1. Tuir 1 Tesalónika 5:11, saida mak importante ba ita atu halo?

 ITA-NIA kongregasaun harii ka halo ona renovasaun ba Reuniaun-Fatin ka lae? Se nuneʼe, klaru katak Ita la haluha dala primeiru neʼebé Ita tuir reuniaun iha fatin foun. Ita agradese tebes ba Jeová. Karik Ita kontente toʼo atu besik tanis no susar atu kanta knananuk primeiru. Reuniaun-Fatin neʼebé harii ho didiʼak lori glória ba Jeová. Maibé ita mós bele fó glória ba Jeová iha dalan seluk no neʼe importante liu fali harii Reuniaun-Fatin. Neʼe mak atu hametin ema sira neʼebé tuir reuniaun atu adora Jeová. Apóstolu Paulo mós temi kona-ba neʼe iha eskritura tema ba lisaun neʼe, iha 1 Tesalónika 5:11.​—Lee.

2. Iha lisaun neʼe, ita sei aprende saida?

² Paulo hatudu ezemplu diʼak kona-ba hametin maluk fiar-naʼin sira. Nia hanoin sira. Iha lisaun neʼe, ita sei aprende oinsá Paulo ajuda maluk Kristaun sira (1) atu tahan susar, (2) atu iha dame ho ema oioin, no (3) atu hametin sira-nia fiar ba Jeová. Mai ita haree oinsá ita bele banati-tuir nia no hametin irmaun-irmán sira.​—1 Kor 11:1.

3. Oinsá Paulo iha hanoin neʼebé loos kona-ba moris?

³ Paulo hadomi tebes irmaun-irmán sira. Nia rasik mós hasoru ona susar oioin. Tan neʼe nia bele hatudu laran-diʼak no laran-sadiʼa ba maluk fiar-naʼin sira bainhira sira hasoru susar. Loron ida, Paulo la iha osan no presiza buka serbisu atu tau matan ninia an no mós maluk sira  neʼebé hamutuk nia. (Após 20:34) Paulo matenek atu halo tenda. Bainhira nia toʼo iha Korinto, nia serbisu hamutuk ho Áquila no Priscila atu halo tenda. Maibé “Sábadu-Sábadu”, nia haklaken ba ema Judeu no ema Gregu. Tuirmai bainhira Silas no Timóteo mai, “Paulo uza nia tempu tomak hodi haklaken Maromak nia liafuan”. (Após 18:2-5) Paulo nunka haluha kona-ba buat neʼebé importante liu iha ninia moris, neʼe mak atu serbí Jeová. Paulo hatudu ezemplu kapás kona-ba haklaken ho badinas no tau matan ba ninia presiza rasik, tan neʼe nia bele anima irmaun-irmán sira. Paulo fó-hanoin sira atu tau uluk “buat sira neʼebé importante liu”, neʼe mak buat hotu neʼebé liga ho sira-nia adorasaun ba Jeová, duké hanoin barak kona-ba moris no mós serbisu atu sustenta família.​—Flp 1:10.

4. Oinsá Paulo no Timóteo ajuda maluk fiar-naʼin sira tahan susar?

⁴ Lakleur depois kongregasaun iha Tesalónika harii tiha, ema kontra makaʼas fiar-naʼin foun sira-neʼe. Bainhira ema-lubun neʼebé hirus makaʼas la hetan Paulo no Silas, sira lori “maun-alin balu ba ukun-naʼin sidade nian”, no hakilar dehan: “Mane sira-neʼe hotu kontra César nia ukun-fuan.” (Após 17:6, 7) Klaru katak fiar-naʼin sira-neʼe taʼuk tebes tanba ema kontra sira. Situasaun neʼe bele halakon sira-nia laran-manas atu serbí Jeová. Paulo lakohi ida-neʼe akontese. Maski nia ho Silas tenke sai husi sidade neʼe, maibé sira arranja ema atu tau matan didiʼak ba kongregasaun foun neʼe. Paulo fó-hatene maluk Kristaun sira iha Tesalónika: “Ami haruka ita-nia alin Timóteo . . . , atu nia bele hametin imi no fó kmaan ba imi kona-ba imi-nia fiar, atu nuneʼe imi-nia fiar labele nakdoko tanba susar sira-neʼe.” (1 Tes 3:2, 3) Karik uluk bainhira Timóteo hela iha Listra, nia mós hasoru ona susar. Nia haree ona oinsá Paulo hametin irmaun-irmán sira iha Listra. Nia mós haree ona oinsá Jeová ajuda iha tempu neʼebá, tan neʼe nia bele hametin irmaun-irmán foun sira-neʼe katak Jeová mós sei ajuda sira.​—Após 14:8, 19-22; Ebr 12:2.

