“Iha eskola, ema barak lakohi liga haʼu, no ida-neʼe halo haʼu sente laran-kanek. Tan neʼe, kuandu haʼu tama eskola sekundária, haʼu troka haʼu-nia hahalok no dalan neʼebé haʼu hatais, maibé laʼós ba buat diʼak. Tanba haʼu hakarak tebes joven sira iha eskola atu simu haʼu nuʼudar sira-nia kolega, haʼu halo tuir deʼit sira.”—Jennifer, tinan 16. *

Agora daudaun, Ita hasoru susar husi kolega sira ka lae? Se nuneʼe, informasaun neʼe bele ajuda Ita.

Kolega sira bele obriga Ita atu halo buat neʼebé la diʼak.

“Ransu hamutuk ho ema aat sei estraga toman diʼak.”—1 Korinto 15:33.

“Maski ita hatene ho klaru katak buat ruma sala, maibé dala ruma, ita halo deʼit tanba ita hakarak ema seluk atu simu ita.”—Dana.

Dala ruma Ita-nia an rasik mak obriga Ita atu halo buat neʼebé la diʼak.

“Bainhira haʼu hakarak halo buat neʼebé loos, buat neʼebé aat mós hamutuk ho haʼu.”—Roma 7:21.

“Dala barak haʼu-nia an rasik mak fó susar mai haʼu. Haʼu rasik mak hakarak halo buat neʼebé haʼu-nia kolega sira koʼalia no haʼu sente katak ida-neʼe sei halo haʼu kontente.”—Diana.

Kuandu Ita la halo tuir deʼit kolega sira-nia hakarak, neʼe halo Ita sente kontente.

“Kontinua iha laran neʼebé moos.”—1 Pedro 3:16.

“Uluk, susar tebes ba haʼu atu tahan hasoru susar husi kolega sira, maibé agora haʼu la taʼuk ona maski haʼu la hanesan ho sira. Tanba haʼu laran-metin ho haʼu-nia desizaun sira, haʼu bele toba diʼak iha kalan no haʼu sente haʼu iha laran neʼebé moos.”—Carla.

Kuandu kolega obriga Ita atu halo buat neʼebé la diʼak, koko toʼok atu halo buat tuirmai neʼe:

Hanoin kona-ba rezultadu. Husu ba Ita-nia an: ‘Se haʼu halo tuir deʼit kolega sira, oinsá se ema seluk hatene kona-ba neʼe? Haʼu-nia inan-aman sei hanoin saida kona-ba haʼu? Haʼu sei haree oinsá kona-ba haʼu-nia an?’—Matadalan husi Bíblia: Galásia 6:7.

“Haʼu-nia inan-aman husu haʼu pergunta hanesan: ‘Se Ita halo tuir deʼit kolega sira-nia hakarak, saida mak sei akontese ba Ita?’ Sira ajuda haʼu atu komprende katak halo tuir deʼit kolega sira bele kona haʼu-nia futuru.”—Olivia.

Hametin Ita-nia fiar. Husu ba Ita-nia an: ‘Tanbasá mak haʼu fiar katak se haʼu halo tuir deʼit haʼu-nia kolega sira, neʼe bele lori rezultadu la diʼak ba haʼu no ba ema seluk?’—Matadalan husi Bíblia: Ebreu 5:14.

“Kuandu haʼu kiʼik, haʼu dehan deʼit ‘lae’ ba haʼu-nia kolega sira ka haʼu esplika uitoan deʼit, maibé agora haʼu bele esplika ho klaru tanbasá mak haʼu bele ka la bele halo buat ruma. Haʼu-nia fiar metin kona-ba buat neʼebé loos no sala. Haʼu rasik mak fó resposta, laʼós ema seluk.”—Anita.

Hanoin kona-ba Ita mak ema oinsá. Husu ba Ita-nia an: ‘Haʼu hakarak sai ema oinsá?’ Tuirmai, hanoin kona-ba susar husi kolega neʼebé Ita hasoru daudaun no husu ba Ita-nia an: ‘Se haʼu sai ema hanesan neʼe, oinsá mak haʼu sei hasoru situasaun neʼe?’—Matadalan husi Bíblia: 2 Korinto 13:5.

“Tanba haʼu kontente ho haʼu-nia an rasik, haʼu la interese ba buat neʼebé ema seluk hanoin kona-ba haʼu. No mós, ema barak gosta haree haʼu-nia hahalok neʼebé loloos.”—Alicia.

Hanoin kona-ba futuru. Se Ita eskola hela, hanoin toʼok fulan balu ka tinan balu liutiha agora. Kolega eskola sira neʼebé Ita koko atu halo kontente agora, karik sira la importante ona iha Ita-nia moris.

“Haʼu haree ba foto eskola uluk nian, no haʼu mós haluha ona kolega eskola balun nia naran. Maibé kuandu ami sei eskola hamutuk, dala ruma haʼu mós sente katak buat neʼebé sira hatete importante ba haʼu liu fali haʼu-nia fiar. Iha tempu neʼebá, haʼu beik tebes!”—Dawn, agora tinan 22.

Prepara an. Bíblia hatete: “Hatene oinsá imi tenke hatán ba ema ida-idak.”—Koloso 4:6.

“Haʼu-nia inan-aman ajuda haʼu no haʼu-nia alin atu hanoin kona-ba situasaun oioin, no tuirmai ami halo drama kiʼik atu nuneʼe kuandu ami hasoru situasaun neʼebé tebes, ami hatene ona atu halo saida.”—Christine.