1. Maski Jeová mak Ida neʼebé Aas Liu Hotu, maibé nia konvida kriatura seluk atu halo saida?

JEOVÁ mak Aas Liu Hotu iha lalehan no rai, nia mak kria buat hotu, no ninia matenek no forsa laiha rohan. Job rekoñese katak Jeová mak Maromak hanesan neʼe duni. Bainhira Jeová esplika tiha ba Job kona-ba ninia kbiit, Job hatete: “Haʼu hatene ona katak Ita bele halo buat hotu-hotu. No la iha buat ida mak bele hanetik Ita atu halo buat neʼebé Ita hakarak.” (Jó [Ayub] 42:2) Jeová rasik bele duni atu halo buat hotu-hotu neʼebé nia hakarak atu halo, nia la presiza ajuda. Maibé tanba domin, nia konvida kriatura seluk atu serbisu hamutuk ho nia hodi kumpre ninia hakarak sira.

2. Jeová konvida Jesus halo knaar importante saida deʼit?

² Maromak nia kriasaun primeiru mak ninia Ona-Mane mesak Jesus. Bainhira nia kria tiha Jesus, nia mós konvida Jesus atu kria fali buat seluk. (João 1:1-3, 18) Apóstolu Paulo hatete katak: “Liuhusi nia mak Maromak kria buat hotu iha lalehan no iha rai, buat neʼebé matan haree no buat neʼebé matan la haree, maski neʼe  mak kadunan ka naʼi-ulun ka governu ka ukun-naʼin sira. Maromak kria ona buat seluk hotu liuhusi nia no ba nia.” (Koloso 1:15-17) Ita bele haree katak Jeová laʼós konvida deʼit Jesus atu serbisu hamutuk ho nia, maibé Jeová mós fó sai ba kriatura seluk kona-ba Jesus nia knaar importante sira. Priviléjiu neʼe folin boot tebes ba Jesus.

3. Jeová konvida Adão halo saida deʼit, no tanbasá mak Jeová hakarak halo hanesan neʼe?

³ Jeová mós konvida ema hodi serbisu hamutuk ho nia. Porezemplu, nia konvida Adão hodi fó naran ba animál sira. (Gênesis [Kejadian] 2:19, 20) Ita bele fiar katak neʼe mak knaar solok ida ba Adão. Nia bele estuda didiʼak animál ida-idak, haree sira-nia oin no hahalok, depois mak fó naran ba sira tuir sira ida-idak nia hahalok. Tuir loloos Jeová rasik bele fó naran ba animál hotu, tanba nia mak kria sira. Maibé tanba nia hadomi Adão, nia husik Adão mak halaʼo knaar neʼe. Jeová mós fó tan knaar furak ida ba Adão hodi halo luan Paraízu toʼo mundu tomak. (Gênesis [Kejadian] 1:27, 28) Maibé triste mak ikusmai Adão hili atu lakohi serbisu hamutuk tan ho Jeová, no ninia desizaun neʼe lori susar boot ba nia no ba ninia oan ho bei-oan hotu.—Gênesis (Kejadian) 3:17-19, 23.

4. Jeová konvida ema seluk tan hodi kumpre ninia hakarak saida deʼit?

⁴ Ema seluk neʼebé Jeová konvida hodi serbisu hamutuk ho nia mak hanesan Noé. Jeová fó knaar ba nia hodi halo arka atu salva nia ho ninia família tomak husi Rai-Nabeen. Nia fó knaar ba Moisés hodi lori ema Izraél sai husi rai-Ejitu. Nia fó knaar ba Josué hodi lori nasaun Izraél tama ba rai neʼebé nia promete ba sira. Nia fó knaar ba Salomão hodi harii ninia templu iha Jeruzalein. Nia fó knaar ba Maria hodi sai Jesus nia inan. Jeová fó knaar ba ninia atan laran-metin sira-neʼe hodi kumpre ninia hakarak.

5. Ita bele hola parte iha serbisu saida? Jeová presiza ita-nia forsa atu halo serbisu neʼe ka lae? (Haree dezeñu iha pájina 28.)

⁵ Ohin loron Jeová konvida ita hotu atu fó apoiu ba ninia Ukun. Ita bele apoia ninia Ukun iha dalan oioin. Karik buat balu ita bele halo no balu kbiit la toʼo ba ita atu halo. Maibé ita hotu bele hola parte iha serbisu haklaken. Tuir loloos Jeová rasik bele koʼalia ba ema husi lalehan, nia la presiza uza ita. Tanba Jesus dehan katak se Jeová hakarak, nia bele halo fatuk sira koʼalia hodi fó sai kona-ba ninia Ukun. (Lucas 19:37-40) Maibé Jeová konvida ita atu sai ninia “maluk serbisu-naʼin”. (1 Korinto 3:9) Hodi nuneʼe mak apóstolu Paulo hatete: “Hodi serbisu hamutuk ho Maromak, ami mós husu namanas ba imi atu la simu Maromak nia laran-diʼak neʼebé boot ho saugati deʼit.” (2 Korinto 6:1) Serbisu hamutuk ho Jeová mak priviléjiu boot tebes, neʼe halo ita kontente. Mai ita koʼalia kona-ba razaun balu tanbasá mak neʼe halo ita kontente.

