ITA sente oinsá bainhira simu karta husi Ita-nia belun diʼak neʼebé anima Ita? Timóteo simu karta hanesan neʼe husi apóstolu Paulo. Ohin loron karta neʼe mak livru Segundu Timóteo. Karik Timóteo hakarak buka fatin hakmatek atu bele lee karta husi ninia belun diʼak. Karik Timóteo hanoin: ‘Paulo nia situasaun oinsá? Nia hakerek konsellu ruma neʼebé bele ajuda haʼu halaʼo haʼu-nia knaar ka lae? Karta neʼe bele ajuda haʼu kumpre haʼu-nia serbisu haklaken no ajuda ema seluk ka lae?’ Hanesan ita sei aprende, Timóteo hetan resposta ba pergunta sira-neʼe no mós hetan informasaun seluk neʼebé folin-boot. Ita sei koʼalia kona-ba konsellu balu iha Paulo nia karta neʼebé bele ajuda ita.

Bainhira Timóteo komesa lee Paulo nia karta, nia bele komprende kedas katak Paulo hadomi nia. Paulo bolu Timóteo nuʼudar “oan doben”. (2 Tim 1:2) Timóteo simu karta neʼe iha tinan 65 EC. Karik iha tempu neʼebá, Timóteo nia idade mak 30 liu no nia serbí nuʼudar katuas kongregasaun no iha esperiénsia barak ona. Nia serbisu hamutuk ho Paulo durante tinan 10 liu no nia aprende buat barak husi Paulo.

Karik Timóteo hetan laran-manas bainhira hatene katak Paulo tahan terus sira ho laran-metin. Paulo mak prizioneiru iha Roma, no lakleur tan nia sei hetan kastigu-mate. (2 Tim 1:15, 16; 4:6-8) Timóteo bele nota katak Paulo aten-brani tanba Paulo dehan: “Haʼu kontinua tahan buat hotu.” (2 Tim 2:8-13) Hanesan Timóteo, ita mós bele hetan laran-manas hodi hanoin kona-ba dalan neʼebé Paulo tahan buat hotu.

Paulo anima Timóteo atu hafolin ninia serbisu ba Maromak. Paulo hakarak Timóteo atu “halo lakan nafatin Maromak nia prezente” neʼebé nia simu ona. (2 Tim 1:6, nota) Kuandu Paulo temi liafuan “prezente” nia uza liafuan Gregu khárisma. Liafuan Gregu neʼe refere ba prezente neʼebé gratuitu no ema neʼebé simu la merese atu simu ida-neʼe. Timóteo simu prezente neʼe bainhira nia hetan knaar espesiál atu serbí kongregasaun.​—1 Tim 4:14.

Paulo anima Timóteo atu halo saida ho prezente neʼe? Bainhira Timóteo lee Paulo nia liafuan “halo lakan nafatin”, karik Timóteo hanoin kona-ba ema neʼebé sunu ai iha sira-nia uma, no dala barak sai ahi-klaak  deʼit. Dala ruma ema presiza book ahi-klaak sira-neʼe hodi ahi bele lakan makaʼas fali. Disionáriu ida esplika katak liafuan Gregu (anazopyréo) neʼebé Paulo uza signifika “halo lakan fali, halo moris fali, kehe atu lakan fali”, entaun Paulo uza liafuan neʼe iha dalan simbóliku atu refere ba sai laran-manas kona-ba serbisu ruma. Neʼe hanesan Paulo fó-hatene Timóteo: ‘Halo ó-nia knaar ho laran tomak.’ Ohin loron, ita mós presiza halo buat neʼebé hanesan. Ita presiza serbí Maromak ho laran-manas.

