1. Susar saida deʼit mak ema kristaun iha apóstolu sira-nia tempu hasoru?

MAIZUMENUS iha tinan 62 toʼo 64, apóstolu Pedro hakerek karta ba “sira neʼebé nuʼudar sidadaun temporáriu nian neʼebé namkari iha Pontus, Galásia, Kapadósia, Ázia, no Bitínia”. (1 Pedro 1:1) Irmaun-irmán sira-neʼe mai husi fatin oioin. Sira hasoru daudaun terus makaʼas husi ema, no sira presiza hetan kmaan no matadalan. Sira mós moris daudaun iha tempu neʼebé perigu tebes. Pedro dehan: “Buat hotu nia rohan besik daudaun ona.” Tuir loloos, la toʼo tinan sanulu tan Jeruzalein naksobu. Saida mak bele ajuda ema kristaun sira iha tempu neʼebá atu tahan liu tempu susar sira-neʼe?​—1 Pedro 4:4, 7, 12.

2, 3. Tanbasá mak Pedro hakarak irmaun-irmán sira hatudu laran-diʼak ba malu? (Haree dezeñu iha leten.)

² Buat ida neʼebé Pedro hakarak irmaun-irmán sira halo mak hodi “hatudu laran-diʼak ba malu”. (1 Pedro 4:9) Liafuan gregu “hatudu laran-diʼak” signifika “hadomi ema estranjeiru sira”. Maibé Pedro hakarak irmaun-irmán sira atu hatudu laran-diʼak “ba malu”, maski sira hatene malu didiʼak ona no sempre halo atividade ruma hamutuk. Oinsá mak hatudu laran-diʼak ba malu bele ajuda sira?

 ³ Neʼe bele halo sira hakbesik malu liután. Oinsá ho Ita? Ita sei hanoin-hetan tempu furak neʼebé Ita sente bainhira ema ida konvida Ita ba ninia uma ka lae? Bainhira Ita konvida ema ida ba Ita-nia uma, neʼe halo Ita hakbesik liután ba malu. Dalan ida atu koñese liután ita-nia irmaun-irmán sira mak simu no hatudu laran-diʼak ba sira. Ema kristaun sira iha Pedro nia tempu presiza hakbesik liután ba malu tanba problema aumenta barak iha tempu neʼebá. Iha “loron ikus sira-neʼe” ita mós presiza halo hanesan.​—2 Timóteo 3:1.

4. Ita sei koʼalia kona-ba saida deʼit iha lisaun neʼe?

⁴ Ita bele hatudu laran-diʼak “ba malu” iha dalan saida deʼit? Saida mak bele hanetik ita hodi simu malu, no oinsá mak ita bele hadiʼa situasaun neʼe? Saida mak bele ajuda ita atu sai bainaka neʼebé diʼak?

5. Oinsá mak ita bele simu malu ho laran-diʼak iha reuniaun sira?

⁵ Iha reuniaun sira: Jeová no ninia organizasaun konvida ita hodi tuir reuniaun sira. Ita hakarak ema hotu sente katak ita simu sira, liuliu ema foun. (Roma 15:7) Ita la bele haree deʼit ba ema nia jeitu ka hatais, tanba sira mós Jeová nia bainaka, tan neʼe ita presiza simu sira ho diʼak. (Tiago 2:1-4) Se ita haree ema ida mai no tuur mesak, karik bele konvida nia tuur hamutuk ho Ita, loos ka lae? Nia sei agradese tebes se Ita esplika ba nia kona-ba reuniaun ka ajuda nia loke eskritura sira. Neʼe mak dalan neʼebé diʼak tebes hodi “haburas toman atu hatudu laran-diʼak”.​—Roma 12:13.

