BÍBLIA hakerek kompletu ona iha tinan 98 liutiha Kristu. Maibé doutrina Trindade komesa hahú nuʼudar igreja nia hanorin iha tinan 325 liutiha Kristu, iha sidade Niseia, ohin loron sidade neʼe mak Iznik, iha rai-Turkia. Tuir livru New Catholic Encyclopedia, naʼi-ulun sira iha igreja halibur iha Niseia, no iha enkontru boot neʼe mak sira fó sai hanorin ofisiál, inklui mós hanorin kona-ba Maromak no Kristu. Entaun, tanbasá mak sira presiza fó sai igreja nia hanorin maski sira iha Bíblia ona? Ida-neʼe tanba Bíblia nia hanorin mak ladún klaru ka lae?

Kuandu liurai Constantino mak ukun rai-Roma, ema neʼebé temi sira-nia an nuʼudar ema kristaun besik ona atu fahe malu tanba la iha hanoin ida deʼit. Porezemplu, sira iha hanoin oioin ba pergunta hanesan: Jesus mak Maromak ka lae? Maromak mak kria Jesus ka lae? Atu rezolve problema neʼe, liurai Constantino halibur ulun-naʼin igreja sira iha sidade Niseia. Maibé nia halo ida-neʼe laʼós atu buka-hatene lia-loos, maibé tanba nia lakohi husik relijiaun atu hafahe ninia povu.

Constantino husu bispu sira atu iha hanorin ida deʼit, maibé sira la hatán ba malu. Tuirmai, Constantino fó ideia katak sira bele halo hanorin kona-ba Jesus sai ladún klaru ba povu baibain, hodi hatete katak Jesus mak “substánsia ida deʼit” ka “natureza ida deʼit” (homoousios) ho Aman. Liafuan neʼe, neʼebé ema uza ba filozofia gregu nian, mak sai nuʼudar hun ba Trindade, neʼebé ikusmai sai doutrina ofisiál. No antes toʼo tinan 400 liutiha Kristu, doutrina Trindade sai metin hanesan ita rona ohin loron, hodi inklui mós espíritu santu nuʼudar parte husi Maromak.

Jesus hatete: “Ema neʼebé adora loloos sei adora Aman tuir . . . lia-loos.” (Joao 4:23) Lia-loos neʼe mak iha Bíblia laran. (Joao 17:17) Bíblia hanorin katak Aman, Oan, no espíritu santu mak Maromak ida deʼit ka lae?

 Ulukliu, ita la hetan liafuan “Trindade” iha Bíblia laran. Jesus mós nunka hatete katak nia hanesan Maromak. Duké hatete nuneʼe, Jesus adora Maromak. (Lucas 22:41-44) Diʼak mós atu ita hanoin kona-ba Jesus nia relasaun ho ninia dixípulu sira. Durante tempu neʼebé Jesus iha rai no mós depois nia moris hiʼas fali, nia bolu ninia dixípulu sira nuʼudar ‘haʼu-nia alin sira’. (Mateus 28:10) Hanoin toʼok, Jesus nia dixípulu sira mak Maromak nia alin ka lae? Lae, sira mak hanesan Maromak nia oan! Liuhusi fiar ba Kristu nuʼudar Maromak nia Oan-Boot, sira mós sai oan ba Aman ida deʼit. (Galasia 3:26) Agora, mai ita haree eskritura balu tan hodi kompara ho Desizaun Niseia nian.

Desizaun Niseia nian dehan:

“Ita fiar Naʼi ida deʼit Jesus Kristu, . . . Maromak husi Maromak, naroman husi naroman, Maromak loos husi Maromak loloos.”

Bíblia hatete:

• “Aman boot liu fali haʼu [Jesus].”—Joao 14:28.

• “Haʼu [Jesus] saʼe ba haʼu-nia Aman no imi-nia Aman; ba haʼu-nia Maromak no imi-nia Maromak.”—Joao 20:17.

• “Ita iha Maromak mesak ida deʼit, Aman.”—1 Korinto 8:6.

• “Kmanek ba Maromak, ita Naʼi Jesus Kristu nia Aman.”—1 Pedro 1:3.

• “Neʼe mak lia-menon Amen [Jesus] nian, . . . Maromak nia kriatura sira-nia hun loloos.”—Apokalipse 3:14. *