5. Oinsá mak irmaun Bryant hetan benefísiu husi katuas kongregasaun ida neʼebé ajuda nia?

⁵ Iha dalan saida tan mak Paulo hametin maluk fiar-naʼin sira? Bainhira Paulo no Barnabé vizita fali Listra, Ikónio no Antiokia, sira “hili katuas sira iha kongregasaun ida-idak”. (Após 14:21-23) Klaru katak katuas sira-neʼe fó kmaan duni ba kongregasaun sira, hanesan katuas kongregasaun sira halo ohin loron. Irmaun Bryant hatete: “Bainhira haʼu tinan 15, haʼu-nia apá husik ami no tuirmai kongregasaun hasai haʼu-nia amá. Haʼu sente mesamesak no laran-kraik.” Saida mak ajuda Bryant atu tahan? Nia hatete: “Katuas ida naran Tony koʼalia ba haʼu iha Reuniaun-Fatin no mós iha tempu seluk. Nia konta kona-ba fiar-naʼin sira neʼebé haksolok nafatin maski hasoru susar. Nia hatudu Salmo 27:10, no nia mós koʼalia beibeik kona-ba Ezequias neʼebé serbí Jeová ho laran-metin maski ninia aman la hatudu ezemplu diʼak.” Oinsá ida-neʼe ajuda Bryant? Nia hatete: “Tanba irmaun Tony anima haʼu, neʼe ajuda haʼu atu komesa serbí Jeová tempu-tomak ho kontente.” Katuas sira, hakaʼas an bá atu ajuda ema  sira neʼebé presiza rona “liafuan neʼebé diʼak” atu sai aten-brani hanesan Bryant.​—Prov 12:25.

6. Oinsá mak Paulo uza ezemplu husi fiar-naʼin sira atu hametin irmaun-irmán sira?

⁶ Paulo fó-hanoin ninia maluk fiar-naʼin sira katak iha “testemuña barak hanesan kalohan” neʼebé tahan ona susar oioin ho Jeová nia kbiit. (Ebr 12:1) Paulo komprende oinsá esperiénsia husi ema sira neʼebé tahan susar ho susesu iha tempu uluk bele fó aten-brani ba irmaun-irmán sira no ajuda sira atu tau fokus ba “Maromak moris nia sidade”. (Ebr 12:22) Ohin loron, ita mós sai aten-brani bainhira lee kona-ba oinsá Jeová ajuda Gideão, Barak, David, Samuel, no ema seluk. (Ebr 11:32-35) Oinsá ho ezemplu iha tempu modernu? Dala barak irmaun-irmán sira haruka karta ba sede-jerál hodi fó sai katak sira-nia fiar sai metin liután bainhira lee istória kona-ba irmaun-irmán sira seluk neʼebé tahan ho laran-metin.

7. Ita bele aprende saida husi Paulo nia konsellu iha Roma 14:19-21?

⁷ Ita bele hametin irmaun-irmán sira bainhira ita haburas dame iha kongregasaun, no la husik ita-nia ideia neʼebé la hanesan atu estraga ita-nia unidade. Ita mós lakohi ezije ema atu halo tuir ita-nia hakarak se sira-nia desizaun rasik la kontra Bíblia nia prinsípiu. Hanoin toʼok ezemplu ida. Irmaun-irmán sira iha kongregasaun Roma mak ema Judeu no mós ema husi nasaun oioin. Bainhira Moisés nia Ukun-Fuan la vale ona, ema neʼebé adora Jeová la presiza halo tuir tan ukun-fuan kona-ba la han ai-han ruma. (Mc 7:19) Hahú husi tempu neʼe, ema Judeu balu neʼebé sai ona ema Kristaun deside atu han ai-han naran deʼit. Maibé sira seluk lakohi. Situasaun neʼe halo kongregasaun lakon unidade. Paulo fó-hanoin sira katak importante atu haburas dame no halo tuir prinsípiu: “Diʼak liu atu la han naʼan, la hemu tua-uvas ka la halo buat naran deʼit neʼebé halo imi-nia maun-alin sidi.” (Lee Roma 14:19-21.) Paulo ajuda maluk fiar-naʼin sira atu haree rezultadu aat neʼebé bele akontese ba sira no ba kongregasaun bainhira mosu haksesuk malu. Paulo mós prontu atu troka ninia hahalok hodi la halo ema seluk sidi. (1 Kor 9:19-22) Ita mós bele hametin malu no mantein dame se ita la haksesuk malu kona-ba buat neʼebé ema ida-idak bele deside rasik.