Bainhira Timóteo kontinua lee Paulo nia karta, nia hetan fraze ida tan neʼebé ajuda nia atu kumpre didiʼak serbisu haklaken. Paulo hakerek: “Ó tenke proteje buat folin-boot sira-neʼe neʼebé entrega ona ba ó ho ajuda husi espíritu santu neʼebé hela iha ita.” (2 Tim 1:14) Saida mak ‘buat folin-boot sira neʼebé entrega ona’ ba Timóteo? Iha versíkulu antes neʼe, Paulo koʼalia kona-ba “liafuan neʼebé loos”, katak lia-loos husi Eskritura sira. (2 Tim 1:13) Nuʼudar haklaken-naʼin, Timóteo presiza hanorin lia-loos iha kongregasaun no mós ba ema seluk. (2 Tim 4:1-5) Timóteo mós simu knaar atu serbí nuʼudar katuas neʼebé tau matan ba Maromak nia bibi. (1 Ped 5:2) Hodi sadere ba Jeová nia espíritu santu no Jeová nia Liafuan, Timóteo bele proteje lia-loos folin-boot neʼebé nia hanorin.—2 Tim 3:14-17.

Ohin loron, ita mós simu lia-loos neʼebé ita presiza fahe ba ema seluk. (Mt 28:19, 20) Ita bele kontinua hafolin lia-loos folin-boot neʼe liuhusi halo orasaun beibeik no estuda beibeik Maromak nia Liafuan. (Rom 12:11, 12; 1 Tim 4:13, 15, 16) Karik ita mós iha knaar atu serbí nuʼudar katuas kongregasaun ka halo serbisu haklaken tempu-tomak. Se ita iha knaar hanesan neʼe, ita presiza haraik an no sadere ba Jeová atu ajuda ita. Se ita halo nuneʼe, ita sei hatudu katak ita hafolin lia-loos folin-boot husi Jeová.

Timóteo nia knaar inklui treinu ema seluk atu halaʼo serbisu neʼebé hanesan ho nia. Tan neʼe Paulo anima Timóteo: “Kona-ba buat sira neʼebé ó rona husi haʼu . . . , ó tenke fó sai buat sira-neʼe ba mane sira neʼebé laran-metin atu nuneʼe sira mós bele kumpre kritéria atu hanorin ema seluk.” (2 Tim 2:2) Paulo fó-hanoin Timóteo atu hanorin ema seluk kona-ba buat hotu neʼebé nia aprende ona. Ohin loron, katuas kongregasaun sira presiza hakaʼas an atu halo buat neʼebé hanesan. Katuas neʼebé diʼak sei la rai deʼit informasaun neʼebé nia hatene kona-ba oinsá halaʼo knaar ruma. Maibé, nia hanorin ema seluk atu sira bele halaʼo knaar neʼe. Nia la taʼuk katak sira sai matenek liu fali nia ka halo serbisu diʼak liu fali nia. Tan neʼe, katuas ida la hanorin deʼit dalan báziku atu halaʼo knaar ruma. Nia hakarak ajuda ema neʼebé nia treinu atu haburas kbiit atu tetu didiʼak no matenek hodi bele sai ema Kristaun neʼebé maduru. Hodi halo nuneʼe, “mane sira neʼebé laran-metin” neʼebé nia hanorin bele ajuda kongregasaun iha dalan neʼebé diʼak liután.

Klaru katak Timóteo hafolin tebes karta neʼebé nia simu husi Paulo. Ita bele fiar katak nia lee beibeik Paulo nia konsellu no medita kona-ba oinsá atu aplika ida-neʼe bainhira nia halaʼo ninia knaar sira.

Ita mós hakarak aplika konsellu sira-neʼe. Oinsá? Ita bele hakaʼas an atu halo lakan nafatin Maromak nia prezente, proteje lia-loos folin-boot neʼebé ita simu, no fahe ita-nia esperiénsia no matenek ba ema seluk. Hodi halo nuneʼe, ita bele ‘kumpre didiʼak ita-nia serbisu ba Maromak’ hanesan Paulo hatete ba Timóteo.​—2 Tim 4:5.