Ba ema Kristaun iha Tesalónika, apóstolu Paulo hakerek: “Se ema ida lakohi halo tuir ami-nia liafuan liuhusi karta neʼe, tau marka ba ema neʼe.” (2 Tes 3:14) Uluk, ita komprende katak neʼe mak matadalan ba katuas sira. Se ema ruma iha kongregasaun kontinua kontra Bíblia nia matadalan maski hetan beibeik konsellu, katuas sira presiza hatoʼo diskursu atu fó avizu ba kongregasaun. Tuirmai, haklaken-naʼin sira sei la ransu ho ema neʼe.

Maibé agora presiza halo mudansa. Paulo nia konsellu neʼe refere ba desizaun neʼebé ema Kristaun ida-idak mak sei halo iha situasaun balu. Tan neʼe, katuas sira la presiza hatoʼo diskursu atu fó avizu. Tanbasá iha mudansa? Haree toʼok Paulo nia konsellu tuir kontestu.

Paulo nota katak ema balu iha kongregasaun “la laʼo tuir dalan neʼebé loos”. Paulo fó ona konsellu husi Eskritura ba sira, maibé sira la halo tuir. Iha ninia vizita antes neʼe nia hatete: “Se ema ida lakohi serbisu, keta fó hahán ba nia atu han.” Maibé ema balu lakohi serbisu atu tau matan ba sira-nia an maski loloos bele. Sira mós mete iha ema seluk nia problema. Ema Kristaun seluk iha kongregasaun presiza halo saida?—2 Tes 3:​6, 10-12.

Paulo hatete: “Tau marka ba ema neʼe.” Iha liafuan Gregu, neʼe fó ideia katak tau atensaun didiʼak hodi la hetan influénsia husi ema neʼe. Paulo fó konsellu neʼe ba kongregasaun tomak, laʼós ba katuas deʼit. (2 Tes 1:1; 3:6) Tan neʼe, kuandu ema Kristaun ida-idak nota katak ninia maluk ida lakohi halo tuir konsellu husi Bíblia, nia mak sei deside atu ‘la ransu tan’ ho ema neʼe.

Neʼe katak ema neʼe mak hanesan deʼit ho ema neʼebé kongregasaun hasai ka lae? Lae, tanba Paulo hatete: “Kontinua fó konsellu ba nia nuʼudar maun-alin ida.” Entaun, ema Kristaun sira sei ransu ho ema neʼe bainhira nia tuir reuniaun no haklaken, maibé sira hili atu la ransu ho ema neʼe liuhusi han hamutuk ka halimar hamutuk. Tanbasá? Paulo dehan: “Atu nuneʼe nia sai moe.” Bainhira la ransu ho ema neʼe, karik nia sei sente moe kona-ba buat neʼebé nia halo daudaun no ikusmai troka ninia hahalok.—2 Tes 3:​14, 15.

Oinsá mak ema Kristaun ohin loron bele aplika konsellu neʼe? Primeiru, ita presiza hatene ho loloos se ema neʼe nia hahalok mak liga ho Paulo nia liafuan “la laʼo tuir dalan neʼebé loos” ka lae. Paulo la koʼalia kona-ba ema neʼebé halo desizaun la hanesan ho ita tanba ninia konxiénsia. Nia mós la koʼalia kona-ba ema neʼebé hakanek ita-nia laran. Tuir loloos, Paulo koʼalia kona-ba ema neʼebé hetan ona konsellu neʼebé bazeia ba Bíblia maibé nafatin lakohi halo tuir.

Ohin loron, se ita nota katak maluk Kristaun ida ulun-toos hodi kontinua kontra Bíblia nia konsellu, a ita sei deside rasik atu la han hamutuk ka halo atividade halimar nian hamutuk ho ema neʼe. Neʼe mak desizaun pesoál, tan neʼe ita labele koʼalia kona-ba neʼe ba ema seluk, só deʼit ba ita-nia família neʼebé hela hamutuk. Maibé ita sei kontinua ransu ho nia iha reuniaun ka haklaken. Ikusmai kuandu ema neʼe hadiʼa ninia hahalok, ita bele ransu fali hanesan baibain.