8. Paulo halo saida bainhira mosu problema neʼebé bele halakon dame iha kongregasaun?

⁸ Paulo hatudu ezemplu diʼak kona-ba mantein dame ho ema seluk maski sira la konkorda malu kona-ba asuntu neʼebé importante. Porezemplu, ema balu iha apóstolu sira-nia tempu ezije atu ema Kristaun sira neʼebé mai husi nasaun seluk atu hetan sirkunsizaun, karik sira halo ida-neʼe tan deʼit lakohi ema Judeu seluk kritika sira. (Gal 6:12) Paulo la konkorda ho sira, maski nuneʼe nia la ezije sira atu halo tuir deʼit ninia hanoin. Ho haraik an nia husu matadalan husi apóstolu no katuas sira iha Jeruzalein. (Após 15:1, 2) Rezultadu mak ema Kristaun sira bele mantein ksolok no iha dame iha kongregasaun.​—Após 15:30, 31.

9. Oinsá mak ita bele halo tuir Paulo nia ezemplu?

⁹ Se mosu haksesuk malu kona-ba asuntu importante ruma, ita bele haburas  dame hodi buka matadalan husi irmaun sira neʼebé Jeová hili atu tau matan kongregasaun. Dala barak organizasaun fó matadalan ba ita liuhusi publikasaun ka karta sira. Ita bele haburas dame liuhusi halo tuir matadalan sira-neʼe duké halo tuir ita-nia ideia rasik.

10. Saida tan mak Paulo halo atu haburas dame iha kongregasaun?

¹⁰ Paulo haburas dame liuhusi tau fokus ba irmaun-irmán sira-nia hahalok diʼak, laʼós sira-nia fraku. Porezemplu, iha parte ikus husi ninia karta ba ema Kristaun iha Roma, Paulo temi ema barak nia naran, no dala barak nia mós temi buat diʼak neʼebé sira halo. Ita bele banati-tuir Paulo hodi konta kona-ba irmaun-irmán sira-nia hahalok diʼak. Bainhira ita halo nuneʼe, irmaun-irmán sira sei hakbesik liután ba ita, no neʼe sei haburas domin iha kongregasaun laran.

11. Oinsá atu hadame malu ho irmaun-irmán sira?

¹¹ Dala ruma, ema Kristaun neʼebé maduru mós diskute malu ka la konkorda malu. Neʼe akontese ba Paulo no ninia belun Barnabé. Sira naʼin-rua la konkorda malu kona-ba lori Marcos atu akompaña sira iha viajen tuirmai nuʼudar misionáriu. Sira naʼin-rua “diskute malu makaʼas ho hirus” no sira haketak malu. (Após 15:37-39) Maibé ikusmai Paulo, Barnabé no Marcos hadame malu fali. Neʼe hatudu katak sira hafolin dame no unidade iha kongregasaun. Paulo mós koʼalia buat diʼak kona-ba Barnabé no Marcos. (1 Kor 9:6; Kol 4:10) Ita bele haburas dame no unidade liuhusi rezolve kedas problema ruma neʼebé mosu entre ita ho irmaun ka irmán ida no kontinua tau fokus ba sira-nia hahalok diʼak.​—Éf 4:3.

12. Irmaun-irmán sira hasoru susar saida deʼit?

¹² Ita hametin irmaun-irmán sira bainhira ita ajuda sira atu iha fiar neʼebé metin liután. Irmaun-irmán balu hasoru susar tanba sira-nia família, kolega serbisu ka kolega eskola goza sira. Irmaun-irmán seluk hasoru susar tanba moras ka laran-kanek. No irmaun-irmán seluk tan hein ba tempu kleur ona atu sistema aat neʼe lakon. Situasaun sira-neʼe bele koko ema Kristaun nia fiar. Ema Kristaun iha apóstolu sira-nia tempu mós hasoru situasaun neʼebé hanesan. Oinsá Paulo hametin irmaun-irmán sira?

13. Oinsá Paulo ajuda maluk fiar-naʼin neʼebé ema goza tanba sira-nia fiar?

¹³ Paulo uza Eskritura atu hametin irmaun-irmán sira-nia fiar. Porezemplu, karik ema Judeu neʼebé sai ema Kristaun la hatene atu hatán saida bainhira sira-nia família dehan katak relijiaun Judeu mak diʼak liu fali Kristaun. Ita bele fiar katak Paulo nia karta ba ema Ebreu hametin duni sira. (Ebr 1:5, 6; 2:2, 3; 9:24, 25) Karik sira bele uza Paulo nia esplikasaun bainhira esplika ba sira-nia família. Ohin loron ita bele ajuda maluk fiar-naʼin atu uza didiʼak ita-nia publikasaun sira atu esplika sira-nia fiar bainhira ema goza. Se ema goza irmaun-irmán joven sira tanba sira fiar ba kriasaun, ita bele ajuda sira uza informasaun husi broxura Moris Hotu Mosu Mesak Deʼit ka lae? no Asal Mula Kehidupan—Lima Pertanyaan yang Patut Direnungkan atu hatudu tanbasá sira fiar katak iha duni Kriadór.

