ITA moris iha mundu neʼebé nakonu ho problema, tan neʼe ita presiza hakaʼas an atu bele iha dame. No maski ita sente iha dame, baibain susar atu mantein dame neʼe. Oinsá mak Maromak nia Liafuan bele ajuda ita atu hetan dame neʼebé loos no ba nafatin? Oinsá mak ita bele ajuda ema seluk atu iha dame neʼebé loos no ba nafatin?

Atu bele iha dame neʼebé loos, ita tenke sente seguru no iha neon neʼebé hakmatek. Ita mós presiza haburas relasaun diʼak ho ema seluk. Atu iha dame neʼebé ba nafatin, buat neʼebé importante liu mak hametin ita-nia relasaun ho Maromak. Oinsá mak ita bele halo ida-neʼe?

Bainhira ita halo tuir Jeová nia ukun-fuan no prinsípiu sira, ita hatudu katak ita tau fiar ba nia no hakarak iha dame ho nia. (Jeremias [Yeremia] 17:7, 8; Tiago 2:22, 23) Se ita halo nuneʼe, Jeová sei hakbesik ba ita no haraik dame neʼebé loos ba ita. Isaías (Yesaya) 32:17 hatete: “Rezultadu husi hahalok loos mak dame, . . . hakmatek no seguru ba nafatin.” Ita bele iha dame neʼebé loos hodi halo tuir Jeová husi laran.​—Isaías (Yesaya) 48:18, 19.

Ita-nia Aman iha lalehan mós bele ajuda ita atu haburas dame ba nafatin liuhusi ninia espíritu santu.​—Apóstolu 9:31.

Apóstolu Paulo temi hahalok terseiru husi “hahalok neʼebé espíritu santu lori mai” mak dame. (Galásia 5:22, 23) Tan neʼe, se ita hakarak haburas dame neʼebé loos, ita tenke husik espíritu santu dirije ita. Mai ita koʼalia kona-ba dalan rua oinsá Maromak nia espíritu santu bele ajuda ita atu iha dame.

 Primeiru, hodi lee Bíblia beibeik bele ajuda ita atu haburas dame. (Salmo [Mazmur] 1:2, 3) Bainhira ita medita kona-ba matadalan sira husi Bíblia, Maromak nia espíritu santu bele ajuda ita atu komprende Jeová nia hanoin kona-ba buat oioin. Porezemplu, ita haree oinsá nia sempre iha dame no tansá neʼe importante ba nia. Bainhira ita halo tuir matadalan sira husi Bíblia, ita sei sente dame liután iha ita-nia moris.​—Provérbios (Amsal) 3:1, 2.

Segundu, ita tenke halo orasaun husu Maromak nia espíritu santu. (Lucas 11:13) Jeová promete katak se ita husu ninia ajuda, “Maromak nia dame neʼebé aas liu ema nia hanoin hotu sei proteje [ita-nia] laran no [ita-nia] kbiit atu hanoin liuhusi Kristu Jesus”. (Filipe 4:6, 7) Se ita halo orasaun beibeik hodi husu Jeová nia espíritu santu, nia sei fó ba ita dame neʼebé loos, dame neʼe ba deʼit ema neʼebé iha relasaun diʼak ho nia.​—Roma 15:13.

Oinsá mak ema balu halo tuir Bíblia nia matadalan sira-neʼe no halo mudansa atu bele hetan dame neʼebé ba nafatin ho Jeová, ho sira-nia an rasik, no ho ema seluk?

Iha ema balu neʼebé uluk “hirusdór” maibé agora sira kontrola an, laran-diʼak, pasiénsia, no iha dame ho ema seluk. * (Provérbios [Amsal] 29:22) Mai ita haree oinsá mak irmaun no irmán ida hetan ajuda hodi la sai hirus lalais no haburas dame ho ema seluk.

David nia atitude neʼebé ladiʼak fó impaktu ba ninia liafuan. Antes dedika an ba Maromak, nia sempre muramura ema seluk no uza liafuan neʼebé kroʼat ba ninia família. Ikusmai, David haree katak presiza duni atu troka ninia hahalok atu bele iha dame. Saida mak ajuda nia atu iha dame? Nia hatete: “Haʼu komesa halo tuir Bíblia nia prinsípiu sira, no rezultadu mak, haʼu no haʼu-nia família hatudu respeitu ba malu liután.”

