Kontente ba sira neʼebé serbí “Maromak neʼebé kontente”
“Ksolok ba povu neʼebé adora Jeová nuʼudar ninia Maromak!”—SALMO (MAZMUR) 144:15.
1. Tanbasá Testemuña ba Jeová mak povu neʼebé kontente? (Haree dezeñu iha leten.)
TESTEMUÑA BA JEOVÁ mak povu neʼebé kontente. Bainhira tuir reuniaun, reuniaun boot, ka ransu hamutuk, sira sempre koʼalia ba malu no hamnasa. Tanbasá sira kontente tebes? Razaun importante mak tanba sira hatene no serbí Jeová, “Maromak neʼebé kontente”, no sira hakaʼas an atu banati-tuir nia. (1 Timóteo 1:11; Salmo [Mazmur] 16:11) Jeová mak kontente nia Hun, nia hakarak ita atu sai kontente, no nia fó razaun barak ba ita atu sai kontente.—Deuteronômio (Ulangan) 12:7; Eclesiastes (Pengkhotbah) 3:12, 13.
2, 3. (a) Kontente katak sá? (b) Tanbasá la fasil atu sai kontente?
2 Oinsá ho Ita? Ita kontente ka lae? Kontente signifika katak ita sente diʼak, kontente ho buat neʼebé ita iha ka haksolok tebes. Bíblia hatudu katak povu neʼebé Jeová haraik bensaun mak bele hetan kontente neʼebé loos. Maibé ohin loron, la fasil atu sai kontente. Tanbasá?
3 Dala ruma situasaun susar hanesan, ema ruma neʼebé ita hadomi mate ka hasai husi kongregasaun, soe-malu ka lakon serbisu, bele halakon ita-nia kontente. Susar mós atu sai kontente se família la iha dame tanba diskute malu beibeik. Kolega serbisu ka eskola goza ita, ema fó-terus ka hatama ita ba komarka tanba ita-nia fiar, saúde sai fraku, moras ba templu kleur, ka moras depresaun mós bele halakon kontente. Maibé presiza hanoin-hetan katak, kuandu iha rai, Jesus Kristu, “Naʼi neʼebé iha kbiit boot no neʼebé ksolok”, gosta tebes atu fó kmaan no halo ema sai kontente. (1 Timóteo 6:15; Mateus 11:28-30) Iha Jesus nia diskursu iha foho, nia temi hahalok balu neʼebé bele ajuda ita atu sai kontente maski ita hasoru problema oioin iha Satanás nia mundu neʼe.
SE LAʼÓS JEOVÁ NIA AJUDA, ITA LA BELE SAI KONTENTE
4, 5. Oinsá mak ita bele sai kontente no la lakon kontente neʼe?
4 Buat primeiru neʼebé Jesus temi mak importante tebes. Nia dehan: “Kontente ba sira neʼebé hatene katak sira presiza Maromak nia matadalan, tanba Ukun lalehan nian mak sira-nian.” (Mateus 5:3) Ita bele halo saida hodi hatudu katak ita presiza Maromak nia matadalan? Hodi estuda Bíblia, halo tuir Maromak, no tau uluk ita-nia adorasaun. Halo buat sira-neʼe bele ajuda ita atu sai kontente. Neʼe bele hametin liután ita-nia fiar ba Maromak nia promesa sira, no “esperansa ksolok nian” husi Bíblia sei fó laran-manas ba ita.—Tito 2:13.
5 Hametin ita-nia relasaun ho Jeová mak dalan neʼebé importante tebes atu bele sai kontente. Apóstolu Paulo hatete: “Haksolok nafatin bá iha Naʼi [Jeová]. Dala ida tan haʼu dehan, haksolok bá!” (Filipe 4:4) Ita presiza matenek husi Jeová atu bele iha relasaun neʼebé besik ho nia. Maromak nia Liafuan dehan: “Ksolok ba ema neʼebé hetan ona matenek no ema neʼebé hatene atu tetu didiʼak. Se ema kaer metin ba matenek, neʼe sei sai nuʼudar ai-hun moris nian ba sira, no ema neʼebé kontinua kaer metin ba matenek sei sai kontente.”—Provérbios (Amsal) 3:13, 18.
6. Saida tan mak ita presiza halo atu bele sai kontente ba nafatin?
6 Maibé atu sai kontente ba nafatin, importante tebes atu kontinua aplika buat neʼebé ita aprende husi Maromak nia Liafuan, laʼós lee deʼit. Jesus rasik konkorda katak importante atu halo nuneʼe hodi dehan: “Se imi hatene buat sira-neʼe, ksolok ba imi kuandu imi halo tuir.” (João 13:17; lee Tiago 1:25.) Neʼe mak xave importante atu iha relasaun neʼebé metin ho Jeová no kontente ba nafatin. Maibé oinsá mak ita bele sai kontente tanba iha buat barak neʼebé bele halakon ita-nia kontente? Mai ita haree saida tan mak Jesus hatete iha ninia diskursu neʼe.