6. Maromak nia Oan-Mane primeiru hatete saida kona-ba serbisu hamutuk ho ninia Aman?

⁶ Jeová nia atan sira sempre sente kontente bainhira serbisu hamutuk ho nia. Ita bele haree ezemplu neʼe husi Maromak nia Oan-Mane primeiru. Antes mai iha rai nia hatete: “Jeová kria haʼu nuʼudar ida neʼebé primeiru husi ninia kriasaun sira . . . Haʼu iha ninia sorin nuʼudar ninia badain neʼebé matenek. Haʼu mak ida neʼebé nia gosta tebes loron ba loron; Haʼu haksolok iha ninia oin ba tempu hotu.” (Provérbios [Amsal] 8:22, 30) Jesus sente kontente tebes hodi bele serbisu hamutuk ho ninia Aman. Hatene katak nia kumpre ona buat barak no Jeová mós hadomi tebes nia, neʼe lori solok ba ninia moris. Oinsá ho ita?

7. Tanbasá mak haklaken lori solok ba ita?

⁷  Jesus hatete katak solok bele mai husi buat neʼebé ita fó no simu. (Apóstolu 20:35) Bainhira ita hetan lia-loos, ita kontente tebes. Hanesan neʼe mós bainhira ita fahe fali lia-loos ba ema, neʼe mós halo ita sente solok. Ita sente kontente tanba ita haree ema neʼebé simu lia-loos komprende kona-ba saida mak Bíblia hanorin, halo mudansa ba sira-nia moris, no sira mós hetan solok tanba iha ona relasaun neʼebé diʼak ho Jeová. Buat sira-neʼe book tebes sira-nia laran hodi sira mós hakarak troka sira-nia hanoin no hahalok. Serbisu haklaken mak serbisu neʼebé importante tebes, tanba liuhusi haklaken mak ema bele hadame malu ho Maromak no atu hetan moris rohan-laek. (2 Korinto 5:20) Hanoin toʼok, serbisu saida mak bele kompara ho serbisu haklaken neʼebé bele lori solok ba ita-nia moris no fó oportunidade ba ita atu ajuda ema seluk hetan moris rohan-laek!

8. Ema balu koʼalia saida kona-ba sira-nia solok hodi bele serbisu hamutuk ho Jeová?

⁸ Hanorin ema aprende kona-ba Maromak, lori solok ba ita tanba ita hatene katak ita halo Jeová kontente, no mós tanba nia hafolin tebes ita-nia hakaʼas an atu serbí nia. (Lee 1 Korinto 15:58.) Irmaun ida husi Itália naran Marcos hatete: “Hatene katak haʼu bele fó haʼu-nia moris tomak ba Jeová mak solok neʼebé boot tebes ba haʼu, tanba haʼu hatene katak haʼu fó ba Jeová, laʼós ba ema neʼebé sei haluha haʼu-nia serbisu sira.” Irmaun seluk mós koʼalia hanesan neʼe, nia mós husi Itália, naran Franco, nia dehan: “Jeová fó-hanoin ita loroloron liuhusi ninia Liafuan no livru sira katak nia hadomi ita no buat hotu neʼebé ita halo, maski ba ita haree hanesan la vale buat ida, maibé ba nia importante tebes. Tan neʼe mak serbisu hamutuk ho Maromak halo haʼu kontente no fó valór ba haʼu-nia moris.”

9. Jeová no Jesus iha relasaun hanesan saida, no tanbasá?

⁹ Bainhira ita serbisu hamutuk ho ema neʼebé ita hadomi, neʼe halo ita hakbesik liután ba ema neʼe no ajuda ita koñese ema neʼe diʼak liután. Ita bele hatene ema neʼe nia planu mak saida no oinsá mak nia atu kumpre ninia planu sira-neʼe. Jesus mós serbisu hamutuk ho Jeová ba tinan barak tebes, tan neʼe mak sira-nia domin ba malu sai metin tebes. Bainhira esplika kona-ba ninia relasaun besik ho Jeová, Jesus dehan: “Haʼu ho Aman ida deʼit.” (João 10:30) Sira sempre iha unidade no serbisu hamutuk hodi apoia malu.

