1. Jeová nia povu hatudu hahalok diʼak saida deʼit?

TEMPU kleur liubá, Bíblia fó sai nanis katak Maromak nia povu sei “fó sira-nia an ho hakarak rasik” atu serbí Jeová no halo tuir Jesus nia matadalan. (Sal 110:3) Profesia neʼe sai loos ohin loron. Tinan-tinan, Jeová nia atan sira neʼebé badinas uza oras millaun ba millaun atu haklaken. Sira la simu osan, maibé halo serbisu neʼe ho hakarak rasik. Sira mós uza tempu atu apoia maluk Kristaun sira iha dalan fíziku, emosaun no espirituál. Katuas no atan ba kongregasaun uza oras barak atu prepara sira-nia parte ba reuniaun no mós atu tau matan ba bibi sira iha kongregasaun. Saida mak book Jeová nia povu atu halo buat sira-neʼe? Domin ba Jeová no domin ba ema seluk.​—Mt 22:37-39.

2. Tuir Roma 15:1-3, Jesus hatudu ezemplu saida mai ita?

² Jesus hatudu ezemplu diʼak kona-ba tau uluk ema seluk nia presiza duké ninia presiza rasik. No ita hotu hakaʼas an atu laʼo tuir ninia ain-fatin. (Lee Roma 15:1-3.) Bainhira ita banati-tuir nia, ita sei hetan benefísiu oioin. Jesus hatete: “Kontente liu atu fó duké simu.”​—Após 20:35.

3. Iha lisaun neʼe, ita sei aprende saida?

³ Iha lisaun neʼe, ita sei aprende kona-ba sakrifísiu balu neʼebé Jesus halo atu bele ajuda ema seluk no oinsá ita bele banati-tuir ninia ezemplu. Ita mós sei aprende oinsá ita bele sai prontu liután atu ajuda ema seluk.

4. Oinsá Jesus tau uluk ema seluk nia presiza duké ninia presiza rasik?

⁴ Jesus ajuda ema seluk maski sente kole. Hanoin toʼok kona-ba buat neʼebé Jesus halo bainhira ema-lubun boot bá hasoru nia iha foho, karik besik Kafarnaum. Antes neʼe, Jesus gasta kalan tomak atu halo orasaun. Karik nia sente kole tebes, maibé kuandu nia haree ema-lubun, nia hanoin tebes ema kiak no ema moras. Jesus kura sira no mós hatoʼo diskursu ida neʼebé anima tebes ema hotu. Neʼe mak diskursu iha foho.​—Lc 6:12-20.

5. Oinsá ulun ba família banati-tuir Jesus no hatudu domin maski sira sente kole?

⁵ Oinsá ulun ba família banati-tuir Jesus. Imajina toʼok situasaun neʼe: Aman ida serbisu makaʼas durante loron tomak no tuirmai nia fila ba uma no sente kole tebes. Nia hanoin atu la halo Adorasaun Família neʼebé sira planu ona atu halo iha kalan neʼe, maibé nia halo orasaun hodi husu Jeová fó kbiit ba nia atu bele dirije adorasaun. Jeová hatán ninia orasaun, no nia dirije adorasaun hanesan nia halo semana-semana. Ninia oan sira aprende lisaun importante katak adorasaun ba Jeová mak importante liu ba sira-nia inan-aman.

6. Fó toʼok ezemplu ida kona-ba oinsá Jesus uza ninia tempu atu ajuda ema seluk.

⁶ Jesus uza tempu ho ema seluk maski nia hakarak gasta tempu mesak. Imajina toʼok Jesus nia sentimentu bainhira rona katak ema oho ninia belun João Batista. Jesus sente triste tebes. Bíblia hatete: “Rona tiha [katak João mate ona], Jesus husik fatin neʼe no saʼe ró hodi bá fatin neʼebé ema la iha atu mesamesak.” (Mt 14:10-13) Ita bele komprende tanbasá nia hakarak mesamesak. Ema barak hakarak mesamesak bainhira sente triste tanba ema neʼebé sira hadomi mate. Maibé Jesus la konsege gasta tempu mesak. Ema-lubun boot toʼo uluk fatin neʼebé nia atu bá. Jesus halo saida? Nia hanoin kona-ba saida mak ema-lubun neʼe presiza no “nia hanoin tebes sira”. Jesus rekoñese katak sira presiza hetan ajuda no kmaan husi Maromak, tan neʼe nia ajuda kedas sira.  Tuir loloos, “nia hahú hanorin sira buat barak”.​—Mc 6:31-34; Lc 9:10, 11.

7-8. Fó toʼok ezemplu ida kona-ba oinsá katuas sira banati-tuir Jesus bainhira maluk Kristaun presiza ajuda.

