiza halaʼo knaar neʼebé baibain mane sira-neʼe mak halaʼo. Porezemplu, kuandu la iha irmaun neʼebé bele halaʼo reuniaun grupu haklaken nian, karik irmán ida presiza halaʼo reuniaun neʼe. Ka, karik irmán ida halaʼo estudu Bíblia iha fatin neʼebé irmaun neʼebé batizmu ona mós iha. * Tanba atividade sira-neʼe mak parte husi arranju kongregasaun nian, irmán sira-neʼe sei taka ulun hodi hatudu katak sira rekoñese katak sira halaʼo knaar neʼebé tuir loloos mane mak halo.

Maibé, iha mós atividade barak atu adora Maromak, neʼebé  irmán sira bele halo no la presiza taka ulun. Porezemplu, kuandu fó komentáriu iha reuniaun kristaun, bá haklaken ho nia laʼen ka mane seluk neʼebé hetan ona batizmu, ka estuda no halo orasaun ho ninia oan neʼebé seidauk hetan batizmu, irmán sira la presiza taka ulun. Se irmán ida hasoru situasaun seluseluk no ladún hatene se nia tenke taka ulun ka lae, nia presiza buka informasaun liután atu hatene kona-ba neʼe. * Maski halo tiha nuneʼe no sei laran-rua hela, karik nia hili atu taka nia ulun hanesan iha dezeñu neʼe, no halo nuneʼe la sala.

Razaun. Iha versíkulu 10, ita hetan razaun rua neʼebé book feto kristaun sira atu hakarak taka sira-nia ulun: “Feto tenke iha kbiit nia sinál iha nia ulun, tan anju sira.” Primeiru, haree toʼok liafuan “kbiit nia sinál”. Hodi tau buat ruma atu taka ulun, feto sira hatudu katak sira rekoñese kbiit neʼebé Maromak Jeová fó ba mane neʼebé hetan batizmu ona iha kongregasaun. Hodi halo nuneʼe, sira hatudu sira-nia domin no laran-metin ba Maromak Jeová. Razaun segundu mak “tan anju sira”. Oinsá mak feto ida nia hahalok bele kona anju sira neʼebé iha forsa boot, kuandu nia taka nia ulun?

Anju sira hakarak haree katak atan hotu iha Maromak Jeová nia organizasaun iha lalehan no iha rai rekoñese Maromak nia kbiit. Sira mós aprende buat ruma husi ezemplu neʼebé ema sala-naʼin mak hatudu kona-ba neʼe. Loos duni, anju sira mós presiza atu halo tuir Maromak Jeová nia arranju, no iha tempu uluk, anju barak la halo nuneʼe. (Judas 6) Agora, anju sira bele haree ezemplu diʼak husi feto kristaun ida neʼebé hakruʼuk an ba kbiit neʼebé mane mak simu, maski irmán ida-neʼe mak iha esperiénsia barak liu, koñesimentu barak liu, no matenek liu iha kongregasaun. Dala ruma, irmán mak ema kristaun ida neʼebé Maromak hili ona  hodi kose mina ho espíritu santu, neʼebé sei simu liman-rohan hamutuk ho Kristu. Aban-bainrua irmán hanesan neʼe sei tuur iha pozisaun aas liu fali anju sira no sei ukun hamutuk ho Kristu iha lalehan. Anju sira-neʼe agora haree daudaun irmaun sira-nia ezemplu neʼebé kapás tebes! Loos, iha oportunidade espesiál ba irmán sira hotu atu hatudu ezemplu diʼak ba anju diʼak rihun ba rihun neʼebé iha lalehan, liuhusi sira-nia hahalok neʼebé hatudu haraik-an no laran-metin hodi halo tuir Maromak nia arranju!