1. Oinsá mak ita hatene katak ita moris iha “loron ikus sira”?

ITA moris depois tinan 1914 ka lae? Se nuneʼe, durante Ita-nia moris tomak Ita hela iha “loron ikus sira” husi sistema aat neʼe. (2 Tim 3:1) Ita hotu haree ka rona ona notísias kona-ba akontesimentu oioin neʼebé Jesus fó-hatene nanis ona kona-ba ita-nia tempu. Neʼe inklui funu, rai-hamlaha, rai-nakdoko, moras-peste, hahalok aat neʼebé aumenta ba beibeik, no ema fó-terus ba Jeová nia povu. (Mt 24:3, 7-9, 12; Lc 21:10-12) Ita mós haree ona katak ema nia hahalok tuir duni liafuan neʼebé apóstolu Paulo fó-hatene nanis ona. (Haree kaixa “ Ema nia hahalok ohin loron”.) Nuʼudar Jeová nia atan, ita fiar duni katak ita moris “iha loron sira-neʼe nia rohan”.—Miq 4:1, nota.

2. Ita sei hetan resposta ba pergunta saida deʼit?

² Tempu barak liu ona husi tinan 1914, neʼe katak agora ita moris iha parte ikus husi “loron ikus sira”. Tanba sistema aat neʼe nia rohan besik loos ona, ita presiza hanoin kona-ba pergunta importante balu: Akontesimentu saida deʼit mak sei mosu iha “loron ikus” sira-nia rohan? Jeová hakarak ita atu halo saida nuʼudar ita hein ba akontesimentu sira-neʼe?

3. Tuir profesia iha 1 Tesalónika 5:1-3, nasaun sira sei fó sai saida?

³ Lee 1 Tesalónika 5:1-3. Iha eskritura neʼe, Paulo temi kona-ba “Jeová nia loron”. Iha kontestu neʼe, fraze neʼe refere ba tempu neʼebé nasaun sira komesa ataka “Babilónia Boot”, katak relijiaun falsu hotu, no remata ho Armagedon. (Apok 16:14, 16; 17:5) Antes “Jeová  nia loron” komesa, nasaun sira sei deklara “Dame no hakmatek!” Dala ruma ukun-naʼin sira iha mundu uza fraze hanesan neʼe bainhira koʼalia kona-ba hametin relasaun entre nasaun sira. * Maibé, deklarasaun kona-ba “dame no hakmatek” neʼebé Bíblia fó-hatene nanis mak diferente. Tanbasá? Bainhira neʼe akontese, karik ema sei hanoin katak ukun-naʼin sira iha mundu neʼe hetan ona susesu atu halo mundu sai seguru liu. Maibé realidade mak “sira sei lakon derrepente deʼit” durante tempu “terus boot”.​—Mt 24:21.

4. (a) Saida mak ita seidauk hatene kona-ba deklarasaun “dame no hakmatek”? (b) Saida mak ita hatene ona kona-ba deklarasaun neʼe?

⁴ Ita hatene buat balu kona-ba deklarasaun “dame no hakmatek”. Maibé ita mós la hatene buat barak. Ita la hatene saida mak sei book ukun-naʼin sira atu deklara ida-neʼe ka oinsá sira fó sai deklarasaun neʼe. No ita la hatene ukun-naʼin sira sei fó sai deklarasaun neʼe dala balu ka dala ida deʼit. Maibé ita hatene katak ita labele husik buat ida atu halo ita fiar katak ukun-naʼin sira bele lori dame ba mundu. Loloos, Bíblia haruka ita atu hein ba deklarasaun neʼe tanba neʼe mak sinál katak “Jeová nia loron” atu komesa ona!

5. Oinsá mak 1 Tesalónika 5:4-6 ajuda ita atu sai prontu ba “Jeová nia loron”?

⁵ Lee 1 Tesalónika 5:4-6. Paulo fó-hatene ita buat neʼebé ita presiza halo atu sai prontu ba “Jeová nia loron”. Ita labele “toba-dukur hanesan ema seluk”. Ita tenke “hadeer nafatin” no kontinua matan-moris. Porezemplu, ita tenke matan-moris atu neutrál nafatin no nunka envolve an iha polítiku. Se ita envolve an, ita sai “mundu neʼe nian”. (João 15:19) Ita hatene katak Maromak nia Ukun deʼit mak bele lori dame ba mundu.

