LISAUN ESTUDU 8
KNANANUK 130 Prontu fó perdua
Oinsá atu banati-tuir Jeová hodi fó perdua?
“Hanesan Jeová prontu atu fó perdua ba imi ho laran tomak, imi mós tenke halo nuneʼe.”—KOL 3:13.
OBJETIVU
Iha lisaun neʼe ita sei aprende kona-ba hakat sira neʼebé ita bele halo atu fó perdua ba ema neʼebé hakanek ita-nia laran.
1-2. (a) Karik iha situasaun saida mak ita sente susar atu fó perdua? (b) Oinsá mak Denise hatudu katak nia fó perdua?
ITA sente susar atu fó perdua ka lae? Ita barak sente susar, liuliu bainhira ema ida hatete ka halo buat ruma neʼebé hakanek ita-nia laran. Maski nuneʼe, ita bele manán ita-nia sentimentu neʼe no fó perdua. Porezemplu, hanoin toʼok kona-ba irmán ida naran Denise. a Nia fó perdua iha dalan neʼebé boot tebes. Iha tinan 2017, Denise no ninia família vizita Sede-Jerál husi Testemuña ba Jeová neʼebé foin loke. Kuandu iha dalan atu fila ba uma, mane ida lori karreta no xoke sira-nia karreta. Denise dezmaia iha asidente neʼe. Kuandu nia hadeer, nia haree katak ninia oan hetan kanek todan no ninia laʼen Brian mate. Kona-ba akontesimentu neʼe, Denise hatete: “Haʼu-nia fuan rahun, no haʼu konfuzaun.” Tuirmai nia komprende katak neʼe mak dezastre deʼit, tanba mane neʼe la lanu ka halimar telefone. Tan neʼe nia halo orasaun ba Jeová atu husu dame.
2 Polísia kaer mane neʼe no halo julgamentu. Se tribunál deside katak mane neʼe sala, nia sei tama komarka. Ema ida husi tribunál hatete ba Denise katak buat neʼebé nia fó sai sei lori impaktu boot ba juís nia desizaun. Denise hatete: “Atu hamriik iha tribunál no konta fali buat neʼebé akontese mak hanesan ema ida kore haʼu-nia kanek no fakar masin galon ida ba kanek neʼe.” Semana balu liu tiha, Denise tuur iha tribunál no prontu atu fó sai buat neʼebé mane neʼe halo neʼebé lori susar ba ninia família. Denise hatete saida? Nia husu ba juís atu hatudu laran-sadiʼa ba mane neʼe. b Bainhira nia koʼalia hotu tiha, juís neʼe tanis. Juís neʼe hatete: “Durante tinan 25, haʼu nunka rona ida-neʼe iha tribunál. Haʼu nunka rona vítima nia família husu atu hatudu laran-sadiʼa ba ema neʼebé halo sala. Haʼu nunka rona liafuan domin no fó perdua.”
3. Saida mak ajuda Denise atu fó perdua?
3 Saida mak ajuda Denise atu fó perdua? Nia hanoin kleʼan kona-ba oinsá Jeová fó perdua. (Miq 7:18) Bainhira ita hafolin dalan neʼebé Jeová perdua ona ita, neʼe sei book ita atu fó perdua mós ba ema seluk.
4. Jeová hakarak ita atu halo saida? (Éfeso 4:32)
4 Jeová hakarak ita atu perdua ema seluk ho laran hanesan nia perdua ona ita. (Lee Éfeso 4:32.) Nia hakarak ita atu prontu fó perdua ba ema neʼebé hakanek ita. (Sal 86:5; Lc 17:4) Iha lisaun neʼe, ita sei aprende buat tolu neʼebé bele ajuda ita atu fó perdua liután.
LABELE IGNORA ITA-NIA SENTIMENTU
5. Tuir Provérbios 12:18, karik ita sei sente oinsá bainhira ema ida hakanek ita?
5 Dala ruma ema ida nia liafuan no hahalok bele hakanek duni ita-nia laran, liuliu se neʼe mak ita-nia belun ka família ida. (Sal 55:12-14) Iha situasaun hanesan neʼe, ita bele sente hanesan ema sona ita. (Lee Provérbios 12:18.) Karik ita koko atu ignora ita-nia sentimentu. Maibé se ita halo nuneʼe, neʼe hanesan ita hetan tiha sona ho tudik, no husik tudik neʼe nafatin belit iha ita-nia isin. Nuneʼe mós, ita-nia sentimentu sei la sai diʼak se ita ignora deʼit ida-neʼe.
