LISAUN 11
Saida mak Ita bele halo atu hetan benefísiu husi lee Bíblia?
Imajina toʼok Ita atu hamoos toʼos neʼebé boot, no Ita la hatene atu hahú husi neʼebé. Atu halo fasil, karik Ita fahe serbisu neʼe ba parte kiʼik-kiʼik. Hanesan neʼe mós ho lee Bíblia. Karik Ita hanoin, ‘Haʼu sei komesa husi neʼebé?’ Iha lisaun neʼe, Ita sei haree buat balu neʼebé bele ajuda Ita sente kontente bainhira lee no estuda Bíblia.
1. Tanbasá mak Ita presiza lee beibeik Bíblia?
Ema neʼebé lee beibeik Bíblia, ka “Jeová nia ukun-fuan”, sei sente kontente no hetan susesu. (Lee Salmo 1:1-3.) Ita bele komesa hodi lee Bíblia ba minutu balu loroloron. Kuandu Ita sai toman ona atu lee beibeik, Ita-nia kontente mós sei aumenta liután bainhira lee Bíblia.
2. Saida mak bele ajuda Ita atu hetan benefísiu husi lee Bíblia?
Atu hetan benefísiu husi lee Bíblia, Ita presiza pauza no hanoin kleʼan ka “medita” kona-ba buat neʼebé Ita lee daudaun. (Josué 1:8) Nuʼudar Ita lee, husu pergunta ba Ita-nia an hanesan: ‘Neʼe hanorin saida mai haʼu kona-ba Jeová? Oinsá mak haʼu bele aplika ida-neʼe iha haʼu-nia moris? Oinsá mak haʼu bele uza ida-neʼe atu ajuda ema seluk?’
3. Oinsá mak Ita bele fahe tempu atu lee Bíblia?
Ita sente susar hodi buka tempu atu lee Bíblia ka lae? Sin, ita barak sente nuneʼe. Koko atu ‘uza didiʼak Ita-nia tempu’. (Éfeso 5:16) Ita bele hili tempu neʼebé espesífiku atu lee Bíblia loroloron. Ema balu uza tempu atu lee Bíblia iha dadeer-saan. No ema balu tan buka tempu seluk, karik meiudia iha tempu deskansa. Ema seluk lee Bíblia iha kalan antes toba. Tempu saida mak diʼak liu ba Ita atu lee Bíblia?
KEʼE KLEʼAN
Aprende oinsá Ita bele haburas hakarak atu lee Bíblia. Haree oinsá Ita bele prepara ho didiʼak atu bele hetan benefísiu husi Ita-nia estudu Bíblia.
Kuandu han beibeik hahán neʼebé ita nunka han, ikusmai ita sei gosta. Ita mós bele aprende atu gosta lee Bíblia
4. Buat neʼebé Ita bele halo hodi haburas hakarak atu lee Bíblia
Karik susar atu komesa lee Bíblia. Maibé ita bele “haburas hakarak” atu halo ida-neʼe. Neʼe hanesan han beibeik hahán neʼebé ita nunka han, no neineik-neineik ita sei gosta. Lee 1 Pedro 2:2, depois koʼalia hamutuk kona-ba pergunta tuirmai:
-
Tuir Ita-nia hanoin se Ita lee Bíblia loroloron, Ita sei sente kontente no hakarak liután atu lee ka lae?
Loke VÍDEO no haree oinsá ema balu haburas sira-nia hakarak atu lee Bíblia. Depois koʼalia hamutuk kona-ba pergunta tuirmai.
-
Iha vídeo neʼe, susar saida deʼit mak joven sira-neʼe hasoru?
-
Saida mak ajuda sira atu kontinua lee Bíblia loroloron?
-
Saida mak sira halo atu bele gosta lee Bíblia liután?
Sujestaun atu ajuda Ita komesa lee Bíblia:
-
Hili tradusaun Bíblia neʼebé diʼak no uza liafuan neʼebé fasil atu komprende. Haree Bíblia Tradusaun Mundu Foun iha Ita-nia língua.