10. Tanbasá mak haklaken bele halo ita hakbesik ba Jeová no ba ema seluk?

¹⁰ Iha Jesus nia orasaun, nia husu ba Jeová atu tau matan ba ninia dixípulu sira. Tanbasá? Jesus dehan: “Atu nuneʼe sira bele sai ida deʼit hanesan haʼu no Ita.” (João 17:11) Se ita mak moris tuir Jeová nia morál sira no hola parte iha serbisu haklaken, neʼe sei ajuda ita atu komprende liután kona-ba Jeová nia hahalok sira. Neʼe sei ajuda ita hatene tanbasá mak matenek atu tau fiar no halo tuir Jeová. No bainhira ita hakbesik ba nia,  nia mós sei hakbesik ba ita. (Lee Tiago 4:8.) Ida-neʼe mós halo ita hakbesik ba ita-nia irmaun-irmán sira tanba ita iha susar, solok, no planu neʼebé hanesan. Loos duni, ita serbisu hamutuk, haksolok hamutuk, no tahan susar hamutuk. Irmán ida husi rai-Bretaña naran Octavia hatete: “Serbisu hamutuk ho Jeová halo haʼu hakbesik liután ba ema seluk.” Nia hatete hanesan neʼe tanba buat neʼebé halo sira habelun malu mak sira-nia planu neʼebé hanesan. Ita mós sente hanesan neʼe ka lae? Bainhira ita haree ema seluk hakaʼas an atu halo buat neʼebé halo Jeová kontente, neʼe halo ita mós hakarak hakbesik liután ba sira, loos ka lae?

11. Tanbasá mak ita sei hakbesik liután ba Jeová no ema seluk iha mundu foun?

¹¹ Domin neʼebé ita iha agora ba Maromak no ba ema seluk sei sai metin liután iha mundu foun. Iha mundu foun ita iha serbisu barak atu halo. Ita sei simu fali ema mate sira husi moris-hiʼas no hanorin sira kona-ba Jeová. Mundu tomak presiza atu halo hodi sai fali paraízu. Serbisu sira-neʼe laʼós serbisu neʼebé kmaan, maibé ita sei haksolok atu serbisu hamutuk toʼo ita hotu sai perfeitu fali iha Maromak nia Ukun okos! Ema hotu sei hakbesik liután ba malu no ba Jeová, Maromak neʼebé sei “halo kontente buat hotu neʼebé moris nia hakarak”.—Salmo (Mazmur) 145:16.

12. Oinsá mak haklaken bele proteje ita?

¹² Ita presiza proteje ita-nia relasaun diʼak ho Jeová. Tanba ita ema sala-naʼin no ita mós hela iha mundu neʼebé Diabu Satanás mak ukun daudauk, fasil tebes ba ita atu moris tuir mundu nia hanoin neʼebé sala. Ita bele kompara mundu nia hanoin hanesan ho tasi nia korrente. Bainhira tasi boot, korrente sempre dada ita ba fatin neʼebé ita lakohi bá. Se ita lakohi mout, ita tenke nani makaʼas hasoru korrente neʼe. Hanesan neʼe mós ho Satanás nia mundu, ita tenke hakaʼas an atu ita la moris tuir ninia hanoin. Bainhira ita haklaken ba ema, neʼe ajuda ita tau fokus ba buat neʼebé importante, laʼós buat neʼebé mak sei halo fraku ita-nia fiar. (Filipe 4:8) Haklaken bele hametin ita-nia fiar, fó-hanoin ita kona-ba Maromak nia promesa no morál sira. Haklaken mós bele ajuda ita hatudu nafatin hahalok neʼebé diʼak hodi bele proteje ita husi Satanás ho ninia mundu.—Lee Éfeso 6:14-17.

13. Testemuña ida husi Austrália sente oinsá kona-ba haklaken?

¹³ Se ita mak preokupa ho serbisu haklaken no atividade iha kongregasaun, neʼe bele ajuda ita atu la hanoin demais kona-ba ita-nia problema sira, no neʼe sai hanesan protesaun ida ba ita. Irmaun ida husi rai-Austrália naran Joel hatete: “Serbisu haklaken ajuda haʼu komprende kona-ba moris. Haklaken fó-hanoin haʼu kona-ba susar sira neʼebé ema hasoru daudauk no tanbasá mak diʼak ba haʼu atu uza Bíblia nia matadalan sira iha haʼu-nia moris. Haklaken ajuda haʼu hatudu haraik-an, no fó oportunidade ba haʼu atu sadere ba Jeová no ba irmaun-irmán sira.”

