1, 2. Tanbasá mak mundu neʼe sempre iha ema neʼebé kiak?

SISTEMA ekonomia ohin loron neʼebé la justu lori susar ba ema barak nia moris. Porezemplu, joven barak la hetan serbisu. Ema balu tau sira-nia an iha perigu laran hodi muda ba rai riku sira. Maibé iha rai riku sira, ema kiak mós barak. Iha mundu neʼe ita bele haree katak, ema riku sai riku ba beibeik, no ema kiak sai kiak ba beibeik. Relatóriu sira hatete katak, iha ema balu riku tebetebes toʼo ema iha mundu tomak nia osan tau hamutuk mós latoʼo. Loos duni, maski iha ema rihun ba rihun mak moris hela iha kiak laran, maibé ema balu iha osan barak tebes toʼo bele tau matan ba sira-nia oan no bei-oan sira. Jesus mós konkorda ho realidade neʼe, tan neʼe nia dehan: “Ema kiak sira nafatin hamutuk ho imi.” (Marcos 14:7) Tanbasá mak situasaun la justisa hanesan neʼe mosu?

² Jesus hatene katak Maromak nia Ukun deʼit mak bele troka sistema ekonomia husi mundu neʼe. * Bíblia hatudu katak “kontratu-naʼin sira” mak reprezenta sistema ekonomia nian, no sira hamutuk ho sistema polítiku no sistema relijiaun falsu hotu mai husi Satanás nia mundu. (Apokalipse  18:3) Maski Maromak nia povu bele haketak an husi polítiku no relijiaun falsu, maibé barak mak la bele hasees an husi sistema ekonomia husi Satanás nia mundu neʼe.

3. Ita sei koʼalia kona-ba pergunta saida deʼit?

³ Ema kristaun presiza iha hanoin neʼebé loos kona-ba sistema ekonomia. Karik bele husu ba ita-nia an: ‘Oinsá mak haʼu bele hatudu katak haʼu laran-metin ba Maromak liuhusi dalan neʼebé haʼu uza sasán sira husi mundu neʼe? Oinsá mak haʼu bele hamenus haʼu-nia tempu atu la envolve demais iha sistema ekonomia nian? Ezemplu saida deʼit mak hatudu katak Maromak nia povu ohin loron tau fiar tomak ba nia?’

4, 5. (a) Iha Jesus nia ai-knanoik, saida mak akontese ba atan neʼe? (b) Jesus anima ninia dixípulu sira atu halo saida?

⁴ Lee Lucas 16:1-9. Jesus nia ai-knanoik kona-ba atan book ita atu hanoin didiʼak kona-ba ita-nia an. Ema duun atan neʼe katak nia halakon ninia naʼi nia rikusoin sira, tan neʼe ninia naʼi hasai nia. * Maibé antes atan neʼe sai husi ninia serbisu, nia halo buat neʼebé matenek. Nia habelun uluk ho ema sira neʼebé ikusmai bele fó ajuda ba nia. Jesus konta ai-knanoik neʼe laʼós atu anima ninia dixípulu hodi halo buat neʼebé la loos ka hatudu hahalok ladiʼak atu bele moris iha mundu neʼe, maibé atu hanorin sira kona-ba lisaun importante ida.

⁵ Jesus hatene katak la fasil ba ninia dixípulu sira atu tau matan sira-nia an iha mundu aat neʼe hanesan atan neʼebé derrepente monu ba susar laran. Tan neʼe nia hatete ba sira: “Halo belun ba ó-nia an liuhusi rikusoin mundu aat neʼe nian.” Liafuan sira-neʼe anima ita atu halo belun ho Jeová no Jesus liuhusi sasán sira neʼebé ita iha. Tanbasá? Tanba bainhira sasán sira lakon ona, ita-nia belun Jeová no Jesus ‘sei simu ita atu hela iha fatin rohan-laek nian’. Saida mak ita aprende husi Jesus nia konsellu neʼe?

