HABOOT oan mak responsabilidade boot duni. Maibé se ita baruk atu fó dixiplina ba oan, neʼe sei hatodan liután ita. Tanbasá? Tanba se ita la fó dixiplina, rezultadu mak (1) labarik sira sai nakar tebes no halo ita ulun-moras, no (2) labarik sira sai beik ka bilán tanba ita la esplika ho loloos hahalok diʼak mak saida no hahalok aat mak saida.

Maibé se ita fó dixiplina ba oan no treinu sira ho didiʼak, ida-neʼe sei ajuda sira atu iha hanoin neʼebé loos no moris tuir morál neʼebé diʼak. Ida-neʼe mós bele halo oan sira sente seguru bainhira sira sai boot. Maibé atu dixiplina oan, ita bele hetan matadalan husi neʼebé?

Ami Testemuña ba Jeová fiar metin katak Bíblia deʼit mak “diʼak atu hanorin, atu hatudu sai buat neʼebé sala, atu hadiʼa buat hotu, no atu fó dixiplina”. (2 Timóteo 3:16) Ami mós fiar Bíblia mak livru espesiál tebes, la hanesan ho livru sira seluk neʼebé fó sai ema nia hanoin no konsellu oioin ba inan-aman sira. Mai ita haree hamutuk matadalan balu husi Bíblia.

LIAFUAN HUSI BÍBLIA: “Hahalok beik mak iha oan nia laran.”—Provérbios (Amsal) 22:15.

Maski labarik sira bele hatudu laran-diʼak no hahalok diʼak neʼebé halo inan-aman kontente, maibé dala ruma sira mós bele halo hahalok neʼebé beik. Tan neʼe, sira presiza duni inan-aman fó dixiplina. (Provérbios [Amsal] 13:24) Hodi hatene realidade ida-neʼe sei ajuda ita atu halaʼo ita-nia responsabilidade nuʼudar inan-aman ho diʼak liután.

LIAFUAN HUSI BÍBLIA: “Keta dada an atu fó dixiplina ba Ita-nia oan.”—Provérbios (Amsal) 23:13.

Ita lalika taʼuk katak se ita fó dixiplina ba oan sira, neʼe sei hakanek sira-nia laran ka halo sira rai odi ba ita toʼo sira sai boot. Tanba se ita fó dixiplina ho domin no tetu didiʼak, neʼe sei ajuda oan atu aprende simu konsellu ho haraik-an. Neʼe mak hahalok  neʼebé importante tebes nuʼudar sira sai boot.—Ebreu 12:11.

LIAFUAN HUSI BÍBLIA: “Buat naran deʼit neʼebé ema kari, nia mós sei koʼa ida-neʼe.”—Galásia 6:7.

Nuʼudar inan-aman, ita hakarak duni proteje ita-nia oan, no neʼe la sala. Maibé dala ida tan, ita tenke tetu didiʼak. Bainhira oan sira halo hahalok sala, no mestre ka ema seluk fó dixiplina sira, ita labele proteje ka apoia deʼit ita-nia oan, tanba neʼe sei la lori buat diʼak ba ita-nia oan. Maibé iha situasaun hanesan neʼe, diʼak liu ita hanorin oan atu simu dixiplina neʼe. Hodi halo nuneʼe, ita-nia oan bele aprende atu hakruʼuk an ba sira neʼebé merese simu respeitu, inklui mós ita rasik nuʼudar inan-aman.—Koloso 3:20.

LIAFUAN HUSI BÍBLIA: “Labarik neʼebé husik livre deʼit sei hamoe nia inan.”—Provérbios (Amsal) 29:15.

Klaru katak ita inan-aman labele sai siʼak-teen ba oan sira no haterus sira, maibé ita mós labele husik deʼit oan sira atu halo buat naranaran deʼit tuir sira-nia hakarak. Livru ida dehan: “Labarik neʼebé nia inan-aman baruk atu fó dixiplina, nia sei la hatene katak inan-aman mak iha direitu atu kontrola buat hotu iha uma-laran.” Loos duni, ikusmai oan sira sei halo desizaun arbiru neʼebé lori susar ba sira-nia an rasik no mós ba ita.—Provérbios (Amsal) 17:25; 29:21.

LIAFUAN HUSI BÍBLIA: “Mane ida . . . sei hela ho nia feen no sira naʼin-rua sei sai isin ida deʼit.”—Mateus 19:5.

Tuir Bíblia, mane no feto tenke kaben uluklai mak bele iha oan, no toʼo oan sira sai boot no husik ona uma mós inan-aman nia moris kaben nian tenke metin ba nafatin. (Mateus 19:5, 6) Neʼe katak importante liu ba ita mak halaʼo uluk moris nuʼudar kaben-naʼin, tuirmai mak ita bele halaʼo moris nuʼudar oan-naʼin. Se ita hanoin demais kona-ba oan liu fali kona-ba ita-nia kaben, ida-neʼe bele halo oan sira hanoin sala katak sira mak “diʼak liu fali buat neʼebé loos”. (Roma 12:3) Loos duni, feen-laʼen hanesan neʼe lori perigu ba sira-nia moris kaben nian.

Atubele haboot oan ho didiʼak, Ita presiza fó dixiplina ba sira iha dalan neʼebé loos tuir matadalan sira tuirmai neʼe.

Hatudu domin. “Keta halo imi-nia oan sai hirus, atu nuneʼe sira la sai laran-tun.”​—Koloso 3:21.

Keta troka bá-mai dixiplina. “Se imi dehan ‘sin’, tenkesér sin, no ‘lae’, tenkesér lae.”​—Mateus 5:37.

Tetu didiʼak. “Haʼu sei fó ba ó dixiplina neʼebé natoon deʼit.”​—Jeremias (Yeremia) 30:11. *