LISAUN 42
Saida mak Bíblia hatete kona-ba klosan no kaben-naʼin?
Iha kultura balu, ema hanoin katak sira tenkesér kaben atu bele moris kontente. Maski nuneʼe, laʼós kaben-naʼin hotu mak kontente no klosan hotu la kontente. Tuir loloos, Bíblia dehan katak moris nuʼudar klosan no mós kaben-naʼin mak prezente husi Maromak.
1. Moris nuʼudar klosan lori benefísiu saida?
Bíblia hatete: “Ema neʼebé kaben halo desizaun neʼebé diʼak, maibé ema neʼebé la kaben halo desizaun neʼebé diʼak liután.” (Lee 1 Korinto 7:32, 33, 38.) Oinsá moris klosan mak “desizaun neʼebé diʼak liután”? Ema Kristaun neʼebé sei klosan la presiza hanoin barak tanba nia la iha pár atu tau matan. Tan neʼe, baibain sira iha liberdade barak liu. Porezemplu, sira balu bele aumenta sira-nia serbisu haklaken iha dalan oioin, hanesan bá rai seluk atu haklaken liafuan diʼak. Importante liu mak, sira bele fahe tempu barak atu hakbesik liután ba Jeová.
2. Kaben tuir lei lori benefísiu saida?
Hanesan ho moris nuʼudar klosan, moris nuʼudar kaben-naʼin mós lori benefísiu. Bíblia hatete katak “ema naʼin-rua diʼak liu fali naʼin-ida”. (Eclesiastes 4:9) Liafuan neʼe aplika liuliu ba ema Kristaun sira neʼebé halo tuir Bíblia nia prinsípiu iha sira-nia moris kaben nian. Feen-laʼen neʼebé kaben tuir lei halo ona juramentu atu hadomi malu, respeitu malu, no hafolin malu. Rezultadu mak sira bele sente seguru no moris hakmatek duké hela hamutuk deʼit maibé la kaben, no sira-nia oan mós sei sente seguru.
3. Saida mak Jeová nia haree kona-ba moris kaben nian?
Bainhira Jeová halaʼo kazamentu primeiru, nia hatete: “Mane ida sei husik ninia inan-aman no nia sei hela hamutuk ho ninia feen.” (Génesis 2:24) Jeová hakarak laʼen no feen atu hadomi malu no moris hamutuk toʼo mate mak haketak sira. Nia fó lisensa ba ema atu soe malu ka divórsiu só deʼit se ninia pár halo adultériu. Iha situasaun hanesan neʼe, Jeová fó direitu ba ida neʼebé la halo sala hodi bele deside atu divórsiu ka lae. a (Mateus 19:9) Jeová la simu poligamia ka kaben ho feen ka laʼen barak.—1 Timóteo 3:2.
KEʼE KLEʼAN
Aprende oinsá mak Ita bele moris kontente no halo Jeová kontente nuʼudar klosan ka kaben-naʼin.
4. Uza didiʼak situasaun nuʼudar klosan
Jesus haree moris nuʼudar klosan mak prezente ida. (Mateus 19:11, 12) Lee Mateus 4:23, depois koʼalia hamutuk kona-ba pergunta tuirmai:
-
Oinsá mak Jesus uza didiʼak ninia situasaun nuʼudar klosan atu serbí ninia Aman no ajuda ema seluk?
Hanesan ho Jesus, ema Kristaun neʼebé klosan bele uza didiʼak sira-nia tempu no moris kontente. Loke VÍDEO, depois koʼalia hamutuk kona-ba pergunta tuirmai.
-
Oinsá mak ema Kristaun neʼebé klosan bele uza didiʼak sira-nia situasaun neʼe?
Ita hatene ka lae?
Bíblia la fó sai idade mínimu ba ema atu kaben. Maibé Bíblia anima joven sira atu hein toʼo “liu ona tempu foin-saʼe nian”, katak tempu neʼebé hakarak seksuál mak makaʼas no halo susar ba sira atu halo desizaun diʼak kona-ba kaben.—1 Korinto 7:36.
5. Hili didiʼak Ita-nia pár
Hili Ita-nia pár mak desizaun importante ida iha Ita-nia moris. Lee Mateus 19:4-6, 9, depois koʼalia hamutuk kona-ba pergunta tuirmai:
-
Tanbasá mak ema Kristaun ida labele ansi atu halo desizaun kona-ba kaben?
Bíblia bele ajuda Ita buka ema neʼebé hatudu hahalok diʼak nuʼudar Ita-nia kaben. No buat neʼebé importante liu mak buka pár neʼebé hadomi Jeová. b Lee 1 Korinto 7:39 no 2 Korinto 6:14. Depois koʼalia hamutuk kona-ba pergunta tuirmai:
-
Tanbasá ita tenke kaben ho maluk Kristaun deʼit?