-
Komesa atu lee parte neʼebé Ita sente Ita sei gosta liu. Sujestaun, haree tabela “Hahú lee Bíblia”.
-
Tau marka ba buat neʼebé Ita lee ona. Uza tabela “Marka eskritura neʼebé Ita lee ona” iha publikasaun neʼe.
-
Uza aplikasaun JW Library® atu bele lee no rona ba gravasaun Bíblia iha tempu naran deʼit, hodi uza Ita-nia telefone ka sasán eletróniku seluk.
-
Uza apéndise sira iha Bíblia Tradusaun Mundu Foun. Apéndise sira-neʼe inklui mapa, tabela, no glosáriu atu Ita bele gosta liután kuandu lee Bíblia.
5. Prepara antes estuda Bíblia
Lee Salmo 119:34, depois koʼalia hamutuk kona-ba pergunta tuirmai:
-
Tanbasá diʼak atu halo orasaun antes Ita lee Bíblia ka prepara ba estudu Bíblia?
Ita bele halo saida atu hetan benefísiu liután husi Ita-nia estudu? Nuʼudar Ita prepara lisaun sira, koko toʼok sujestaun tuirmai:
-
Lee parágrafu sira husi lisaun nia parte primeiru.
-
Lee didiʼak eskritura sira, no koko atu komprende oinsá mak neʼe liga ho informasaun.
-
Tau marka ba pontu ka fraze importante sira atu hatán ba pergunta ida-idak. Neʼe sei ajuda Ita atu halaʼo diskusaun ho ema neʼebé estuda ho Ita.
Ita hatene ka lae?
Testemuña ba Jeová uza ona tradusaun Bíblia oioin. Maski nuneʼe, ami gosta tebes Bíblia Sagrada Tradusaun Mundu Foun tanba tradús ho loloos, fasil atu komprende no uza Maromak nia naran.—Haree informasaun iha jw.org/tdt, “Testemuña ba Jeová uza deʼit sira-nia tradusaun Bíblia ka lae?”
EMA BALU DEHAN: “Haʼu kole no la iha tempu atu lee no estuda Bíblia.”
-
Ita hanoin oinsá kona-ba estuda Bíblia?
PONTU IMPORTANTE
Atu bele hetan benefísiu husi Bíblia, Ita presiza fahe tempu atu lee Bíblia, halo orasaun atu bele komprende buat neʼebé Ita lee, no prepara ba Ita-nia estudu Bíblia.
Rezumu
-
Saida deʼit mak bele ajuda Ita atu hetan benefísiu husi Bíblia?
-
Bainhira mak Ita rasik bele uza tempu atu lee no estuda Bíblia?
-
Tanbasá diʼak atu prepara ba Ita-nia estudu Bíblia?
BUKA-HATENE LIUTÁN
Haree toʼok sujestaun balu neʼebé bele ajuda Ita hetan benefísiu husi lee Bíblia.
“Lee Bíblia lori benefísiu ba Ita” (Livru Haklaken No. 1 2017)
Aprende dalan tolu oinsá atu lee Bíblia.
“Oinsá mak Bíblia bele ajuda haʼu?—Parte 1: Deskobre Ita-nia Bíblia” (Informasaun iha jw.org/tdt)
Buka-hatene liután oinsá ita bele sente kontente bainhira lee Bíblia.
Haree sujestaun balu husi ema neʼebé iha esperiénsia barak ona kona-ba lee no estuda Bíblia.
Karik Ita sei gosta
PERGUNTA SIRA NEʼEBÉ BAIBAIN EMA HUSU
Kursu Bíblia hanesan saida mak Testemuña ba Jeová oferese?
Ita bele uza tradusaun Bíblia naran deʼit atu halaʼo kursu Bíblia interativu ho Testemuña ba Jeová ho gratuitu. Bele mós konvida Ita-nia kolega no família tomak atu estuda hamutuk.