⁷ Oinsá katuas sira banati-tuir Jesus. Ita hafolin serbisu hotu neʼebé katuas sira halo atu ajuda ita. Irmaun-irmán barak la hatene kona-ba serbisu hotu neʼebé katuas sira halo. Porezemplu, kuandu mosu emerjénsia médiku, membru sira husi Komisaun neʼebé Komunika ho Ospitál sei ajuda lalais irmaun-irmán sira. Dala barak emerjénsia hanesan neʼe mosu iha kalan-boot. Maibé tanba katuas sira hanoin tebes irmaun-irmán sira neʼebé hasoru susar, katuas sira-neʼe no sira-nia família tau uluk maluk fiar-naʼin sira-nia presiza duké sira-nia presiza rasik.

⁸ Katuas sira mós ajuda atu harii Reuniaun-Fatin sira no fatin seluk no mós ajuda bainhira dezastre mosu. Sira mós uza tempu barak atu hanorin, anima no apoia ita. Irmaun sira-neʼe no mós sira-nia família merese simu ita-nia gaba. Jeová sei haraik bensaun ba sira. Maibé hanesan ho ema seluk, katuas sira mós presiza tetu didiʼak dalan neʼebé sira uza sira-nia tempu. Sira labele gasta tempu barak liu atu halo serbisu ba kongregasaun no ikusmai la iha tempu atu tau matan ba sira-nia família nia presiza.

9. Tuir Filipe 2:4, 5, ema Kristaun hotu presiza haburas hahalok saida?

⁹ Lee Filipe 2:4, 5. Maski ita hotu laʼós katuas kongregasaun, maibé ita  hotu bele aprende atu banati-tuir Jesus no tau uluk ema seluk nia presiza duké ita-nia presiza rasik. Bíblia hatete katak Jesus “sai hanesan atan ida”. (Flp 2:7) Saida mak ita bele aprende husi versíkulu neʼe? Patraun sei hafolin ninia atan neʼebé buka oportunidade oioin atu halo kontente nia. Tanba ita mak Jeová nia atan no ita serbí irmaun-irmán sira, ita hakarak Jeová uza liután ita no ita mós hakarak atu ajuda irmaun-irmán sira. Sujestaun sira tuirmai bele ajuda ita.

10. Ita bele husu pergunta saida deʼit ba ita-nia an?

¹⁰ Analiza Ita-nia hahalok. Husu ba Ita-nia an: ‘Haʼu prontu atu uza haʼu-nia tempu no enerjia atu ajuda ema seluk ka lae? Porezemplu, haʼu sei halo saida se ema ruma husu haʼu atu vizita irmaun neʼebé idade, ka atu tula irmán neʼebé idade ba reuniaun sira? Haʼu prontu atu ajuda hamoos fatin ba reuniaun boot ka tau matan ba Reuniaun-Fatin ka lae?’ Bainhira ita dedika an ba Jeová, ita promete atu uza buat hotu neʼebé ita iha atu serbí nia. Jeová hakarak ita atu uza ita-nia tempu, enerjia, sasán no osan atu ajuda ema seluk. Bainhira ita tau uluk ema seluk nia presiza duké ita-nia presiza, neʼe halo Jeová kontente. Saida mak ita bele halo se ita nota katak ita presiza halo mudansa?

11. Oinsá orasaun bele ajuda ita sai prontu atu ajuda ema seluk?

¹¹ Halo orasaun ba Jeová ho laran. Karik Ita rekoñese katak Ita presiza halo mudansa ba Ita-nia hahalok, maibé Ita la iha motivasaun. Se nuneʼe, halo orasaun ba Jeová ho laran. Koʼalia nakloke ba nia. Fó sai Ita-nia sentimentu ba nia no husu nia atu fó ba Ita “hakarak no kbiit atu halo” mudansa.​—Flp 2:13.

12. Oinsá irmaun joven neʼebé batizmu ona bele ajuda kongregasaun?

¹² Se Ita mak irmaun joven neʼebé batizmu ona, husu Jeová atu ajuda Ita haburas hakarak atu simu knaar ruma iha kongregasaun. Iha nasaun balu, iha katuas kongregasaun barak liu fali atan ba kongregasaun, no maioria atan sira-neʼe laʼós irmaun neʼebé joven. Maromak nia organizasaun kontinua sai boot liután, no presiza tebes irmaun joven sira atu ajuda katuas kongregasaun tau matan Jeová nia povu. Se Ita prontu atu serbí iha dalan naran deʼit, Ita sei kontente. Tanbasá? Tanba Ita sei halo Jeová kontente, Ita sei hetan naran diʼak no mós bainhira Ita ajuda ema seluk, neʼe lori kontente mai Ita.

13-14. Oinsá ita bele ajuda ita-nia irmaun-irmán sira? (Haree dezeñu iha livru oin.)

