Maria ho ninia laʼen João a hela iha nasaun ida neʼebé ema Filipino barak mai halo serbisu, no sira kontente atu haklaken ba ema Filipino sira. Durante pandemia COVID-19, Maria konsege hahú estudu Bíblia ho ema Filipino barak iha nasaun neʼebé nia hela bá no mós iha rai seluk. Oinsá?

Maria husu ba ninia estudante: “Ita hatene ema ruma neʼebé hakarak estuda Bíblia?” Se estudante hatán sin, nia sei husu atu fó koñese ema neʼe ba nia. Pergunta simples hanesan neʼe dala barak lori rezultadu diʼak. Tanbasá? Tanba ema neʼebé hafolin Maromak nia Liafuan baibain hakarak fahe buat neʼebé sira aprende ba família ka belun neʼebé sira hadomi. Entaun, pergunta neʼe lori rezultadu saida?

Estudante ida naran Jasmin fó koñese Maria ba ema naʼin-haat neʼebé hakarak estuda Bíblia. Sira ida mak Kristine. Nia gosta tebes estuda no husu Maria atu estuda semana ida dala rua. Bainhira Maria husu Kristine se nia hatene ema ruma neʼebé hakarak estuda Bíblia, Kristine hatete: “Sin, haʼu sei fó koñese Ita ba haʼu-nia kolega sira.” Lakleur, Kristine fó koñese ninia kolega naʼin-haat neʼebé hakarak estuda. Depois neʼe, Kristine mós ajuda Maria atu kontaktu kolega seluk tan, no Kristine nia kolega balu mós lori tan kolega seluk.

Kristine mós hakarak ninia família iha Filipinas atu aprende Bíblia. Tan neʼe, nia koʼalia ho ninia oan-feto Andrea. Foufoun, Andrea hanoin: ‘Testemuña mak relijiaun fanátiku. Sira la fiar Jesus no uza deʼit Testamentu Tuan.’ Maibé bainhira Andrea halo estudu ba dala primeiru, nia rekoñese kedas katak ninia hanoin mak sala. Durante estudu, nia hatete beibeik: “Se Bíblia hatete hanesan neʼe, tenkesér nuneʼe duni!”

Lakleur, Andrea fó koñese ninia belun naʼin-rua no kolega serbisu ida ba Maria, no sira mós hahú estuda. Bainhira Maria estuda ho Andrea liuhusi vídeo konferénsia, Andrea nia tia naran Angela mós rona hela. Angela mak defisiente matan, no durante neʼe Maria la hatene katak Angela mós rona hela bainhira sira estuda. Loron ida, Angela husu Andrea atu fó-hatene Maria katak nia hakarak estuda Bíblia. Angela gosta tebes buat neʼebé nia aprende. La toʼo fulan ida, nia dekór eskritura barak no hakarak estuda semana ida dala haat! Nia mós tuir reuniaun beibeik liuhusi vídeo konferénsia.

 Bainhira Maria estuda ho Kristine liuhusi vídeo konferénsia, nia nota katak Kristine nia laʼen Josué mós iha, tan neʼe nia konvida Josué atu estuda hamutuk. Josué hatete: “Haʼu sei rona deʼit, maibé labele husu pergunta mai haʼu. Se Ita husu, haʼu sei halai.” Maibé la toʼo minutu lima, Josué husu pergunta barak liu fali Kristine, no nia mós hakarak estuda.

Maria nia pergunta neʼebé simples loke dalan ba ema barak atu estuda Bíblia. Tanba nia iha estudante barak, nia halo arranju atu fahe estudante sira ba irmaun-irmán balu. Tanba pergunta simples ida, ikusmai ema naʼin-28 neʼebé hela iha nasaun haat mak komesa estuda Bíblia.

Jasmin neʼebé temi ona hetan batizmu iha Abríl 2021. Kristine hetan batizmu iha Maiu 2022 no fila ba Filipinas atu hamutuk fali ho família. Kristine nia kolega naʼin-rua mós hetan batizmu. Liutiha fulan balu, Angela mós hetan batizmu no agora serbí nuʼudar pioneiru regulár. Kristine nia laʼen Josué no sira-nia oan-feto Andrea, no estudante seluk tan mós laʼo ba oin daudaun.

Iha apóstolu sira-nia tempu, liafuan diʼak habelar lalais liuhusi família no belun sira. (João 1:​41, 42a; Após 10:​24, 27, 48; 16:​25-33) Karik Ita mós bele husu ba estudante Bíblia ka ema neʼebé hatudu interese ba lia-loos: “Ita hatene ema ruma neʼebé hakarak estuda Bíblia?” Se Ita husu pergunta simples hanesan neʼe, karik Ita mós sei hetan ema barak neʼebé hakarak estuda Bíblia.