1, 2. (a) Maromak nia atan sei simu kolen saida deʼit? (b) Saida mak bele ajuda ita atu tau fokus ba ita-nia kolen? (Haree dezeñu iha leten.)

KRISTU nia alin sira iha esperansa neʼebé furak tebes. Apóstolu Paulo hatete katak sira sei simu kolen husi Maromak atu moris iha lalehan. (Filipe 3:14) Sira sei ukun hamutuk ho Jesus Kristu no serbisu hamutuk ho nia atu ajuda ema sai perfeitu fali. (Apokalipse 20:6) Neʼe mak esperansa neʼebé furak duni! Bibi seluk mós sei simu sira-nia kolen. Sira sei moris ba nafatin iha paraízu, no esperansa neʼe sei lori ksolok neʼebé loos ba sira!—2 Pedro 3:13.

² Paulo hakarak ajuda ninia maluk sira atu hatudu laran-metin hodi bele hetan sira-nia kolen, no nia dehan ba sira: “Kontinua hanoin kona-ba buat leten nian.” (Koloso 3:2) Sira presiza tau fokus ba sira-nia esperansa atu bá lalehan. (Koloso 1:4, 5) Loos duni, hanoin beibeik kona-ba bensaun sira husi Jeová bele ajuda ita hotu atu tau fokus ba ita-nia kolen, maski ita-nia esperansa mak atu bá lalehan ka moris iha rai.—1 Korinto 9:24.

3. Paulo fó avizu saida deʼit ba ema kristaun?

 ³ Paulo mós fó avizu ba ema kristaun kona-ba perigu ruma neʼebé bele hanetik sira atu simu sira-nia kolen. Porezemplu, nia hakerek karta ba kongregasaun Koloso kona-ba ema kristaun falsu sira neʼebé hakarak halo tuir nafatin Moisés nia Ukun-Fuan hodi Maromak simu sira duké tau fiar ba Kristu. (Koloso 2:16-18) Paulo mós koʼalia kona-ba perigu balu neʼebé ohin loron bele hanetik ita atu manán ita-nia kolen. Nia esplika oinsá bele hasees an husi hakarak neʼebé la morál no se problema ruma mosu entre ita ho irmaun-irmán sira ka ho ita-nia família, ita bele halo saida. Paulo nia konsellu sira diʼak tebes ba ita ohin loron. Tan neʼe, mai ita koʼalia kona-ba avizu balu neʼebé hetan husi ninia karta ba ema Koloso sira.

4. Tanbasá mak hakarak neʼebé la morál bele hanetik ita atu manán ita-nia kolen?

⁴ Bainhira Paulo fó-hanoin ba ninia maluk sira kona-ba sira-nia esperansa furak, tuirmai nia dehan: “Tan neʼe, hamate hakarak isin nian neʼebé book imi atu halo hahalok hanesan sala-foʼer, hahalok la moos, hakarak seksuál neʼebé foʼer, hakarak aat, no kaan buat neʼebé ema seluk nian.” (Koloso 3:5) Hakarak la morál iha forsa boot tebes no bele estraga ita-nia relasaun diʼak ho Jeová no halakon ita-nia esperansa kona-ba futuru. Iha irmaun ida neʼebé uluk monu ba hakarak neʼebé la morál no ikusmai fila fali ba kongregasaun. Nia dehan, hakarak la morál iha forsa boot tebes no nia monu tiha ba sala mak nia foin fila fali ba Jeová.