6. Ita hakarak ajuda ema atu halo saida? Tanbasá?

⁶ Ita presiza matan-moris nafatin, no mós hakarak ajuda ema seluk atu aprende buat neʼebé Bíblia fó-hatene nanis atu akontese. Hanoin-hetan katak bainhira terus boot komesa, la iha tan oportunidade ba ema atu komesa serbí Jeová. Tan neʼe mak ita-nia serbisu haklaken urjente tebes agora. *

7. Jeová hakarak ita atu halo saida agora?

⁷ Hela tempu uitoan deʼit ona atu “Jeová nia loron” komesa, no Jeová hakarak ita atu haklaken ho badinas nafatin. Ita presiza “sai badinas nafatin iha Naʼi nia serbisu”. (1 Kor 15:58) Jesus fó-hatene nanis kona-ba serbisu neʼe. Bainhira nia  koʼalia kona-ba akontesimentu boot sira neʼebé sei akontese durante loron ikus sira, nia dehan: “Liafuan diʼak neʼe ema tenke haklaken uluk iha nasaun hotu.” (Mc 13:4, 8, 10; Mt 24:14) Bainhira ita bá haklaken, ita hola parte atu kumpre Bíblia nia profesia neʼe.

8. Oinsá serbisu haklaken kontinua ba oin?

⁸ Oinsá mak serbisu haklaken kontinua ba oin? Tinan-tinan, ema barak tan rona kona-ba Maromak nia Ukun. Porezemplu, hanoin toʼok kona-ba oinsá haklaken-naʼin sira aumenta iha mundu tomak durante loron ikus sira. Iha tinan 1914, iha haklaken-naʼin 5.155 iha rai 43. Maibé agora, iha haklaken-naʼin millaun 8,5 iha rai 240. Maski nuneʼe, ita-nia serbisu seidauk hotu. Ita tenke kontinua haklaken katak Maromak nia Ukun deʼit mak bele rezolve ema nia problema.​—Sal 145:11-13.

9. Tanbasá ita tenke kontinua haklaken Maromak nia Ukun?

⁹ Ita kontinua haklaken Maromak nia Ukun toʼo Jeová dehan para. Ita la hatene hela tempu hira tan ba ema atu aprende kona-ba Maromak Jeová no Jesus Kristu. (João 17:3) Maibé ita hatene katak antes terus boot komesa, sei iha oportunidade ba ema sira neʼebé “prontu atu simu lia-loos neʼebé lori ba moris rohan-laek” atu serbí Jeová. (Após 13:48) Oinsá mak ita bele ajuda sira antes la iha tan oportunidade?

10. Jeová fó saida deʼit ba ita atu hanorin ema kona-ba lia-loos?

¹⁰ Liuhusi Jeová nia organizasaun, Jeová fó buat hotu neʼebé ita presiza atu hanorin ema kona-ba lia-loos. Porezemplu, ita simu treinu semana-semana iha reuniaun loron baileet nian. Reuniaun neʼe hanorin ita oinsá atu koʼalia bainhira hasoru ema ba dala primeiru no vizita fali. No mós oinsá atu halaʼo estuda Bíblia ho ema. Jeová nia organizasaun mós fó ita publikasaun no vídeo sira iha Ekipamentu Hanorin nian. Buat sira-neʼe ajuda ita atu . . .

• komesa koʼalia ho ema,

• haburas ema nia interese,

• motiva ema atu hakarak aprende liután,

• estuda Bíblia ho ema, no

• konvida ema atu loke ita-nia sítiu no bá Reuniaun-Fatin.

 Klaru katak la toʼo atu iha deʼit publikasaun no vídeo sira-neʼe. Ita mós tenke uza buat sira-neʼe. * Porezemplu, bainhira koʼalia tiha ho ema ida neʼebé interese, karik ita bele fó panfletu ka revista ba nia atu nia bele lee toʼo ita vizita fali nia. Ita ida-idak presiza sai badinas nafatin fulan-fulan hodi haklaken Maromak nia Ukun.