 Rachel nia moris uluk nian fó impaktu ba ninia atitude. Nia dehan: “Toʼo agora, haʼu koko makaʼas atu kontrola sentimentu hirus tanba haʼu boot iha família neʼebé gosta hirus lalais.” Saida mak ajuda nia atu bele iha dame? Nia hatete: “Haʼu halo orasaun beibeik hodi husu Jeová nia ajuda.”

David no Rachel nia ezemplu hatudu katak se ita halo tuir Bíblia nia prinsípiu sira no husu Maromak atu fó ninia espíritu santu, ita bele duni iha dame. Sin, maski ita moris iha mundu aat neʼe, ita bele iha dame ho ita-nia família no irmaun-irmán sira. Maibé Jeová hakarak ita atu “moris iha dame ho ema hotu”. (Roma 12:18) Neʼe bele duni ka lae? Ita-nia hakaʼas-an atu haburas dame ho ema hotu bele lori benefísiu saida deʼit?

Liuhusi haklaken, ita ajuda ema atu hetan dame. (Isaías [Yesaya] 9:6, 7; Mateus 24:14) Ita kontente hodi haree ema barak hakarak rona kona-ba mensajen neʼe. Rezultadu mak, duké sai laran-kraik ka sente hirus bainhira haree buat oioin neʼebé akontese iha mundu neʼe, agora sira iha esperansa ba futuru no neʼe book sira atu “buka dame no halo dame”.​—Salmo (Mazmur) 34:14.

Laʼós ema hotu hakarak simu ita-nia mensajen. (João 3:19) Maski nuneʼe, ita hetan ajuda husi Maromak nia espíritu santu atu hatoʼo liafuan diʼak neʼe ba sira ho dame no respeitu. Iha dalan hanesan neʼe, ita halo tuir Jesus nia matadalan neʼebé hakerek iha Mateus 10:11-13, nia dehan: “Kuandu imi tama iha uma ida, kumprimenta ema iha uma neʼe. No se sira simu imi, sira sei hetan bensaun. Maibé se sira la simu imi, bensaun neʼe sei nafatin ho imi.” Bainhira ita halo tuir matadalan neʼe, ita bele bá ho dame no ho esperansa katak ita bele ajuda fali ema neʼe iha tempu seluk.

Ita mós kontribui ba dame hodi hatudu respeitu ba ema-boot sira husi governu, inklui sira neʼebé karik la gosta ho ita-nia serbisu haklaken. Porezemplu, iha rai ida iha Áfrika, tanba governu todan ba sorin, sira la fó lisensa ba ita atu harii Reuniaun-Fatin sira. Irmaun sira hakarak rezolve problema neʼe ho dame, tan neʼe irmaun ida neʼebé uluk serbí nuʼudar misionáriu iha rai neʼe, bá hasoru Embaixadór husi rai neʼe iha Londres, Inglaterra. Ninia knaar mak atu esplika ba Embaixadór kona-ba Testemuña ba Jeová halaʼo serbisu neʼebé ho dame iha ninia rai. Vizita neʼe lori rezultadu saida?

Irmaun neʼe konta: “Bainhira haʼu toʼo iha embaixada neʼe, haʼu haree ema neʼebé simu bainaka ninia dalan hatais mai husi knua neʼebé ninia língua haʼu aprende ona. Tan neʼe haʼu hasé nia hodi uza ninia língua rasik. Nia hakfodak no husu haʼu: ‘Tanbasá mak ita mai?’ Ho respeitu haʼu koʼalia ba nia katak haʼu hakarak hasoru Embaixadór. Nia telefone ba Embaixadór no Embaixadór neʼe sai mai hasoru haʼu no hasé haʼu ho ninia língua rasik. Depois neʼe, nia rona ba haʼu ho didiʼak bainhira haʼu esplika ba nia kona-ba Testemuña nia atividade mak atividade neʼebé dame nian.”

Tanba irmaun neʼe esplika ho respeitu, ikusmai Embaixadór neʼe la hanoin sala tan kona-ba ita-nia serbisu. Liutiha tempu balu, governu husi rai neʼe fó lisensa atu harii Reuniaun-Fatin sira. Irmaun-irmán sira kontente tebes ho desizaun neʼe! Sin, hodi hatudu respeitu ba ema seluk bele lori rezultadu neʼebé diʼak inklui dame.

Ohin loron Jeová nia povu sente dame neʼebé loos iha paraízu espirituál. Ita sei sente dame liután bainhira Ita hakaʼas an atu haburas hahalok dame iha Ita-nia moris. Importante liu hotu mak Jeová sei simu Ita no Ita sei hetan dame neʼebé rohan-laek iha mundu foun.​—2 Pedro 3:13, 14.