1. Ita hotu iha hakarak kona-ba saida?

ITA sente oinsá se ema neʼebé Ita koñese no respeitu haluha Ita-nia naran, ka aat liután mak nia la koñese ona Ita? Neʼe bele halo Ita laran-kanek tebes, loos ka lae? Tanbasá? Tanba ita hotu hakarak ema seluk simu ita. Laʼós neʼe deʼit, ita mós hakarak ema seluk hatene ita mak ema hanesan saida no ita kumpre ona saida deʼit.​—Números (Bilangan) 11:16; Jó (Ayub) 31:6.

2, 3. Saida mak bele book ita atu iha hanoin neʼebé laloos kona-ba oinsá ema tenke hafolin ita? (Haree dezeñu iha leten.)

² Maibé tanba ita la perfeitu, se ita la kuidadu, ita-nia hanoin bele sai kleʼuk kona-ba oinsá ema tenke hafolin ita. Satanás nia mundu bele book ita atu haburas hakarak hodi sai famozu ka sai ema neʼebé importante. Se ita komesa haburas hakarak sira-neʼe, ita sei la fó tan hahiʼi neʼebé Aman Jeová merese atu simu.​—Apokalipse 4:11.

³ Iha Jesus nia tempu, ulun-naʼin relijiaun balu iha hanoin neʼebé sala kona-ba oinsá ema tenke hatene no simu sira. Jesus fó avizu ba ninia dixípulu sira: “Matan-moris bá, tanba eskriba  sira laʼo bá-mai ho unuk neʼebé naruk no hakarak ema kumprimenta sira iha merkadu, no iha sinagoga laran, sira gosta atu tuur iha oin. No kuandu sira han iha festa, sira mós hakarak tuur iha fatin neʼebé importante liu.” Nia hatutan: “Sira sei hetan kastigu neʼebé makaʼas liu.” (Lucas 20:46, 47) Jesus gaba feto-faluk kiak ida neʼebé fó kontribuisaun osan kiʼik rua maski karik ema seluk la hatene kona-ba ninia kontribuisaun neʼe. (Lucas 21:1-4) Husi neʼe ita bele haree katak Jesus nia hanoin la hanesan ema seluk kona-ba simu hahiʼi. Lisaun neʼe sei ajuda ita atu haburas Maromak Jeová nia hanoin kona-ba neʼe.

4. Importante liu atu sé mak hatene no simu ita, no tanbasá?

⁴ Importante liu atu sé mak hatene no simu ita? Ema barak hakarak ema seluk hatene sira liuhusi edukasaun, negósiu, sai artista ka atleta. Maibé Paulo esplika: “Agora imi hatene ona Maromak, ka haʼu bele dehan katak Maromak hatene ona imi, entaun oinsá mak imi fila hodi sai atan fali ba buat neʼebé fraku no buat neʼebé la iha folin iha mundu neʼe?” (Galásia 4:9) Sin, se Maromak, Ukun-Naʼin Boot liu Hotu iha lalehan no rai hatene ita, neʼe mak priviléjiu neʼebé furak tebes. Bainhira Jeová hatene ita, neʼe katak nia hadomi ita, no nia hakarak sai ita-nia belun. Tuir loloos Jeová kria ita hodi bele sai ninia belun, neʼe mak razaun neʼebé ita hotu moris.​—Eclesiastes (Pengkhotbah) 12:13, 14.

5. Ita presiza halo saida hodi Jeová bele hatene ita?

⁵ Ita hatene katak Moisés mak Jeová nia belun. Bainhira Moisés husu ba Jeová: “Halo haʼu hatene Ita-nia dalan sira”, Jeová hatán: “Haʼu mós sei halo buat neʼebé ó husu, tanba haʼu simu ona ó no haʼu hatene didiʼak kona-ba ó.” (Êxodo [Keluaran] 33:12-17) Ita mós bele hetan bensaun hanesan neʼe bainhira Jeová hatene didiʼak kona-ba ita. Maibé ita presiza halo saida hodi Jeová bele hatene didiʼak? Ita tenke hadomi nia no dedika ita-nia moris ba nia.​—Lee 1 Korinto 8:3.

6, 7. Saida mak bele estraga ita-nia relasaun diʼak ho Jeová?