HAHALOK NEʼEBÉ LORI KONTENTE
7. Oinsá mak ema neʼebé triste bele sente kontente?
7 “Kontente ba sira neʼebé triste, tanba sira sei hetan laran-kmaan.” (Mateus 5:4) Ema balu hanoin: ‘Oinsá mak sira neʼebé triste bele kontente?’ Jesus laʼós koʼalia kona-ba ema hotu neʼebé triste. Ema aat sente triste tanba sira hasoru daudauk “problema barak neʼebé susar atu tahan”. (2 Timóteo 3:1) Sira hanoin deʼit kona-ba sira-nia an, laʼós kona-ba Jeová, tan neʼe sira la bele haburas relasaun neʼebé diʼak ho nia no la bele sai kontente. Ema neʼebé Jesus temi mak sira neʼebé hatene katak sira presiza Maromak nia matadalan. Sira sente triste tanba sira haree ema barak lakohi moris tuir Jeová nia hakarak. Sira mós triste tanba sira rekoñese katak sira la perfeitu no haree buat aat oioin akontese daudauk iha mundu neʼe. Jeová hatene ema neʼebé triste husi laran, nia fó kmaan ba sira liuhusi ninia Liafuan, nia halo sira kontente no fó esperansa atu moris ba nafatin.—Lee Ezequiel (Yehezkiel) 5:11; * 9:4. *
8. Oinsá mak hatudu hahalok laran-maus bele ajuda Ita atu sai kontente?
8 “Kontente ba sira neʼebé laran-maus, tanba sira sei simu rai nuʼudar liman-rohan.” (Mateus 5:5) Oinsá mak hatudu hahalok laran-maus bele ajuda Ita atu sai kontente? Antes aprende kona-ba lia-loos, ema barak la hatudu respeitu ba ema seluk no gosta hamosu problema. Maibé, kuandu aprende tiha lia-loos, sira troka hodi sai fali “ema foun”. Agora sira hatudu fali “hahalok domin ho laran-sadiʼa nuʼudar [sira-nia] hatais hamutuk ho laran-diʼak, haraik-an, laran-maus, no pasiénsia”. (Koloso 3:9-12) Rezultadu mak sira moris ho kontente no iha dame, no mós iha relasaun neʼebé diʼak ho ema seluk. No Maromak nia Liafuan mós promete katak sira sei “simu rai nuʼudar liman-rohan”.—Salmo (Mazmur) 37:8-10, 29.
9. (a) Iha dalan saida deʼit mak sira neʼebé laran-maus “simu rai nuʼudar liman-rohan”? (b) Oinsá mak “sira neʼebé hamlaha no hamrook ba buat loos” bele sai kontente?
9 Iha dalan saida deʼit mak sira neʼebé laran-maus “simu rai nuʼudar liman-rohan”? Ema kose-mina sira sei simu rai nuʼudar liman-rohan kuandu sira ukun rai neʼe nuʼudar amlulik no liurai. (Apokalipse 20:6) Ema millaun ba millaun neʼebé la iha esperansa atu bá lalehan sei simu rai nuʼudar liman-rohan kuandu sira hetan oportunidade atu moris ba nafatin iha rai. Sira sei sai perfeitu, iha dame no kontente. Ema kose-mina no bibi seluk mak ema neʼebé Jesus hatete: “Kontente ba sira neʼebé hamlaha no hamrook ba buat loos.” (Mateus 5:6) Jeová sei halo sira-nia hakarak ba buat loos sai realidade bainhira nia halakon buat aat hotu. (2 Pedro 3:13) Iha mundu foun, ema laran-loos sei sai kontente no nunka sai triste tan tanba buat aat sira neʼebé ema aat hamosu.—Salmo (Mazmur) 37:17.
10. Hatudu laran-sadiʼa katak sá?
10 “Kontente ba sira neʼebé hatudu laran-sadiʼa, tanba sira sei hetan laran-sadiʼa.” (Mateus 5:7) Signifika husi liafuan laran-sadiʼa mak hatudu laran-diʼak no hanoin tebes sira neʼebé hasoru daudauk terus. Maibé hahalok laran-sadiʼa laʼós hatudu deʼit ho sentimentu. Bíblia hanorin katak hahalok laran-sadiʼa inklui mós halo buat ruma atu ajuda ema seluk.
