Robaun nia aman Salomão mak liurai iha Izraél ba tinan 40. (1 Reis [Raja-Raja] 11:42) Bainhira Salomão mate iha tinan 997 molok Kristu, Robaun laʼo husi Jeruzalein ba Sikém atu sai liurai. (2 Crônicas [Tawarikh] 10:1) Nia la fiar an atu sai liurai ka lae? Ninia aman Salomão mak ema neʼebé matenek tebes. Lakleur, Robaun presiza hatudu se nia mós matenek atu rezolve problema neʼebé susar.

Ema Izraél sira sente terus no haruka ema atu fó-hatene Robaun saida mak sira hakarak nia atu halo. Sira dehan: “Ita-Boot nia aman halo ami-nia ai-leba todan. Maibé se Ita halo kmaan ami-nia serbisu todan neʼebé Ita-nia aman haruka ami atu halo no halo kmaan ami-nia ai-leba todan neʼebé nia tau iha ami-nia leten, entaun ami sei serbí Ita.”​—2 Crônicas [Tawarikh] 10:3, 4.

Robaun presiza foti desizaun neʼebé susar. Se nia halo tuir povu nia hakarak, nia, ninia família, no sira neʼebé hela iha palásiu karik presiza husik buat balu no la bele moris diʼak hanesan sira-nia toman. Maibé se nia la simu buat neʼebé povu sira husu, karik sira sei kontra hasoru nia. Saida mak nia halo? Primeiru, nia koʼalia ho katuas sira neʼebé uluk ajuda mós ninia aman Salomão. Sira dehan ba nia atu rona ba povu sira. Maibé depois, Robaun ba koʼalia fali ho mane sira neʼebé tinan hanesan ho nia, no deside atu trata ninia povu iha dalan neʼebé aat. Nia hatete ba povu: “Haʼu sei halo imi-nia ai-leba todan liután, no haʼu sei aumenta ai-leba neʼe nia todan. Haʼu-nia aman kastigu imi ho xikote, maibé haʼu sei kastigu imi ho xikote neʼebé tutun kroʼat.”​—2 Crônicas [Tawarikh] 10:6-14.

Ita bele hetan lisaun neʼebé diʼak ka lae? Ohin loron, iha irmaun-irmán barak neʼebé idade, no sira serbí Jeová ba tinan barak ona. Sira bele ajuda ita atu halo desizaun neʼebé diʼak. Mai ita hatudu matenek hodi rona ba sira.​—Jó (Ayub) 12:12.

Robaun halibur ninia tropa sira atu funu hasoru suku sira neʼebé kontra nia. Maibé, Jeová haruka profeta Semias atu fó-hatene sira: “Imi labele bá funu hasoru imi-nia maun-alin ema Izraél. Imi ida-idak tenke fila fali ba imi-nia uma rasik, tanba haʼu mak hamosu situasaun neʼe.”​—1 Reis (Raja-Raja) 12:21-24. *

Fasil ka lae ba Robaun atu rona ba Jeová? Povu sira sei hanoin oinsá kona-ba sira-nia liurai foun? Nia hatete ona katak nia sei kastigu sira ho “xikote neʼebé tutun kroʼat”, maibé ikusmai nia la halo buat ida kona-ba ema nia hahalok kontra neʼe! (Kompara ho 2 Crônicas [Tawarikh] 13:7.) Maski nuneʼe, liurai no ninia tropa sira “halo tuir Jeová nia liafuan no fila fali ba sira-nia uma, hanesan Jeová hatete ona ba sira”.

Saida mak lisaun ba ita? Ita hatudu matenek se ita halo tuir Maromak maski ema goza ita. Maromak sempre fó bensaun ba ita se ita halo tuir nia.​—Deuteronômio (Ulangan) 28:2.

Robaun hetan rezultadu saida? Robaun nafatin liurai ba suku Judá no Benjamin, no nia deside atu harii sidade foun sira. Nia mós hakaʼas an atu hametin sidade sira-neʼe. (2 Crônicas [Tawarikh] 11:5-12) No importante liu mak, ba tempu balu, nia halo tuir Jeová nia ukun-fuan sira. Bainhira reinu suku 10 komesa atu adora fali estátua sira, ema barak husi neʼebá laʼo ba Jeruzalein hodi fó apoiu ba Robaun no adorasaun neʼebé loos. (2 Crônicas [Tawarikh] 11:16, 17) Tan neʼe, Robaun nia reinu sai forte liután tanba nia halo tuir Jeová.