11. Tanbasá Jeová nia organizasaun kria Estudu Bíblia online?

¹¹ Ezemplu ida tan oinsá Jeová ajuda ema aprende lia-loos mak liuhusi Estudu Bíblia online iha jw.org^®. * Tanbasá Jeová nia organizasaun kria ida-neʼe? Fulan-fulan, ema barak iha mundu tomak buka atu estuda Bíblia iha internét. Estudu Bíblia online iha ita-nia sítiu bele ajuda ema sira-neʼe komesa aprende lia-loos husi Bíblia. Karik ema balu neʼebé ita hasoru dada an atu simu estudu Bíblia. Se nuneʼe, hatudu ita-nia sítiu ba sira ka haruka link ba sira atu asesu Estudu Bíblia online iha língua neʼebé sira bele komprende.

12. Saida mak ema bele aprende husi Estudu Bíblia online?

¹² Estudu Bíblia online iha jw.org fó sai tópiku sira tuirmai: “Bíblia no Maromak”, “Istória importante iha Bíblia”, no “Bíblia nia mensajen kona-ba esperansa”. Bainhira estuda tópiku sira-neʼe, ema sei aprende:

• Oinsá Bíblia bele ajuda ema nia moris?

• Sé mak Jeová, Jesus, no anju sira?

• Tanbasá Maromak kria ema?

• Tanbasá akontese susar no buat aat?

Tópiku sira-neʼe mós inklui oinsá Jeová sei . . .

• halakon terus no mate,

• halo ema moris-hiʼas fali, no

• troka ema nia governu ho Maromak nia Ukun.

13. Estudu Bíblia online troka arranju atu estuda Bíblia ho ema ka lae? Esplika toʼok.

¹³ Estudu Bíblia online la troka arranju atu estuda Bíblia ho ema oin ba oin. Jesus fó ita priviléjiu atu hanorin ema sai dixípulu. Objetivu husi Estudu online mak atu ajuda ema atu aprende kona-ba Bíblia no hafolin buat neʼebé sira aprende, no book sira atu hakarak aprende liután. Ho ida-neʼe, karik sira sei simu atu estuda Bíblia ho ita. Iha tópiku ida-idak nia rohan, iha konvite ba lee-naʼin atu prenxe formuláriu hodi husu estuda Bíblia. Loroloron iha ema naʼin-230 liu iha mundu tomak neʼebé husu liuhusi ita-nia sítiu atu estuda Bíblia. Estuda Bíblia oin ba oin mak importante.

14. Tuir Jesus nia liafuan iha Mateus 28:19, 20, ita tenke hakaʼas an atu halo saida? Tanbasá?

¹⁴ Lee Mateus 28:19, 20. Bainhira ita estuda Bíblia ho ema, ita hakaʼas an atu ‘hanorin ema sai dixípulu no hanorin sira atu halo tuir Jesus nia mandamentu hotu’. Ita presiza ajuda ema komprende tanbasá importante ba sira atu halo desizaun hodi serbí Jeová no apoia ninia Ukun. Neʼe katak ita presiza hakaʼas an atu motiva ema hodi aplika lia-loos neʼebé sira aprende, dedika sira-nia moris ba Jeová, no hetan batizmu. Se sira halo nuneʼe, sira sei hetan salvasaun.​—1 Ped 3:21.

15. Ita lalika gasta tempu atu halo saida? Tanbasá?

 ¹⁵ Hanesan temi ona ohin, hela tempu uitoan deʼit atu sistema aat neʼe lakon. Tan razaun neʼe, ita lalika gasta tempu atu estuda Bíblia ho ema neʼebé lakohi halo mudansa atu sai Kristu nia dixípulu. (1 Kor 9:26) Ita-nia serbisu mak urjente! Iha ema barak tan neʼebé presiza rona liafuan diʼak kona-ba Maromak nia Ukun antes la iha tan oportunidade.

