Maski Ita hakaʼas an tebes atu halo Ita-nia moris família nian kontente, maibé susar neʼebé akontese derrepente deʼit mós bele kona Ita-nia família. No ida-neʼe bele halo família sai laran-tun tebes. (Eclesiastes [Pengkhotbah] 9:11) Tanba Maromak hadomi ita, nia sempre fó ajuda kuandu ita hasoru susar ka terus. Se Ita halo tuir Bíblia nia matadalan sira tuirmai neʼe, Ita bele tahan nafatin maski hasoru susar boot.

BUAT NEʼEBÉ BÍBLIA HANORIN: “Entrega imi-nia laran-susar hotu ba nia, tanba nia hanoin imi.” (1 Pedro 5:7) Keta hanoin katak susar neʼebé Ita hasoru mai husi Maromak. (Tiago 1:13) Nuʼudar Ita hakbesik ba Maromak, nia sei ajuda Ita iha dalan neʼebé diʼak liu. (Isaías [Yesaya] 41:10) “Iha nia oin fakar sai imi-nia laran.”—Salmo (Mazmur) 62:8.

Ita sei sente kmaan hodi lee no estuda Bíblia loroloron, no Ita sei sente duni oinsá Jeová “fó kmaan ba ita iha ita-nia susar hotu”. (2 Korinto 1:3, 4; Roma 15:4) Maromak promete ona atu fó ba Ita ninia “dame neʼebé aas liu ema nia hanoin hotu”.—Filipe 4:6, 7, 13.

BUAT NEʼEBÉ ITA BELE HALO:

• Halo orasaun hodi husu Jeová nia ajuda atu kalma nafatin no atu bele hanoin ho loos

• Hanoin didiʼak kona-ba dalan balu oinsá atu hadiʼa problema, depois hili dalan neʼebé Ita hanoin mak diʼak liu

BUAT NEʼEBÉ BÍBLIA HANORIN: “Ema matenek nia laran husu atu hatene, no ema matenek nia tilun buka atu hatene.” (Provérbios [Amsal] 18:15) Buka atu hatene informasaun hotu kona-ba situasaun. No mós buka-hatene saida mak família ida-idak presiza atu bele tahan susar. Koʼalia no rona ba sira.—Provérbios (Amsal) 20:5.

Oinsá se ema ida neʼebé Ita hadomi mate? Se nuneʼe, labele moe atu hatudu sai buat neʼebé Ita sente. Hanoin-hetan katak Jesus mós “tanis”. (João 11:35; Eclesiastes [Pengkhotbah] 3:4) Bainhira Ita hasoru situasaun susar hanesan neʼe, importante atu deskansa no toba. (Eclesiastes [Pengkhotbah] 4:6) Ida-neʼe sei ajuda Ita atu tahan.

BUAT NEʼEBÉ ITA BELE HALO:

• Sai toman atu koʼalia beibeik ba Ita-nia família maski susar seidauk kona imi. Nuneʼe kuandu susar ruma mosu, sira toman ona atu koʼalia ba Ita

• Koʼalia ho sira neʼebé hasoru ona susar hanesan ho Ita-nian

BUAT NEʼEBÉ BÍBLIA HANORIN: “Belun neʼebé loos sempre hatudu domin, no nia mak maun neʼebé mosu mai iha tempu susar nia laran.” (Provérbios [Amsal] 17:17) Ita-nia kolega sira hakarak duni atu ajuda Ita, maibé karik sira la hatene Ita-nia presiza. Entaun, labele moe atu fó-hatene ba sira saida mak Ita presiza. (Provérbios [Amsal] 12:25) No mós, husu ajuda husi ema neʼebé hatene didiʼak kona-ba Bíblia. Sira bele hatudu ba Ita matadalan husi Bíblia neʼebé bele ajuda Ita.—Tiago 5:14.

Iha tempu susar, Ita sei hetan apoia hodi ransu beibeik hamutuk ho ema neʼebé iha fiar loos ba Maromak no ba ninia promesa sira. Ita sei sente kmaan hodi ajuda no fó kmaan ba ema seluk neʼebé hasoru susar. Haklaken Ita-nia fiar kona-ba Maromak Jeová no ninia promesa sira. Sai badinas atu ajuda ema seluk no keta haketak an husi ema neʼebé hanoin no hadomi Ita.—Provérbios (Amsal) 18:1; 1 Korinto 15:58.

BUAT NEʼEBÉ ITA BELE HALO:

• Koʼalia ba belun ida no husik nia atu ajuda Ita

• Fó-hatene ba nia saida loos mak Ita presiza