1. Saida mak halo Ita fiar katak Maromak nia Liafuan iha duni kbiit? (Haree foto iha leten.)

JEOVÁ nia povu fiar duni katak Maromak nia liafuan, ka ninia mensajen mak “moris no iha kbiit boot”. (Ebreu 4:12) Ita haree ona oinsá Bíblia troka ita no ema seluk nia moris. Antes sai Testemuña, ema balu iha toman atu naʼok, uza droga, ka moris iha dalan neʼebé la morál. Balu tan iha naran boot no riku, maibé sira sente mamuk iha sira-nia moris. (Eclesiastes [Pengkhotbah] 2:3-11) Loos duni, ema sira neʼebé uluk la iha esperansa, ohin loron hetan ona esperansa. Ita lee beibeik esperiénsia barak kona-ba neʼe husi série iha Livru Haklaken, “Bíblia troka ema nia moris.” No husi esperiénsia sira-neʼe ita mós haree katak, maski sai ona Testemuña, ema tenkesér hametin nafatin sira-nia relasaun diʼak ho Jeová liuhusi Bíblia nia ajuda.

2. Oinsá mak kbiit husi Maromak nia Liafuan ajuda ona ema barak iha apóstolu sira-nia tempu?

² Ita la hakfodak atu haree ema barak neʼebé aprende lia-loos halo mudansa ba sira-nia moris. Irmaun-irmán sira iha apóstolu sira-nia tempu neʼebé iha esperansa atu ukun iha lalehan mós halo mudansa hanesan neʼe. (Lee   1 Korinto 6:9-11.) Bainhira apóstolu Paulo temi tiha ema sira neʼebé sei la simu Maromak nia Ukun nuʼudar liman-rohan, nia hatutan hodi dehan: “Imi balu mós uluk halo hanesan neʼe.” Maromak nia Liafuan no espíritu santu mak ajuda ema sira-neʼe hodi halo mudansa. Maibé, maski sai ona ema kristaun, balu monu ba sala. Porezemplu, Bíblia temi katak iha apóstolu sira-nia tempu iha irmaun ida neʼebé tenkesér hasai husi kongregasaun. Maibé ikusmai nia halo mudansa hodi kongregasaun simu fali nia. (1 Korinto 5:1-5; 2 Korinto 2:5-8) Hodi haree katak ita-nia irmaun-irmán barak halo mudansa ba sira-nia moris liuhusi Bíblia nia kbiit, neʼe fó kmaan tebes ba ita.

3. Ita sei koʼalia kona-ba saida iha lisaun neʼe?

³ Maromak nia Liafuan iha duni kbiit neʼebé boot. Jeová fó ona Bíblia mai ita, tan neʼe ita hakarak uza didiʼak ninia Liafuan neʼe. (2 Timóteo 2:15) Iha lisaun neʼe, ita sei koʼalia kona-ba oinsá ita bele uza kbiit husi Bíblia (1) iha ita-nia moris, (2) iha serbisu haklaken, no (3) bainhira hatoʼo diskursu. Informasaun sira-neʼe sei ajuda ita atu hatudu domin no agradese ba ita-nia Aman iha lalehan neʼebé hanorin ita atu lori diʼak ba ita-nia an.​—Isaías (Yesaya) 48:17.

4. (a) Oinsá mak ita bele hetan ajuda husi Maromak nia Liafuan? (b) Oinsá mak Ita buka tempu hodi lee Bíblia?

⁴ Ita presiza lee beibeik Bíblia hodi Maromak nia Liafuan bele ajuda ita. Ita tenke hakaʼas an atu lee loroloron. (Josué [Yosua] 1:8) Ita-nia moris preokupa tebes, maibé ita la bele husik buat ida, inklui mós ita-nia responsabilidade seluk atu hanetik ita hodi lee Bíblia. (Lee Éfeso 5:15, 16.) Karik ita bele buka tempu iha dadeer-saan, loron, ka kalan. Ita konkorda duni ho ema neʼebé hakerek salmu, nia dehan: “Oh haʼu hadomi tebes Ita-nia ukun-fuan! Haʼu hanoin kleʼan kona-ba neʼe loron tomak.”​—Salmo (Mazmur) 119:97.

5, 6. (a) Tanbasá mak ita tenke hanoin kleʼan? (b) Oinsá mak hanoin kleʼan bele lori benefísiu ba ita? (c) Oinsá mak lee Bíblia no hanoin kleʼan ajuda ona Ita rasik?

