Ita-nia kaben dehan: “Ó la rona haʼu!” Maibé karik Ita hanoin iha Ita-nia laran: “Ohin haʼu rona duni.” Maski nuneʼe, Ita-nia kaben sente buat neʼebé Ita foin rona mak laʼós buat neʼebé nia foin hatete. Tan neʼe, imi komesa istori malu fali.

Tuir loloos, ita bele duni atu hasees an husi problema sira-neʼe. Maibé ulukliu, Ita presiza hatene tansá mak dala ruma susar atu rona didiʼak ba buat importante balu neʼebé Ita-nia kaben fó sai, maski Ita hanoin katak Ita rona ona ba Ita-nia kaben.

Buat ruma dada ita-nia atensaun ka Ita sente kole. Hanoin toʼok kona-ba situasaun neʼe: Labarik sira hakilar daudaun, televizaun nia lian makaʼas, no Ita hanoin hela kona-ba problema neʼebé Ita hasoru iha serbisu-fatin. Iha tempu neʼe Ita-nia kaben hahú koʼalia ba Ita, karik nia koʼalia ba Ita kona-ba bainaka neʼebé sei mai Ita-nia uma kalan neʼe. Ita doko ulun no dehan: “Diʼak”, maibé neʼe katak Ita rona didiʼak ba buat neʼebé Ita-nia kaben koʼalia ka lae? Karik lae.

Karik Ita lalais atu hanoin sala ba Ita-nia kaben nia liafuan. Ita hanoin katak ita-nia kaben nia liafuan duun Ita, maibé realidade mak Ita-nia hanoin mak la loos. Porezemplu, Ita-nia kaben dehan: “Ó uza tempu barak liu atu halo serbisu semana neʼe.” Ho ida-neʼe, karik Ita hanoin katak Ita-nia kaben kritika Ita, entaun Ita ho hirus dehan: “Neʼe laʼós haʼu-nia sala! Haʼu serbisu liu oras tanba ó uza osan barak liu.” Tuir loloos, Ita-nia kaben hakarak atu fó sujestaun deʼit hodi deskansa hamutuk ho família iha findesemana, maibé tanba Ita hanoin sala ba ninia liafuan, entaun nia mós komesa hakilar malu ho Ita.

Ita buka atu rezolve kedas problema. Feto ida naran Marsia * dehan: “Dala ruma haʼu hakarak atu fó sai deʼit haʼu-nia sentimentu, maibé Miguel hakarak fó-hatene haʼu kona-ba oinsá atu hadiʼa ida-neʼe. Haʼu lakohi atu hadiʼa. Haʼu hakarak nia atu hatene deʼit kona-ba oinsá haʼu sente.” Entaun, problema mak saida? Miguel nia hanoin mak atu hadiʼa kedas problema. Rezultadu mak Miguel lakon oportunidade atu rona ba buat balu ka buat hotu neʼebé Marsia hakarak fó sai.

Oinsá mak Ita bele sai ema neʼebé rona ho didiʼak?

Tau atensaun tomak. Kuandu Ita-nia kaben hakarak fó sai buat neʼebé importante, Ita prontu ona atu rona ka lae? Karik Ita hanoin hela kona-ba buat ruma. Se nuneʼe, keta finje deʼit katak Ita rona. Se bele, diʼak liu atu husik tiha buat neʼebé Ita halo daudaun no tau atensaun tomak ba Ita-nia kaben, ka karik Ita bele husu Ita-nia kaben atu hein uitoan.—Bíblia nia matadalan: Tiago 1:19.

Koʼalia hodi la hadau malu. Kuandu Ita-nia kaben koʼalia, hakaʼas an atu la teri netik ka hatudu katak Ita la simu ninia ideia. Tuir loloos, Ita sei hetan tempu atu koʼalia. Maibé agora, Ita presiza rona deʼit.—Bíblia nia matadalan: Provérbios (Amsal) 18:13.

Husu pergunta. Ida-neʼe sei ajuda Ita atu komprende diʼak liután kona-ba buat neʼebé Ita-nia kaben koʼalia. Marsia, neʼebé temi uluk, dehan: “Haʼu gosta tebes kuandu Miguel husu pergunta. Ida-neʼe hatudu katak nia hakarak atu hatene buat neʼebé haʼu dehan.”

Hakaʼas an atu komprende ninia sentimentu, laʼós rona deʼit ninia liafuan. Haree sinál neʼebé Ita-nia kaben hatudu, hanesan ninia matan, no ninia lian. Porezemplu, liafuan sira hanesan, “La buat ida” karik bele hatudu katak iha problema ruma. Tuir loloos, neʼe depende ba dalan neʼebé Ita-nia kaben koʼalia liafuan sira-neʼe. No mós liafuan hanesan “Ó nunka hakarak ajuda”, karik ida-neʼe bele hatudu katak Ita-nia kaben sente Ita la hafolin nia. Entaun, hakaʼas an atu komprende Ita-nia kaben nia sentimentu, maski ida-neʼe laʼós ho liafuan ruma. Se Ita la halo ida-neʼe, karik ikusmai Ita sei haksesuk malu deʼit kona-ba liafuan neʼebé Ita-nia kaben hatete, duké hanoin kona-ba ita-nia kaben nia sentimentu.

Rona nafatin. Kuandu Ita-nia kaben koʼalia ba Ita, Ita-nia hanoin keta ba fatin seluk no keta laʼo sees, maski Ita la gosta buat neʼebé nia fó sai. Porezemplu, oinsá se Ita-nia kaben kritika Ita? Mane ida naran Gregory, neʼebé kaben ona tinan 60, fó konsellu dehan: “Rona nafatin. Hanoin didiʼak kona-ba buat neʼebé Ita-nia kaben fó sai. Maski neʼe katak Ita presiza hakaʼas an liután, maibé ida-neʼe iha folin boot.”—Bíblia nia matadalan: Provérbios (Amsal) 18:15.

Husi laran hatudu interese ba Ita-nia kaben. Kuandu Ita rona didiʼak, neʼe laʼós deʼit dalan diʼak atu halo, maibé tuir loloos ida-neʼe hatudu katak Ita hadomi Ita-nia kaben. Kuandu Ita hatudu interese ba buat neʼebé Ita-nia kaben koʼalia, ida-neʼe sei halo fasil liu ba Ita atu rona ba nia. Hodi halo nuneʼe, Ita halo tuir Bíblia nia matadalan tuirmai neʼe: “Keta buka imi rasik nia diʼak, maibé buka uluk ema seluk nian.”—Filipe 2:4.