¹³ Matan-moris kona-ba ema seluk nia presiza. Apóstolu Paulo hatete ba ema Kristaun neʼebé hela iha Judeia: “Keta haluha atu halo hahalok diʼak no fahe buat neʼebé imi iha ba ema seluk, tanba buat sira-neʼe hanesan sakrifísiu neʼebé halo Maromak kontente.” (Ebr 13:16) Konsellu neʼe diʼak tebes. Lakleur depois simu tiha karta neʼe, ema Kristaun iha Judeia tenke husik hela sira-nia uma, negósiu no família neʼebé laʼós ema Kristaun no sira tenke “halai ba foho”. (Mt 24:16) Iha tempu neʼebá, karik sira presiza tebes atu ajuda malu. Ema Kristaun neʼebé halo tuir ona Paulo nia konsellu kona-ba fahe ba malu buat neʼebé sira iha, karik sira sente fasil liu atu halaʼo moris neʼebé simples iha sira-nia hela-fatin foun.

¹⁴ Dala ruma irmaun-irmán sira la fó-hatene ita kona-ba buat neʼebé sira  presiza. Porezemplu, karik irmaun ida nia feen mate. Irmaun neʼe presiza ita-nia ajuda atu prepara hahán, halo serbisu uma-laran nian, ka tula nia ba fatin ruma ka lae? Karik nia sei la husu ajuda tanba nia lakohi halo ita okupadu. Maibé karik nia sei agradese tebes se ita ajuda maski nia la husu. Ita labele hanoin katak ema seluk sei ajuda nia ka hanoin katak se nia presiza ajuda nia sei husu. Husu ba Ita-nia an: ‘Se haʼu mak iha ninia situasaun, haʼu hakarak ema ajuda haʼu iha dalan oinsá?’

15. Ita presiza halo saida se ita hakarak ajuda ema seluk?

¹⁵ Halo fasil ba ema atu hakbesik Ita. Karik Ita koñese irmaun-irmán sira neʼebé sempre prontu atu ajuda ema seluk. Sira nunka halo Ita sente la diʼak bainhira Ita husu ajuda. Ita hatene katak sira sempre prontu atu ajuda. Ita hakarak tebes banati-tuir sira. Katuas kongregasaun naran Alan neʼebé tinan 45 hakarak ema seluk sente fasil atu hakbesik ba nia. Alan hanoin kona-ba Jesus nia ezemplu no hatete: “Jesus okupadu, maibé ema ho idade oioin kontente atu hakbesik ba nia no la sente taʼuk atu husu ajuda. Sira hatene katak Jesus hanoin tebes sira. Haʼu hakarak tebes atu banati-tuir Jesus. Haʼu hakarak ema koñese haʼu nuʼudar ema neʼebé fasil atu hakbesik, laran-diʼak no hanoin ema.”

16. Oinsá aplika Salmo 119:59, 60 bele ajuda ita banati-tuir Jesus ho diʼak liután?

¹⁶ Keta sai laran-kraik se ita la banati-tuir Jesus ho perfeitu. (Tgo 3:2) Estudante neʼebé aprende atu pinta dezeñu labele pinta tuir ho perfeitu ninia mestre nia dezeñu. Maibé estudante neʼe aprende husi ninia sala no hakaʼas an  atu banati-tuir ninia mestre ho didiʼak, no estudante neʼe nia matenek atu pinta kontinua aumenta. Nuneʼe mós ho ita, se ita aplika buat neʼebé ita aprende kuandu estuda Bíblia mesak no hakaʼas an atu hadiʼa ita-nia fraku sira, ita bele banati-tuir Jesus ho diʼak liután.​—Lee Salmo 119:59, 60.

17-18. Bainhira ita banati-tuir Jesus, ita sei hetan benefísiu saida deʼit?

¹⁷ Bainhira ita prontu atu ajuda ema seluk, neʼe mós bele book ema seluk atu halo nuneʼe. Katuas kongregasaun ida naran Tim hatete: “Irmaun joven balu iha ami-nia kongregasaun laʼo ba oin no simu knaar atu serbí nuʼudar atan ba kongregasaun. Razaun ida tanbasá sira halo nuneʼe mak tanba sira haree irmaun-irmán seluk neʼebé prontu atu ajuda ema seluk, no sira hakarak banati-tuir. Irmaun joven sira-neʼe ajuda ami-nia kongregasaun no mós ajuda katuas sira.”

¹⁸ Ema barak ohin loron hanoin an deʼit. Maibé Jeová nia povu la hanesan neʼe. Jesus nia ezemplu kona-ba tau uluk ema seluk nia presiza duké ninia presiza book ita-nia laran no ita hakaʼas an atu banati-tuir ninia ezemplu. Maski ita labele banati-tuir ninia ezemplu ho perfeitu, maibé ita bele “laʼo tuir ninia ain-fatin ho didiʼak”. (1 Ped 2:21) Bainhira ita hakaʼas an atu banati-tuir Jesus nia ezemplu, ita mós sei sente kontente tanba ita halo Jeová kontente.