Iha 2 Korinto 12:2, 3, Paulo konta kona-ba mane ida neʼebé ‘Naʼi lori ba lalehan terseiru’. Sé mak mane neʼe? Iha Paulo nia karta ba kongregasaun Korinto, Paulo hatete katak Maromak uza nia nuʼudar apóstolu ida. (2 Korinto 11:5, 23) Tuirmai nia temi kona-ba “vizaun sira no buat neʼebé Naʼi hatudu sai”. Iha kontestu neʼe Paulo la temi kona-ba ema seluk, maibé ninia an rasik. Entaun, bainhira Paulo koʼalia kona-ba mane neʼebé haree vizaun sira-neʼe, nia refere ba ninia an rasik.​—2 Korinto 12:1, 5.

Paulo mak mane neʼebé ‘Naʼi lori ba lalehan terseiru’ no “ba paraízu”. (2 Korinto 12:2-4) Liafuan “buat neʼebé Naʼi hatudu sai” fó ideia katak Paulo haree buat neʼebé sei akontese iha futuru.

“Lalehan terseiru” neʼebé Paulo haree signifika saida?

Iha Bíblia, liafuan “lalehan” bele refere ba lalehan neʼebé ita bele haree ho matan. (Génesis 11:4; 27:28; Mateus 6:26) Maibé liafuan “lalehan” mós bele refere ba buat seluk. Dala ruma ida-neʼe refere ba ema nia ukun. (Daniel 4:20-22) Ka bele mós refere ba Maromak nia Ukun.​—Apokalipse 21:1.

Paulo haree “lalehan terseiru”. Neʼe katak sá? Dala ruma Bíblia uza númeru tolu atu tau énfaze ba buat ruma, ka atu hatudu katak buat ida mak loos duni, metin ka forte liu. (Isaias 6:3; Ezequiel 21:27; Apokalipse 4:8) Bainhira Paulo koʼalia kona-ba “lalehan terseiru”, karik nia fó sai kona-ba ukun neʼebé kmanek liu ka aas liu, neʼe mak Mesias nia Ukun liuhusi Jesus Kristu no ema naʼin–144.000. Mesias nia Ukun mak “lalehan foun” neʼebé apóstolu Pedro hakerek, no ita hein daudaun ba ida-neʼe.​—2 Pedro 3:13.

“Paraízu” neʼebé Paulo temi signifika saida?

Liafuan “paraízu” mós iha signifikadu oioin: (1) Neʼe bele refere ba mundu neʼebé sei sai paraízu iha futuru, (2) Neʼe bele refere ba kondisaun espirituál neʼebé lori dame entre Maromak ho ninia povu iha mundu foun. (3) Neʼe mós bele refere ba kondisaun furak iha lalehan, katak “Maromak nia paraízu” neʼebé temi iha Apokalipse 2:7.​—Haree Livru Haklaken, 15 Jullu 2015, p. 8, par. 8.

Bainhira Paulo konta ninia esperiénsia iha 2 Korinto 12:4, karik nia refere ba buat hirak-neʼe hotu.

Rezumu:

Karik “lalehan terseiru” neʼebé temi iha 2 Korinto 12:2 refere ba Mesias nia Ukun neʼebé Jesus Kristu no ema naʼin–144.000 mak ukun nuʼudar liurai, neʼe katak “lalehan foun”.​—2 Pedro 3:13.

Mesias nia Ukun mak kmanek liu no aas liu, tan neʼe mak bolu nuʼudar “lalehan terseiru”.

“Paraízu” neʼebé Paulo haree iha ninia vizaun karik refere ba (1) mundu neʼebé sei sai paraízu iha futuru, (2) paraízu espirituál iha mundu foun, neʼebé boot liu no kmanek liu fali paraízu espirituál neʼebé ita goza agora daudaun, no (3) “Maromak nia paraízu” iha lalehan neʼebé sei laʼo hamutuk ho paraízu iha mundu foun.

Entaun, “paraízu” refere ba lalehan foun no mós rai foun. Neʼe mak arranju foun, arranju neʼe inklui governu iha lalehan no mós ema sira neʼebé serbí Jeová iha mundu paraízu.