6. Bainhira ema ida hakanek ita, karik ita-nia reasaun mak saida?
6 Bainhira ema ida hakanek ita, karik ita-nia reasaun primeiru mak hirus. No Bíblia mós rekoñese ida-neʼe. Maski nuneʼe, Bíblia fó ita avizu atu la husik sentimentu neʼe domina ita. (Sal 4:4; Éf 4:26) Tanbasá? Tanba baibain ita-nia emosaun bele book ita atu halo asaun. No sentimentu hirus la lori rezultadu neʼebé diʼak. (Tgo 1:20) Hanoin-hetan, sai hirus mak reasaun, maibé nafatin hirus mak desizaun.
Sai hirus mak reasaun, maibé nafatin hirus mak desizaun
7. Karik saida mak ita sei sente bainhira ema hakanek ita-nia laran?
7 Bainhira ema ida trata aat ita, karik neʼe sei hakanek tebes ita-nia laran. Porezemplu, irmán ida naran Ann hatete: “Bainhira haʼu kiʼik, haʼu-nia apá soe haʼu-nia amá no kaben fali ho feto neʼebé tau matan haʼu. Haʼu sente apá abandona tiha haʼu. Kuandu sira iha oan, haʼu sente apá la hadomi ona haʼu. Haʼu sai boot ho sentimentu katak ema la presiza haʼu.” Irmán ida naran Georgette fó sai kona-ba ninia sentimentu bainhira ninia laʼen halo sala seksuál: “Haʼu-nia fuan rahun. Ami sai belun husi kiʼik kedas. Ami serbí hamutuk nuʼudar pioneiru!” Irmán ida naran Naomi hatete: “Haʼu nunka imajina katak haʼu-nia laʼen sei hakanek haʼu-nia laran. Bainhira nia hatete katak nia haree pornografia, haʼu sente duni katak nia la laran-metin mai haʼu.”
8. (a) Saida mak razaun balu tanbasá ita presiza fó perdua? (b) Benefísiu saida mak ita hetan kuandu ita fó perdua? (Haree kaixa “ Oinsá se ema ida halo buat ruma neʼebé lori trauma ba ita?”)
8 Ita labele kontrola saida mak ema seluk hatete ka halo mai ita, maibé ita bele koko atu kontrola buat neʼebé ita halo. No baibain buat diʼak liu neʼebé ita bele halo mak fó perdua. Tanbasá? Tanba ita hadomi Jeová, no nia hakarak ita atu fó perdua. Se ita nafatin hirus no la fó perdua, karik ita sei halo hahalok neʼebé la diʼak no karik bele hasoru problema saúde. (Prov 14:17, 29, 30) Haree toʼok ezemplu husi irmán Christine. Nia hatete: “Bainhira haʼu sai hirus ka laran-kanek, susar ba haʼu atu hatudu oin-midar. Neʼe halo haʼu hakarak atu han hahán neʼebé la saudavel. Haʼu mós labele toba diʼak iha kalan, no neʼe halo susar liután mai haʼu atu kontrola haʼu-nia emosaun, no tuirmai neʼe kona haʼu-nia moris kaben nian no haʼu-nia relasaun ho ema seluk.”
9. Tanbasá ita presiza husik tiha sentimentu hirus?
9 Maski ema neʼebé hakanek ita nunka husu deskulpa, ita bele hamenus ita-nia sentimentu laran-kanek. Oinsá? Georgette neʼebé temi ona hatete: “Neʼe presiza tempu. Maibé haʼu la hirus tan ba mane neʼebé uluk sai haʼu-nia laʼen. No rezultadu mak haʼu sente dame iha laran.” Bainhira ita la rai hirus, neʼe sei ajuda ita atu la trata ema seluk tuir deʼit ita-nia sentimentu. Ita mós bele lori buat diʼak ba ita-nia an rasik, neʼe mak la hanoin tan kona-ba problema neʼe no sente kontente fali. (Prov 11:17) Maibé saida mak ita presiza halo se ita nafatin sente susar atu fó perdua?
