LISAUN 04
Sé mak Maromak neʼebé loos?
Ba tempu kleur ona, ema adora maromak oioin. Maibé, Bíblia koʼalia kona-ba Maromak ida neʼebé ‘kmanek liu fali maromak sira seluk hotu’. (2 Krónikas 2:5) Nia mak sé? No saida mak halo nia boot liu fali maromak seluk neʼebé ema barak adora? Iha lisaun neʼe, Ita sei aprende oinsá Maromak fó koñese ninia an ba Ita.
1. Maromak nia naran mak saida, no saida mak hatudu katak nia hakarak ita hatene ninia naran?
Liuhusi Bíblia, Maromak fó koñese ninia an mai ita. Nia hatete: “Haʼu mak Jeová. Neʼe mak haʼu-nia naran.” (Lee Isaias 42:5, 8.) Naran “Jeová” tradús husi naran ida iha lian Ebraiku, no tuir matenek-naʼin barak, naran neʼe signifika “Nia mak halo sai”. Jeová hakarak ita hatene ninia naran. (Éxodo 3:15) Oinsá mak ita bele fiar ida-neʼe? Tanba Bíblia temi naran neʼe dala 7.000 liu! a Naran Jeová refere ba “Maromak loos iha lalehan no iha rai”.—Deuteronómio 4:39.
2. Saida mak Bíblia hatete kona-ba Jeová?
Bíblia dehan katak, husi maromak sira hotu neʼebé ema adora, Jeová deʼit mak Maromak neʼebé loos. Tanbasá? Iha razaun barak. Jeová mak “Maromak neʼebé Aas Liu Hotu iha mundu tomak”. (Lee Salmo 83:18.) Bíblia bolu nia nuʼudar “Ida neʼebé Kbiit Boot Liu Hotu”, tanba nia iha kbiit atu halo buat naran deʼit neʼebé nia hakarak. Nia ‘kria buat hotu’ iha lalehan no iha rai. (Apokalipse 4:8, 11) Só Jeová deʼit mak sempre iha, husi uluk kedas no ba nafatin.—Salmo 90:2.
KEʼE KLEʼAN
Aprende kona-ba oinsá Maromak nia naran la hanesan ho ninia títulu sira. Ita mós sei aprende kona-ba oinsá no tanbasá nia fó-hatene ninia naran ba Ita.
3. Maromak iha títulu oioin, maibé iha naran ida deʼit
Atu komprende oinsá ema nia naran la hanesan ho ninia títulu, loke VÍDEO, depois koʼalia hamutuk kona-ba pergunta tuirmai.
-
Tanbasá mak títulu sira hanesan “Naʼi” la hanesan ho naran?
Bíblia dehan katak ema adora maromak no naʼi oioin. Lee Salmo 136:1-3, depois koʼalia hamutuk kona-ba pergunta tuirmai:
-
Sé mak “Maromak neʼebé aas liu maromak sira seluk” no “Naʼi neʼebé aas liu naʼi sira seluk”?
4. Jeová hakarak Ita atu hatene no uza ninia naran
Saida mak hatudu katak Jeová hakarak Ita atu hatene ninia naran? Loke VÍDEO, depois koʼalia hamutuk kona-ba pergunta tuirmai.
-
Tuir Ita-nia hanoin, Jeová hakarak ema hotu atu hatene ninia naran ka lae? Tanbasá?
Jeová hakarak ema uza ninia naran. Lee Roma 10:13, depois koʼalia hamutuk kona-ba pergunta tuirmai:
-
Tanbasá importante atu uza Maromak nia naran Jeová?
-
Ita sente oinsá bainhira ema hanoin-hetan Ita-nia naran no bolu Ita ho Ita-nia naran?
-
Tuir Ita-nia hanoin, Jeová sente oinsá bainhira Ita uza ninia naran?
5. Jeová hakarak Ita atu hakbesik ba nia
Feto ida husi rai-Kamboja naran Soten dehan katak aprende kona-ba Maromak nia naran halo nia kontente tebes. Loke VÍDEO, depois koʼalia hamutuk kona-ba pergunta tuirmai.
-
Saida mak Soten sente kuandu nia hatene Maromak nia naran?
Antes sai belun ho ema ida, baibain Ita presiza hatene uluk ninia naran. Lee Tiago 4:8a, depois koʼalia hamutuk kona-ba pergunta tuirmai:
-
Jeová konvida Ita atu halo saida?
-
Oinsá mak hatene no uza Maromak nia naran, bele ajuda Ita sente besik liu ba nia?
EMA BALU DEHAN: “Iha Maromak loos ida deʼit, tan neʼe bolu Maromak ho naran saida deʼit la importante.”
-
Ita fiar katak Maromak nia naran mak Jeová ka lae?
-
Oinsá mak Ita bele esplika katak Maromak hakarak ita atu uza ninia naran?
PONTU IMPORTANTE
Jeová mak Maromak loos mesak deʼit nia naran. Nia hakarak ita atu hatene no uza naran neʼe atu ita bele hakbesik ba nia.
Rezumu
-
Tanbasá mak Jeová la hanesan ho maromak sira seluk neʼebé ema adora?
-
Tanbasá mak importante atu uza Maromak nia naran?
-
Saida mak hatudu katak Jeová hakarak Ita atu hakbesik ba nia?
BUKA-HATENE LIUTÁN
Lee kona-ba evidénsia lima neʼebé hatudu katak Maromak iha duni.
Haree tanbasá la susar demais atu fiar katak Maromak sempre iha husi uluk kedas.
Aprende tanbasá ita tenke uza Maromak nia naran maski ita la hatene oinsá ema iha tempu uluk temi ninia naran.
Maski Bíblia uza títulu oioin atu koʼalia kona-ba Maromak, maibé haree toʼok tanbasá ita bele dehan nia iha naran rasik.
a Atu hetan informasaun liután kona-ba signifikadu husi Maromak nia naran no tanbasá tradusaun Bíblia balu la uza naran neʼe, haree Apéndise A4 husi Bíblia Sagrada Tradusaun Mundu Foun.
Karik Ita sei gosta
PERGUNTA SIRA NEʼEBÉ BAIBAIN EMA HUSU
Kursu Bíblia hanesan saida mak Testemuña ba Jeová oferese?
Ita bele uza tradusaun Bíblia naran deʼit atu halaʼo kursu Bíblia interativu ho Testemuña ba Jeová ho gratuitu. Bele mós konvida Ita-nia kolega no família tomak atu estuda hamutuk.