6. Ita presiza hatudu laran-diʼak liuliu ba sé?

⁶ Han hamutuk: Iha tempu antigu, baibain ema han hamutuk ho bainaka sira neʼebé vizita hodi hatudu katak sira hakarak sai belun diʼak no iha dame. (Gênesis [Kejadian] 18:1-8; Juízes [Hakim-Hakim] 13:15; Lucas 24:28-30) Ita presiza hatudu laran-diʼak liuliu ba sé? Ba irmaun-irmán sira husi ita-nia kongregasaun. Mundu neʼe sai aat ba beibeik, ita presiza apoiu husi irmaun-irmán sira no laran-metin ba malu. Iha 2011, Grupu Administradór halo mudansa ba tempu Estudu Livru Haklaken ba família Betel iha Estadus Unidus husi tuku 6.45 lokraik ba fali tuku 6.15 lokraik. Tanbasá? Tanba neʼe bele halo fasil ba família Betel atu simu no hatudu laran-diʼak ba malu tanba estudu neʼe ramata sedu. Sukursál seluk mós halo tuir mudansa neʼe. No mudansa neʼe fó oportunidade ba família Betel atu koñese malu liután.

7, 8. Oinsá mak ita bele hatudu laran-diʼak ba oradór sira neʼebé vizita ita?

⁷ Dala ruma katuas área, reprezentante husi sukursál, ka irmaun sira mai husi kongregasaun seluk atu hatoʼo diskursu iha ita-nia kongregasaun. Ita bele uza oportunidade ida-neʼe hodi hatudu laran-diʼak ba irmaun sira-neʼe. (Lee 3 João 5-8.) Dalan ida atu bele halo nuneʼe mak konvida sira ba ita-nia uma hodi han hamutuk.

⁸ Irmán ida husi rai-Estadus Unidus konta fali hodi dehan: “Tinan barak ona haʼu ho haʼu-nia laʼen aproveita oportunidade neʼebé ami iha hodi konvida oradór ho sira-nia feen bá han iha ami-nia uma. Ami gosta tebes tempu ida-idak neʼebé ami gasta hodi ransu hamutuk. Tempu sira-neʼe hametin tebes ami-nia fiar. Ami nunka sente katak halo buat sira-neʼe saugati deʼit.”

9, 10. (a) Sesé deʼit mak presiza hela ba tempu naruk iha ita-nia uma? (b) Sira neʼebé iha deʼit uma kiʼik bele ajuda ka lae? Fó toʼok ezemplu.

⁹ Bainaka neʼebé hela ba tempu naruk: Iha tempu antigu, baibain ema fó fatin ba bainaka balu atu hela. (Jó [Ayub] 31:32; Filemon 22) Dala ruma ita mós presiza halo buat neʼebé hanesan. Baibain katuas área sira presiza fatin atu hela bainhira  sira vizita kongregasaun sira. Dala ruma irmaun-irmán sira neʼebé tuir eskola Bíblia sira ka voluntáriu ba konstrusaun mós presiza hela-fatin. No bainhira dezastre naturais akontese, irmaun-irmán sira neʼebé lakon sira-nia uma presiza fatin atu hela toʼo harii fali sira-nia uma. Ita la bele iha hanoin katak, sira neʼebé iha uma boot deʼit mak bele fó ajuda. Karik sira hatudu laran-diʼak hanesan neʼe dala barak ona iha tempu uluk. Ita rasik bele fó fatin ba ema seluk atu hela ka lae, maski Ita iha deʼit uma neʼebé kiʼik?

¹⁰ Irmaun ida husi rai-Koreia Súl sei hanoin-hetan bainhira irmaun-irmán sira neʼebé tuir eskola Bíblia sira hela iha ninia uma, nia dehan: “Foufoun haʼu iha duvida tanba ami foin kaben no hela deʼit iha uma neʼebé kiʼik. Maibé simu irmaun-irmán sira hodi hela hamutuk ho ami lori esperiénsia furak ida ba ami. Tanba ami foin kaben, diʼak ba ami hodi haree katak, kaben-naʼin sira-neʼe haksolok tebes tanba sira serbí Jeová no halo planu espirituál hamutuk.”

