IRMAUN Allen * neʼebé muda ba kongregasaun seluk dook kilómetru 1.400 husi ninia uma uluk, dehan: “Antes muda, haʼu taʼuk uitoan. Haʼu la hatene se haʼu bele hetan belun foun, no irmaun-irmán sira iha neʼe simu haʼu ka lae.”

Se Ita mak muda ba kongregasaun seluk, karik Ita mós sente taʼuk. Saida mak bele ajuda Ita? Ita bele halo saida se Ita sente susar atu sai toman ho kongregasaun foun? Ka, se Ita la muda, saida mak Ita bele halo atu ajuda ema neʼebé muda ba Ita-nia kongregasaun?

Hanoin toʼok ezemplu neʼe: Se ita keʼe ai ida atu kuda fali iha fatin seluk, neʼe bele halo susar ba ai neʼe. Tanba presiza tesi kotu ai nia abut hodi bele fokit sai ai neʼe. Bainhira kuda ai neʼe iha fatin foun, ai neʼe presiza iha abut foun atu moris fali. Hanesan neʼe mós, bainhira Ita muda ba kongregasaun seluk, karik Ita mós bele hasoru susar balu. Iha Ita-nia kongregasaun uluk, karik Ita iha belun diʼak barak no toman ona ho atividade espirituál iha moris loroloron nian. Neʼe hanesan Ita-nia abut sai naruk ona. Maibé bainhira muda ba kongregasaun seluk, neʼe hanesan Ita presiza abut foun atu bele sai buras iha fatin foun neʼe. Halo tuir Bíblia nia prinsípiu sira bele ajuda Ita atu halo nuneʼe. Agora, mai ita haree Bíblia nia prinsípiu balu.

Ema neʼebé lee Maromak nia Liafuan beibeik mak hanesan “ai-hun ida neʼebé kuda besik bee-dalan sira, ai-hun neʼebé fó fuan tuir ninia tempu, ninia tahan sira sei la sai namlaek. No nia sei hetan susesu iha buat hotu neʼebé nia halo.”—Salmo (Mazmur) 1:1-3.

Ai presiza hetan beibeik bee hodi bele buras. Hanesan neʼe mós ho ema kristaun. Ita presiza lee beibeik Maromak nia Liafuan hodi iha nafatin relasaun diʼak ho Maromak. Tan neʼe, kontinua lee Bíblia loroloron no tuir reuniaun sira. Kaer metin Ita-nia toman diʼak sira kona-ba adorasaun família nian no estuda mesak. Toman espirituál sira neʼebé halo iha Ita-nia kongregasaun uluk, Ita presiza halo nafatin iha Ita-nia kongregasaun foun.

“Ema neʼebé fó kmaan ba ema seluk, nia rasik mós sei simu kmaan.”—Provérbios (Amsal) 11:25.

Haklaken beibeik bele ajuda Ita sai toman ho Ita-nia kongregasaun foun no fó laran-manas ba Ita. Kevin, katuas kongregasaun ida hatete: “Buat neʼebé ajuda haʼu no haʼu-nia feen bainhira muda ba kongregasaun foun mak foti kedas pioneiru estra. Hodi nuneʼe, lalais deʼit ami bele koñese pioneiru sira, irmaun-irmán sira seluk, no ema iha haklaken-fatin.” Roger muda ba fatin foun, dook kilómetru 1.600, nia hatete: “Dalan diʼak liu atu sai toman ba kongregasaun foun mak atu bá haklaken beibeik. No mós, fó-hatene katuas kongregasaun sira katak Ita prontu atu ajuda ho buat naran deʼit, porezemplu, hamoos Reuniaun-Fatin, troka ema nia fatin atu hatoʼo diskursu, ka husu atu tula ema ba reuniaun. Se irmaun-irmán sira haree Ita sempre prontu atu ajuda, fasil ba sira atu habelun Ita.”

“Loke luan imi-nia laran bá.”—2 Korinto 6:13.

Ransu ho irmaun-irmán sira. Bainhira Melissa no ninia família muda ba kongregasaun foun, sira halo planu atu habelun ho ema oioin. Melissa hatete:  “Antes reuniaun, no bainhira reuniaun hotu tiha, ami sempre koʼalia ho irmaun-irmán sira. Ami iha tempu atu koʼalia naruk uitoan, laʼós hasé deʼit.” Neʼe mós ajuda Melissa nia família atu hatene lalais irmaun-irmán sira-nia naran. Sira mós hakaʼas an hatudu laran-luak, no ida-neʼe ajuda sira atu iha relasaun diʼak ho ema iha kongregasaun. Melissa hatete: “Ami troka númeru ho irmaun-irmán sira hodi sira bele kontaktu ami no hola parte iha atividade kongregasaun nian no atividade sira seluk.”

Se Ita sente taʼuk atu hasoru ema foun, saida mak Ita bele halo? Bele komesa ho buat kiʼik deʼit, porezemplu, hatudu oin-midar. Maski foufoun Ita sente baruk atu oin-midar, ema seluk sei sente kmaan tanba “matan neʼebé nabilan halo ema laran-kontente”. (Provérbios [Amsal] 15:30) Rachel, neʼebé muda dook husi ninia moris-fatin, hatete: “Haʼu ema moedór. Dala ruma haʼu tenke obriga an atu koʼalia ba irmaun-irmán sira iha haʼu-nia kongregasaun foun. Haʼu buka ema neʼebé tuur mesak iha Reuniaun-Fatin no bá koʼalia ho nia, tanba karik nia mós moe, hanesan haʼu.” Koko toʼok halo planu atu koʼalia ho ema ida iha reuniaun sira semana-semana.

