LISAUN 16
Saida mak Jesus halo bainhira iha rai?
Ema barak imajina Jesus nuʼudar kosok-oan ida, profeta ida neʼebé matenek, ka mane ida neʼebé ema oho. Maibé ita bele aprende liután kona-ba nia hodi buka-hatene saida mak nia halo bainhira nia iha rai. Iha lisaun neʼe, ita sei haree buat importante balu neʼebé Jesus halo no oinsá ida-neʼe kona Ita.
1. Serbisu importante liu neʼebé Jesus halo mak saida?
Serbisu importante liu neʼebé Jesus halo mak ‘haklaken liafuan diʼak kona-ba Maromak nia Ukun’. (Lee Lucas 4:43.) Nia haklaken liafuan diʼak katak Maromak sei harii ukun, ka governu ida neʼebé sei rezolve ema nia problema hotu. a Jesus fahe mensajen diʼak ho badinas durante tinan tolu ho balu.—Mateus 9:35.
2. Milagre neʼebé Jesus halo hatudu saida?
Bíblia dehan katak ‘Maromak halo milagre, sinál no buat kmanek oioin liuhusi Jesus’. (Apóstolu 2:22) Ho Maromak nia forsa, Jesus bele kontrola klima, fó han ema rihun ba rihun, kura ema moras, no halo ema mate moris fali. (Mateus 8:23-27; 14:15-21; Marcos 6:56; Lucas 7:11-17) Milagre sira neʼebé Jesus halo hatudu ho klaru katak Jeová mak haruka nia mai, no Jeová iha kbiit atu rezolve ita-nia problema hotu.
3. Saida mak ita bele aprende husi dalan neʼebé Jesus halaʼo ninia moris?
Jesus halo tuir Jeová iha situasaun hotu. (Lee João 8:29.) Maski iha kontradór barak, Jesus nafatin laran-metin hodi halo tuir ninia aman nia hakarak toʼo nia mate. Nia prova katak ema bele duni serbí Maromak maski hasoru situasaun neʼebé susar. Jesus hatudu ‘ezemplu ba ita atu laʼo tuir ninia ain-fatin ho didiʼak’.—1 Pedro 2:21.
KEʼE KLEʼAN
Aprende kona-ba oinsá mak Jesus haklaken liafuan diʼak no halo milagre oioin.
4. Jesus haklaken liafuan diʼak
Jesus laʼo dook kilómetru atus ba atus atu haklaken liafuan diʼak ba ema hotu neʼebé nia hasoru. Lee Lucas 8:1, depois koʼalia hamutuk kona-ba pergunta tuirmai:
-
Bainhira haklaken, Jesus hein deʼit ba ema atu hakbesik no rona ba nia ka lae?
-
Saida mak Jesus halo atu bele hetan ema?
Maromak fó-hatene nanis katak Mesias sei haklaken liafuan diʼak. Lee Isaias 61:1, 2, depois koʼalia hamutuk kona-ba pergunta tuirmai:
-
Oinsá mak Jesus kumpre profesia neʼe?
-
Tuir Ita-nia hanoin, ema ohin loron presiza rona liafuan diʼak neʼe ka lae?
5. Jesus hanorin lisaun neʼebé iha folin-boot
Jesus mós hanorin lisaun barak neʼebé bele ajuda ema. Haree toʼok ezemplu balu husi ninia diskursu iha foho. Lee Mateus 6:14, 34 no 7:12, depois koʼalia hamutuk kona-ba pergunta tuirmai:
-
Lisaun saida deʼit mak Jesus hanorin iha versíkulu sira-neʼe?
-
Tuir Ita-nia hanoin, ninia hanorin sira-neʼe bele ajuda ita ohin loron ka lae?
6. Jesus halo milagre oioin
Jeová fó kbiit ba Jesus atu halo milagre barak. Atu haree ezemplu ida, lee Marcos 5:25-34 ka loke VÍDEO. Depois koʼalia hamutuk kona-ba pergunta tuirmai.
-
Iha vídeo neʼe, feto neʼebé moras fiar saida?
-
Saida mak Ita gosta husi milagre neʼe?
Lee João 5:36, depois koʼalia hamutuk kona-ba pergunta tuirmai:
-
Jesus nia milagre sira “fó sasin”, ka hatudu saida kona-ba nia?
Ita hatene ka lae?
Buat barak neʼebé ita hatene kona-ba Jesus mai husi livru haat iha Bíblia neʼebé bolu nuʼudar Evanjellu, neʼe mak livru Mateus, Marcos, Lucas, no João. Hakerek-naʼin ida-idak esplika buat oioin kona-ba Jesus. Informasaun husi livru haat neʼe kompleta malu atu ita bele komprende didiʼak kona-ba Jesus nia moris.
-
MATEUS
mak hakerek uluk Evanjellu primeiru. Nia koʼalia barak kona-ba Jesus nia hanorin sira, liuliu hanorin kona-ba Maromak nia Ukun.
-
MARCOS
hakerek Evanjellu neʼebé badak liu. Maski nuneʼe, nia konta kona-ba akontesimentu barak.
-
LUCAS
hakerek katak orasaun mak importante ba Jesus no fó-hatene oinsá Jesus hatudu hahalok diʼak ba feto sira.
-
JOÃO
fó sai buat barak neʼebé Jesus koʼalia ba ninia belun sira no ema seluk. Neʼe ajuda ita komprende Jesus mak ema hanesan saida.
EMA BALU DEHAN: “Jesus mak profeta baibain deʼit.”
-
Ita hanoin oinsá?
PONTU IMPORTANTE
Jesus haklaken kona-ba Maromak nia Ukun, halo milagre oioin, no halo tuir Maromak Jeová iha situasaun hotu.
Rezumu
-
Serbisu importante liu neʼebé Jesus halo iha rai mak saida?
-
Milagre sira neʼebé Jesus halo hatudu saida?
-
Jesus hanorin lisaun saida deʼit mai ita?
BUKA-HATENE LIUTÁN
Jesus haklaken liuliu kona-ba saida?
“Maromak nia Reinu—Tansá mak Jesus hafolin tebes?” (Livru Haklaken, 1 Outubru 2014)
Tanbasá ita bele fiar katak milagre neʼebé Jesus halo akontese duni.
“Saida mak ita bele aprende husi Jesus nia milagre?” (Livru Haklaken, 15 Jullu 2004)
Haree oinsá mane ida troka ninia moris bainhira nia aprende katak Jesus hanoin tebes ema.
“Uluk haʼu hanoin deʼit haʼu-nia an” (Livru Haklaken, 1 Outubru 2014)
Haree lista kronolójiku kona-ba atividade oioin neʼebé Jesus halo durante ninia serbisu haklaken.
a Lisaun 31-33 sei esplika didiʼak kona-ba Maromak nia Ukun.
Karik Ita sei gosta
PERGUNTA SIRA NEʼEBÉ BAIBAIN EMA HUSU
Kursu Bíblia hanesan saida mak Testemuña ba Jeová oferese?
Ita bele uza tradusaun Bíblia naran deʼit atu halaʼo kursu Bíblia interativu ho Testemuña ba Jeová ho gratuitu. Bele mós konvida Ita-nia kolega no família tomak atu estuda hamutuk.