11. Tanbasá Ita presiza hatudu laran-diʼak ba irmaun-irmán sira neʼebé muda ba Ita-nia kongregasaun?

¹¹ Irmaun-irmán foun: Karik iha irmaun-irmán ka família balu muda ba Ita-nia kongregasaun tanba Ita-nia kongregasaun presiza ajuda. Ka karik pioneiru balu simu knaar hodi muda ba Ita-nia kongregasaun. Ba sira, neʼe mak mudansa neʼebé boot. Karik sira presiza sai toman iha fatin neʼebé foun, kongregasaun foun, no karik presiza aprende língua ka kultura neʼebé foun. Konvida irmaun-irmán sira-neʼe hodi han ka pasiar hamutuk bele ajuda sira atu hetan belun foun no sai toman ho situasaun neʼebé la hanesan.

12. Esperiénsia saida mak hatudu katak Ita la presiza iha buat barak atu hatudu laran-diʼak?

¹² Ita la presiza iha buat barak atu hatudu laran-diʼak hodi simu ema. (Lee Lucas 10:41, 42.) Irmaun ida konta fali nia ho ninia feen nia esperiénsia bainhira sira foin serbí nuʼudar misionáriu. Nia dehan: “Iha tempu neʼebá, ami seidauk iha esperiénsia no hanoin tebes ami-nia rai. Kalan ida, haʼu-nia feen hanoin tebes ami-nia rai toʼo haʼu la hatene atu halo saida. Maibé maizumenus iha tuku 7.30 kalan, ema ida dere odamatan. Ema neʼe estudante Bíblia no nia lori sabraka fuan balu ba ami. Nia mai atu fó benvindu ba misionáriu foun. Ami konvida nia tama no fó bee kopu ida ba nia. Tuirmai ami halo xá no susubeen xokolate hodi hemu hamutuk. Ami seidauk hatene koʼalia lian swahili iha tempu neʼebá no nia mós la komprende inglés.” Irmaun neʼe hatete katak esperiénsia neʼe ajuda sira komesa sai belun ho irmaun-irmán rai-naʼin sira no haksolok liután.

13. Hatudu laran-diʼak hodi simu ema lori benefísiu saida ba Ita?

¹³ Dala ruma Ita mós duvida atu hatudu laran-diʼak hodi simu ema ka lae? Se nuneʼe, karik Ita lakon ona oportunidade hodi sente tempu furak no hetan belun neʼebé ba nafatin. Hatudu laran-diʼak ba ema mak dalan neʼebé diʼak liu hotu atu la sente mesamesak. Maibé saida mak bele hanetik ema atu hatudu laran-diʼak ba malu? Karik tanba razaun balu.

14. Ita bele halo saida se ita sente katak ita-nia tempu no forsa latoʼo atu hatudu no simu laran-diʼak husi ema seluk?

¹⁴ Tempu no forsa: Jeová nia povu iha buat barak neʼebé sira presiza halo. Balu sente katak sira-nia tempu ka forsa latoʼo atu simu malu. Se Ita mak sente nuneʼe, karik Ita presiza halo mudansa balu ba Ita-nia tempu. Tanba Bíblia hakarak ita atu hatudu laran-diʼak ba malu. (Ebreu 13:2) Hatudu laran-diʼak mak hahalok neʼebé furak. Maibé atu bele hatudu laran-diʼak, karik Ita presiza  hamenus tempu neʼebé Ita uza ba buat neʼebé ladún importante.

15. Tanbasá mak ema balu sente susar atu hatudu laran-diʼak hodi simu malu?

¹⁵ Sente an: Karik Ita hakarak hatudu laran-diʼak hodi simu ema maibé Ita sente susar. Karik tanba Ita sente moe ka taʼuk se bainaka sira sente baruk. Karik tanba Ita la iha osan barak no Ita sente katak Ita la iha kbiit hanesan irmaun-irmán seluk atu hatudu laran-diʼak ba malu. Maibé presiza hanoin-hetan katak iha uma neʼebé jeitu laʼós buat neʼebé importante. Importante mak Ita-nia uma moos, la runguranga no katak Ita simu ema ho diʼak.