5. Oinsá mak ita bele proteje ita-nia an iha situasaun sira neʼebé perigu?

⁵ Ita presiza kuidadu tebes liuliu iha situasaun neʼebé bele halo ita kontra Jeová nia morál sira. Porezemplu, diʼak ba ema neʼebé namora atu halo lei ba sira-nia an husi tempu neʼebé sira hahú namora, kona-ba kaer, reʼi malu, no mesamesak. (Provérbios [Amsal] 22:3) Situasaun perigu seluk tan mak bainhira ema ida dook husi uma ba tempu kleur hodi halo serbisu ruma ka bainhira feto ho mane ida serbisu hamutuk. (Provérbios [Amsal] 2:10-12, 16) Ita bele halo saida hodi proteje ita-nia an? Fó-hatene katak Ita mak Testemuña ba Jeová. Hatudu respeitu, no hanoin-hetan katak, hatudu sentimentu gosta ba ema bele lori perigu. Ita mós presiza kuidadu iha tempu neʼebé ita sente triste ka sente mesamesak. Iha tempu hanesan neʼe karik ita hakarak ema seluk atu fó kmaan ba ita. No dala ruma ita bele sai triste tebes toʼo ita simu ema naran deʼit atu fó konsola ita. Neʼe perigu tebes. Se ita mak iha situasaun hanesan neʼe, keta halo buat neʼebé bele hanetik ita atu manán ita-nia kolen. Buka ajuda husi Jeová no husi ita-nia irmaun ka irmán sira.—Lee Salmo (Mazmur) 34:18; * Provérbios (Amsal) 13:20. *

6. Ita tenke hanoin kona-ba saida bainhira atu hili atividade ruma?

⁶ Ita presiza hasees an husi atividade sira neʼebé la moos atu bele hamate hakarak neʼebé la morál. Ohin loron, iha atividade barak neʼebé halo ita hanoin fali buat neʼebé ema halo iha sidade Sodoma no Gomorra. (Judas 7) Ema neʼebé kria atividade sira-neʼe halo ema hanoin katak, hahalok la morál mak buat neʼebé baibain deʼit no la lori perigu ba ema. Tan neʼe mak ita presiza kuidadu beibeik. Ita tenke hili didiʼak atividade neʼebé la hanetik ita atu manán ita-nia kolen  moris nian iha futuru.—Provérbios (Amsal) 4:23.

7. Problema saida mak bele mosu iha kongregasaun?

⁷ Atu sai parte ida ba kongregasaun mak bensaun boot ba ita. Ita estuda Maromak nia Liafuan hamutuk iha reuniaun no fó apoiu ba malu. Halo nuneʼe ajuda ita tau fokus ba ita-nia kolen. Maibé dala ruma tanba komprende malu sala bele hamosu problema entre ita ho ita-nia irmaun-irmán sira. Se ita mak la rezolve problema sira, neʼe bele halo ita rai odi ba malu.—Lee 1 Pedro 3:8, 9.

8, 9. (a) Hahalok saida deʼit mak bele ajuda ita atu manán ita-nia kolen? (b) Saida mak bele ajuda ita atu iha dame nafatin se irmaun ka irmán ida halo ita sai hirus?

⁸ Keta husik hahalok rai odi atu hanetik ita manán ita-nia kolen. Paulo esplika ba ema Koloso: “Nuʼudar ema neʼebé Maromak hili ona, santu no neʼebé nia hadomi, tau hahalok domin ho laran-sadiʼa nuʼudar imi-nia hatais hamutuk ho laran-diʼak, haraik-an, laran-maus, no pasiénsia. Kontinua hatudu pasiénsia ba malu no fó perdua ba malu ho laran tomak maski ema halo buat ruma hasoru imi. Nuʼudar Jeová fó perdua ba imi ho laran tomak, imi mós tenke halo nuneʼe. Maibé, iha buat sira-neʼe hotu nia leten, tau domin nuʼudar imi-nia hatais, tanba domin mak kesi ita hamutuk iha dalan neʼebé kompletu.”—Koloso 3:12-14.

⁹ Hahalok domin no laran-diʼak bele ajuda ita atu fó perdua ba malu. Se ita sente katak ema seluk koʼalia ka halo buat ruma neʼebé hakanek ita, diʼak atu hanoin fali tempu neʼebé ita koʼalia ka halo buat ruma neʼebé hakanek ema seluk no oinsá sira fó perdua ba ita. Ita agradese tebes ba domin no laran-diʼak neʼebé sira hatudu mai ita, loos ka lae? (Lee Eclesiastes [Pengkhotbah] 7:21, 22. *) Ita agradese tanba Kristu nia domin mak halo ema neʼebé adora Jeová hodi iha unidade. (Koloso 3:15) Ita hotu hadomi Maromak neʼebé hanesan, haklaken mensajen neʼebé hanesan, no hasoru problema barak neʼebé hanesan. Se ita mak hatudu laran-diʼak, domin no fó perdua ba malu, kongregasaun sei sai metin liután no ita mós bele tau fokus ba ita-nia kolen.

