“Maromak hakarak katak imi sei sai . . . moos tebetebes husi sala-foʼer.”—1 Tesalonika 4:3.

BUAT NEʼEBÉ EMA HANOIN

Iha rai balu, ema barak hanoin katak la sala atu halo relasaun seksuál kuandu sira-nia tinan toʼo ona no se sira rua mak hakarak. Iha rai balu tan, ema hanoin katak la sala ba joven naʼin-rua neʼebé seidauk kaben atu hatudu domin ba malu iha dalan seksuál.

BUAT NEʼEBÉ BÍBLIA HANORIN

Tuir Bíblia, “sala-foʼer” mak hahalok seksuál neʼebé ema ida halo ba ida neʼebé laʼós ninia kaben. Maromak hakarak ita atu sai “moos tebetebes husi sala-foʼer”. (1 Tesalonika 4:3) Relasaun seksuál antes kaben mak sala neʼebé boot, hanesan halo sala-foʼer ho ema seluk nia kaben, adora lulik, bá matan-dook, hemu-lanu, oho ema, no naʼok. —1 Korinto 6:9, 10; Apokalipse 21:8.

TANBASÁ MAK IDA-NEʼE IMPORTANTE BA ITA

Bíblia hatete katak “Maromak sei tesi lia ba sira neʼebé halo sala-foʼer”. (Ebreu 13:4) Liután neʼe, hodi halo tuir Maromak Jeová nia ukun-fuan kona-ba morál, ita bele hatudu katak ita hadomi nia. (1 Joao 5:3) Maromak sei haraik bensaun ba ema neʼebé halo tuir ninia ukun-fuan.—Isaías (Yesaya) 48:18.

“Keta husik ema ida iha imi leet temi sala-foʼer eh buat foʼer tomak, eh laran karak-teen nian.”—Efeso 5:3.

BUAT NEʼEBÉ EMA HANOIN

Ema barak fiar katak sala ba mane ho feto neʼebé seidauk kaben atu toba hamutuk, maibé sira sente katak la sala atu sira kaer malu iha dalan seksuál hodi hatudu domin ba malu.

BUAT NEʼEBÉ BÍBLIA HANORIN

Bíblia hatete laʼós deʼit katak ita labele halo sala-foʼer, maibé mós katak ita tenke hasees an husi “moris naranaran deʼit”, ka hahalok arbiru deʼit. (2 Korinto 12:21) Klaru katak ita presiza sees husi hahalok sira neʼebé halo Maromak la kontente, maski neʼe laʼós relasaun seksuál.

Tuir Bíblia, feen no laʼen deʼit mak bele hatudu domin ba malu iha dalan seksuál. Bíblia mós haruka ita atu labele iha “laran-foʼer”. (1 Tesalonika 4:5) Neʼe katak sá? Hanoin toʼok ezemplu ida-neʼe: Mane ida ho ninia namora, sira fiar katak sira labele toba hamutuk antes kaben. Maibé, sira kaer malu iha dalan seksuál hodi haburas sira-nia hakarak atu halo buat neʼebé tuir loloos sira seidauk bele. Ho ida-neʼe, sira husik sira-nia laran sai “foʼer”, ka kaan haksolok seksuál nian. Bíblia bandu hahalok kaan ba buat seksuál nian.—Efeso 5:3-5.

“Hadook an husi sala-foʼer!”—1 Korinto 6:18.

TANBASÁ MAK IDA-NEʼE IMPORTANTE BA ITA

Tuir Bíblia, halo hahalok seksuál antes kaben bele halo ita lakon ita-nia relasaun diʼak ho Maromak.—Koloso 3:5, 6.

BUAT NEʼEBÉ BÍBLIA HANORIN

Bíblia haruka ita atu “hadook an husi sala-foʼer”. (1 Korinto 6:18) Ida-neʼe katak ita presiza hasees an husi buat naran deʼit neʼebé book ita atu halo sala seksuál nian. (Provérbios [Amsal] 22:3) Porezemplu, atu bele moos nafatin iha dalan morál, importante ba ita atu la ransu beibeik ho ema neʼebé la hafolin Maromak nia matadalan kona-ba morál. Bíblia fó avizu: “Ema neʼebé laʼo hamutuk ho ema matenek sei sai matenek, maibé ema neʼebé hamutuk ho ema beik sira sei hetan buat aat.”—Provérbios 13:20.

Se ita hanoin nafatin kona-ba buat neʼebé la tuir morál, ida-neʼe mós bele lori ita ba hahalok sala. (Roma 8:5, 6) Tan neʼe, importante atu hasees an husi múzika, filme, dezeñu, ka buat sira seluk neʼebé hatudu hahalok seksuál iha dalan sala ka book ema atu halo hahalok neʼebé Maromak la simu.—Salmo (Mazmur) 101:3.