16, 17. Ita bele halo saida se Ita sente laran-taridu kona-ba simu bainaka sira?

¹⁶ Ema barak mós sente laran-taridu kona-ba simu bainaka. Katuas kongregasaun ida husi rai-Bretaña hatete: “Halo preparasaun atu simu bainaka bele halo ita-nia laran la hakmatek. Maibé buat hotu neʼebé iha ligasaun ho serbí Jeová sei lori benefísiu no ksolok boot liu fali laran-taridu. Haʼu gosta tebes tuur hamutuk ho bainaka hodi hemu deʼit kafé no koʼalia ba malu.” Importante atu hatudu katak ita hakarak koñese bainaka sira diʼak liután. (Filipe 2:4) Ema barak gosta koʼalia kona-ba esperiénsia moris nian, no dala ruma, dalan ida deʼit ita bele buka-hatene sira-nia esperiénsia mak tempu neʼebé ita hamutuk ho sira. Katuas kongregasaun ida tan hatete: “Konvida irmaun-irmán sira mai uma ajuda haʼu atu hatene sira no fó tempu ba haʼu atu koñese sira diʼak liután, liuliu kona-ba oinsá sira hetan lia-loos.” Sin, se Ita mak hatudu katak Ita hakarak koñese Ita-nia bainaka sira diʼak liután, ema hotu sei sente haksolok tebes.

¹⁷ Irmán pioneiru ida iha toman hodi simu irmaun-irmán sira neʼebé tuir eskola Bíblia dehan: “Foufoun haʼu sente an tebes tanba haʼu-nia uma simples, no sasán sira iha uma laran mós uzadu deʼit. Maibé irmaun ida neʼebé dirije eskola, ninia feen koʼalia ba haʼu hodi ajuda haʼu la hanoin barak. Nia dehan katak bainhira nia ho ninia laʼen vizita kongregasaun sira, tempu neʼebé sira gosta tebes mak hela hamutuk ho ema neʼebé maduru iha lia-loos. Maski sira la iha sasán barak, maibé sira hanesan ami, tau fokus deʼit hodi serbí Jeová no halaʼo moris neʼebé simples. Neʼe halo haʼu hanoin fali buat neʼebé haʼu-nia inan sempre koʼalia bainhira ami sei kiʼik: ‘Diʼak liu han modo-tahan bikan ida hamutuk ho domin.’” (Provérbios [Amsal] 15:17) Lalika preokupa demais, tanba buat neʼebé importante liu mak hatudu domin ba ita-nia bainaka sira.

18, 19. Oinsá mak hatudu laran-diʼak bele ajuda ita atu halakon sentimentu ladiʼak kona-ba ema seluk?

¹⁸ Ita-nia sentimentu kona-ba ema seluk: Iha ema balu iha Ita-nia kongregasaun neʼebé halo Ita hirus ka lae? Se Ita la koko atu hadiʼa Ita-nia sentimentu kona-ba ema neʼe, situasaun sei nunka troka. Karik Ita lakohi konvida ema ruma ba Ita-nia uma tanba Ita la gosta ninia hahalok ruma. Ka karik ema ruma uluk hakanek Ita no Ita sente susar atu haluha kona-ba buat neʼebé nia halo.

¹⁹ Bíblia hatete Ita bele hadiʼa Ita-nia relasaun ho ema seluk, maski ho inimigu sira, liuhusi hatudu laran-diʼak ba malu. (Lee Provérbios [Amsal] 25:21, 22. *) Konvida ema ba Ita-nia uma bele halakon sentimentu ladiʼak kona-ba ema neʼe no haburas dame ho nia. Karik neʼe sei ajuda Ita atu tau fokus ba ninia hahalok diʼak neʼebé book Jeová hodi dada ema neʼe ba nia. (João 6:44) Se Ita husik domin book Ita hodi konvida ema ruma, neʼe bele hahú kria relasaun neʼebé diʼak ba malu. Oinsá mak Ita bele hatene Ita-nia motivu atu halo nuneʼe mak tanba domin? Dalan ida mak hodi halo tuir konsellu husi Filipe 2:3: “Haraik-an hodi haree ema seluk boot liu [Ita].” Ita tenke buka-hatene iha dalan saida deʼit mak ita-nia irmaun-irmán sira boot liu ita. Karik ita bele aprende husi sira-nia fiar, hahalok tahan, ka hahalok furak seluk tan. Hanoin kona-ba sira-nia hahalok diʼak bele hametin ita-nia domin ba sira no halo fasil mós ba ita atu hatudu laran-diʼak ba malu.

