“Ema neʼebé hateke ba feto ida hodi kaan nia, nia halo ona sala-foʼer ho nia iha nia laran.”—Mateus 5:28.

TANBASÁ MAK IDA-NEʼE IMPORTANTE?

Ohin loron pornografia mak barak liu no fasil liu atu hetan se kompara ho tempu uluk. Se ita hakarak halo kontente Maromak no hakarak iha moris neʼebé kontente, ita tenke hatene saida mak Maromak nia hanoin kona-ba pornografia.

BUAT NEʼEBÉ BÍBLIA HANORIN

Maski Bíblia la temi kona-ba pornografia, maibé ida-neʼe kontra Bíblia nia matadalan.

Bíblia hatete momoos katak kuandu mane “hateke ba feto ida” neʼebé laʼós nia kaben, no hakarak atu halo relasaun seksuál ho nia, ida-neʼe bele halo nia monu ba sala-foʼer. Bíblia nia konsellu neʼe ba ema ida-idak, inklui kaben-naʼin no klosan, neʼebé haree ba pornografia. Klaru katak Maromak la gosta hahalok hanesan neʼe.

“Neʼe duni, imi sei oho hakarak rai neʼe nian neʼebé book imi-nia laran, hanesan sala-foʼer, hanoin foʼer, hakarak foʼer, laran-aat, laran karak-teen.”—Koloso 3:5.

 BUAT NEʼEBÉ EMA HANOIN

Matenek-naʼin balu la fiar katak pornografia bele book ema atu halo sala-foʼer. Maibé hodi haree deʼit pornografia, neʼe problema ka lae?

BUAT NEʼEBÉ BÍBLIA HANORIN

Bíblia hatete katak Maromak la gosta “lia-foʼer”. (Efeso 5:3, 4) Entaun se Maromak la gosta lia-foʼer, sá tan ho pornografia? Ohin loron, pornografia inklui vídeo sira kona-ba ema neʼebé halo sala-foʼer, mane ho mane ka feto ho feto, no sala-foʼer seluk tan. Klaru katak hodi haree buat sira-neʼe, neʼe halo Maromak la kontente.

Ema neʼebé halo peskiza, iha hanoin oioin se pornografia bele book ema atu halo sala-foʼer ka lae. Maibé Bíblia hatudu katak Maromak la gosta neʼe tanba ida-neʼe bele estraga ema nia relasaun ho Maromak. Bíblia fó avizu hodi dehan: “Neʼe duni, imi sei oho hakarak . . . neʼebé book imi-nia laran, hanesan sala-foʼer, [no] hakarak foʼer.” (Koloso 3:5) Maibé kuandu ema haree pornografia, sira la oho hakarak sira-neʼe, maibé sira haburas hakarak neʼe.

“Buka ba buat neʼebé diʼak, no laʼós buat neʼebé aat . . . Odi buat neʼebé aat, no hadomi buat neʼebé diʼak.”—Amós 5:14, 15.

BUAT NEʼEBÉ BÍBLIA HANORIN

Bíblia hatete katak ema neʼebé uluk halo sala-foʼer, lanu-teen no naʼok-teen, sira konsege troka sira-nia hahalok. (1 Korinto 6:9-11) Maibé oinsá? Sira halo tuir matenek neʼebé mai husi Maromak nia Liafuan, no sira mós aprende atu odi buat neʼebé aat.

Hodi hanoin rezultadu aat kona-ba pornografia, neʼe bele halo ema aprende atu odi toman aat neʼe. Relatóriu ida husi universidade ida (Utah State University) hatudu katak ema neʼebé haree pornografia hasoru problema hanesan “depresaun, hakarak mesak deʼit, estraga sira-nia relasaun ho ema seluk”, no rezultadu aat seluk tan. Liután neʼe, hanesan temi tiha ona, Maromak la gosta ema haree pornografia no ida-neʼe bele halo susar ba ema atu sai Maromak nia belun.

Bíblia ajuda ita atu hadomi buat neʼebé loos. Kuandu ita lee Bíblia, Ita-nia domin ba buat neʼebé loos sei aumenta liután. Domin neʼe sei ajuda ita atu hamriik metin hodi odi pornografia, no sente hanesan ema neʼebé hakerek salmu ida. Nia hatete: “Haʼu sei la tau iha haʼu-nia oin buat neʼebé la iha folin.”—Salmo (Mazmur) 101:3.