10, 11. (a) Tanbasá mak laran-moras perigu? (b) Oinsá mak ita bele hasees an husi laran-moras hodi la lakon ita-nia kolen?

¹⁰ Laran-moras bele hanetik ita atu manán ita-nia kolen. Ezemplu balu husi Bíblia hatudu katak laran-moras perigu tebes. Porezemplu, Caim nia laran-moras mak halo nia oho Abel. Tanba Kora, Datan, no Abiram laran-moras mak halo sira kontra Moisés. No tanba Liurai Saul nia laran-moras mak halo nia koko atu oho David. Sin, Maromak nia Liafuan hatete loos: “Kuandu mosu laran-moras no istori-malu, sei mosu mós runguranga no buat aat oioin.”—Tiago 3:16.

¹¹ Se ita mak hakaʼas an atu hatudu domin no laran-diʼak, ita sei la sai laran-moras ba ema. Maromak nia Liafuan dehan: “Domin mak pasiénsia no laran-diʼak. Domin la laran-moras.” (1 Korinto 13:4) Se ita lakohi atu iha hahalok laran-moras, ita presiza iha hanoin hanesan Jeová nian. Ita presiza haree ita-nia irmaun-irmán nuʼudar parte oioin husi isin-lolon ida deʼit, neʼe mak kongregasaun. Bíblia dehan: “Se parte ida simu glória, parte hotu mós haksolok hamutuk ho nia.” (1 Korinto 12:16-18, 26) Se ita-nia maluk ida mak simu bensaun ruma, ita haksolok hamutuk ho nia, laʼós laran-moras ba nia. Hanoin kona-ba ezemplu diʼak husi  Liurai Saul nia oan Jónatas. Nia la sai laran-moras ba David bainhira David mak hetan knaar atu sai liurai, laʼós nia. Duké sai laran-moras, Jónatas fó fali laran-manas no apoia David. (1 Samuel 23:16-18) Ita bele sai laran-diʼak no iha domin hanesan Jónatas ka lae?

12. Konsellu saida husi Bíblia mak bele ajuda ita-nia família atu manán kolen iha futuru?

¹² Se ema ida-idak husi família mak halo tuir Bíblia nia prinsípiu sira, família sei sai hakmatek, kontente no sei manán kolen iha futuru. Paulo fó konsellu tuirmai ba família: “Imi feen sira, hakruʼuk an ba imi-nia laʼen, tanba neʼe mak buat neʼebé diʼak iha Naʼi. Imi laʼen sira, kontinua hadomi imi-nia feen no keta sai hirus makaʼas ba sira. Imi oan sira, halo tuir imi-nia inan-aman iha buat hotu, tanba ida-neʼe monu loos ba Naʼi nia laran. Imi aman sira, keta halo imi-nia oan sai hirus, atu nuneʼe sira la sai laran-tun.” (Koloso 3:18-21) Konsellu neʼe bele ajuda Ita-nia família ka lae?

13. Oinsá mak irmán sira bele ajuda sira-nia laʼen hakarak atu serbí Jeová?

¹³ Maibé, oinsá se Ita mak irmán neʼebé laʼen la serbí Jeová? Ita sei halo saida se Ita-nia laʼen trata Ita iha dalan neʼebé ladiʼak? Karik Ita bele sai hirus no istori ho nia, maibé halo nuneʼe bele troka situasaun ka lae? Maski Ita mak manán bainhira istori malu, maibé neʼe bele halo nia hakarak atu serbí Jeová ka lae? Karik lae. Maibé se Ita hatudu respeitu ba nia nuʼudar família nia ulun, neʼe bele ajuda Ita-nia família atu sai hakmatek  no lori glória ba Jeová. Karik Ita-nia ezemplu diʼak bele book Ita-nia laʼen hakarak atu serbí Jeová, se nuneʼe imi naʼin-rua sei manán kolen iha futuru.—Lee 1 Pedro 3:1, 2.