20. Bainhira ema ida konvida ita, tanbasá no oinsá mak ita bele hatudu katak ita la dada fali ita-nia liafuan?

²⁰ Iha salmo ida, David husu: “Oh Jeová, sé mak bele sai bainaka iha Ita-nia tenda?” (Salmo [Mazmur] 15:1) Tuirmai David koʼalia kona-ba hahalok sira neʼebé Jeová hakarak ninia bainaka atu hatudu. Hahalok ida mak la dada fali ita-nia liafuan: “Nia kumpre nafatin ninia promesa sira maski neʼe lori susar ba nia.” (Salmo [Mazmur] 15:4) Se ita mak hatán ona ba ema neʼebé konvida ita, la diʼak atu kansela se la iha razaun neʼebé loos. Karik ema neʼebé konvida ita prepara ona buat barak hodi hein ita, tan neʼe se ita kansela, buat hotu neʼebé nia prepara sei sai estraga deʼit. (Mateus 5:37) Ema balu kansela tanba sira hetan fali konvite neʼebé diʼak liu. Hahalok hanesan neʼe hatudu domin no respeitu ka lae? Tuir loloos ita tenkesér agradese ba buat neʼebé ema halo ba ita. (Lucas 10:7) Se ita presiza duni atu kansela, diʼak atu fó-hatene kedas ba ema neʼebé konvida ita, tanba halo nuneʼe hatudu domin no hanoin ema.

21. Oinsá mak hatudu respeitu ba kultura bele ajuda ita atu sai bainaka neʼebé diʼak?

²¹ Importante mós atu hatudu respeitu ba rai ida-idak nia kostume. Iha kultura balu, ema neʼebé la hetan konvite mós bele vizita. Maibé iha kultura seluk, diʼak atu halo arranju uluk antes vizita ema ruma. Iha rai balu, uma-naʼin fó uluk hahán neʼebé diʼak liu hotu ba bainaka atu han, tuirmai mak fó ba ninia família rasik. Maibé iha rai seluk, ema hotu hanesan deʼit. Iha fatin balu, baibain bainaka mós lori buat ruma hodi kontribui atu han hamutuk. Maibé iha fatin seluk, uma-naʼin lakohi bainaka atu lori buat ida. Iha kultura balu, bainhira uma-naʼin konvida bainaka ruma, la diʼak ba bainaka sira atu simu kedas konvite neʼe ba dala primeiru ka dala segundu. Maibé iha kultura seluk, se ema la simu kedas konvite ida, neʼe la hatudu respeitu. Ita tenke hakaʼas an atu halo buat neʼebé lori ksolok ba ema neʼebé konvida ita.

22. Tanbasá mak importante atu “hatudu laran-diʼak ba malu”?

²² Apóstolu Pedro hatete: “Buat hotu nia rohan besik daudaun ona.” (1 Pedro 4:7) Ohin loron, ita sei hasoru terus boot liu hotu neʼebé mundu neʼe nunka hasoru. Tanba mundu aat neʼe sei sai aat liután, ita presiza hatudu domin neʼebé kleʼan ba ita-nia irmaun-irmán sira. Pedro nia konsellu atu “hatudu laran-diʼak ba malu”, aplika duni iha tempu neʼebé loos. (1 Pedro 4:9) Sin, hatudu laran-diʼak hodi simu malu mak hahalok neʼebé lori ksolok no importante ba ita-nia moris ohin loron no ba nafatin.