⁵ Maibé lee deʼit Bíblia latoʼo. Ita presiza hanoin kleʼan kona-ba buat neʼebé ita lee. (Salmo [Mazmur] 1:1-3) Hodi halo nuneʼe mak ita bele hatene oinsá atu uza Bíblia nia matadalan iha ita-nia moris. Tan neʼe, maski ita lee eskritura sira liuhusi sasán eletróniku ka husi Bíblia, ita-nia objetivu mak atu husik Maromak nia Liafuan book ita atu halo mudansa ruma.

⁶ Oinsá mak hanoin kleʼan bele lori benefísiu ba ita? Bainhira lee Bíblia, husu  ba ita-nia an: ‘Eskritura sira-neʼe hanorin saida mai haʼu kona-ba Jeová? Iha dalan saida mak haʼu uza daudauk informasaun sira-neʼe iha haʼu-nia moris? Mudansa saida tan mak haʼu presiza halo ba haʼu-nia an?’ Se ita mak halo orasaun no hanoin kleʼan kona-ba buat neʼebé ita lee, neʼe sei book ita atu uza informasaun sira-neʼe. Se ita mak halo nuneʼe, ita sei haree rasik katak Maromak nia Liafuan iha duni kbiit boot atu troka ita-nia moris.​—2 Korinto 10:4, 5.

7. Oinsá mak ita bele uza didiʼak Maromak nia Liafuan iha serbisu haklaken?

⁷ Importante atu uza beibeik Maromak nia Liafuan bainhira ita haklaken no hanorin ema. Irmaun ida hatete, “Se Ita mak haklaken hamutuk ho Jeová, Ita sei hadau hotu atu koʼalia, ka Ita husik Jeová mak atu koʼalia?” Tan neʼe bainhira ita lee eskritura ba ema, neʼe hanesan ita husik Jeová mak koʼalia ba ema neʼe. Kuandu ita hili didiʼak eskritura ida hodi lee ba ema, neʼe iha kbiit liu fali ita rasik nia liafuan sira. (1 Tesalónika 2:13) Bainhira bá haklaken, Ita mós koko atu lee beibeik Bíblia ba ema ka lae?

8. Tanbasá latoʼo atu lee deʼit eskritura bainhira haklaken ba ema?

⁸ Maibé, lee deʼit eskritura seidauk toʼo. Tanba ema barak ohin loron, hanesan mós iha apóstolu sira-nia tempu, la komprende kona-ba Bíblia. (Roma 10:2) Tan neʼe, bainhira ita lee eskritura ruma, ita la bele hanoin kedas katak uma-naʼin komprende ona. Ita presiza ajuda nia komprende hodi lee fali liafuan ka fraze importante husi versíkulu neʼebé ita lee no depois esplika eskritura neʼe katak sá. Halo hanesan neʼe bele ajuda hodi Maromak nia Liafuan book ema nia laran no neon.​—Lee Lucas 24:32.

9. Oinsá mak ita bele ajuda ema hatudu respeitu ba Bíblia liuhusi buat neʼebé ita koʼalia antes lee eskritura? Fó toʼok ezemplu.

 ⁹ Liafuan hahú antes lee eskritura ruma mós bele ajuda uma-naʼin atu hatudu respeitu ba Bíblia. Porezemplu, karik ita bele hatete, “Mai ita haree toʼok ita-nia Kriadór sente oinsá kona-ba tópiku neʼe.” Se ita mak koʼalia ba ema neʼebé laʼós ema kristaun, karik bele dehan, “Mai ita haree toʼok Livru Santu hatete oinsá.” Se ita mak hasoru ema neʼebé la interese ba relijiaun, karik ita bele husu, “Uluk Ita rona ona kona-ba liafuan antigu neʼe ka lae?” Kuandu ita hanoin-hetan katak ema ida-idak iha kultura no fiar neʼebé la hanesan, neʼe sei book ita atu koko uza liafuan neʼebé dada ema nia atensaun.​—1 Korinto 9:22, 23.

10. (a) Konta toʼok irmaun ida nia esperiénsia. (b) Konta toʼok Ita rasik nia esperiénsia husi serbisu haklaken neʼebé hatudu katak Maromak nia Liafuan iha kbiit boot.

¹⁰ Haklaken-naʼin barak sente katak uza beibeik Maromak nia Liafuan book tebes ema neʼebé sira haklaken bá. Porezemplu, irmaun ida bá vizita katuas ida neʼebé lee beibeik ita-nia revista ba tinan barak ona. Loron ida, irmaun neʼe deside atu lee eskritura ida ba nia duké fó deʼit Livru Haklaken foun ba nia. Nia lee 2 Korinto 1:3, 4 neʼebé dehan: “Aman neʼebé laran-sadiʼa no Maromak neʼebé fó kmaan ba ema iha situasaun hotu . . . fó kmaan ba ita iha ita-nia susar hotu.” Liafuan sira husi eskritura book tebes katuas neʼe toʼo nia husu irmaun atu lee dala ida tan ba nia. Tuirmai mane neʼe hatete katak, tuir loloos nia ho ninia feen buka daudauk atu hetan kmaan. Tanba eskritura neʼe, nia mós hakarak hatene liután kona-ba Bíblia. Sin, uza Maromak nia Liafuan iha ita-nia serbisu haklaken iha kbiit boot tebes!​—Apóstolu 19:20.