11. Ai-knanoik kona-ba ema Samaria hanorin saida mai ita?
11 Lee Lucas 10:30-37. Jesus nia ai-knanoik kona-ba ema Samaria bele ajuda ita atu hatene saida mak hahalok laran-sadiʼa. Ema Samaria hanoin tebes mane ida neʼebé hetan susar, no neʼe book nia hodi fó ajuda ba ema neʼe. Kuandu Jesus konta tiha ai-knanoik neʼe, nia dehan: “Ó rasik bá no halo mós buat neʼebé hanesan.” Tan neʼe, diʼak atu husu ba ita-nia an: ‘Haʼu halo buat neʼebé hanesan ema Samaria neʼe halo ka lae? Kuandu ema ruma hetan susar, haʼu bele ajuda sira ka lae? Porezemplu, haʼu fó ajuda ba ema neʼebé idade iha kongregasaun, irmaun-irmán neʼebé faluk, no oan sira neʼebé inan-aman la serbí Jeová ka lae? Haʼu buka dalan atu “fó laran-manas ba sira neʼebé laran-tun” ka lae?’—1 Tesalónika 5:14; Tiago 1:27.
Hatudu laran-sadiʼa ba ema seluk sei lori kontente ba ema hotu (Haree parágrafu 12)
12. Tanbasá mak hatudu laran-sadiʼa bele ajuda ita atu sai kontente?
12 Tanbasá mak hatudu laran-sadiʼa bele ajuda ita atu sai kontente? Hatudu laran-sadiʼa mak dalan ida atu fó ba ema seluk, no neʼe sei lori kontente mai ita. No razaun ida tan mak tanba ita hatene ita halo kontente Jeová. (Apóstolu 20:35; lee Ebreu 13:16.) Kona-ba ema neʼebé hatudu laran-sadiʼa, Liurai David dehan: “Jeová sei proteje nia hodi nia bele kontinua moris. Ema sei fó sai katak nia mak ema neʼebé kontente iha rai.” (Salmo [Mazmur] 41:1, 2) Kuandu ita hatudu laran-sadiʼa no hanoin ema seluk, ita mós sei simu laran-sadiʼa husi Jeová no sai kontente ba nafatin.—Tiago 2:13.
TANBASÁ “SIRA NEʼEBÉ LARAN MOOS” MAK KONTENTE?
13, 14. Tanbasá importante atu iha “laran moos”?
13 Jesus hatete: “Kontente ba sira neʼebé laran moos, tanba sira sei haree Maromak.” (Mateus 5:8) Atu iha laran moos, ita presiza iha hanoin no hakarak neʼebé moos. Ida-neʼe importante tebes se ita hakarak Jeová simu ita-nia adorasaun.—Lee 2 Korinto 4:2; 1 Timóteo 1:5.
14 Ema neʼebé laran moos bele iha relasaun diʼak ho Jeová, no Jeová dehan: “Ksolok ba sira neʼebé fase moos ona sira-nia hatais.” (Apokalipse 22:14) “Fase moos ona sira-nia hatais” katak sá? Ba ema kose-mina sira, neʼe katak sira moos iha Jeová nia haree, sira sei nunka mate no moris ho kontente ba nafatin iha lalehan. Ba ema-lubun boot neʼebé iha esperansa atu moris iha rai, neʼe katak sira bele sai Jeová nia belun tanba nia haree sira nuʼudar ema laran-loos. Bíblia dehan katak “sira fase tiha ona sira-nia unuk no halo mutin ona ho Bibi-Oan nia raan”.—Apokalipse 7:9, 13, 14.
15, 16. Oinsá mak sira neʼebé laran moos bele “haree Maromak”?
15 Oinsá mak ema neʼebé laran moos bele “haree Maromak”, tanba Jeová dehan “ema neʼebé haree haʼu-nia oin sei la kontinua moris”? (Êxodo [Keluaran] 33:20) Liafuan gregu neʼebé tradús nuʼudar “haree” bele iha signifika katak atu imajina, komprende ka hatene. Tan neʼe, “haree Maromak” signifika katak koñese didiʼak no hafolin ninia hahalok. (Éfeso 1:18) Jesus banati-tuir Jeová nia hahalok iha dalan neʼebé perfeitu, tan neʼe nia bele dehan: “Ema neʼebé haree ona haʼu, haree ona mós Aman.”—João 14:7-9.
16 Ita mós bele “haree Maromak” hodi hanoin kona-ba dalan oioin neʼebé nia ajuda ita. (Jó [Ayub] 42:5) Ita mós bele “haree” ka tau fokus ba buat furak oioin neʼebé Jeová promete ona ba sira neʼebé laran moos no serbí nia ho laran-metin. Kuandu ema kose-mina sira hetan moris-hiʼas atu bá lalehan, sira sei haree duni Jeová.—1 João 3:2.