⁶ Maibé ita presiza proteje ita-nia relasaun espesiál ho ita-nia Aman lalehan nian. Hanesan ema kristaun iha Galásia, ita mós tenke hasees an hodi la sai atan ba “buat neʼebé fraku no buat neʼebé la iha folin”, inklui mós la buka susesu no naran-boot iha mundu neʼe. (Galásia 4:9) Ema kristaun sira iha Galásia hatene ona kona-ba Maromak, no Maromak mós hatene sira. Maibé Paulo hatete katak irmaun-irmán sira-neʼe fila fali ba buat neʼebé folin-laek. Paulo nia liafuan hanesan atu husu sira: ‘Imi hadook an ona husi buat neʼebé beik no folin-laek maibé tanbasá mak imi fila fali hodi sai atan ba buat sira-neʼe?’

⁷ Buat hanesan neʼe mós bele akontese ba ita ohin loron ka lae? Bele. Hanesan Paulo, karik bainhira ita foin aprende lia-loos, ita mós husik tiha buat balu neʼebé bele halo ita sai naran-boot no sai susesu iha Satanás nia mundu. (Lee Filipe 3:7, 8.) Karik ita husik tiha oportunidade atu hetan bolsa-estudu, hetan serbisu diʼak, ka manán osan boot. Ka karik ita iha oportunidade atu sai famozu ka riku tanba ita iha talentu kona-ba múzika ka desportu. Maibé ita husik tiha oportunidade sira-neʼe. (Ebreu 11:24-27) La matenek atu arrepende kona-ba desizaun sira neʼebé ita halo ona hodi hanoin katak ita lakon oportunidade sira-neʼe. Tanba hanoin hanesan neʼe bele book ita atu fila fali ba buat sira iha mundu neʼe, katak buat neʼebé ita hatene ona “la iha folin”.

8. Saida mak bele hametin ita-nia hakarak atu sai ema neʼebé Jeová hatene?

⁸ Oinsá mak ita bele hametin ita-nia hakarak atu sai ema neʼebé Jeová hatene duké buka mundu nia atensaun? Ita presiza hanoin-hetan faktu importante rua. Primeiru, Jeová sempre fó atensaun ba ema neʼebé serbí nia ho laran-metin. (Lee Ebreu 6:10; 11:6.) Jeová haree ninia atan ida-idak neʼebé laran-metin hanesan buat neʼebé folin-boot tebes, nia sente se nia la fó atensaun ba sira, neʼe hanesan “hatudu hahalok aat”. Jeová sempre “hatene sira neʼebé ninian”. (2 Timóteo 2:19) Nia “haree didiʼak ema laran-loos nia hahalok” no nia hatene oinsá atu salva sira.​—Salmo (Mazmur) 1:6; 2 Pedro 2:9.

9. Fó toʼok ezemplu kona-ba dalan neʼebé Jeová hatudu nia simu ninia povu.

⁹ Dala ruma Jeová uza dalan espesiál oioin hodi hatudu ba ninia povu katak nia simu sira. (2 Crônicas [Tawarikh] 20:20, 29) Porezemplu, bainhira Faraun nia tropa neʼebé forsa boot duni tuir ema Izraél, Jeová salva ema Izraél sira iha Tasi Mean. (Êxodo [Keluaran] 14:21-30; Salmo [Mazmur] 106:9-11) Akontesimentu neʼe mak kmanek tebes tanba liutiha maizumenus tinan 40, ema seluk sei konta nafatin kona-ba akontesimentu neʼe. (Josué [Yosua] 2:9-11) Hodi hanoin beibeik kona-ba dalan neʼebé Jeová hatudu ninia domin no forsa hodi salva ninia povu iha tempu uluk, neʼe fó kmaan ba ita tanba lakleur tan Gog husi rai-Magog sei ataka ita. (Ezequiel [Yehezkiel] 38:8-12) Iha tempu neʼebá, ita sei kontente tanba ita hakaʼas an atu Maromak hatene no simu ita, duké hakaʼas an atu mundu neʼe simu ita.

10. Faktu importante segundu neʼebé ita presiza hanoin-hetan mak saida?

¹⁰ Faktu importante segundu neʼebé ita presiza hanoin-hetan mak karik Jeová sei uza dalan neʼebé ita nunka hanoin hodi hatudu katak nia hatene ita. Se ema halo buat diʼak tan deʼit atu hetan naran-boot husi ema seluk, Jeová sei la fó kolen ba ema neʼe. Tanbasá? Tanba hanesan Jesus hatete katak, se ema seluk fó ona glória ba ema neʼe, ema neʼe simu ona ninia kolen tomak. (Lee Mateus 6:1-5.) Maibé Jeová “neʼebé haree buat hotu”, fó atensaun ba sira neʼebé ema seluk la rekoñese kona-ba buat diʼak neʼebé sira halo. Nia haree buat neʼebé sira halo no nia fó kolen ba sira. Dala ruma Jeová fó kolen ba ninia atan iha dalan neʼebé sira nunka hanoin. Mai ita haree toʼok ezemplu balu.