6. Oinsá mak ita hatene katak sistema ekonomia ohin loron laʼós parte husi Maromak nia planu?

⁶ Bíblia hatudu ho klaru katak, sistema ekonomia ohin loron neʼebé ema uza atu sai riku laʼós parte husi Maromak nia planu. Ita hatene ida-neʼe tanba iha jardín Eden, Jeová fó deʼit buat hotu ba Adão no Eva liu fali sira-nia presiza. (Gênesis [Kejadian] 2:15, 16) No iha tempu neʼebé Maromak haraik ninia espíritu santu ba ema sira neʼebé nia hili, “la iha ida mak dehan katak sasán neʼebé sira iha mak sira-nian, maibé sira fahe buat hotu ba malu”. (Apóstolu 4:32) Profeta Isaías fó-hatene nanis katak, loron ida ema hotu la presiza selu buat ida atu goza sasán hotu neʼebé mai husi mundu neʼe. (Isaías [Yesaya] 25:6-9; 65:21, 22) Maibé antes tempu neʼe toʼo mai, Jesus nia dixípulu sira presiza “hatudu matenek”. Sira presiza uza didiʼak sasán sira iha mundu neʼe atu tau matan ba sira-nia an maibé halo nafatin buat neʼebé Maromak simu.

7. Jesus fó konsellu saida iha Lucas 16:10-13?

⁷ Lee Lucas 16:10-13. Iha Jesus nia ai-knanoik, atan neʼe habelun ema seluk tanba hanoin ninia an. Maibé Jesus hakarak ninia dixípulu sira atu la hanoin an deʼit bainhira habelun Jeová no Jesus. Nia hatete katak ita bele hatudu laran-metin ba Maromak liuhusi dalan neʼebé ita uza didiʼak rikusoin sira neʼebé ita iha. Oinsá mak ita bele halo nuneʼe?

8, 9. Fó toʼok ezemplu oinsá mak ema balu hatudu laran-metin liuhusi sasán neʼebé sira iha.

⁸ Dalan ida atu hatudu laran-metin liuhusi sasán neʼebé ita iha mak hodi fó kontribuisaun  ba serbisu haklaken iha mundu tomak neʼebé Jesus fó-hatene nanis. (Mateus 24:14) Labarik-feto ida husi Índia rai beibeik osan iha kofre. Nia lakohi uza osan neʼe atu hola brinkedu. Bainhira nia rai osan sira-neʼe toʼo nakonu, nia fó hotu osan neʼe atu uza ba serbisu haklaken. Ezemplu ida tan mak kona-ba irmaun ida husi Índia neʼebé kuda nuu. Nia fó nuu fuan balu ba eskritóriu tradusaun Malayalam. Tanba nia hanoin se eskritóriu presiza hola beibeik nuu, diʼak liu fó kontribuisaun nuu ba irmaun sira duké fó osan. Neʼe “hatudu matenek” duni! Hanesan neʼe mós ho irmaun sira iha rai-Grésia, sira fó beibeik kontribuisaun mina azeite, keiju, no ai-han seluk tan ba família Betel.

⁹ Irmaun ida seluk husi rai-Seilaun. Nia iha uma ida no nia uza ninia uma neʼe hodi halaʼo reuniaun, reuniaun boot, no husik irmaun-irmán neʼebé serbí Jeová tempu-tomak atu hela iha neʼebá. Irmaun neʼe halo sakrifísiu boot, no neʼe ajuda tebes haklaken-naʼin sira iha fatin neʼe tanba sira ladún iha osan. Dala ruma, iha rai neʼebé la iha liberdade atu halaʼo serbisu haklaken, irmaun-irmán sira uza sira rasik nia uma atu sai hanesan Reuniaun-Fatin. Ida-neʼe ajuda pioneiru no ema seluk atu tuir reuniaun tanba la presiza hasai osan barak atu aluga fatin seluk.