11. Irmaun sira neʼebé hatoʼo diskursu iha responsabilidade saida?

¹¹ Ita gosta tebes atu tuir reuniaun no reuniaun boot sira. Razaun importante neʼebé ita hakarak tuir mak atu adora Jeová. Informasaun sira neʼebé ita aprende husi reuniaun sira-neʼe mós diʼak ba ita. Tan neʼe mak irmaun sira neʼebé hatoʼo diskursu hetan priviléjiu no responsabilidade neʼebé boot. (Tiago 3:1) Sira-nia hanorin tenkesér bazeia ba Maromak nia Liafuan. Se Ita mak iha daudauk priviléjiu neʼe, oinsá mak Ita bele uza kbiit husi Maromak nia Liafuan atu book rona-naʼin sira?

12. Diskursu-naʼin presiza halo saida atu ninia diskursu bele bazeia ba Bíblia?

¹² Eskritura sira mak importante liu iha diskursu hotu. (João 7:16) Tan neʼe mak tenkesér kuidadu bainhira hatoʼo diskursu, ita lakohi uza demais esperiénsia ka ai-knanoik sira hodi ema la fó atensaun ba Bíblia. No ita mós presiza hanoin-hetan katak lee deʼit eskritura la dehan katak ita hanorin. Tanba se Ita mak lee eskritura barak liu, susar ba ema atu hanoin-hetan eskritura hotu. Tan neʼe hili eskritura sira ho didiʼak. La bele lee lalais, esplika didiʼak, fó ezemplu balu, no hatudu oinsá atu uza eskritura sira-neʼe nuʼudar matadalan iha ita-nia moris. (Neemias 8:8) Se Ita mak hatoʼo diskursu husi nota diskursu, komprende didiʼak nota neʼe no eskritura sira neʼebé hetan iha nota diskursu neʼe. Koko atu komprende didiʼak oinsá mak nota diskursu neʼe liga ho eskritura sira. Tuirmai hili eskritura balu atu hanorin pontu importante husi nota neʼe. (Ita bele hetan sujestaun barak husi livru Aprende husi Eskola Serbisu Kristaun nian, husi lisaun 21 toʼo 23.) No importante liu mak halo orasaun  atu husu ajuda husi Jeová hodi bele fó sai pontu furak sira husi ninia Liafuan.​—Lee Esdras (Ezra) 7:10; * Provérbios (Amsal) 3:13, 14. *

13. (a) Iha dalan saida mak eskritura neʼebé irmán ida rona husi reuniaun, book tebes nia? (b) Oinsá mak dalan neʼebé irmaun sira esplika eskritura iha reuniaun, book tebes Ita?

¹³ Iha irmán ida husi rai-Austrália, bainhira nia sei kiʼik, buat aat barak akontese ba ninia moris. Maski ikusmai nia aprende kona-ba Jeová, nia sei duvida katak Jeová hadomi nia. Loron ida iha reuniaun nia rona eskritura ida neʼebé book tebes ninia laran. Nia hanoin kleʼan no halo riset kona-ba eskritura neʼe, no neʼe book nia hodi lee tan eskritura seluk. Halo tiha nuneʼe nia fiar ho laran tomak katak Jeová hadomi duni nia. * Ita mós rona ona eskritura ida husi reuniaun no reuniaun boot sira neʼebé book tebes ita-nia laran ka lae?​—Neemias 8:12.

14. Oinsá mak ita bele hatudu katak ita hafolin no hadomi Jeová nia Liafuan?

¹⁴ Ita hakarak fó agradese ba Jeová tanba ninia Liafuan Bíblia, loos ka lae? Nia promete ona katak ninia Liafuan sei hela ba nafatin no nia sempre kumpre ninia promete. (1 Pedro 1:24, 25) Tan neʼe, ita hakarak lee beibeik Bíblia, uza matadalan husi Bíblia, no uza Bíblia atu ajuda ema. Se ita mak halo nuneʼe, ita hatudu katak ita hadomi no hafolin tebes Bíblia no Bíblia nia naʼin, Maromak Jeová.