11. Iha dalan saida mak Jeová hatudu katak nia hatene Maria?

¹¹ Bainhira tempu toʼo ona ba Maromak nia Oan-Mane atu moris nuʼudar ema, Jeová hili Maria, feto joven neʼebé haraik-an hodi sai Jesus nia inan. Maria hela iha sidade ida naran Nazaré, fatin neʼe dook husi Jeruzalein no dook husi templu neʼebé furak. (Lee Lucas 1:26-33.) Tanbasá mak Jeová hili Maria? Anju Gabriel hatete ba Maria katak tanba nia “monu loos ba Maromak nia laran”. Husi buat neʼebé Maria fó sai ba ninia família ida naran Isabel, ita bele haree katak Maria iha relasaun neʼebé diʼak ho Jeová. (Lucas 1:46-55) Sin, Jeová sempre fó atensaun ba Maria tanba nia hatudu laran-metin ba Jeová, no Jeová fó bensaun ba nia iha dalan neʼebé nia nunka hanoin.

12, 13. Jesus simu hahiʼi iha dalan saida iha tempu neʼebé nia foin moris, no liutiha loron 40 bainhira Maria lori nia ba templu?

¹² Iha tempu neʼebé Jesus moris, Jeová la fó sai ba ema-boot ka naʼi-ulun sira iha Jeruzalein ka Belein kona-ba Jesus nia moris.  Maibé nia haruka anju sira mosu ba bibi-atan sira neʼebé haraik-an, sira neʼebé hein daudauk bibi iha sidade Belein nia liʼur. (Lucas 2:8-14) Tuirmai bibi-atan sira-neʼe bá vizita bebé neʼebé foin moris mai. (Lucas 2:15-17) Karik Maria no José hakfodak tebes hodi haree dalan neʼebé Jesus simu hahiʼi. Dalan neʼebé Jeová halo buat ruma la hanesan duni ho Diabu nia dalan. Bainhira Satanás haruka ema siʼikdór sira bá hodi vizita Jesus ho ninia inan-aman, ema hotu iha Jeruzalein sai laran-taridu tebes hodi rona katak Jesus moris ona. (Mateus 2:3) Hodi fó sai ba ema barak hanesan neʼe mós lori susar boot, tanba neʼe halo ema oho labarik barak neʼebé la halo sala.​—Mateus 2:16.

¹³ Ukun-Fuan neʼebé Jeová fó ba ema Izraél hatete katak, se inan ida tuur-ahi oan-mane, liutiha loron 40 nia tenke hasaʼe sakrifísiu ba Jeová. Tan neʼe Maria no José laʼo maizumenus kilómetru sia ba Jeruzalein hodi hasaʼe sakrifísiu ba Jeová iha templu. (Lucas 2:22-24) Karik iha dalan Maria hanoin amlulik sei simu Jesus iha dalan neʼebé espesiál ka lae. Ikusmai Jesus simu hahiʼi iha dalan neʼebé Maria nunka hanoin. Jeová hili deʼit Simeão, ema neʼebé “laran-metin no hamtaʼuk ba Maromak”, no mós profeta feto-faluk ida neʼebé idade 84 naran Ana hodi fó sai katak Jesus sei sai Mesias ka Kristu neʼebé promete nanis ona.​—Lucas 2:25-38.

14. Jeová fó kolen ba Maria iha dalan saida deʼit?

¹⁴ Oinsá ho Maria? Jeová hatene no simu nafatin Maria tanba nia kontinua hatudu laran-metin hodi haboot no tau matan ba Jesus. Tan neʼe Jeová rai liafuan balu neʼebé Maria koʼalia no temi buat balu neʼebé Maria halo iha Bíblia. Bainhira Jesus halaʼo serbisu haklaken ba tinan tolu ho balu, Maria la tuir Jesus. Karik tanba nia sai ona feto-faluk no hela deʼit iha Nazaré. Maski nia lakon oportunidade barak tanba la tuir Jesus, maibé iha tempu Jesus mate, Maria konsege hamutuk ho nia. (João 19:26) Ikusmai, Maria mós hamutuk ho Jesus nia dixípulu sira iha Jeruzalein antes sira simu espíritu santu iha loron Pentekostes. (Apóstolu 1:13, 14) Ita bele fiar katak nia mós simu espíritu santu hamutuk dixípulu seluk. Se nuneʼe, nia mós hetan oportunidade atu hamutuk ho Jesus iha lalehan ba nafatin. Neʼe mak kolen neʼebé furak tebes ba ninia serbisu hotu ho laran-metin!