10. Tanbasá mak diʼak atu hatudu laran-luak?

¹⁰ Ezemplu sira-neʼe hatudu duni katak Maromak nia povu “laran-metin iha buat kiʼik”. (Lucas 16:10) Sira uza buat neʼebé sira iha atu ajuda fali ema seluk. Jeová nia belun sira-neʼe sente oinsá kona-ba sakrifísiu neʼebé sira halo? Sira sente kontente tebes hodi hatene katak bainhira sira hatudu laran-luak, sira hetan “rikusoin neʼebé loos” iha lalehan. (Lucas 16:11) Irmán ida fó beibeik kontribuisaun osan hodi ajuda serbisu haklaken. Nia hatete katak iha tinan hirak nia laran ninia hahalok barak mós troka. Nia dehan: “Haʼu sente tanba haʼu hatudu beibeik laran-luak, neʼe halo haʼu-nia sentimentu kona-ba ema seluk mós troka. Haʼu sente haʼu lalais atu fó perdua ba ema, iha pasiénsia liu, no fasil atu tahan ema nia fraku no simu konsellu.” Ema barak mós sente hanesan neʼe.—Salmo (Mazmur) 112:5; Provérbios (Amsal) 22:9.

11. (a) Tanbasá mak fó ho laran-luak “hatudu matenek”? (b) Arranju saida mak fó ajuda tebes ba Maromak nia povu? (Haree foto iha pájina 7.)

¹¹ Ita mós bele “hatudu matenek” liuhusi uza sasán neʼebé ita iha atu fó apoiu ba ema seluk iha serbisu haklaken. Hodi nuneʼe, maski ita la bele serbí Jeová tempu-tomak ka muda ba fatin neʼebé presiza liután haklaken-naʼin, ita fó ajuda daudauk ba ema seluk. (Provérbios [Amsal] 19:17) Iha rai sira neʼebé kiak tebes no ema barak hakarak hatene kona-ba lia-loos. Maibé liuhusi kontribuisaun neʼebé ita fó hodi apoiu serbisu haklaken mak ikusmai ema iha fatin sira-neʼe bele hetan ita-nia livru. Porezemplu, iha rai hanesan Kongu, Madagaskar, no Ruanda, ema faʼan Bíblia karun tebes. Dala ruma, ema presiza rai saláriu husi semana ida ka fulan ida nian mak foin bele sosa Bíblia ida. Ba tinan barak ita-nia irmaun sira presiza tetu didiʼak atu uza sira-nia osan hodi hola hahán ba família ka hodi hola Bíblia ida.  Maibé agora tanba liuhusi kontribuisaun, ‘buat neʼebé ita iha resin bele taka sira-nia kuran’. Liuhusi arranju neʼe mak Jeová nia organizasaun tradús no fahe Bíblia ba ema ida-idak iha família laran no mós ba estudante Bíblia sira hodi la husu osan. (Lee 2 Korinto 8:13-15.) Ho ida-neʼe, sira neʼebé fó no sira neʼebé simu mós sai Jeová nia belun.

12. Oinsá mak Abraão hatudu katak nia tau fiar ba Maromak?

¹² Dalan ida tan atu halo belun ho Jeová mak hodi la envolve demais ho sistema ekonomia iha mundu neʼe maibé uza ita-nia situasaun moris nian atu buka “rikusoin neʼebé loos”. Neʼe mak buat neʼebé Abraão halo. Nia halo tuir Jeová hodi husik sidade Ur neʼebé riku tebes no hela deʼit iha tenda tanba nia hakarak tebes atu sai Jeová nia belun. (Ebreu 11:8-10) Nia sempre tau fiar ba Maromak duké tau fiar ba sasán sira. (Gênesis [Kejadian] 14:22, 23) Jesus hakarak ema atu hatudu fiar hanesan neʼe. Loron ida, nia hatete ba mane joven ida neʼebé riku: “Se ó hakarak atu sai kompletu iha ó-nia serbisu ba Maromak, bá no faʼan ó-nia rikusoin sira no fó ba ema kiak, no ó sei hetan rikusoin iha lalehan, no mai tuir haʼu.” (Mateus 19:21) Maski joven neʼe la hatudu fiar hanesan Abraão, maibé iha ema seluk neʼebé tau fiar ba Maromak.