MANÁN HASORU ITA-NIA SENTIMENTU
10. Tanbasá ita presiza tempu atu bele sai diʼak iha dalan emosaun? (Haree mós dezeñu.)
10 Oinsá ita bele manán hasoru sentimentu laran-kanek? Dalan ida mak fó tempu ba ita-nia an atu sente diʼak fali. Bainhira ema ida simu tiha tratamentu médiku kona-ba kanek neʼebé boot, ema neʼe presiza tempu balu atu ninia kanek sai diʼak fali. Nuneʼe mós, karik ita mós presiza tempu atu bele sai diʼak iha dalan emosaun antes ita prontu atu fó perdua ba ema seluk.—Ecle 3:3; 1 Ped 1:22.
Hanesan isin neʼebé kanek presiza tempu atu bele sai diʼak, nuneʼe mós ho sentimentu neʼebé kanek (Haree parágrafu 10)
11. Oinsá mak orasaun bele ajuda Ita atu fó perdua?
11 Halo orasaun no husu Jeová ajuda Ita atu bele perdua ema seluk. c Irmán Ann neʼebé temi ona esplika kona-ba oinsá orasaun ajuda nia. Nia hatete: “Haʼu husu Jeová atu fó perdua mai ami ida-idak iha família laran ba buat la diʼak neʼebé ami halo. Tuirmai haʼu hakerek karta ida ba apá no ninia feen-kiʼik no dehan katak haʼu perdua ona sira.” Ann hatete katak neʼe la fasil. Maibé nia dehan: “Haʼu espera katak hodi koko banati-tuir Jeová nia dalan atu fó perdua, neʼe bele book apá no ninia feen-kiʼik atu aprende kona-ba Jeová.”
12. Tanbasá mak ita presiza tau fiar ba Jeová laʼós ba ita-nia sentimentu? (Provérbios 3:5, 6)
12 Tau fiar ba Jeová, laʼós ba Ita-nia sentimentu. (Lee Provérbios 3:5, 6.) Jeová hatene saida mak diʼak liu mai ita. (Isa 55:8, 9) No nia sei nunka husu ita atu halo buat ruma neʼebé hakanek ita. Tan neʼe, bainhira nia anima ita atu fó perdua, ita bele fiar katak neʼe sei lori benefísiu mai ita. (Sal 40:4; Isa 48:17, 18) Maibé, se ita tau fiar ba ita-nia sentimentu, karik ita sei nunka bele atu fó perdua. (Prov 14:12; Jer 17:9) Naomi neʼebé temi ona hatete: “Foufoun, haʼu sente katak haʼu la presiza fó perdua ba haʼu-nia laʼen tanba nia haree pornografia. Haʼu taʼuk se nia hakanek tan haʼu, ka haluha katak nia hakanek tebes haʼu-nia laran. No haʼu fiar Jeová komprende haʼu-nia sentimentu. Maibé haʼu komesa rekoñese katak maski Jeová komprende haʼu-nia sentimentu, neʼe la dehan katak nia konkorda ho ida-neʼe. Nia hatene haʼu-nia sentimentu, no presiza tempu atu bele sai diʼak fali. Maibé nia mós hakarak haʼu atu fó perdua.” d
HABURAS SENTIMENTU POZITIVU
13. Tuir Roma 12:18-21, saida mak ita presiza halo?
13 Bainhira ita perdua ema neʼebé hakanek tebes ita, ita laʼós deʼit deside atu la koʼalia tan buat neʼebé akontese ona, maibé ita mós hakarak halo dame, liuliu se ema neʼe mak ita-nia irmaun ka irmán ida. (Mt 5:23, 24) Ita deside troka ita-nia sentimentu hirus ho laran-sadiʼa no fó perdua. (Lee Roma 12:18-21; 1 Ped 3:9) Saida mak bele ajuda ita atu halo nuneʼe?