14. Oinsá mak hodi tahan nafatin iha serbisu haklaken hatudu katak ita iha Maromak nia espíritu santu?

¹⁴ Serbisu haklaken mós hametin ita-nia fiar katak ita iha Jeová nia espíritu santu. Hanoin toʼok se ita hetan serbisu ida atu fahe paun ba ema hotu iha ita-nia knua. Serbisu neʼe ita uza ita-nia osan rasik no sira la selu fali osan neʼebé ita hasai ona. No bainhira ita lori paun ba ema, sira barak lakohi paun neʼe, no balu hirus no odi fali ita. Ita bele tahan toʼo bainhira ho serbisu neʼe? Karik lalais deʼit serbisu neʼe bele halo ita laran-tun no laiha forsa tan atu halo serbisu neʼe. Maibé iha serbisu haklaken ita barak tahan ona  tinan ba tinan, maski ita uza ita rasik nia osan, ema hirus, no hamnasa hamoe ita. Hanoin toʼok, se laʼós Maromak nia espíritu santu ita bele kontinua halaʼo serbisu neʼe ka lae?

15. Oinsá mak serbisu haklaken iha ligasaun ho Maromak nia hakarak ba ema?

¹⁵ Serbisu haklaken mós iha ligasaun ho Maromak nia hakarak ba ema. Jeová nia hakarak mak atu ema moris ba nafatin iha rai, no maski Adão halo sala kontra Maromak, maibé nia la troka ninia hakarak neʼe ba ema. (Isaías [Yesaya] 55:11) Jeová halo ona arranju atu salva ema husi sala no mate. Jesus mós hakarak serbisu hamutuk ho Jeová atu kumpre Jeová nia arranju, tan neʼe mak nia tun mai iha rai hodi fó ninia moris ba ema neʼebé halo tuir Jeová. Atu Jesus nia mate bele kasu ema nia sala no mate, ema tenkesér halo tuir Jeová no hatene saida mak Jeová hakarak sira atu halo. Tan neʼe mak Jesus sempre hanorin ema kona-ba Jeová nia hakarak sira no nia mós haruka ninia dixípulu atu hanorin fali ema seluk. Bainhira ita ajuda ema hadame malu fali ho Maromak, ita mós serbisu hamutuk atu kumpre Jeová nia arranju hodi salva ema husi sala no mate.

16. Oinsá mak haklaken liga ho Maromak nia ukun-fuan rua neʼebé importante liu hotu?

¹⁶ Ajuda ema atu hetan moris rohan-laek mós hatudu katak ita iha domin ba ema no ba Jeová, tanba Jeová nia hakarak mak “atu ema hotu hetan salvasaun no hatene didiʼak kona-ba lia-loos”. (1 Timóteo 2:4) Bainhira ema husu ba Jesus kona-ba ukun-fuan saida mak importante liu hotu ba nasaun Izraél, Jesus hatán: “‘Ó tenke hadomi Jeová ó-nia Maromak ho ó-nia laran tomak, ho ó-nia moris tomak, no ho ó-nia neon tomak.’ Neʼe mak mandamentu neʼebé boot liu no uluk liu. Ida tuirmai neʼebé hanesan nia mak: ‘Ó tenke hadomi ó-nia maluk hanesan ó-nia an rasik.’” (Mateus 22:37-39) Atu hatudu katak ita mós hakarak halo tuir mandamentu neʼe, ita tenke bá haklaken.—Lee Apóstolu 10:42.

17. Ita sente oinsá kona-ba Ita-nia priviléjiu atu haklaken?

¹⁷ Ita mak ema neʼebé Maromak fó bensaun duni! Jeová fó ona mai ita serbisu neʼebé mak lori solok ba ita-nia moris, serbisu neʼebé mak halo ita hakbesik liután ba nia no ba ita-nia maluk sira, no serbisu neʼebé mak fó protesaun ba ita. Serbisu neʼe mós fó oportunidade ba ita atu hatudu ita-nia domin ba Maromak no ema seluk. Maski Maromak nia povu iha mundu tomak moris iha situasaun neʼebé la hanesan, balu idade boot ona, balu seidauk, balu riku, balu lae, balu forte, balu fraku, maibé hotu-hotu sempre buka dalan oioin atu fahe sira-nia fiar ba ema seluk. Karik ita rasik mós konkorda ho irmán ida husi rai-Fransa, naran Chantel. Nia hatete: “Neʼe hanesan Maromak solok nian, Ida neʼebé forsa boot liu hotu no Ida neʼebé kria buat hotu iha lalehan no rai hatete mai haʼu dehan: ‘Bá! Bá koʼalia! Bá hatoʼo hela haʼu-nia liafuan, koʼalia ho laran. Haʼu sei fó kbiit, haʼu-nia Liafuan Bíblia, apoia husi lalehan, apoia husi rai, treinu, no matadalan ida-idak iha tempu neʼebé ó presiza.’ Ida-neʼe mak priviléjiu neʼebé boot tebes hodi bele halo buat neʼebé Jeová hakarak ita atu halo no hodi bele serbisu hamutuk ho ita-nia Maromak!”