13. (a) Konsellu saida mak Paulo fó ba Timóteo? (b) Oinsá mak ita bele uza Paulo nia konsellu ohin loron?

¹³ Timóteo mak ema neʼebé iha fiar. Apóstolu Paulo bolu nia nuʼudar “Kristu Jesus nia soldadu neʼebé diʼak”. Tuirmai nia hatete ba Timóteo: “Ema neʼebé sai nuʼudar soldadu la envolve an ho serbisu seluk atu buka moris tanba nia hakarak atu halo kontente ema neʼebé hatama nia nuʼudar soldadu.” (2 Timóteo 2:3, 4) Ohin loron, Jesus nia dixípulu hotu hakaʼas an tebes atu halo tuir Paulo nia konsellu, inklui mós irmaun-irmán millaun ida liu neʼebé serbí tempu-tomak. Sira hasees an atu la monu ba promosaun sira neʼebé mundu neʼe uza atu tenta ema. Sira hanoin-hetan Bíblia nia prinsípiu neʼebé dehan: “Ema neʼebé empresta sei sai atan ba ida neʼebé fó-empresta.” (Provérbios [Amsal] 22:7) Satanás hakarak ita atu uza ita-nia tempu no forsa hotu ba sistema ekonomia nian. Ema balu debe osan barak hodi hola uma, hola karreta, bá eskola boot, ka halaʼo kazamentu neʼebé gasta osan barak tebes. Se ita mak la kuidadu, ita bele monu ba debe boot neʼebé presiza tinan barak atu selu. Ita bele hatudu matenek hodi halaʼo moris neʼebé simples, la monu ba debe, no la uza osan arbiru. Neʼe bele ajuda ita atu serbí Maromak ho livre duké sai atan ba mundu neʼe nia sistema ekonomia nian.—1 Timóteo 6:10.

14. Ita tenkesér hakaʼas an atu halo saida? Fó toʼok ezemplu balu.

¹⁴ Ita tenkesér tau uluk Maromak nia Ukun atu bele halaʼo moris neʼebé simples. Feen-laʼen ida iha bisnis boot neʼebé manán osan diʼak. Maibé sira hakarak atu serbí fali Jeová tempu-tomak. Tan neʼe sira faʼan sira-nia bisnis, ró, no sasán sira seluk. Tuirmai sira fó sira-nia an atu ajuda harii sede-jerál foun iha Warwick, Novaiorke. Neʼe mak buat neʼebé espesiál tebes ba sira tanba sira bele serbisu hamutuk ho sira-nia oan-feto no mane-foun. No ba semana balu sira mós serbisu hamutuk ho laʼen nia inan-aman sira neʼebé mós fó ajuda daudauk ba projetu iha Warwick. Irmán pioneiru ida husi Colorado, Estadus Unidus, nia hetan serbisu part-time ida iha banku. Ninia patraun kontente tebes ho ninia serbisu toʼo hakarak husu nia atu serbisu full-time no aumenta ninia saláriu ba dala tolu. Maibé tanba simu serbisu hanesan neʼe bele hanetik serbisu haklaken, nia la  simu serbisu neʼe. Ezemplu sira-neʼe mak ezemplu balu deʼit neʼebé hatudu katak Jeová nia atan sira halo duni sakrifísiu oioin. Se ita mak hakaʼas an atu tau uluk Maromak nia Ukun, neʼe hatudu katak ita hafolin ita-nia relasaun diʼak ho Maromak no hafolin mós rikusoin neʼebé loos, liu fali sasán hotu.