14. Ita presiza hakaʼas an atu halo saida, no tanbasá?
14 Ita presiza hakaʼas an atu haree ema neʼebé hakanek ita tuir Jeová nia haree. Jeová hili atu haree buat neʼebé diʼak husi ema. (2 Krón 16:9; Sal 130:3) Baibain se ita koko atu buka ema nia sala, neʼe sei halo ita haree deʼit ba sira-nia sala. Maibé se ita buka ema nia hahalok diʼak, ita sei hetan ida-neʼe no neʼe sei halo fasil ba ita atu fó perdua. Porezemplu, irmaun ida naran Jarrod hatete: “Haʼu sente fasil liu atu perdua irmaun ida se haʼu fokus ba buat diʼak barak neʼebé haʼu gosta husi nia, duké fokus deʼit ba ninia sala.”
15. Tanbasá karik diʼak atu fó-hatene ema ruma katak ita perdua ona nia?
15 Buat importante ida tan neʼebé ita bele halo mak atu hatete ba ema neʼe katak ita perdua ona nia. Tanbasá? Haree toʼok saida mak Naomi neʼebé temi ona ohin hatete: “Haʼu-nia laʼen husu haʼu: ‘Ó perdua haʼu ka lae?’ Tempu neʼebá, susar ba haʼu atu hatete ba nia ‘haʼu perdua ona ó’. Haʼu rekoñese katak haʼu seidauk perdua nia. Maibé nuʼudar tempu liu daudaun, haʼu bele hatete ba nia liafuan tolu neʼebé iha kbiit, ‘haʼu perdua ó’. Haʼu la fiar katak neʼe sei halo ninia matan-been nakonu. Haʼu hakfodak tanba ikusmai nia bele sente kmaan no haʼu mós bele sente dame. Husi tempu neʼebá, haʼu haburas fali haʼu-nia fiar ba nia no ami bele sai besik fali.”
16. Saida mak Ita aprende ona kona-ba fó perdua?
16 Jeová hakarak ita atu fó perdua. (Kol 3:13) Maski nuneʼe, karik ita nafatin sente susar atu perdua ema seluk. Maibé ita bele fó perdua se ita la ignora ita-nia sentimentu no hakaʼas an atu manán hasoru ida-neʼe. Tuirmai ita bele iha sentimentu neʼebé pozitivu.—Haree kaixa “ Hakat tolu atu fó perdua”.
FOKUS BA BENEFÍSIU TANBA FÓ PERDUA
17. Fó perdua lori benefísiu saida mai ita?
17 Ita iha razaun barak atu fó perdua. Haree toʼok razaun balu. Primeiru, ita banati-tuir no halo kontente ita-nia Aman Jeová neʼebé laran-sadiʼa. (Lc 6:36) Segundu, ita hatudu agradese ba Jeová tanba perdua ita. (Mt 6:12) Terseiru, ita bele iha saúde diʼak no kontinua iha relasaun belun neʼebé metin.
18-19. Rezultadu saida mak ita bele hetan kuandu ita fó perdua?
18 Bainhira ita perdua ema seluk, karik ita bele hetan bensaun neʼebé ita la imajina. Porezemplu, haree toʼok saida mak akontese ba Denise neʼebé temi ona ohin. Iha tempu neʼebá, nia rasik la hatene katak loloos mane neʼebé hamosu asidente planu ona atu oho an kuandu hetan tiha julgamentu. Maibé tanba Denise perdua nia, neʼe book nia atu komesa estuda Bíblia ho Testemuña sira.
19 Karik ita sente katak fó perdua ba ema ida mak susar tebes atu halo, maibé hodi fó perdua mós karik bele lori benefísiu oioin. (Mt 5:7) Tan neʼe, ita hakarak halo buat neʼebé ita bele atu banati-tuir Jeová neʼebé fó perdua.
KNANANUK 125 Ksolok ba ema laran-sadiʼa
a Naran balu laʼós naran neʼebé loos.
b Iha situasaun hanesan neʼe, ema Kristaun ida-idak tenke halo desizaun kona-ba saida mak nia sei halo.
c Haree iha jw.org vídeo ba knananuk husi JW Broadcasting “Fó perdua ho laran”, no “Sai belun fali”.
d Maski haree pornografia mak sala no hakanek duni pár nia laran, maibé tuir Bíblia, neʼe laʼós razaun atu bele soe malu.
