EMA barak ohin loron hanoin katak sira iha direitu atu ema seluk trata sira iha dalan neʼebé espesiál. Maski sira iha ona buat barak, maibé sira hanoin katak sira merese simu barak liután. Ema hanesan neʼe mak ema neʼebé hanoin an deʼit no la hatene fó agradese. Neʼe mak sinál ba loron ikus sira.—2 Tim 3:2.

Klaru, hahalok hanoin an laʼós buat foun. Adão ho Eva hakarak deside rasik kona-ba buat neʼebé loos no sala, no neʼe lori konsekuénsia neʼebé aat. Liurai Uzias husi nasaun Judá hanoin katak nia iha direitu atu sunu insensu iha templu, maibé hanoin neʼe mak sala. (2 Krón 26:​18, 19) Nuneʼe mós ho ema Farizeu no Saduseu. Sira fiar katak sira merese simu domin espesiál husi Maromak tan deʼit sira mak Abraão nia bei-oan.—Mt 3:9.

Ema barak ohin loron hanoin an deʼit, no neʼe bele kona ita. (Gal 5:26) Karik ita komesa hanoin katak ita merese simu pozisaun espesiál ruma, ka ema seluk tenke trata ita iha dalan espesiál. Saida mak bele ajuda ita atu la hanoin hanesan neʼe? Ulukliu, ita presiza komprende Jeová nia hanoin. Prinsípiu rua husi Bíblia bele ajuda ita.

Jeová mak deside kona-ba buat neʼebé ita merese simu. Haree toʼok ezemplu balu.

•   Iha arranju família nian, laʼen presiza simu respeitu husi feen, no feen presiza simu domin husi laʼen. (Éf 5:33) Jeová hakarak kaben-naʼin sira atu hatudu domin romántiku ba malu, laʼós ba ema seluk. (1 Kor 7:3) Inan-aman merese simu respeitu husi sira-nia oan, no oan sira mós iha direitu atu simu domin no apoiu husi inan-aman.—2 Kor 12:14; Éf 6:2.

• Katuas kongregasaun merese simu respeitu husi ita. (1 Tes 5:12) Maibé sira la iha direitu atu domina ema seluk.—1 Ped 5:​2, 3.

• Maromak fó direitu ba governu sira atu husu povu selu impostu no hamtaʼuk sira.—Rom 13:​1, 6, 7.

Ho domin Jeová fó ita barak liu fali buat neʼebé ita merese simu. Nuʼudar sala-naʼin, ita merese mate. (Rom 6:23) Maibé, Jeová fó ita bensaun barak liuhusi ninia domin neʼebé laran-metin. (Sal 103:​10, 11) Bensaun sira-neʼe hotu mak prezente tanba Jeová nia laran-diʼak neʼebé ita la merese simu.—Rom 12:​6-8; Éf 2:8.

Keta husik mundu fó influénsia ba Ita. Dala ruma, ita komesa hanoin katak ita merese simu buat barak liu fali ema seluk. Jesus konta ai-knanoik ida neʼebé hatudu katak fasil tebes ba ita atu iha hanoin hanesan neʼe. Nia koʼalia kona-ba ema balu neʼebé konkorda atu serbisu ba loron tomak iha toʼos no simu denáriu ida. Sira serbisu husi dadeer toʼo lokraik no iha loron manas laran. Maibé kuandu sira haree ema neʼebé serbisu ba oras ida deʼit mós simu denáriu ida, sira hanoin katak sira merese simu osan barak liu. (Mt 20:​1-16) Liuhusi ai-knanoik neʼe, Jesus hanorin katak importante atu kontente ho buat neʼebé ita simu husi Maromak.

Hatudu agradese, no keta hanoin katak Ita merese simu buat ruma. (1 Tes 5:18) Banati-tuir apóstolu Paulo nia ezemplu. Nia la husu maluk sira iha Korinto atu sustenta ninia moris maski nia iha direitu atu husu. (1 Kor 9:​11-14) Ita presiza hatudu  agradese ba buat hotu neʼebé ita simu no labele hanoin katak ita merese simu buat ruma husi ema seluk.

Haburas haraik an. Kuandu ema ida hanoin an demais, baibain nia komesa sente katak nia merese simu barak liu fali buat neʼebé nia iha. Se ita mak haraik an, ita sei la hanoin hanesan neʼe.

Profeta Daniel mak ezemplu diʼak. Nia mai husi família neʼebé importante. Nia mós bonitu, matenek, no iha abilidade oioin. Neʼe bele halo nia sente katak nia merese atu ema trata nia iha dalan neʼebé diʼak. (Dan 1:​3, 4, 19, 20) Maski nuneʼe Daniel nafatin haraik an, tan neʼe Jeová hafolin tebes nia.—Dan 2:30; 10:​11, 12.

Tan neʼe, mai ita hakaʼas an atu la hanoin an deʼit hanesan ema barak ohin loron, maibé kontinua haksolok ho bensaun neʼebé Jeová fó mai ita tanba ninia laran-diʼak neʼebé ita la merese simu.