16. Tuir Apokalipse 18:2, 4, 5, 8, ita tenke halo saida? (Haree mós nota-rodapé.)

¹⁶ Lee Apokalipse 18:2, 4, 5, 8. Versíkulu sira-neʼe fó sai buat neʼebé Jeová hakarak ninia atan sira atu halo. Ema Kristaun loos hotu tenke hatudu ho klaru katak sira la iha ligasaun ho Babilónia Boot. Antes aprende lia-loos, karik estudante Bíblia ida mak membru ba relijiaun falsu ida. Karik nia tuir misa ka hola parte iha atividade oioin husi relijiaun neʼe. Ka karik nia fó osan kontribuisaun ba relijiaun neʼe. Antes katuas sira fó lisensa ba estudante Bíblia ida atu sai haklaken-naʼin, estudante neʼe tenke haketak an husi relijiaun falsu. Nia presiza hakerek karta atu rezigna an ka hakotu ninia relasaun hotu ho relijiaun falsu ka organizasaun neʼebé iha ligasaun ho Babilónia Boot. *

17. Ema Kristaun tenke hasees an husi serbisu saida? Tanbasá?

¹⁷ Ema Kristaun loos tenke haree didiʼak katak ninia serbisu la iha ligasaun ho Babilónia Boot. (2 Kor 6:14-17) Porezemplu, nia la sai serbisu-naʼin iha igreja. Liután neʼe, ema Kristaun neʼebé serbisu ho kompañia ruma sei la halo serbisu barak liu iha fatin neʼebé baibain uza atu halo adorasaun falsu. No se ema Kristaun neʼe mak naʼin ba kompañia, nia sei la buka serbisu ka simu serbisu neʼebé iha ligasaun ho Babilónia Boot. Tanbasá ita halo desizaun metin hanesan neʼe? Tanba Maromak haree relijiaun falsu nuʼudar buat la moos no ita lakohi atu hola parte iha relijiaun nia hahalok aat no sala sira.​—Isa 52:11. *

18. Oinsá mak irmaun ida kaer metin ba Bíblia nia prinsípiu kona-ba serbisu?

¹⁸ Tinan barak liubá, ema ida husu katuas kongregasaun ida neʼebé iha kompañia rasik atu halo serbisu karpinteiru  iha igreja ida iha sidade neʼebé irmaun neʼe hela. Ema neʼe hatene katak irmaun neʼe sempre dehan katak nia sei nunka halo serbisu iha igreja. Maibé iha tempu neʼebá, ema neʼe presiza tebes serbisu-naʼin ida. Maski nuneʼe, irmaun neʼe kaer metin nafatin Bíblia nia prinsípiu no la simu serbisu neʼe. Semana ida tuirmai, jornál fó sai foto kona-ba karpinteiru ida neʼebé monta hela krús iha igreja. Se uluk irmaun neʼe simu serbisu neʼe, karik ninia foto mak sei mosu iha jornál neʼe. Karik neʼe sei hafoʼer ninia naran diʼak iha maluk Kristaun sira-nia leet. No Jeová mós sei sente laran-kanek.

19-20. (a) Saida mak ita aprende ona? (b) Ita sei aprende tan kona-ba saida?

¹⁹ Tuir profesia iha Bíblia, akontesimentu boot ida neʼebé sei akontese lakleur tan iha mundu mak nasaun sira-nia deklarasaun kona-ba “dame no hakmatek”. Ita agradese tebes tanba Jeová hanorin ona ita katak nasaun sira sei la lori dame neʼebé loos no ba nafatin. Saida mak ita presiza halo antes nasaun sira deklara “dame no hakmatek” no “terus boot” hahú? Jeová hakarak ita atu badinas nafatin hodi haklaken liafuan diʼak kona-ba Maromak nia Ukun no hakaʼas an hanorin ema sai dixípulu. No ita mós tenke hasees an husi relijiaun falsu hotu. Neʼe inklui la sai tan membru ba relijiaun neʼe no mós la simu serbisu neʼebé iha ligasaun ho Babilónia Boot.

²⁰ Iha mós akontesimentu seluk neʼebé akontese tuirmai durante parte ikus husi “loron ikus sira”. No iha mós buat seluk tan neʼebé Jeová hakarak ita atu halo. Neʼe mak saida? Oinsá mak ita bele prepara an ba buat hotu neʼebé sei akontese lakleur tan? Ita sei aprende kona-ba neʼe iha lisaun tuirmai.