Ita bele ka lae hatán ba pergunta sira tuirmai neʼebé bazeia ba Livru Haklaken 2024:

Jeová hatudu ezemplu saida kona-ba dalan atu trata feto sira?

Jeová la todan ba sorin, no nia la haree mane mak folin-boot liu fali feto. Nia rona ba feto sira, no interese ba sira-nia hanoin no sentimentu. Nia mós tau fiar ba feto sira atu halo ninia serbisu.—w24.01, p. 15-16.

Oinsá atu aplika Éfeso 5:​7, neʼebé dehan: “Keta hola parte hamutuk ho sira”?

Apóstolu Paulo fó avizu ba ita atu la ransu ho ema neʼebé la apoia ita halo tuir Jeová nia matadalan. Neʼe inklui gasta tempu ho sira oin ba oin ka liuhusi média sosiál.—w24.03, p. 22-23.

Ita presiza matan-moris kona-ba istória falsu hanesan saida?

Ita presiza kuidadu ho istória ruma husi irmaun ka irmán ida se nia seidauk buka-hatene istória neʼe loos ka lae, email husi ema neʼebé ita la koñese, no apóstata neʼebé finje hatudu interese ba Bíblia.—w24.04, p. 12.

Saida mak ita hatene no la hatene kona-ba dalan neʼebé Jeová sei tesi-lia ba Liurai Salomão, ema neʼebé mate iha Sodoma no Gomorra, no mós iha Rai-Nabeen?

Ita la hatene ho klaru se Jeová deside ona katak sira hotu sei mate ba nafatin. Maibé ita hatene katak nia hatene faktu hotu no hatudu laran-sadiʼa neʼebé boot.—w24.05, p. 3-4.

Tanba Jeová mak “Fatuk Boot”, oinsá neʼe ajuda ita? (Deut 32:4)

Ita bele buka protesaun husi Jeová. Nia laran-metin, no sempre kumpre ninia promesa sira. No nia nunka troka, ninia hahalok no hakarak nunka troka.—w24.06, p. 26-28.

Saida mak bele ajuda Ita sai toman ho kongregasaun foun?

Sadere ba Jeová, nia sei ajuda Ita hanesan nia ajuda ona ninia atan sira iha tempu uluk. Keta halo komparasaun ho Ita-nia kongregasaun uluk nian. Apoia kongregasaun foun, no hakaʼas an atu habelun ho ema foun.—w24.07, p. 26-28.

Ai-knanoik tolu iha Mateus kapítulu 25 hanorin lisaun saida mai ita?

Ai-knanoik kona-ba bibi-malae no bibi-timur tau énfaze kona-ba hatudu laran-metin. Ai-knanoik kona-ba feto virjen neʼebé matenek no beik hanorin katak importante atu matan-moris. Ai-knanoik kona-ba osan talentu hanorin katak importante atu serbisu ho badinas.—w24.09, p. 20-24.

Varanda iha Salomão nia templu mak aas metru hira?

Iha 2 Krónikas 3:​4, manuskritu antigu balu dehan “kóvado 120”, neʼe katak varanda aas metru 53. Maibé manuskritu seluk dehan “kóvado 20”, neʼe katak varanda aas metru 9. Lójiku katak varanda neʼe mak metru 9 tanba se neʼe mak aas liu, parede sei la metin.—w24.10, p. 31.

Atan ba kongregasaun “tenke iha feen ida deʼit” katak sá? (1 Tim 3:12)

Neʼe katak nia kaben ho feto ida deʼit no mós labele halo sala seksuál. Nia mós labele hatudu sentimentu romántiku ba feto seluk.—w24.11, p. 19.

Tanbasá ita bele dehan katak Jesus nia liafuan iha João 6:53 la hanesan ho ninia liafuan iha Naʼi nia Han-Kalan?

João 6:53 temi katak ema presiza han Jesus nia isin no hemu ninia raan. Jesus koʼalia liafuan sira-neʼe iha tinan 32 EC, iha Galileia ba ema Judeu neʼebé seidauk tau fiar ba nia. Maibé Jesus hahú Naʼi nia Han-Kalan tinan ida liu tiha iha tinan 33 EC iha Jeruzalein. Iha neʼebá, Jesus koʼalia ba ema neʼebé sei ukun hamutuk ho nia iha lalehan.—w24.12, p. 10-11.