15. Oinsá mak Jeová hatudu katak nia simu ninia Oan-Mane bainhira iha rai?

¹⁵ Jesus la buka hahiʼi husi ulun-naʼin relijiaun ka polítiku nia naʼi-ulun sira. Ba nia, buat neʼebé importante liu mak Jeová simu nia. Tan neʼe, ita bele fiar katak bainhira Jeová koʼalia husi lalehan hodi fó sai katak nia hadomi Jesus, ida neʼe hametin tebes Jesus. Jeová halo nuneʼe ba dala tolu. Dala primeiru mak iha tempu neʼebé Jesus hetan batizmu iha Mota Jordaun, Jeová hatete: “Neʼe mak haʼu-nia Oan-Mane neʼebé haʼu hadomi, ida neʼebé halo haʼu-nia laran kontente.” (Mateus 3:17) Tuir Bíblia, karik João Batista no Jesus deʼit mak rona bainhira Jeová fó sai liafuan sira-neʼe. Tuirmai, tinan ida antes Jesus mate, ninia apóstolu naʼin-tolu rona bainhira Jeová koʼalia kona-ba Jesus: “Neʼe mak haʼu-nia Oan-Mane, ida neʼebé haʼu hadomi, no neʼebé halo haʼu kontente, rona nia bá.” (Mateus 17:5) Dala ikus mak iha loron balu antes Jesus mate, Jeová koʼalia dala ida tan husi lalehan ba ninia Oan-Mane.​—João 12:28.

16, 17. Jesus simu glória saida husi Jeová neʼebé nia nunka hanoin?

¹⁶ Jesus hatene ema sei duun katak nia  koʼalia aat hasoru Maromak no nia sei mate ho terus. Maski nuneʼe, nia halo orasaun ba ninia Aman, dehan: “Halo tuir Ita-nia hakarak bá, laʼós haʼu-nian.” (Mateus 26:39, 42) “Nia tahan iha ai-riin terus nian hodi la sente moe”, tanba nia hakarak deʼit ninia Aman mak hatene no simu nia, laʼós mundu neʼe. (Ebreu 12:2) Oinsá mak Jeová hatudu katak nia simu duni Jesus?

¹⁷ Bainhira Jesus moris iha rai, nia halo orasaun atu hetan fali glória neʼebé uluk nia iha kuandu nia sei hamutuk ho ninia Aman iha lalehan. (João 17:5) Bíblia la hatete katak Jesus hakarak hetan glória boot liu fali glória neʼebé uluk nia iha. Nia la husu atu simu kolen espesiál tanba nia halo tuir ona Jeová nia hakarak sira iha rai. Maibé Jeová halo saida ba Jesus? Jesus simu glória husi Jeová iha dalan neʼebé nia nunka hanoin. Jeová fó moris-hiʼas ba nia hodi “foti nia ba pozisaun neʼebé aas liu”. Jeová mós fó ba Jesus moris nuʼudar kriatura espíritu neʼebé sei nunka mate. * (Filipe 2:9; 1 Timóteo 6:16) Jeová fó kolen neʼebé furak tebes ba Jesus tanba Jesus nia laran-metin!

18. Saida mak bele ajuda ita atu sai ema neʼebé Jeová simu no la buka naran-boot husi mundu neʼe?

¹⁸ Saida mak bele ajuda ita atu sai ema neʼebé Jeová simu, hodi la buka susesu no naran-boot husi mundu neʼe? Ita presiza hanoin-hetan katak Jeová sempre hatene ninia atan neʼebé laran-metin, no dala barak nia fó kolen ba sira iha dalan neʼebé sira nunka hanoin. Ita la hatene bensaun furak saida mak Jeová sei fó ba ita iha futuru. Maibé, ohin loron, mai ita tahan hasoru problema no susar oioin iha mundu aat neʼe, no la haluha katak mundu neʼe liu daudaun, tan neʼe ema nia susesu no naran-boot iha mundu neʼe mós sei lakon. (1 João 2:17) Ita-nia Aman Jeová neʼebé nakonu ho domin sei nunka haluha kona-ba ita-nia serbisu no domin neʼebé ita hatudu ba ninia naran, tanba nia “nunka hatudu hahalok aat”. (Ebreu 6:10) Sin, Jeová sei hatudu duni katak nia simu ita, karik liuhusi dalan neʼebé ita nunka hanoin.