MASKI HASORU PROBLEMA OIOIN, ITA BELE KONTENTE
17. Tanbasá mak ema neʼebé buka dame sai kontente?
17 Tuirmai Jesus dehan: “Kontente ba sira neʼebé buka dame.” (Mateus 5:9) Ema neʼebé buka uluk dame sei sai kontente. Dixípulu Tiago hakerek: “Sira neʼebé buka atu nafatin iha relasaun diʼak ho ema seluk, sira haburas dame no tuirmai sira sei fó fuan hahalok loos nian.” (Tiago 3:18) Kuandu Ita iha problema ho ema ruma iha kongregasaun ka família, husu Jeová ajuda Ita atu buka dame. Se Ita halo nuneʼe, Jeová sei haraik ninia espíritu santu atu ajuda Ita hatudu hahalok neʼebé diʼak, no Ita sei sai kontente liután. Jesus hatete katak importante tebes atu buka uluk dame. Nia dehan: “Neʼe duni, se ó lori daudaun ó-nia prezente ba altár no ó hanoin-hetan katak ó-nia maun-alin iha buat ruma hasoru ó, husik lai ó-nia prezente iha altár oin, no bá hodi halo dame uluklai ho ó-nia maun-alin. Tuirmai, kuandu ó fila fali, fó ó-nia prezente neʼe.”—Mateus 5:23, 24.
18, 19. Tanbasá mak ema kristaun bele haksolok maski ema fó-terus ba sira?
18 “Kontente ba imi kuandu ema koʼalia aat imi no fó-terus ba imi no koʼalia lia-bosok oioin neʼebé aat hasoru imi tanba haʼu.” Jesus nia liafuan katak sá? Nia hatutan tan: “Haksoit bá ho haksolok, tanba imi-nia kolen boot tebes iha lalehan, basá iha dalan hanesan neʼe mós sira fó-terus ba profeta sira neʼebé uluk liu imi.” (Mateus 5:11, 12) Kuandu ema baku tiha apóstolu sira no haruka sira atu la bele haklaken, “sira sai husi Sinédriu nia oin no sira haksolok”. Sira haksolok laʼós tanba hetan baku, maibé tanba “Maromak husik ema atu hamoe sira tanba Jesus nia naran”.—Apóstolu 5:41.
19 Ohin loron, Jeová nia povu mós tahan ho haksolok kuandu ema fó-terus ba sira tanba Jesus nia naran. (Lee Tiago 1:2-4.) Hanesan apóstolu sira, se ita hetan susar ka ema fó-terus, ita la sente haksolok. Maibé se ita hatudu laran-metin ba Jeová, nia sei fó aten-brani ba ita atu ita bele tahan. Porezemplu, iha fulan-Agostu 1944, governu hatama ita-nia irmaun ida naran Henryk Dornik no ninia maun ba komarka. Maibé ema neʼebé fó-terus ba sira hatete: “Susar tebes atu haruka sira troka. Sira kontente atu mate tanba sira-nia fiar.” Irmaun Henryk esplika: “Maski haʼu lakohi atu mate, maibé hodi hatudu laran-metin ba Jeová no tahan terus ho aten-brani no dignidade, neʼe lori ksolok ba haʼu.” Nia hatutan: “Haʼu hakbesik liután ba Jeová hodi harohan beibeik, no nia sempre fó ajuda ba haʼu.”
20. Tanbasá mak ita kontente atu serbí “Maromak neʼebé kontente”?
20 Kuandu Jeová, “Maromak neʼebé kontente” simu ita, ita bele sente kontente maski ema fó-terus, família kontra, moras, ka idade aumenta. (1 Timóteo 1:11) Ita mós bele sai kontente tanba ita-nia Maromak neʼebé “nunka bosok” promete buat furak oioin. (Tito 1:2) Kuandu nia kumpre ninia promesa furak sira, ita sei la hanoin-hetan tan problema sira neʼebé ita hasoru ohin loron. Iha Paraízu, Jeová sei fó bensaun furak oioin ba ita. Sin, ita “sei hetan ksolok boot ho dame neʼebé barak”.—Salmo (Mazmur) 37:11.
^ par. 7 Ezequiel 5:11 “Jeová, Naʼi Ukun-Naʼin Boot Liu, dehan: ‘Haʼu jura hodi haʼu-nia moris rasik katak haʼu sei la simu ó, tanba ó hafoʼer haʼu-nia fatin sagradu ho ó-nia estátua hotu neʼebé haʼu hakribi no ho ó-nia hahalok aat hotu. Haʼu sei la hanoin ó, no haʼu sei la hatudu laran-sadiʼa.
^ par. 7 Ezequiel 9:4 Jeová dehan ba nia: “Laʼo haleʼu sidade Jeruzalein, no tau marka ba ema nia reen-toos, katak sira neʼebé triste no halerik tanba buat aat hotu neʼebé ema halo iha sidade neʼe.”