-
Tuir Ita-nia hanoin, Jeová sente oinsá se ita kaben ho ema neʼebé la hadomi Nia?
Se animál rua neʼebé la hanesan lori ai-leba hamutuk, sira sei hasoru susar. Nuneʼe mós, ema Kristaun neʼebé kaben ho ema neʼebé fiar la hanesan sei hasoru problema barak
6. Haree moris kaben nian tuir Jeová nia haree
Iha Izraél antigu, mane balu soe sira-nia feen ho razaun neʼebé hanoin an deʼit. Lee Malaquias 2:13, 14, 16, depois koʼalia hamutuk kona-ba pergunta tuirmai:
-
Tanbasá mak Jeová odi soe malu ho razaun la loos?
Adultériu no divórsiu sei halo pár neʼebé la halo sala no oan sira sente laran-kanek
Loke VÍDEO, depois koʼalia hamutuk kona-ba pergunta tuirmai.
-
Se Ita-nia kaben nia fiar la hanesan ho Ita, saida mak Ita bele halo atu bele halaʼo moris kaben nian ho kontente?
7. Halo tuir Jeová nia matadalan kona-ba kaben
Karik ema balu presiza hakaʼas an tebes atu bele moris tuir Jeová nia matadalan kona-ba kaben. c Maibé Jeová fó bensaun ba ema neʼebé halo nuneʼe. Loke VÍDEO.
Lee Ebreu 13:4, depois koʼalia hamutuk kona-ba pergunta tuirmai:
-
Tuir Ita-nia hanoin, susar ka lae atu halo tuir Jeová nia matadalan kona-ba kaben? Tanbasá?
Jeová hakarak ema Kristaun atu rejistu sira-nia kazamentu ka divórsiu hodi tuir nasaun ida-idak nia lei. Lee Tito 3:1, depois koʼalia hamutuk kona-ba pergunta tuirmai:
-
Se Ita mak kaben-naʼin, Ita kaben ona tuir governu nia lei ka lae?
KARIK EMA SEI HUSU: “Tanbasá mak presiza rejistu kazamentu? Moris hamutuk deʼit mós diʼak, loos ka lae?”
-
Ita sei hatán oinsá?
PONTU IMPORTANTE
Moris nuʼudar klosan no mós kaben-naʼin mak prezente husi Jeová. Maski Ita mak klosan ka kaben ona, Ita bele moris kontente se Ita halo tuir Jeová nia hakarak.
Rezumu
-
Oinsá mak ema neʼebé klosan bele uza didiʼak ninia situasaun neʼe?
-
Tanbasá mak Bíblia haruka ita atu kaben deʼit ho maluk Kristaun?
-
Bíblia fó razaun ida deʼit atu ema bele halo divórsiu, neʼe mak saida?
BUKA-HATENE LIUTÁN
Kaben deʼit “iha Naʼi” katak sá?
Haree drama kiʼik rua neʼebé bele ajuda Ita atu halo desizaun diʼak kona-ba namora no kaben.
Buka-hatene tanbasá mak irmaun ida sente katak Jeová fó ba nia buat neʼebé folin-boot liu se kompara ho buat neʼebé nia husik ona.
Saida deʼit mak ema ida presiza hanoin antes atu halo planu kona-ba soe malu ka haketak malu?
“Hatudu respeitu ba ‘buat neʼebé Maromak tau hamutuk’” (Livru Haklaken, Dezembru 2018)
a Haree Apéndise 4 kona-ba haketak malu entre feen-laʼen neʼebé la halo adultériu.
b Iha kultura balu, inan-aman mak hili ema neʼebé atu kaben ho sira-nia oan. Se nuneʼe, inan-aman neʼebé hadomi oan sei la hanoin uluk kona-ba osan ka situasaun moris, maibé sira hanoin se ema neʼebé sei kaben ho sira-nia oan mak hadomi Jeová ka lae.
c Se Ita moris hamutuk daudaun ho ema neʼebé seidauk sai Ita-nia kaben, atu fahe malu ho ema neʼe ka kaben tuir lei mak Ita rasik nia desizaun.
Karik Ita sei gosta
PERGUNTA SIRA NEʼEBÉ BAIBAIN EMA HUSU
Kursu Bíblia hanesan saida mak Testemuña ba Jeová oferese?
Ita bele uza tradusaun Bíblia naran deʼit atu halaʼo kursu Bíblia interativu ho Testemuña ba Jeová ho gratuitu. Bele mós konvida Ita-nia kolega no família tomak atu estuda hamutuk.