14. Irmaun ida tenke halo saida se ninia feen neʼebé la serbí Jeová la hatudu respeitu ba nia?

¹⁴ Oinsá se Ita mak irmaun neʼebé feen la serbí Jeová? Ita bele halo saida se Ita-nia feen la hatudu respeitu ba Ita? Se Ita mak sempre hakilar hodi hatudu katak Ita mak boot iha família, neʼe sei halo nia respeitu Ita ka lae? Lae. Maromak hakarak Ita atu sai laʼen neʼebé iha domin hanesan Jesus. (Éfeso 5:23) Jesus sempre hatudu pasiénsia no domin nuʼudar ulun ba kongregasaun. (Lucas 9:46-48) Se Ita mak banati-tuir Jesus, neineik-neineik karik Ita-nia feen mós sei hakarak atu serbí Jeová.

15. Oinsá mak laʼen bele hatudu katak nia hadomi ninia feen?

¹⁵ Jeová fó matadalan ba laʼen sira: “Kontinua hadomi imi-nia feen no keta sai hirus makaʼas ba sira.” (Koloso 3:19) Laʼen neʼebé iha domin hatudu respeitu ba ninia feen. Oinsá? Nia rona ba ninia feen nia hanoin no fó-hatene katak nia hafolin feen nia opiniaun sira. (1 Pedro 3:7) Maski nia la bele halo tuir buat hotu neʼebé ninia feen hakarak, maibé rona ba ninia feen bele ajuda nia halo desizaun neʼebé diʼak. (Provérbios [Amsal] 15:22) Laʼen neʼebé iha domin la obriga feen atu hatudu respeitu ba nia, maibé liuhusi ninia hahalok diʼak mak book ninia feen atu hatudu respeitu ba nia. Se laʼen ida mak hadomi ninia feen ho oan sira, neʼe sei halo sira kontente atu serbí Jeová no manán kolen iha futuru.

16, 17. Nuʼudar joven, saida mak bele ajuda Ita atu la sai hirus demais ba Ita-nia inan-aman?

¹⁶ Oinsá se Ita mak joven ida no Ita sente katak Ita-nia inan-aman la komprende Ita ka sira hakaʼas demais Ita? Karik neʼe bele halo Ita hirus tebes toʼo Ita hanoin atu la serbí tan Jeová. Maibé se Ita mak husik Jeová, Ita sei hatene katak la iha ema ida iha mundu neʼe mak hadomi Ita hanesan Ita-nia inan-aman ka maluk sira iha kongregasaun.

¹⁷ Hanoin toʼok: Se Ita-nia inan-aman la korrije Ita, oinsá mak Ita hatene katak sira hadomi Ita? (Ebreu 12:8) Sira laʼós ema neʼebé perfeitu, tan neʼe dalan neʼebé sira fó dixiplina bele halo Ita sai hirus. Maibé keta hanoin deʼit kona-ba neʼe. Koko atu komprende razaun tanbasá mak sira hakarak korrije Ita. Sai kalma nafatin no keta sai hirus. Maromak nia Liafuan hatete: “Ema neʼebé iha koñesimentu kuidadu kona-ba ninia liafuan sira, no ema neʼebé matenek sei kalma nafatin.” (Provérbios [Amsal] 17:27) Hakaʼas an atu sai ema neʼebé maduru hodi simu konsellu no halo tuir konsellu neʼe maski dalan neʼebé inan-aman fó, Ita ladún gosta. (Provérbios [Amsal] 1:8) Keta haluha katak inan-aman neʼebé hadomi Jeová mak prezente furak ida ba Ita. Sira hakarak ajuda Ita atu moris ba nafatin.

18. Tanbasá mak Ita hakarak tau fokus ba Ita-nia kolen iha futuru?

¹⁸ Ita hotu hein atu manán kolen iha futuru. Maski ita-nia esperansa mak atu bá lalehan ka moris iha rai, esperansa sira-neʼe hotu mak furak. Neʼe sei sai realidade iha futuru tanba ita-nia Kriadór promete ona katak: “Mundu tomak sei hatene kona-ba Jeová.” (Isaías [Yesaya] 11:9) Lakleur tan ema hotu iha mundu neʼe sei simu hanorin husi Maromak. Neʼe mak kolen neʼebé iha folin-boot tebes. Tan neʼe, tenke hanoin beibeik kona-ba buat neʼebé Jeová promete ona ba Ita, no keta husik buat ida hanetik Ita atu manán Ita-nia kolen iha futuru!