15. Rikusoin hanesan saida mak lori ksolok neʼebé boot liu hotu?

¹⁵ Iha rikusoin la hatudu katak tanba Maromak mak fó bensaun. Maibé Jeová fó duni bensaun ba sira neʼebé “sai riku ho hahalok loos”. (Lee 1 Timóteo 6:17-19.) Porezemplu, irmán ida naran Lucia hatene katak iha rai-Albánia presiza tan haklaken-naʼin. * Tan neʼe iha tinan 1993, nia muda husi Itália ba neʼebá. Nia la iha serbisu, maibé nia tau fiar ba Jeová atu ajuda nia. Nia aprende língua Albánia no ajuda ona ema naʼin-60 liu hodi halo dedikasaun ba Jeová. Karik ita-nia haklaken fatin la fó rezultadu neʼebé hanesan irmán neʼe, maibé ita-nia hakaʼas-an hotu atu ajuda ema seluk hodi aprende kona-ba Jeová no sai ninia belun mak iha folin boot tebes.—Mateus 6:20.

16. (a) Saida mak sei akontese ba sistema ekonomia ohin loron nian? (b) Oinsá hatene kona-ba neʼe sei ajuda ita atu iha hanoin neʼebé loos kona-ba sasán husi mundu neʼe?

¹⁶ Iha Lucas 16:9 Jesus la hatete katak ‘se karik rikusoin mundu aat neʼe nian lakon’. Maibé nia hatete katak rikusoin mundu aat neʼe nian sei lakon duni. Iha loron ikus sira-neʼe, banku barak mak taka ona no nasaun balun mós monu ona ba krize ekonomia nian. Lakleur, buat hotu sei sai aat liután. Satanás nia sistema polítiku, relijiaun, no ekonomia sei lakon hotu. Profeta Ezequiel no Sofonias fó-hatene nanis katak osan-mean ho osan-mutin neʼebé sempre sai hanesan sasán importante ba sistema ekonomia nian sei sai folin-laek iha futuru. (Ezequiel [Yehezkiel] 7:19; Sofonias [Zefanya] 1:18) Hanoin toʼok se aban-bainrua ita sai ona ferik no katuas, no ita haree katak, uluk ita uza ita-nia moris tomak hodi buka deʼit rikusoin mundu aat neʼe nian duké buka rikusoin neʼebé loos, ita sei sente oinsá? Karik neʼe sei halo ita sente hanesan ema ida neʼebé serbisu iha ninia moris tomak hodi buka deʼit osan, maibé ikusmai nia foin hatene katak tuir loloos osan sira-neʼe osan falsu. (Provérbios [Amsal] 18:11) Sin, sasán husi mundu neʼe aban-bainrua sei lakon. Tan neʼe, uza didiʼak sasán neʼebé ita iha hodi halo belun ho Jeová no Jesus. Buat neʼebé ita halo ba Jeová ho ninia Ukun sei lori ksolok neʼebé loos ba ita.

17, 18. Maromak nia belun sira sei hetan kolen saida iha futuru?

¹⁷ Bainhira Maromak nia Ukun toʼo mai, ema la presiza tan atu aluga ka debe osan. Hahán sei sai barak no lalika hola. La presiza tan selu doutór ka hola ai-moruk. Jeová nia belun hotu sei uza rai neʼe nia sasán neʼebé diʼak liu hotu. Osan-mean, osan-mutin, no fatuk-murak hotu sei uza atu enfeita deʼit, laʼós tan atu halo ema sai riku. Ema sei uza ai, fatuk, no besi ho kualidade neʼebé diʼak mak atu harii uma neʼebé furak. Ita-nia belun sira sei mai ajuda ita ho sira-nia hakarak rasik, laʼós tanba ita selu sira. Ita hotu sei fahe sasán ba malu hodi la selu.

¹⁸ Neʼe mak buat balu deʼit neʼebé Jeová no Jesus nia belun sira sei simu iha futuru. Ema hotu iha rai neʼebé adora Jeová sei haklalak ho haksolok bainhira rona Jesus nia liafuan neʼebé hatete: “Mai, imi neʼebé haʼu-nia Aman fó bensaun, mai simu Ukun neʼebé prepara ona ba imi husi mundu hahú.”—Mateus 25:34.