Maibé bainhira Robaun nia reinu sai forte ona, nia halo buat ruma neʼebé la hanesan baibain. Nia la halo tuir tan Jeová nia ukun-fuan no komesa adora fali maromak falsu sira! Tanbasá? Ninia inan, ema Amon, book Robaun atu troka ka lae? (1 Reis [Raja-Raja] 14:21) Ita la hatene se neʼe loos ka lae, maibé povu hotu halo tuir ninia ezemplu aat. Tan neʼe, Jeová husik Liurai Sisac husi Ejitu atu hadau Judá nia sidade barak, maski Robaun hametin ona sidade sira neʼe.​—1 Reis (Raja-Raja) 14:22-24; 2 Crônicas [Tawarikh] 12:1-4.

Situasaun sai aat liután bainhira Sisac no ninia tropa sira mai atu ataka Jeruzalein, fatin neʼebé Robaun nia kadunan hela bá. Iha tempu neʼe mak profeta Semias hatoʼo mensajen ida husi Maromak ba Robaun no ninia ulun-naʼin sira: “Imi husik ona haʼu, entaun haʼu mós husik imi hodi entrega imi ba Sisac nia liman.” Robaun simu dixiplina neʼe ka lae? Sin, nia simu! Bíblia hatete: “Izraél nia ulun-naʼin sira no mós liurai haraik an no dehan: ‘Jeová nia hahalok mak loos.’” Tan neʼe, Jeová salva Robaun, no sidade Jeruzalein la naksobu.​—2 Crônicas [Tawarikh] 12:5-7, 12.

Liutiha neʼe, Robaun kontinua atu ukun nasaun Judá. Antes nia mate, nia fó prezente barak ba ninia oan-mane sira. Karik nia halo ida-neʼe atu sira la kontra sira-nia maun no alin Abias neʼebé atu troka nia nuʼudar liurai. (2 Crônicas [Tawarikh] 11:21-23) Hodi halo ida-neʼe, Robaun hatudu matenek liu fali tempu uluk.

Maski Robaun koko atu halo buat balu neʼebé diʼak, maibé Bíblia hatete kona-ba tempu neʼebé nia ukun: “Robaun halo hahalok aat.” Tanbasá? Tanba “nia lakohi buka Jeová”. Tan neʼe, Jeová la kontente ho nia.​—2 Crônicas [Tawarikh] 12:14.

Saida mak ita aprende husi Robaun nia moris? Dala ruma nia halo tuir Jeová, no nia halo buat diʼak balu ba Jeová nia povu. Maibé nia la iha relasaun neʼebé besik ho Jeová, no la iha hakarak atu halo Jeová kontente. Tan neʼe, nia la halo buat neʼebé loos no komesa adora fali maromak falsu sira. Karik ita husu: ‘Iha tempu sira neʼebé Robaun simu Jeová nia dixiplina, neʼe tanba nia arrepende an duni kona-ba sala sira neʼebé nia halo no nia hakarak halo Jeová kontente, ka tan deʼit nia halo tuir buat neʼebé ema seluk haruka  nia atu halo?’ (2 Crônicas [Tawarikh] 11:3, 4; 12:6) Iha tempu seluk mós Robaun halo fali buat neʼebé aat. Nia la hanesan duni ninia avó Liurai David! Tanba maski Liurai David halo sala, nia arrepende an husi laran. Nia mós hadomi tebes Jeová no fó laran tomak ba adorasaun neʼebé loos iha ninia moris tomak.​—1 Reis (Raja-Raja) 14:8; Salmo (Mazmur) 51:1, 17; 63:1.

Ita bele aprende buat barak husi Bíblia nia istória neʼe. Diʼak tebes atu fó buat neʼebé ita-nia família presiza no halo buat diʼak ba ema seluk. Maibé atu Jeová bele simu ita, ita tenke adora nia iha dalan neʼebé halo nia kontente, no ita mós presiza haburas relasaun neʼebé metin ho nia.

Atu halo ida-neʼe, ita presiza haburas domin neʼebé kleʼan ba Jeová. Hanesan bainhira ita tau ai ba ahi atu ahi neʼe la mate, ita mós halo ita-nia domin ba Maromak lakan nafatin hodi lee beibeik ninia Liafuan, hanoin kleʼan kona-ba buat neʼebé ita lee, no halo orasaun beibeik. (Salmo [Mazmur] 1:2; Roma 12:12) Domin neʼe sei book ita atu halo Jeová kontente iha buat hotu neʼebé ita halo. Neʼe mós sei book ita atu arrepende an husi ita-nia sala sira no husu Jeová nia perdua. Se ita halo ida-neʼe, ita sei la sai hanesan Robaun, maibé ita sei laran-metin nafatin ba adorasaun neʼebé loos.​—Judas 20, 21.