Karik foufoun Ita kontente atu hasoru irmaun-irmán sira ba dala primeiru, maibé lakleur Ita sente neʼe baibain deʼit. Se nuneʼe, Ita presiza hakaʼas an nafatin atu habelun ho ema.

Ai balu presiza tempu kleur atu abut bele sai naruk iha fatin foun. Hanesan neʼe mós, ema balu presiza tempu kleur atu sai toman ho sira-nia kongregasaun. Se Ita muda kleur ona maibé Ita sente seidauk toman, Bíblia nia prinsípiu sira tuirmai bele ajuda:

“Mai ita la para atu halo buat neʼebé diʼak, tanba se ita la sai baruk, ita sei koʼa iha tempu neʼebé loos.”—Galásia 6:9.

Fó tempu neineik-neineik ba Ita-nia an atu sai toman. Porezemplu, misionáriu barak neʼebé tuir Eskola Gilead, sira hela iha sira-nia rai foun ba tinan balu mak foin bá fali sira-nia rai atu vizita. Hodi halo hanesan neʼe ajuda sira atu habelun irmaun-irmán sira no sai toman ho kultura foun.

Alejandro no ninia feen muda kongregasaun dala barak ona no nia hatene katak presiza pasiénsia. Nia dehan: “Uluk ami muda, haʼu-nia feen dehan, ‘Haʼu-nia belun hotu iha ita-nia kongregasaun uluk!’” Alejandro fó-hanoin ba ninia feen katak ninia feen hatete buat neʼebé hanesan deʼit tinan rua antes neʼe bainhira sira muda. Maibé durante tinan rua neʼe, ninia feen hetan belun barak tanba hatudu interese ba irmaun-irmán sira.

“Keta dehan: ‘Tansá mak loron uluk nian diʼak liu fali agora?’ tanba ó la hatudu matenek bainhira husu ida-neʼe.”—Eclesiastes (Pengkhotbah) 7:10.

Keta kompara Ita-nia kongregasaun foun ho Ita-nia kongregasaun uluk nian. Porezemplu, karik irmaun-irmán sira iha kongregasaun foun mak nonook liu ka koʼalia barak liu se kompara ho kongregasaun uluk. Se nuneʼe, hakaʼas an tau fokus ba sira-nia hahalok diʼak, tanba Ita mós hakarak sira halo hanesan neʼe ba Ita. Iha ema balu, bainhira sira muda ba kongregasaun foun, sira rekoñese katak sira presiza husu ba sira-nia an: ‘Haʼu loloos  “hadomi maluk fiar-naʼin hotu” ka lae?’—1 Pedro 2:17.

“Kontinua husu, no neʼe sei fó ba imi.”—Lucas 11:9.

Halo orasaun beibeik. David, katuas kongregasaun ida hatete: “Keta koko atu tahan ida-neʼe mesak deʼit. Iha buat balu ita bele halo só ho Jeová nia ajuda. Tan neʼe, halo orasaun kona-ba neʼe!” Rachel, neʼebé temi ona iha leten hatete: “Se haʼu no haʼu-nia laʼen sente katak ami laʼós parte husi kongregasaun, ami temi ida-neʼe iha ami-nia orasaun. Ami hatete, ‘Se ami halo buat ruma neʼebé halo irmaun-irmán sira sente susar atu hakbesik ba ami, favór, ajuda ami hadiʼa ida-neʼe.’ Depois, ami koko gasta tempu ho sira iha kongregasaun.”

Inan-aman sira, se imi-nia oan sente susar atu sai toman ho kongregasaun foun, halo orasaun ho sira kona-ba neʼe. Ajuda sira atu hetan belun foun hodi planu kona-ba tempu atu ransu hamutuk ho ema iha kongregasaun.

Saida mak Ita bele halo atu ajuda ema foun neʼebé muda ba Ita-nia kongregasaun? Hakaʼas an atu sai sira-nia belun bainhira sira foin mai. Atu halo ida-neʼe, hanoin toʼok saida mak Ita gosta ema halo ba Ita se Ita mak foin muda kongregasaun, depois hakaʼas an atu halo tuir. (Mateus 7:12) Porezemplu, Ita bele konvida ema foun atu tuir Ita-nia adorasaun família nian ka atu haree hamutuk JW Broadcasting? Ita bele konvida sira bá haklaken hamutuk Ita ka lae? Se Ita konvida sira han hamutuk, maski buat neʼebé simples deʼit, sira sei la haluha Ita-nia laran-diʼak. Ajuda saida tan mak Ita bele fó ba sira?

Carlos hatete, “Bainhira ami foin toʼo iha ami-nia kongregasaun foun, irmán ida fó-hatene ami loja sira neʼebé mak faʼan sasán baratu. Neʼe ajuda tebes ami.” Se ema mai husi fatin neʼebé klima la hanesan Ita-nian, sira sei agradese se Ita esplika roupa saida mak diʼak atu uza iha Ita-nia fatin neʼebé rai-manas, malirin ka sempre udan. No Ita mós bele ajuda sira-nia haklaken hodi fó-hatene kona-ba ema iha haklaken-fatin fiar kona-ba saida.

Allen, neʼebé temi uluk, tinan ida ona iha ninia kongregasaun foun. Nia hatete: “Foufoun, haʼu presiza hakaʼas an atu koñese irmaun-irmán sira. Maibé agora haʼu haree sira hanesan família, no haʼu sente kontente.” Allen hatene katak, maski nia muda, maibé nia la lakon belun sira. Tuir loloos, nia hetan belun tan neʼebé sei sai ninia belun ba nafatin.