14. Maski okupadu ho serbisu haklaken no hanorin, maibé saida mak Paulo halo?

¹⁴ Paulo anima irmaun-irmán sira  atu hatudu domin liuhusi “hahalok diʼak”. (Ebr 10:24) Nia ajuda irmaun-irmán sira liuhusi ninia liafuan no hahalok. Porezemplu, bainhira maluk Kristaun sira iha Judeia hetan susar tanba rai-hamlaha, Paulo ajuda lori buat ruma neʼebé sira presiza. (Após 11:27-30) Maski Paulo okupadu ho serbisu haklaken no hanorin, maibé nia sempre buka dalan atu apoia maluk sira neʼebé presiza ajuda iha dalan fíziku. (Gal 2:10) Hodi halo nuneʼe, Paulo hametin maluk Kristaun sira-nia fiar katak Jeová sei tau matan ba sira. Ohin loron, bainhira ita uza ita-nia tempu, forsa no matenek atu ajuda irmaun-irmán sira iha tempu dezastre, ita mós sei hametin sira-nia fiar. Ita mós bele fó kontribuisaun beibeik atu apoia serbisu iha mundu tomak. Ita bele ajuda irmaun-irmán sira atu fiar katak Jeová sei nunka husik sira liuhusi dalan sira-neʼe no mós dalan seluk tan.

15-16. Oinsá ita bele ajuda irmaun-irmán sira neʼebé fiar fraku?

¹⁵ Paulo la rende an atu ajuda irmaun-irmán sira neʼebé fiar fraku. Nia hatudu laran-sadiʼa ba sira no koʼalia ho laran-diʼak no iha dalan pozitivu. (Ebr 6:9; 10:39) Porezemplu, iha ninia karta ba ema Ebreu, dala barak nia uza liafuan “ita”, neʼe hatudu katak nia mós presiza aplika ninia konsellu. (Ebr 2:1, 3) Hanesan Paulo, ita labele rende an atu ajuda irmaun-irmán sira neʼebé fiar fraku. Ita hakarak hametin sira liuhusi hatudu interese ba sira. Hodi halo nuneʼe, ita hatudu katak ita hadomi sira. Se ita koʼalia ho laran-diʼak no anima sira, neʼe sei hametin sira.

¹⁶ Paulo fó-hanoin irmaun-irmán sira  katak Jeová haree sira-nia hahalok diʼak. (Ebr 10:32-34) Ita mós bele halo nuneʼe bainhira ita ajuda irmaun-irmán sira neʼebé fiar fraku. Karik ita bele husu sira kona-ba oinsá sira hetan lia-loos ka anima sira atu hanoin kona-ba tempu neʼebé Jeová ajuda sira. Ita bele uza oportunidade neʼe atu ajuda sira fiar metin katak Jeová la haluha sira-nia domin neʼebé uluk sira hatudu ba nia no mós Jeová sei nunka husik hela sira iha futuru. (Ebr 6:10; 13:5, 6) Karik ida-neʼe bele book irmaun-irmán sira-neʼe atu hakarak kontinua serbí Jeová.

17. Ita hakarak aumenta ita-nia matenek kona-ba saida?

¹⁷ Badaen ida bele sai matenek liután atu halo ninia serbisu, nuneʼe mós ita bele sai matenek liután atu hametin malu. Ita bele ajuda irmaun-irmán sira atu hetan forsa hodi tahan susar liuhusi konta esperiénsia kona-ba fiar-naʼin sira neʼebé konsege tahan susar. Ita bele haburas dame liuhusi koʼalia kona-ba irmaun-irmán sira-nia hahalok diʼak, mantein dame bainhira mosu problema, no buka dame bainhira iha ideia la hanesan. No ita bele kontinua hametin irmaun-irmán sira-nia fiar liuhusi fahe lia-loos importante husi Bíblia, fó ajuda neʼebé sira presiza, no apoia sira neʼebé fraku iha dalan espirituál.

18. Saida mak Ita hakarak halo?

¹⁸ Irmaun-irmán sira neʼebé harii fatin adorasaun sente kontente. Ita bele sente kontente bainhira ita ajuda hametin irmaun-irmán sira-nia fiar. Uma neʼebé ema harii bele sai aat, maibé ita-nia hakaʼas an atu hametin irmaun-irmán sira bele lori rezultadu diʼak neʼebé ba nafatin. Mai ita hakaʼas an atu “kontinua fó aten-brani ba malu no hametin malu”.​—1 Tes 5:11.